شينحۋا اگەنتتىگىنىڭ 2 - ايدىڭ 14 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 2 - ايدىڭ 14 - كۇنى مەكسيكا قۇراما شتاتتارىنىڭ زۇڭتۇڭى لوپەزبەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن مەكسيكا ەكەۋى دە ۇزاق وركەنيەت تاريحى بار ەلدەر، ەكى ەل حالقىنىڭ دوستىق بارىس - كەلىسى ارىدان جالعاسىپ كەلەدى. ديپلوماتيالىق قارىم - قاتىناس ورناتقان جارتى عاسىردان بەرى، اسىرەسە، 2013 - جىلى ەكى ەل جاپپاي ستراتەگيالىق سەرىكتەستىك قارىم - قاتىناس ورناتقاننان بەرى، ەكى جاقتىڭ قارىم - قاتىناسىنىڭ دامۋى تەزدەي ءتۇستى. ەكى ەلدىڭ ساياسي جاقتاعى ءوزارا سەنىمدىلىگى كۇن سايىن تەرەڭدەپ، ءار سالاداعى دوستىق اۋىس - كۇيىس سەلبەستىگى كۇشەيدى. عاسىرلىق ىندەت الدىندا، جۇڭگو مەن مەكسيكا قيىندىقتى بىلەك بىرىكتىرە جەڭىپ، ءوزارا قارايلاسىپ، ىندەتكە ىنتىماقتاسا قارسى اتتانۋدىڭ حالىقارالىق ۇلگىسىن ورناتتى. جۇڭگو - مەكسيكا دوستىق اعاشىنىڭ جاپىراقتارى جايقالىپ، كەسەك تابىستارعا قول جەتكىزىپ، ەكى ەل حالقىنا ناقتى يگىلىك اكەلدى.
شي جينپيڭ بىلاي دەپ باسا دارىپتەدى: مەن جۇڭگو − مەكسيكا قارىم - قاتىناسىنىڭ دامۋىنا بارىنشا ءمان بەرەمىن، لوپەز زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن وراي ەتىپ، ءبىر جاعادان باس، ءبىر جەڭنەن قول شىعارىپ، الدىڭعىلاردىڭ ءىزىن باسىپ، بولاشاققا جول اشىپ، ءداستۇرلى دوستىقتى نىعايتىپ، ءوزارا پايدا جەتكىزەتىن سەلبەستىكتى تەرەڭدەتىپ، بىرگە دامۋدى جەبەپ، جۇڭگو مەن مەكسيكانىڭ جاپپاي ستراتەگيالىق سەرىكتەستىك قارىم - قاتىناسىنىڭ ءمانىن ۇزدىكسىز بايىتىپ، ەكى ەل حالقىنىڭ ماڭگى ءبىر - بىرىنە سەنەتىن جاقسى دوستار، گۇلدەنۋدەن بىرگە يگىلىكتەنەتىن جاقسى سەرىكتەر بولۋىنا مۇمكىندىك جاساۋدى قالايمىن.
لوپەز مىنالاردى ءبىلدىردى: 50 جىلدان بەرى مەكسيكا مەن جۇڭگو ەكى ەل مىزعىماس بەرىك دوستىقتى بىرگە سومداپ، ساياسي، ەكونوميكا، وقۋ - اعارتۋ سياقتى سالالارداعى اۋىس - كۇيىس پەن سەلبەستىكتى كەڭ كولەمدە ورىستەتتى، بۇل ەكى ەلدىڭ جاڭا تيپتى ايدارشا ۆيرۋس وكپە قابىنۋ ىندەتىنە ىنتىماقتاسا قارسى اتتانۋى بارىسىندا دا كورنەكتىلەندى. مەكسيكا جاق ىندەتكە قارسى اتتانۋ بارىسىندا جۇڭگو جاقتىڭ بىزگە ءوزارا قارايلاسقاندىعىنا العىس ايتادى ءارى ماڭگى ۇمىتپايدى. كەزەكتە مەكسيكا مەن جۇڭگونىڭ جاپپاي ستراتەگيالىق سەرىكتەستىك قارىم - قاتىناسى داۋىرمەن بىرگە ىلگەرىلەپ، كۇن سايىن بەكەمدەلىپ، ەكى ەل حالقىن ۇزدىكسىز باقىتقا كەنەلتۋدە. ەكى جاق وڭىرلىك جانە كوپ جاقتىلىق تۇرعىسىنان سىن - سايىستارعا قول ۇستاسا توتەپ بەردى. مەن مەكسيكا مەن جۇڭگو قارىم - قاتىناسىنىڭ، ءسوز جوق، ورنىقتى قاداممەن الىسقا جەتىپ، جاڭا ومىرشەڭدىك كۇش قاۋلاتاتىندىعىنا كامىل سەنەمىن.
