□ انار بۇلت / شينجياڭ گازەتىنىڭ ءتىلشىسى جاڭ شياۋمي
”بەيجيڭ قىسقى وليمپيادا سپورت جارىسى باستالعاننان بەرى كوپشىلىكتىڭ شاڭعى تەبۋ ىنتاسى بارىنشا ارتتى. 2 - ايدان بەرى شاڭعى الاڭىنا كەلگەن ساياحاتشىلار سايكەس مەزگىلدەگىدەن 4 − 5 ەسە ارتىپ، ەڭ كوپ بولعان كەزدە ساياحاتشى سانى كۇنىنە 6000 ادامعا تايادى“، - دەدى 2 - ايدىڭ 18 - كۇنى ءۇشتۇرپان اۋدانى چۋانيۇيشيڭكۇڭ حالىقارالىق شاڭعى الاڭى. ءتورت ماۋسىم ساياحات دەمالىس ورنىنىڭ جاۋاپتىسى دۋ جيا.
بەيجيڭ قىسقى وليمپيادا سپورت جارىسىنىڭ ىقپالىندا وڭتۇستىك شينجياڭنىڭ جەر - جەرى قار - مۇز ماۋسىمىنىڭ سوڭعى ءساتىن مىقتى يگەرىپ، باي مازمۇندى قار - مۇز سپورتى قيمىلىن ورىستەتىپ، ءتىپتى دە كوپ ادامدى قار - مۇز سپورتىنا ات سالىسۋعا باۋرادى، قار - مۇز سپورتى تۇرلەرىنىڭ اتاعى شىعىپ، قار - مۇز ساياحاتى قىزا ءتۇستى.
ونسۋ اۋدانى تيانشان توفىڭ شاڭعى الاڭىنىڭ باس ديرەكتورى جاڭ يان: ”كوكتەم مەرەكەسىنىڭ 15 - كۇنىنەن كەيىن شاڭعى الاڭى جابىلىپ، جۇمىسىن توقتاتاتىن. ال بيىل ساياحاتشىلار كوكتەم مەرەكەسىنىڭ الدىنداعىدان دا كوپ بولدى. جۇرت قار - مۇز ماۋسىمىنىڭ سوڭعى ساتىنەن پايدالانىپ، قىسقى وليمپيادانىڭ قىزىعىنا باتتى. وسى قار - مۇز ماۋسىمىندا 3 - ايدىڭ باسىنا دەيىن تيجارات جۇرگىزۋگە بولادى، ءبىز دە قيمىلدار ۇيىمداستىرىپ، ساياحاتشىلاردىڭ قار - مۇز سپورتىنا ات سالىسۋ ىنتاسىن قاۋلاتا تۇسەمىز“، - دەدى.
كەلپىن اۋدانى قىسىل تاۋى كورىنىس وڭىرىندەگى قىسىل شاڭعى الاڭى مەن سارى ورىك مەكەنى كورىنىس وڭىرىندەگى مۇز ايدىنى وسى قىستا جەرگىلىكتى ورىنداعى ەڭ تانىمالى جەرگە اينالدى، كەلپىن اۋداندىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ مۇشەسى، مادەني ەسكەرتكىش، ساياحات دامىتۋ كەڭسەسىنىڭ مەڭگەرۋشىسى چىن يۇڭبو: ”كەلپىن اۋدانىندا تۇڭعىش رەت شاڭعى الاڭى مەن مۇز ايدىنى بار بولدى، ءار ۇلت بۇقاراسى وليمپيادا ساڭلاقتارىنىڭ تارتىمدى جارىستارىن كورە وتىرىپ، قار - مۇز سپورتىنىڭ قىزىعىنا شومۋىنا بولاتىن بولدى“، - دەدى.
اقسۋ ايماعىندا 8 شاڭعى الاڭى بار. سانى جاعىنان بۇكىل شينجياڭ بويىنشا 3 - ورىندى، وڭتۇستىك شينجياڭ بويىنشا 1 - ورىندى يەلەيدى. قار - مۇز ماۋسىمىنىڭ سوڭعى مەزگىلىنە تاياپ قالسا دا، ساياحاتشىلار سانى ازايمادى، شاڭعى الاڭدارى جابال قىسقى وليمپيادا سپورت جارىسىنىڭ تىكە تاراتىلىمىن كورۋ، شاڭعى جارىسى، قاردان اياز ادام جاساۋ قىزىقتى جارىستارى سياقتى قيمىلداردى وتكىزىپ، جۇرتتى باۋرادى. مۇنان سىرت، وسى قار - مۇز ماۋسىمىندا اقسۋ ايماعى قىسقى قار - مۇز سپورتى سالتاناتى، قار - مۇز ساياحات مەرەكەسى، ”كوكتەم مەرەكەسىمەن قاۋىشۋ. قىسقى وليمپيادانى قارسى الۋ“ باسكەتبول جارىسى، شانا جارىسى، مۇزدا سىرعاناۋ جارىسى سياقتى 30دان استام تۇردەگى قار - مۇز ساياحاتى قيمىلى مەن مەرەكە جارىسىن وتكىزدى. ”وسى قيمىلدار قار - مۇز سپورتى مەن سالت - سانانى ۇشتاستىرىپ، قىسقى وليمپيادا سالتاناتىنا دەم بەردى ءارى جالپى حالىقتىق دەنە شىنىقتىرۋ سپورتىنىڭ جالپىلاسۋىن ىلگەرىلەتتى“، - دەدى اقسۋ ايماقتىق پارتكوم ۇگىت ءبولىمىنىڭ ورىنباسار باستىعى، اقسۋ ايماقتىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى لو جۋان. ”قار - مۇز + دەنە تاربيەنى“ ارقاۋ ەتكەن بايىنعولين موڭعۇل اۆتونوميالى وبلىسى قىسقى وليمپيادا سپورت جارىسى نەگىزگى تاقىرىبىنداعى قار - مۇز كوركەمونەرى قيمىلى، مادەنيەت قيمىلى سياقتى ەرەكشەلىككە يە ساياحات تۇرلەرىن شىعارىپ، قار - مۇز ساياحاتىنىڭ جەكە كولىكپەن ساياحاتتاۋمەن، جانۇيا ساياحاتىمەن، سەيىل - سەرۋەن ساياحاتىمەن، دەمالىس ساياحاتىمەن، ءدامدى تاعامداردان ءدام تاتۋ ساياحاتىمەن، ت.ب تەرەڭدەي توعىسۋىن ىلگەرىلەتىپ، قىسقى ساياحات ونىمدەرىمەن قامداۋدى بايىتتى. ”قىسقى وليمپيادا سپورت جارىسى قىزۋ رايعا بولەندى، بۇل قيمىلدار جۇرتتى ەرەكشە باۋرادى، قار - مۇز سپورتىمەن شۇعىلداناتىنداردىڭ قاتارى بارعان سايىن كوبەيىپ كەلەدى. ءبىز بايىنعولين وبلىسىنىڭ قار - مۇز ساياحاتى مەرەكەسىنىڭ ايگىلى ماركاسىن كەڭەيتىپ، قۋاتتى ەتىپ، مۇنان دا كوپ ادامنىڭ قار - مۇز قىزىعىنا بىرگە شومۋىنا مۇمكىندىك جاسايمىز“، - دەدى بايىنعولين وبلىستىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى يۇي شۋيىڭ.
قاشقار ايماعىنداعى شاڭعى الاڭدارى دا جابال تيىمدىلىك شارالارىن شىعارىپ، ءتۇرلى قاۋىمنىڭ قار - مۇز سپورتىنان تۇتىنۋ قاجەتىن قاناعاتتاندىردى. وسى قار - مۇز ماۋسىمىندا قاشقار ايماعى قار - مۇز ساياحات مەرەكەسى، قار - مۇز مادەنيەت مەرەكەسى، قار - مۇز سپورتى تاماشا مەزگىلى، قاز - مۇز مارافونى سياقتى قىسقى قيمىلداردى وتكىزىپ، قار - مۇز سپورتىنىڭ ورلەۋىن ۇزدىكسىز كوتەردى.
