گۋ ايليڭ قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك شەشۋشى جارىسىندا ارىنداپ اعا جۇلدەگەر بولدى
2 - ايدىڭ 18 - كۇنى جۇڭگو قۇراماسىنىڭ سپورتشىسى گۋ ايليڭ ەستەلىك بۇيىم تاراتۋ سالتىندا.
□ سۋرەتتى شينحۋا اگەنتتىگىنىڭ ءتىلشىسى شۇي چاڭ تۇسىرگەن
شينحۋا اگەنتتىگىنىڭ 2 - ايدىڭ 18 - كۇنى حىبەيدىڭ چۇڭليىنەن بەرگەن حابارى (تىلشىلەر ياڭ فان، لۋ شيڭجي، جۋ چيڭ). 2 - ايدىڭ 18 - كۇنى بەيجيڭ قىسقى وليمپيادا سپورت جارىسىنىڭ قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك شەشۋشى جارىسىندا جۇڭگو قۇراماسىنىڭ ساڭلاعى گۋ ايليڭ ارىنداپ اعا جۇلدەگەر بولىپ، جۇڭگو ۋاكىلدەر ۇيىرمەسىنىڭ وسى كەزەكتى وليمپيادا سپورت جارىسىنداعى 8 - التىن مەدالىن الدى. بۇل ونىڭ وسى كەزەكتى وليمپيادا سپورت جارىسىندا قاردا ەركىن سىرعاناۋ بويىنشا ايەلدەردىڭ شاڭعىمەن ۇلكەن تۇعىردان سەكىرۋىندە التىن مەدال العاننان كەيىنگى جەكە العان 2 - التىن مەدالى.
كانادا ساڭلاعى كاسسيە شارپە، راچاەل كاركەر جەكە - جەكە 2 -، 3 - ورىندى يەلەدى. جۇڭگو قۇراماسىنىڭ باسقا 2 ساڭلاعى لي فاڭحۇي، جاڭ كىشين جەكە - جەكە 5 - جانە 7 - ورىندى يەلەدى.
2 - ايدىڭ 17 - كۇنگى تولىمدىلىق جارىسى اياقتاعاننان كەيىن، گۋ ايليڭ، جاڭ كىشين، لي فاڭحۇي كەلەسى جارىسقا جولداما الدى، ۋ مىڭ شەشۋشى جارىسقا كىرۋدە سالىمى بولمادى، بۇلاردىڭ اراسىندا گۋ ايليڭ 1 - ورىندا بولدى. پيونچان قىسقى وليمپيادا سپورت جارىسىندا وسى تۇردەن اعا جۇلدەگەر بولعان شارپە جانە ساپتاسى كاركەر قول ۇستاسا كەلەسى جارىسقا جولداما الدى، سوڭعى بىرنەشە جىلدا ەۆروپاداعى جارىس مايداندارىن قيداي سىپىرعان ەستونيالىق ”تالانتتى بويجەتكەن“ كەللي سيلدارۋ قاداپ وتىرىپ كەلەسى جارىسقا جولداما الدى.
شەشۋشى جارىستىڭ العاشقى اينالىمىندا 18جاستاعى لي فاڭحۇي 81.75 ءنومىر الىپ جۇڭگو قۇراماسىنا تاماشا باستاما اشتى. الدىڭعى جارىس ماۋسىمىندا دۇنيە ءجۇزى بويىنشا 2 - ورىندا تۇرعان انگليا ساڭلاعى زوە اتكين اعاتتىق جىبەرىپ، وڭ اياعى شاڭعىدان اجىراپ كەتتى. شارپەنىڭ كوككە شاپشىعانداعى بيىكتەۋ دەڭگەيى مەن ارەكەتىنىڭ ۇشتاسۋى ادامداردى قايران قالدىرىپ، 89.00 ءنومىر الدى، كاركەر 87.75 ءنومىر الدى. ەڭ سوڭىندا مايدانعا شىققان گۋ ايليڭنىڭ ارەكەتى مەن كۇش - قۋاتى باسىم ءتۇسىپ، 93.25 نومىرمەن ۋاقىتشا 1 - ورىندى يەلەدى.
ەكىنشى اينالىمدا اتكين تاعى ءبىر رەت اۋساي كەتتى. وسى اينالىمدا 1080 گرادۋس اينالاتىن قيىندىقتا جەڭىسكە جەتكەن لي فاڭحۇي 86.50 ءنومىر الدى. سيلدارۋ وسى اينالىمدا ءۇرتىس كوپ رەت شەگىنە سىرعاناۋ ارەكەتىن قۇراستىرىپ، ءبىرشاما كوپ جىلدامدىق ورەسى مەن بيىكتىك دەڭگەيىنەن ايرىلىپ، 87 ءنومىر الدى. شارپە گۋ ايليڭگە سايىس جاريالاپ، ىركەس - تىركەس 2 رەت 900 گرادۋس اينالىپ، وعان قوسا 1080 گرادۋس اينالاتىن قيىن ارەكەتتى بىرلەستىرىپ، 90.00 نومىرگە يە بولدى.
گۋ ايليڭ بۇكىل الاڭنىڭ كوز تىگۋىمەن مايدانعا شىعىپ، الدىمەن ىركەس - تىركەس 2 رەت 900 گرادۋس اينالاتىن قيىن ارەكەتتى جاساپ، ىلە - شالا 3 ارەكەتتى جاتىق تۇتاستىردى، سىرعاناۋ ساپاسىنا جەتەر جان بولماي، 95.25 ءنومىر الىپ، اعا جۇلدەگەرلىكتى نەگىزىنەن ءوز ۋىسىنا الدى.
شەشۋشى جارىس اينالىمىندا شارپە ءوز ونەرىن بارىنشا ايگىلەپ، 90.75 ءنومىر الدى. جاڭ كىشين العاشقى اينالىمدا 78.75 ءنومىر السا، ەكىنشى اينالىمدا دا اۋساي كەتتى، وسى اينالىمدا تىعىرىقتان شىعۋعا تىرمىسقانىمەن، ءبىراق سىرعاناپ ءبىراز جۇرگەندە جىعىلىپ قالدى، سول ارادا تەكسەرگەندە دەنەسىندە ۇلكەن ماسەلە بايقالمادى. 24 جاستاعى كاركەر تۇتاس مايداندا سوڭىنان ساناعاندا ەكىنشى بولىپ مايدانعا شىقتى، ءبىراق 1080 گرادۋس اينالاتىن ەڭ قيىن ارەكەتتە اعاتتىق جىبەردى.
گۋ ايليڭ التىن مەدال الدى! ول ۇستىنە قىزىل ءتۇستى شاڭعىشىلار كيىمىن كيىپ، بۇكىل الاڭداعىلاردىڭ القاۋلى ايعايى ىشىندە مايدانعا شىعىپ تومەنگە قاراي سىرعانادى، قيىندىعى جوعارى ارەكەت جاساعانى جوق، قايتا مايداندا ەمىن - ەركىن زىمىراي سىرعاناپ ءتۇستى.
گۋ ايليڭ جارىستان كەيىن مىنالاردى ءبىلدىردى: ”جارىس بارىسىندا ءىشىنارا قيىن ساتتەر بولدى، ءبىراق سول ساتتەردە دە مەن تاعى دا ءبىر كۇمىس مەدال تاعىپ وسى مايدانمەن قوشتاسارمىن دەگەندى ويىما دا العان جوقپىن. شاڭعى تەبۋ قىزىعى مول جانە وزگەشەلىككە يە سپورت، ءوزىم جونىنەن العاندا، مەن وسىنداي سەزىمدى شىنىمەن دە U فورمالى الاڭنان تاپتىم“.
