□ انار بۇلت / شينجياڭ گازەتىنىڭ تىلشىلەرى
ءار كۇنگى قىسقى وليمپيادا جارىسىنا نازار اۋدارىپ، جۇڭگو ساڭلاقتارىنا دەم بەرىپ ماداق ايتتى؛ وتباسىنداعىلارمەن بىرگە جارىس كورىپ، قار - مۇز جارىس الاڭىنداعى تارتىمدى كورىنىستەرگە شاتتاندى؛ اپتا سوڭىندا تۋىس - تۋعان، دوس - جاراندارىمەن ۋادەلەسىپ، قار شاڭعى الاڭىنا، قار - مۇز تاقىرىبىنداعى باقشالارعا، ويىن الاڭدارىنا بارىپ قار - مۇز قىزىعىنا شومدى... بەيجيڭ قىسقى وليمپيادا سپورت جارىسى باستالعاننان بەرى تارتىمدى جارىستار، ۇمىتىلماس ساتتەر رايونىمىزداعى ءار ۇلت بۇقاراسىنىڭ نازارىن اۋداردى.
”جۇڭگو قىسقى وليمپيادا ساڭلاقتارىنا ماداق جاۋدىردى“
2 - ايدىڭ 18 - كۇنى ساۋان قالاسى داچۋان اۋىلى يەجياحۋ قىستاعىنىڭ تۇرعىنى ەرجانات وكەن تەلەۆيزوردان گۋ ايليڭنىڭ تاعى دا التىن مەدال العانىن كورىپ، شاتتانا الاقايلادى.
ەرجانات كىشكەنتايىنان دەنە تاربيە قيمىلدارىن ەرەكشە ۇناتادى. ”بەيجيڭ قىسقى وليمپيادا سپورت جارىسىندا جۇڭگو سپورتشىلارىنىڭ قايىسپاس قايسارلىقپەن شايقاسقان رۋحى مەنى ەرەكشە اسەرلەندىردى، مەن ولاردى ءار كۇنى القاپ وتىرامىن. مەدال السىن - الماسىن ولاردىڭ ءبارى جارايدى“، - دەدى ەرجانات، بۇگىنگى كۇندە ساۋان قالاسىندا قار - مۇز الاڭدارى كوبەيدى، بوس ۋاقىتى شىققاندا بالاسىن ەرتىپ شاڭعى تەۋىپ، مۇزدا سىرعاناپ، بالاسىنىڭ قار - مۇز سپورتى جاعىنداعى ارتىقشىلىعىن جەتىلدىردى.
جاڭاءشار اۋدانى جاڭاءشار قالاشىعى بو - ۋاڭ الەۋمەتتىك اۋماعىنىڭ تۇرعىنى تۇرسۇن ايىت ءار كۇنى وتباسىنداعىلارمەن بىرگە قىسقى وليمپيادا سپورت جارىسىن كورىپ مارە - سارە بولدى.
”ءار رەت جۇڭگو سپورتشىلارىنىڭ جارىس الاڭىندا شايقاسىپ، وتان ءۇشىن داڭق اپەرگەنىن كورگەنىمدە، ىشتەي قاتتى اسەرلەنەمىن. وتاننىڭ گۇلدەنىپ - كوركەيۋىن تىلەيمىن“، - دەدى تۇرسۇن، بالالارى ۇستىنەن تاراتىلعان جارىستى وتە ۇناتىپ كورەدى، نەگىزىنەن، ءار رەتكى ۇستىنەن تاراتۋلاردى قالت جىبەرمەي كورىپ كەلەدى. ”مەنىڭشە، بالالار ءۇشىن بۇل تاربيە سانالادى، بۇل مۇنان بىلايعى ۇيرەنۋدە ولاردى قىسقى وليمپيادا ساڭلاقتارىنا قاراپ قاتار تۇزەپ، رۋحتى سەرپىلتىپ، قيىنشىلىقتان قورىقپاي، قيىندىقتارعا قاسقايا قارسى اتتانىپ، بولاشاققا بىرگە اتتانۋعا شابىتتاندىرادى!“.
”وتباسىمداعىلاردى ەرتىپ بەيجيڭگە بارامىن“
”بەيجيڭ قىسقى وليمپيادا سپورت جارىسى وتە تارتىمدى، ەستەن كەتپەستەي بولدى. بيىل جىل سوڭىندا قىسقى ارەدىكتە مەن وتباسىمداعىلاردى ەرتىپ بەيجيڭگە بارامىن“، - دەدى 2 - ايدىڭ 19 - كۇنى اۋات اۋدانى يىڭى ارىق قالاشىعى سوگەتارىق قىستاعىنىڭ تۇرعىنى تۇرسۇنگۇل ابدۇنياز.
2021 - جىلى 12 - ايدا تۇرسۇنگۇل مەن كۇيەۋى ۇسەنجان گايىس بالالارىن ەرتىپ ءۇرىمجى قالاسىن ساياحاتتاپ، كوڭىلدى ويناپ قايتقان. ”وڭتۇستىك شينجياڭدا قار از جاۋادى، ءبىز ۇرىمجىدەگى جىبەك جولى حالىقارالىق شاڭعى الاڭىنا ارناۋلى بارىپ شاڭعى تەۋىپ قايتتىق، قازىرگە دەيىن ەسىمىزدەن كەتپەيدى“، - دەدى تۇرسۇنگۇل، ءوزى ءبىر ەرەن بازارىندا جۇمىس ىستەيدى، جىلدىق كىرىسى 50 مىڭ يۋان اينالاسىندا، كۇيەۋى ەگىن سالىپ، كەپتىرىلگەن جەمىس - جيدەك ساۋداسىن ىستەيدى، جىلدىق كىرىسى دە از ەمەس، ”بەيجيڭگە بارىپ ساياحاتتاۋعا شامامىز جەتەدى“.
بەيجيڭ قىسقى وليمپيادا سپورت جارىسىنىڭ الاڭ - سارايلارىن جانە قۇرىلعىلارىن اۋىزعا العاندا، مامەتجان مۇنىردين بەس ساۋساعىنداي قانىق ەكەن: ”قۇس ۇياسىن ايتپاي - اق قويايىن، ونى كوپشىلىك بىلەدى. ءوز باسىم ’قار قۇتى‘ مەن ’قار ايداعاردى‘ ەرەكشە جاقسى كورەمىن، وراي بولسا، ءسوز جوق، بارىپ كورەمىن“. مامەتجان لوپ اۋدانى بەيجيڭ ونەركاسىپ باقشا رايونى جىبەك جولى قار - مۇز ويىن الاڭىنىڭ حاۋىپسىزدىك باسقارۋعا جاۋاپتى قىزمەتكەرى. وسى ويىن الاڭىندا قار بالونى، قارلى جەر موتوتسيكلى، التىباقان، ينتەرنەتتە تانىمال كوپىر، دوڭەستەن اۋەگە ەرەن كوتەرىلۋ سياقتى ءتۇرلى قار - مۇز كوڭىل اشۋ تۇرلەرى بار.
قولى بوساي قالعاندا، مامەتجان قول تەلەفونىنان بەيجيڭ قىسقى وليمپيادا سپورت جارىسىنىڭ احۋالىن كورەدى. ”قاراڭىزشى، ءبىزدىڭ مىنا قار - مۇز ويىن الاڭىندا ادام كوپ شىعار؟ كوپ ادام قىسقى وليمپيادا سپورت جارىسىنىڭ ىقپالىمەن تۋىس - تۋعان، دوس - جاراندارىمەن وسىندا ويناۋعا كەلدى“، - دەدى مامەتجان.
”بەيجيڭ قىسقى وليمپيادا سپورت جارىسىنا ىزگى تىلەك تىلەيمىن“
2 - ايدىڭ 19 - كۇنى شاپشال سىبە اۆتونوميالى اۋدانى جەتىسۋمۇل اۋىلى جەتىسۋمۇل قىستاعىنىڭ تۇرعىنى قۇرمان ابدىرەشيت سيىر قوراداعى شارۋالارىن تامامداعاننان كەيىن، جۇبايىمەن بىرگە سافادا وتىرىپ، شايىن ءىشىپ، تەلەۆيزوردان قىسقى وليمپيادا سپورت جارىسىن كورىپ، جۇڭگو قىسقى وليمپيادا ساڭلاقتارىن جىگەرلەندىرىپ، مەدەت بەردى.
قۇرمان بيىل 60 نەشە جاستا، جاس كەزىندە جاقىن ماڭداعى بىرنەشە قىستاققا اتى ايگىلى بالۋان ەدى، نەشە ون جىلدان بەرى دەنە تاربيەگە قىزىعۋمەن كەلەدى. ”قازىر قىستاقتىڭ سپورت الاڭدارى جاقسى، اۋداندا دا قار - مۇز الاڭدارى بار. جاستاردىڭ كوبى سپورتقا قىزىعادى. ءبىزدىڭ بۇل جەردەن دە ۇزدىك سپورتشىلاردىڭ شىعۋىن ءۇمىت ەتەمىن“، - دەدى قۇرمان.
قۇتىبي اۋدانى ۋگۇڭتاي قالاشىعى ۋگۇڭتاي قىستاعىنىڭ تۇرعىنى قانات قيسابەك قۇتىبي اۋدانى ات بايگە قوعامىنىڭ باستىعى. بەيجيڭ قىسقى وليمپيادا سپورت جارىسى باستالعاننان قازىرگە دەيىن، ول ءار كۇنى جارىس كورىپ كەلەدى.
”بەيجيڭ قىسقى وليمپيادا سپورت جارىسىندا جۇڭگو سپورتشىلارى قىسقى وليمپيادا سپورت جارىسىنا قاتىناسقاننان بەرگى ەڭ جاقسى ناتيجەگە قول جەتكىزدى، بۇل ادامداردى شابىتتاندىردى. مەن بەيجيڭ قىسقى وليمپيادا سپورت جارىسىنا ىزگى تىلەك تىلەيمىن“، - دەدى قانات، ”اۋىلداستار مەن سياقتى تۇرمىستارى بايىعاننان كەيىن، مادەنيەت، دەنە تاربيە قيمىلدارىنا وتە كوڭىل بولەتىن بولدى، بەيجيڭ قىسقى وليمپيادا سپورت جارىسىن ماقتانىش سەزىنەدى جانە ابىروي سانايدى. 2 - ايدىڭ 16 - كۇنى ات بايگە قوعامىمىز تۇتاس اۋدان كولەمىندە بايگە وزدىرىپ، بەيجيڭ قىسقى وليمپيادا سپورت جارىسىنا تىلەك ءبىلدىرۋدى تاقىرىپ ەتتى“.
(ءتىلشى ۋي يۇڭگۇي، جازۋعا قاتىناسقان تىلشىلەر گى يوۋجۇن، ءپاريزات ابدۇل، ءرايدا، حان چين - يان، ءجازيرا نەسىپبەك، چىن جياڭلين)
