لي پىڭ:
اعا - باۋىر، اپەكە - قارىنداستارىن باستاپ بولاشاققا بىرگە اتتاندى
□ انار بۇلت / شينجياڭ گازەتىنىڭ ءتىلشىسى ءپاريزات ابدۇل
شينجياڭ قۇمدى ءشول شىلان شارۋاشىلىعى شەكتى سەرىكتەستىگىنىڭ القا باستىعى لي پىڭ ۇلتتار ىنتىماعى، العاباسارلىعى جاعىنداعى مەملەكەتتىك ۇلگىلى جەكە، مەملەكەتتىك كەدەيلىكتەن ارىلتۋدان قامال الۋ سيلىعىنىڭ ۇلەس قوسۋ سيلىعى قاتارلى كوپ تۇردەگى داڭقتارعا يە بولعان، جۋىقتا ول تاعى 7 - كەزەكتى اۆتونوميالى رايوندىق ءمورال ۇلگىسى بولىپ باعالاندى.
2009 - جىلى لي پىڭ زەينەتكە شىققاننان كەيىن شەريا اۋدانى شەريا اۋىلىنىڭ ارىش قىستاعىنا بارىپ، قۇمدى شولدە شىلان باعىن اشۋعا بەكيدى.
ارىش قىستاعىنىڭ تۇرعىندارى ەرىكسىزدەن ”قىلتاناق شىقپايتىن قۇمدى شولدە شىلان ەگۋگە بولا ما؟“، - دەپ سۇرادى.
سايىس جاريالاۋدان تايىنبايتىن لي پىڭ ءۇي ىشىندەگىلەردىڭ جانە تۋىس - تۋعان، دوس - جاراندارىنىڭ ايتقان ءناسيحاتىنا قاراماستان، قۇمدى شولگە تامىر تارتادى. قۇمدى توبەشىكتەردى تەگىستەپ، اق تەرەك ەگىپ، توعان قازىپ، جول سالىپ، شىلان ەگىپ، زاۆود قۇردى... 13 جىلدىق جاپالى قۇلشىنىسى سەلگە كەتپەدى، ارمانداعان بۇتاقتاردا شىلان سامسىعان كورىنىس شىندىققا اينالىپ، 2000 نەشە مۋ كەلەتىن قۇمدى توبەشىكتەر ”كوكتەمدە جاسىل جەلەك جامىلاتىن، جازدا شەشەك اتاتىن، كۇزدە جەمىس بەرەتىن“ ەكولوگيالىق ولشەمدەنگەن شىلان ەگىمشىلىگى ۇلگى بازاسىنا اينالدى.
”شىلان اعاشىنىڭ قاتارعا قوسىلىپ، شىلانىنىڭ ءارى ۇلكەن، ءارى قىزىل، ونىڭ ۇستىنە توتەنشە ءتاتتى بولارىن ەشكىم دە ويلاماعان ەدى“. ارىش قىستاعىنىڭ تۇرعىنى ءماتسايىم ءماتياسىن قۇمدى توبەشىكتىڭ شىلان باعىنا اينالۋ بارىسىنا كۋا بولدى، قازىر ول ايەلىمەن بىرگە شينجياڭ قۇمدى ءشول شىلان شارۋاشىلىعى شەكتى سەرىكتەستىگىندە جۇمىس ىستەيدى، ەكەۋىنىڭ ايلىق كىرىسى 5000 نەشە يۋان.
ارىش قىستاعىنداعى قىستاق تۇرعىندارىنىڭ كوبى ءماتسايىم سياقتى شينجياڭ قۇمدى ءشول شىلان شارۋاشىلىعى شەكتى سەرىكتەستىگىندە جۇمىس ىستەيدى، ايلىق كىرىستەرى 2000 يۋاننان 6000 يۋانعا دەيىن، سەرىكتەستىك جەرگىلىكتى ورىن ءۇشىن جيىنى 200 مىڭ ادامنىڭ (رەت) جۇمىستانۋ ماسەلەسىن شەشىپ، 13 جىلدان بەرى جيىنى 20 نەشە ميلليون يۋان ەڭبەكاقى تاراتتى. لي پىڭنىڭ باستاۋىندا تەگىندە شىلان ەگىمشىلىگى تەحنيكاسىن بىلمەيتىن جەرگىلىكتى شارۋالار تەحنيكانى يگەرىپ، سەرىكتەستىكتە جۇمىس ىستەۋمەن بىرگە، وزدەرى دە شىلان ەگىپ، قوجايىن بولىپ، شىلان شارۋاشىلىعىن دامىتۋدىڭ پايداسىن كوردى.
”ءبىز تامىرلاس ءبىر ءۇيدىڭ ادامىمىز، مۇنان دا كوپ اعا - باۋىر، اپەكە - قارىنداستارىمنىڭ شىلاننىڭ پايداسىن كورىپ، مۇنان دا تاماشا تۇرمىس كەشىرۋىنە مۇمكىندىك جاسايمىن“، - دەدى 2 - ايدىڭ 19 - كۇنى لي پىڭ تىلشىگە تەلەفوندا.
لي پىڭ ارىش قىستاعىندا شىلان وڭدەۋ زاۆودىن دا قۇردى، قىستاقتىڭ شىلاندارى وسى اراعا جەتكىزىلىپ، سورتقا ءبولىنىپ، تازارتىلىپ، سۇرىپتالىپ، قوراپتالىپ، باعاسى نەداۋىر جوعارىلادى؛ لي پىڭ شەريا اۋدانى جىحۇي جەمىس شارۋاشىلىعى شارۋالار كاسىپتىك سەلبەستىك كووپەراتيۆىن دە قۇرىپ، 100 ادامدى كووپەراتيۆ مۇشەلىگىنە قابىلداپ، ولارعا شىلاندى تەگىن وڭدەپ بەردى.
”كاسىپ سالاسى تىزبەگىن ۇزارتقاندا عانا مۇنان دا كوپ شارۋالاردى يگىلىككە كەنەلتۋگە بولادى“. لي پىڭ ايتقانداي، قازىر شينجياڭ قۇمدى ءشول شىلان شەكتى سەرىكتەستىگى ەگىمشىلىك، وڭدەۋ، ساتىپ الۋ، قوراپتاۋ، ساتۋ ءبىر تۇلعالانعان كاسىپورىن بولىپ دامىپ، شاتيانحۇڭ، ارىش، سىگو تيانيۋان، قۇمدى شولدە شىلان ەگۋشى سياقتى ايگىلى ماركانىڭ جىنتىكتەي وڭدەلگەن 30 ءتۇرلى شىلان ءونىمى وڭىرلىك ەرەكشەلىككە يە كاسىپ سالاسى تىزبەگىن قالىپتاستىرۋعا باستادى.
لي پىڭ: ”قالعان ۋاقىتىم مەن ءومىرىمدى وسى اراعا ارناپ، اعا - باۋىر، اپەكە - قارىنداستاردى باستاپ، اعاش ەگىپ، قۇمدى تىزگىندەپ، مۇنان دا جارقىن بولاشاققا بىرگە قادام تاستايمىز“، - دەدى.
