تيانشان تورى
تيانشان تورى   ›   جاڭالىقتار   ›   شينجياڭ حابارلارى

ول مىنە وسىنداي ”ءبىر ساقشى“

پاڭ شين:

ول مىنە وسىنداي ”ءبىر ساقشى“

□ انار بۇلت / شينجياڭ گازەتىنىڭ ءتىلشىسى سۇي يۇنيان

  7 - كەزەكتى اۆتونوميالى رايوندىق ءمورال ۇلگىسى پاڭ شين ساقشى. ءارى ”ءبىر ساقشى“ ەكەن.

  1993 - جىلى پاڭ شين قارۋلى ساقشى قوسىنىنان شەگىنگەن سوڭ ءپىشان اۋداندىق قوعام حاۋىپسىزدىگى مەكەمەسىنە كەلىپ قىزمەت ىستەيدى، قازىر ءپىشان اۋداندىق قوعام حاۋىپسىزدىگى مەكەمەسى ەكونوميكالىق قىلمىستاردى بارلاۋ ۇلكەن اترەتىنىڭ ساياسي جەتەكشىسى؛ تالاي جىلدان بەرى، پاڭ شين ”ءبىر ساقشى“ دەگەن جاناما اتپەن وتباسىندا قيىنشىلىعى بار بالالارعا اقشا جىبەرىپ، ولاردىڭ وقۋىن جالعاستىرۋىنا اقشالاي كومەكتەسىپ كەلەدى.

  1999 - جىلدىڭ سوڭىندا، پاڭ شين ءپىشان اۋداندىق تەلەۆيزيا ستانسياسىنان تاراتىلعان ارناۋلى فيلمنەن ءپىشان اۋدانى ءدوڭبازار حۇيزۋ ۇلتتىق اۋىلىنداعى ءبىر وتباسىندا اكە - شەشەسى ىركەس - تىركەس قايتىس بولىپ، جاسى 10عا تولماي ارتىندا قالعان 2 بالانىڭ اتا - اجەسى باعىپ العانىمەن، قيىنشىلىق سەبەبىنەن وقۋدان قول ۇزۋگە ءدوپ كەلگەندىگىن بىلەدى. بۇعان قاتتى قامىققان پاڭ شين جۇبايىمەن اقىلداسقان سوڭ، اي سايىن بىرنەشە ءجۇز يۋان ۇنەمدەپ 2 بالانىڭ وقۋىن جالعاستىرۋىنا كومەكتەسۋ بەكىمىنە كەلەدى.

  سونىمەن، مەكتەپ تەز ارادا ”ءبىر ساقشى“ اتىمەن جولدانعان 2 اقشا تالونىن تاپسىرىپ الادى، وسىدان سوڭ اي سايىن اقشا تالونى ۋاقىتىندا كەلىپ تۇردى، بالالاردىڭ مۇعالىمدارى مەن تۋىس - تۋعاندارىنىڭ وسى ”ءبىر ساقشىنىڭ“، ءسىرا، قايسى مەيىربان جان ەكەندىگىن بىلۋگە اڭسارى اۋدى، ولار جەرگىلىكتى پوچتا مەكەمەسىندەگى قىزمەتكەرلەردىڭ كومەگىمەن پاڭ شيندى تابادى.

  وسى جىلداردا پاڭ شين جەتىم بالالار مەن وتباسىندا قيىنشىلىعى بار وقۋشىلاردان جالپى 24 بالاعا قارجىلاي كومەك بەردى.

  قازىر بالالار ەسەيىپ - ەرجەتتى، كەيبىرەۋى جۇمىس ورنىنا شىقتى، كەيبىرەۋى وتباسىن قۇرىپ، باقىتتى تۇرمىس كەشىرۋدە، ولار پاڭ شينمەن جاقىن تۋىسىنداي ارالاسىپ كەلەدى.

  20 نەشە جىلدان بەرى، پاڭ شين ىلگەرىندى - كەيىندى 8 سۇيەنىشسىز قارتقا قارايلاستى. 1997 - جىلى پاڭ شين قىزمەت ورنىنىڭ ماڭىنان جۇپىنى كيىمدى، قالتىراقتاپ جۇرگەن ءبىر شەشەيدى ۇنەمى جولىقتىرىپ قالادى. بۇل جايدى كوڭىلىنە بۇككەن ول جاعدايدى ۇعىسادى. شەشەيدىڭ ەسىمى زۋيدام ابدوللا، ەستىمەيتىن، سويلەي المايتىن كەرەڭ - مىلقاۋ، كۇيەۋى قايتىس بولعان، پەرزەنتسىز، كورشى - قولاڭنىڭ كومەگىمەن كۇن كورىپ جۇرگەندىگىن ءبىلىپ، وعان كومەكتەسۋگە بەكيدى.

  پاڭ شيننىڭ كىرىسۋىمەن زۋيدامنىڭ ءۇيى جاڭادان اكتەلدى، كۇرىش، ۇن، ماي جانە ماقتالى كيىم، ءدارى - دارمەك ۋاعىندا جەتكىزىلىپ تۇردى. قىس كەتىپ جاز كەلىپ، كوكتەم مەن كۇز اۋىسىپ جاتتى، پاڭ شين مەن زۋيدام بىلايعى جۇرت تۇسىنە المايتىن قول يشاراتىمەن سويلەسىپ، ارادا سۇيىسپەنشىلىك قويۋلاي ءتۇستى. 2003 - جىلى 72 جاستاعى زۋيدام پاڭ شين سىندى جاقىنىنىڭ قاسىندا جايبىراقات ومىردەن اتتاندى.

  ساقشى بولعاننان بەرى، پاڭ شين ءوز كىرىسىنەن ىركىپ 300 مىڭ يۋاننان استام اقشانى قارتتارعا قارايلاسۋعا، بالالارعا اقشالاي كومەك بەرۋگە جۇمسادى، ال ءوزى مىندەت اتقارۋ بارىسىندا تالاي رەت جاراقات الىپ، دەنەسىندە زارداپ قالعاندىقتان، ەمدەلۋى قاجەت ەدى، ۇيىندە ءۇي قارىزى جانە باسقا قارىزى بار. سوندا دا ول قيىنشىلىعى بار بۇقاراعا تالاي رەت كومەك بەردى، جەر سىلكىنىس اپاتى تۋىلعان وڭىرلەرگە جىلۋ اقشا اتادى. 2020 - جىلى 2 - ايدا پاڭ شين اۆتونوميالى رايوندىق قىزىل كرەست قوعامى ارقىلى ۋحانعا 10 مىڭ يۋان جىلۋ اقشا اتادى.

  پاڭ شيندى كەدەيلەردى سۇيەمەلدەپ، قيىنشىلىعى بار بۇقاراعا كۇنى بۇگىنگە دەيىن ۇزبەي كومەك بەرۋگە جەبەپ كەلگەن قانداي رۋحاني كۇش؟ ول: ”مەن ءبىر ساقشىمىن، قيىنشىلىعى بار بۇقاراعا كومەكتەسۋ جاۋاپكەرشىلىگىم ءارى بورىشىم!“، - دەدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.