تيانشان تورى   ›   جاڭالىقتار   ›   ماڭىزدى حابارلار

24 - كەزەكتى قىسقى وليمپيادا سپورت جارىسى بەيجيڭدە تولىق تابىسپەن اياقتادى

شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان، حالىقارالىق وليمپيادا كوميتەتىنىڭ ءتوراعاسى باح اياقتاۋ سالتىنا قاتىناستى

  24 - كەزەكتى قىسقى وليمپيادا سپورت جارىسىنىڭ اياقتاۋ سالتى 2 - ايدىڭ 20 - كۇنى كەشتە مەملەكەتتىك دەنە تاربيە الاڭىندا سالتاناتپەن وتكىزىلدى. سۋرەتتە: مەملەكەت ءتوراعاسى شي جينپيڭ حالىقارالىق وليمپيادا كوميتەتىنىڭ ءتوراعاسى باحپەن بىرگە ءتوراعالار مىنبەسىندە كوپشىلىككە قول بۇلعاپ قۇرمەت بىلدىرۋدە.

□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

  24 - كەزەكتى قىسقى وليمپيادا سپورت جارىسىنىڭ اياقتاۋ سالتى 2 - ايدىڭ 20 - كۇنى كەشتە مەملەكەتتىك دەنە تاربيە الاڭىندا سالتاناتپەن وتكىزىلدى. شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلى پارتيا مەن مەملەكەت باسشىلارى اياقتاۋ سالتىنا قاتىناستى.

□ سۋرەتتى شينحۋا اگەنتتىگىنىڭ ءتىلشىسى يۋە يۋەۋي تۇسىرگەن

  شينحۋا اگەنتتىگىنىڭ 2 - ايدىڭ 20 - كۇنى بەيجيڭنەن بەرگەن حابارى. 24 - كەزەكتى قىسقى وليمپيادا سپورت جارىسىنىڭ اياقتاۋ سالتى 2 - ايدىڭ 20 - كۇنى كەشتە مەملەكەتتىك دەنە تاربيە الاڭىندا سالتاناتپەن وتكىزىلدى. شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلى پارتيا مەن مەملەكەت باسشىلارى، حالىقارالىق وليمپيادا كوميتەتىنىڭ ءتوراعاسى باح اياقتاۋ سالتىنا قاتىناستى.

  2008 - جىلى 100 جىلدىق وليمپيادا ارمانىنىڭ ورىندالۋىنان 2022 - جىلى وليمپيادا سپورتىمەن تاعى ءبىر مارتە قول ۇستاسقانعا دەيىن، بەيجيڭ تاريحتاعى تۇڭعىش ”قوس وليمپيادا قالاسىنا“ اينالدى. وتكەن 16 كۇندە بەيجيڭ باسەكەلىك دەنە تاربيەنىڭ داڭق - شۇعىلاسى مەن ارمانىنا كۋا بولىپ، ادامزات قوعامىن ىنتىماق پەن دوستىققا ۇيىستىردى. 5 ساقينالى تۋ استىندا 91 مەملەكەت پەن وڭىردەن كەلگەن 3000عا جۋىق سپورتشى قايراتتانا بەلدەسىپ، جوعارى شەككە سايىس جاريالاپ، ءوز مۇمكىندىكتەرىن ەڭ جوعارى شەكتە ساۋلەلەندىرىپ، 2 تۇردە دۇنيە جۇزىلىك رەكوردتى جانە 17 تۇردە قىسقى وليمپيادا سپورت جارىسىنىڭ رەكوردىن جاڭالاپ، ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋدىڭ“ تاماشا سيمفونياسىن ورىندادى. جۇڭگو ىندەت ىقپالىن ەڭسەرىپ، قاراپايىم، حاۋىپسىز، تارتىمدى قىسقى وليمپيادا سپورت جارىسىن وتكىزۋ ءۇشىن وراسان زور قۇلشىنىس جاسادى، ماڭداي الدى جارىس الاڭ - سارايلارى مەن قۇرىلعىلارى، اسا تاماشا ۇيىمداستىرۋ، قىزمەت وتەۋ جۇمىستارى وليمپيادا ۇلى شاڭىراعى مەن حالىقارالىق قوعامنىڭ جاپپاي جاقسى باعاسىنا يە بولدى. جۇڭگو ۋاكىلدەر ۇيىرمەسى 9 التىن، 4 كۇمىس، 2 قولا مەدال الىپ، ءبىر كەزەكتى قىسقى وليمپيادا سپورت جارىسىندا يە بولعان التىن مەدال سانىنان دا، مەدال سانىنان دا رەكورد جاڭالاپ، التىن مەدال تاقتاسىندا 3 - ورىنعا شىعىپ، 1980 - جىلدان باستاپ قىسقى وليمپيادا سپورت جارىسىنا قاتىناسقاننان بەرگى تاريحتاعى ەڭ جاقسى ناتيجەگە قول جەتكىزدى.

  ءتۇن قاراڭعىسىندا مەملەكەتتىك دەنە تاربيە الاڭى الۋان نۇرعا شومىپ، قىزۋ مەرەيلى دۋمانعا بولەندى.

  «بەيبىتشىلىك − تاعدىرلاس ورتاق تۇلعا» اتتى مۋزيكا ءۇنى ىشىندە، شي جينپيڭ مەن حانىمى پىڭ لييۋان باح قاتارلىلارمەن بىرگە ءتوراعالار مىنبەسىنە شىعىپ، كورەرمەنگە قول بۇلعاپ قۇرمەت ءبىلدىردى. بۇكىل الاڭنان قىزۋ شاپالاق ءۇنى كوتەرىلدى.

  ساعات ءدال 20دا اياقتاۋ سالتىنىڭ بەتاشار ويىنى «شام جاعۋ» باستالدى. بالالار قولدارىنا قار گۇلى ءپىشىندى اشەكەي شامدار ۇستاپ، يۋانشياۋ مەرەكەسىندەگى اشەكەي شام ويناتۋ داستۇرىمەن الاڭداعى ”冬“ ءارىپتى جينالىس بەلگىسىنىڭ شامىن جاقتى.

  الاڭداعىلار تۇگەل ورىندارىنان تۇردى، ايبىندى جۇڭحۋا حالىق رەسپۋبليكاسىنىڭ مەملەكەت ءانى اۋەنىندە بەس جۇلدىزدى نارت قىزىل تۋ باياۋ كوتەرىلدى.

  الاڭدا وراسان ۇلكەن جۇڭگو تۇيىنشەگى ورنەگى پايدا بولدى، جالاۋگەرلەر قولدارىنا وسى كەزەكتى قىسقى وليمپيادا سپورت جارىسىنا قاتىناسقان 91 ۋاكىلدەر ۇيىرمەسىنىڭ تۋىن ۇستاپ الاڭ ىشىنە كىردى. «شاتتىق جىرى» اتتى كلاسسيكالىق كۇي اۋەنى كوتەرىلىپ، سپورتشىلاردىڭ ۋاكىلدەرى الاڭعا كىردى، الاڭداعى بارشا كورەرمەن شاپالاق سوعىپ جانە الاقايلاپ، دەنە تاربيە ساڭلاقتارىنىڭ ۋاكىلدەرىنە ىستىق ىقىلاستى قۇتتىقتاۋ جانە شىن جۇرەكتەن شىققان ىزگى قۇرمەت ءبىلدىردى.

  ۇلكەن ەكراندا «2022، مەن بارمىن!» اتتى قىسقا مەتراجدى فيلم قويىلىپ، سپورتشىلاردىڭ قايراتتانا ايقاسقان، جىگەرلى جالىنمەن شىعانداعان تارتىمدى ساتتەرى قايتا كورسەتىلدى. وسىدان سوڭ دالالىق شاڭعى ايەلدەردىڭ 30 كيلومەترگە توپتىق اتتانۋ (ەركىن شەبەرلىك) ءتۇرى مەن دالالىق شاڭعى ەرلەردىڭ 50 كيلومەترگە توپتىق اتتانۋ (ەركىن شەبەرلىك) تۇرىندە مەدالعا يە بولعان سپورتشىلارعا مەدال بەرىلدى.

  ەرىكتىلەردىڭ شىن ىقىلاستى كۇلىمسىرەگەن جۇزدەرى ۇلكەن ەكراندا الما - كەزەك ۇزدىكسىز كورىنىس بەرىپ جاتتى. جاڭادان سايلانعان حالىقارالىق وليمپيادا كوميتەتى سپورتشىلار كوميتەتى مۇشەلەرىنىڭ ۋاكىلى بۇكىل سپورتشىلار اتىنان ەرىكتىلەردىڭ 6 ۋاكىلىنە قۇرمەت ءبىلدىرىپ، قالىڭ ەرىكتىلەرگە دەگەن شىن ىقىلاستى العىستارىن ءبىلدىردى. 2008 - جىلى بەيجيڭ وليمپيادا سپورت جارىسىندا ”ەرىكتىلەرگە قۇرمەت ءبىلدىرۋ“ بۋىنى قوسىلعان ەدى، وسىدان سوڭ بۇل وليمپيادا سپورت جارىسى اياقتاۋ سالتىنىڭ داستۇرىنە اينالعان بولاتىن. وسى كەزەكتى قىسقى وليمپيادا سپورت جارىسى كەزىندە نەشە ون مىڭ ەرىكتى ىستىق ىقىلاسپەن قىزمەت وتەپ، قاجىرلىلىقپەن قۇلشىنىس جاساپ، جاپپاي القاۋ - ماراپاتقا يە بولدى.

  ۇلكەن ەكراندا حالىقارالىق وليمپيادا كوميتەتىنىڭ «سەنىمنىڭ كۇشى» اتتى قىسقا مەتراجدى فيلمى قويىلىپ، ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋ“ سىندى وليمپيادا رۋحىن جاندى تۇردە ايگىلەدى.

  سالتاناتتى جينالىس اياقتالۋعا جاقىنداپ، تاعى ءبىر قوشتاسار ءسات جەتتى. جۇڭگودا بۇرىنعىلار ۇنەمى تالدىڭ بۇتاعىن سىندىرىپ قوشتاسىپ، وعان ساعىنىش سەزىمدەرىن امانات ەتەتىن. ءار سالا، ءار كاسىپتەن كەلگەن، تۇرلىشە جاستاعى 365 قاراپايىم ادام قولدارىنا تالدىڭ بۇتاعىن ۇستاپ، الاڭ ورتاسىنا جينالىپ، ءبىر جىلدىڭ 365 كۇنىندەگى ساعىنىشقا ۋاكىلدىك ەتتى. اق ءتۇستى ساۋلە شوعى الاڭ ورتاسىندا جارقىراپ، جارىق نۇرلى ەسكەرتكىش بولىپ تۇلعالانىپ، نەگىزگى الاۋداعى ”ۇلكەن قار گۇلىن“ كوتەرىپ تۇردى. ۇلكەن ەكراندا «2022، ءبىز بارمىز!» اتتى قىسقا مەتراجدى فيلم قويىلىپ، قىسقى وليمپيادا سپورت جارىسىنداعى جۇرت جۇرەگىنە جىلى شۋاق سيلاعان كورىنىستەردى ەستەلىككە الدى.

  وسىدان سوڭ گرەتسيانىڭ مەملەكەت تۋىن شىعارۋ، گرەتسيانىڭ مەملەكەت ءانىن ورىنداۋ سالتى وتكىزىلدى.

  حىبەيدىڭ فۋپيڭ تاۋلى وڭىرىنەن كەلگەن بالالار وليمپيادا ءانىن تاعى ءبىر مارتە اسقاقتاتا شىرقاپ، وليمپيادا تۋى ءان اۋەنىمەن باياۋ ءتۇسىرىلدى.

  وليمپيادا تۋىن تاپسىرىپ بەرۋ - الۋ سالتى باستالدى. بەيجيڭ قالاسىنىڭ باستىعى چىن جي - نيڭ بەس ساقينالى تۋدى جەلبىرەتە بۇلعاپ، ونان سوڭ حالىقارالىق وليمپيادا كوميتەتىنىڭ ءتوراعاسى باحقا بەردى. باح جينالىس تۋىن كەلەسى كەزەكتى قىسقى وليمپيادا سپورت جارىسىن وتكىزۋشى قالالار يتاليانىڭ ميلان قالاسىنىڭ باستىعى سالا مەن كورتينا دامپەززو قالاسىنىڭ باستىعى گەديناعا تاپسىردى.

  الاڭدا يتاليانىڭ مەملەكەت ءانى ورىندالىپ، يتاليانىڭ مەملەكەت تۋى شىعارىلدى. ميلان قالاسى مەن كورتينا دامپەززو قالاسى «قانات قوسقان قوس قالا · كۇش بىرىكتىرىپ، بىرگە شۇعىلا شاشۋ» اتتى تارتىمدى ادەبيەت - كوركەمونەر قويىلىمىن اكەلىپتى.

  وسىدان سوڭ بەيجيڭ قىسقى وليمپيادا سپورت جارىسىن ۇيىمداستىرۋ كوميسسياسىنىڭ ءتوراعاسى ساي چي ارناۋ ءسوز سويلەپ بىلاي دەدى: وسىناۋ ۇمىتىلماس 16 كۇندە دۇنيە ءجۇزىنىڭ جەر - جەرىنەن كەلگەن سپورت ساڭلاقتارى جارىس الاڭىندا جاسىنداي جارقىلداپ، دەنە تاربيەنىڭ تارتىمدى كەرەمەتىن كورسەتىپ، ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋ“ سىندى وليمپيادا ناقىلىن ءتۇسىندىردى. وليمپيادا ۇلكەن شاڭىراعىنىڭ مۇشەلەرى ىنتىماقتاسا سەلبەسىپ، ءارقايسى اقپارات قۇرالدارى دەن قويا جالعاپ تاراتىپ، حابارلاپ، دۇنيە جۇزىنە بەيجيڭ قىسقى وليمپيادا سپورت جارىسى الاڭىنىڭ ءىشى - سىرتىنداعى ءاربىر تارتىمدى ساتتەردى كورسەتتى. بەيجيڭ قىسقى وليمپيادا سپورت جارىسىنا قاتىناسقان، قولداۋ كورسەتكەن جانە ۇلەس قوسقان بارشا دوستارعا العىس ايتامىن، سىزدەر دە قىسقى وليمپيادانىڭ كەرەمەتىن ايگىلەدىڭىزدەر. ”قوس وليمپيادا قالاسى“، تاڭعاجايىپ قىسقى وليمپيادا سپورت جارىسى. بەيجيڭ قىسقى وليمپيادا سپورت جارىسى الەمدىك قار - مۇز سپورتىنىڭ جاڭا ءداۋىرىن اشتى، ءبىز وسىناۋ ۇمىتىلماس قىسقى وليمپيادا ساتتەرىن جادىمىزعا ساقتاپ، قول ۇستاسا وتىرىپ ادامزاتتىڭ اناعۇرلىم جارقىن بولاشاعىنا جول اشايىق.

  حالىقارالىق وليمپيادا كوميتەتىنىڭ ءتوراعاسى باح ارناۋ ءسوز سويلەدى. ول بىلاي دەدى: وسى كەزەكتى قىسقى وليمپيادا سپورت جارىسىنداعى قىسقى وليمپيادا قىستاعى وزىندىك شەبەر ويمەن ەرەكشەلەنىپ، الاڭ - سارايلار تاڭداي قاقتىرىپ، ۇيىمداستىرۋ قىزمەتى تاڭعاجايىپ، ەرەن بولدى. ءبىز بەيجيڭ قىسقى وليمپيادا سپورتىن ۇيىمداستىرۋ كوميسسياسىنا، جۇڭگو ۇكىمەت تاراۋلارىنا جانە ءبىزدىڭ جۇڭگوداعى بارلىق سەلبەستىك سەرىكتەرىمىز بەن دوستارىمىزعا ەڭ ىقىلاستى العىس ايتامىز. بۇل شىنىمەن دە ءبىر كەزەك تەڭدەسسىز قىسقى وليمپيادا سپورت جارىسى بولدى، ءبىز جۇڭگونىڭ قار - مۇز سپورتىندا ءىرى ەلگە اينالعانىن قارسى الامىز. سوڭىندا باح 24 - كەزەكتى قىسقى وليمپيادا سپورت جارىسىنىڭ اياقتاعاندىعىن جاريالادى، سونداي - اق بۇكىل الەم جاستارىن 4 جىلدان كەيىن ميلان − كورتينا دامپەززودا باس قوسىپ، 25 - كەزەكتى قىسقى وليمپيادا سپورت جارىسىنا قاتىناسۋعا ۇندەدى.

  ۇلكەن ەكراندا «قوش بول! بولاشاققا بىرگە اتتانايىق!» اتتى قىسقا مەتراجدى فيلم قويىلىپ، وسى كەزەكتى قىسقى وليمپيادا سپورت جارىسى اياقتالار ساتتە، جۇڭگو حالقىنىڭ دۇنيە ءجۇزىنىڭ جەر - جەرىنەن كەلگەن سيلى قوناقتارمەن قيماستىقپەن قوشتاسقان سۇيىسپەنشىلىگى ورنەكتەلدى.

  ساعات 21دەن 35 مينۋت وتكەندە 2008 - جىلعى بەيجيڭ قىسقى وليمپيادا سپورت جارىسىنىڭ ارقاۋ ءانى «مەن جانە سەن» ءانىنىڭ اسەرلى اۋەنى قايتا قالىقتاپ، ساۋلە شاشقان وليمپيادانىڭ 5 ساقيناسى الاڭ ورتاسىنان جوعارى كوتەرىلدى. نەگىزگى الاۋ ”ۇلكەن قار گۇلى“ باياۋ ءتۇسىرىلىپ، «قار گۇلى» ءانىنىڭ پاك، تۇڭعيىق اۋەنىندە، 16 كۇن جانعان وليمپيادا الاۋى بىرتىندەپ ءسوندى.

  سالتاناتتى وتشاشۋ اسپانعا كوتەرىلىپ، دەنە تاربيە الاڭىنىڭ جوعارى كەڭىستىگىندە 5 ساقينالى ءپىشىن، جۇڭگو، اعىلشىن تىلىندەگى ”الەم حالقى ءبىر وتباسى“ جازۋىن قۇرادى، ءان اۋەنى، شاپالاق ءۇنى، الاقايلاعان داۋىس زەڭگىر اسپاندى جاڭعىرتىپ، مەملەكەتتىك دەنە تاربيە الاڭى دۋمان تەڭىزىنە اينالدى.

  بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى، مەملەكەتتىك كەڭەس مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، بەيجيڭدەگى مەملەكەتتىك ساياسي كەڭەستىڭ ورىنباسار ءتوراعالارى، سونداي - اق ورتالىق اسكەري ىستەر كوميتەتىنىڭ مۇشەلەرى اياقتاۋ سالتىنا قاتىناستى.

  حالىقارالىق وليمپيادا كوميتەتىنىڭ جاۋاپتىلارى، ت.ب اياقتاۋ سالتىنا قاتىناستى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.