− 24 -كەزەكتى قىسقى وليمپيادا سپورت جارىسىنىڭ اياقتاعاندىعىن قىزۋ قۇتتىقتايمىز
2 - ايدىڭ 20 - كۇنى كەشتە ساۋلەتتى وتشاشۋلار بەيجيڭنىڭ تۇنگى اسپانىن جارقىراتتى، 24 - كەزەكتى قىسقى وليمپيادا سپورت جارىسىنىڭ اياقتاۋ سالتى سالتاناتپەن وتكىزىلدى. شاتتىقتىڭ شالقار تەڭىزىندە، قيماستىقپەن قوشتاسۋ بارىسىندا بەيجيڭ قىسقى وليمپيادا سپورت جارىسىنىڭ شىمىلدىعى تولىق تابىسپەن جابىلدى.
وتكەن 16 كۇندە بەيجيڭ، وسىناۋ ءارى بايىرعى، ءارى زاماناۋي حالىقارالىق قالا، دۇنيە ءجۇزى بويىنشا تۇڭعىش ”قوس وليمپيادا قالاسى“ دۇنيە جۇزىنە ەستەن كەتپەس وليمپيادا سپورت جارىسىنىڭ سالتاناتتى جينالىسىن تاعى ءبىر مارتە ۇسىنىپ، الەم حالىقتارىنا جۇڭگو حالقىنىڭ بەلسەندى، ءورشىل رۋحىن جانە كۇش - قايراتىن كورسەتىپ، وليمپيادا سپورتىنىڭ تىڭ كەرەمەتىن تاعى ءبىر مارتە جازىپ قالدىردى.
91 مەملەكەت پەن ءوڭىر، 3000عا جۋىق قار - مۇز سپورت ساڭلاعى، 7 ۇلكەن ءتۇر، 109 كىشى ءتۇر... بۇل جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى تۇڭعىش رەت مەجەلى مەرزىمىندە وتكىزىلگەن الەمدىك كەشەندى دەنە تاربيە سالتاناتى، ورنالاستىرىلعان جارىس تۇرلەرى مەن جارىققا شىققان التىن مەدال ەڭ كوپ ءبىر كەزەكتى قىسقى وليمپيادا سپورت جارىسى بولدى، ول اناعۇرلىم كوپ قار - مۇز سپورت ساڭلاقتارىنا ارماندارىن ىسكە اسىرۋ ورايىن جاراتتى. بەيجيڭ قىسقى وليمپيادا سپورت جارىسىنىڭ تولىق تابىستى بولۋى جۇڭگونىڭ حالىقارالىق قوعامعا بەرگەن ايبىندى ۋادەسىن ورىنداپ، ءار ەلدىڭ قار - مۇز سپورتى ساڭلاقتارىنىڭ ءوز مۇمكىندىكتەرىن ەڭ جوعارى شەكتە ساۋلەلەندىرۋىنە ساحنا ازىرلەدى، سونداي - اق ىندەت قىسپاعىنداعى دۇنيە جۇزىنە سەنىم مەن كۇش - قايرات ۇستەدى.
بەيجيڭ قىسقى وليمپيادا سپورت جارىسى باستالاردىڭ الدىندا ءتوراعا شي جينپيڭ: ”جۇڭگو جاق شىن ىقىلاسپەن دۇنيە جۇزىنە ۇنەمدى، حاۋىپسىز، تارتىمدى وليمپيادا سپورت جارىسى سالتاناتتى جينالىسىن تارتۋ ەتىپ، ’اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋداي‘ وليمپيادا ناقىلىن امالياتتا ايگىلەيدى“، - دەپ سالتاناتپەن جاريالادى. بەيجيڭ قىسقى وليمپيادا سپورت جارىسىنىڭ تابىستى وتكىزىلۋى، ءوزىنىڭ تارتىمدى، كەرەمەت، ەرەن بولۋىمەن دۇنيە ءجۇزىنىڭ نازارىن اۋدارىپ، جاقسى باعاسىن الىپ، وليمپيادا سپورتى تاريحىندا ايشىقتى ارىپتەرمەن تاماشا ءبىر ورنەك كەستەلەدى! بەيجيڭ قىسقى وليمپيادا سپورت جارىسى دۇنيە ءجۇزى قار - مۇز سپورتىنىڭ دامۋىنداعى ماڭىزدى بەلەسكە اينالدى!
بۇل تەڭدەسسىز تارتىمدى سالتاناتتى جينالىس بولدى. وليمپيادا رەكوردتارى ۇزدىكسىز جاڭالانىپ، جوعارى قيىندىقتاعى ارەكەتتەر ءجيى - ءجيى كورىنىس بەردى، جاس ساڭلاقتار بوي كورسەتىپ، سارابدال ساقا ساڭلاقتار ءوز كەرەمەتتەرىن جالعاستىرا كورسەتتى، باسەكەلەستەر ءبىر - بىرىنە كوڭىل ءبولىپ، ءوزارا ىنتالاندىرىپ وتىردى... تارتىمدى ساتتەر ءار ەل قار - مۇز سپورت ساڭلاقتارىنىڭ ءوزىن تىنباي الۋەتتەندىرگەن، ءوز مۇمكىندىكتەرىن ەڭ جوعارى شەكتە ساۋلەلەندىرگەن سايىس بارىسىنا كۋا بولىپ، وليمپيادا رۋحىن جاندى ءتۇسىندىردى.
جارىس الاڭىندا جۇڭگونىڭ قار - مۇز سپورت ساڭلاقتارى ايانباي سايىسىپ، باتىلدىقپەن سايىسىپ، شەبەرلىكپەن سايىسىپ، 9 التىن مەدال، 4 كۇمىس مەدال، 2 قولا مەدال الۋداي جاقسى ناتيجەگە قول جەتكىزىپ، ”ومىردە قانشا رەت شايقاس ورايى كەلەدى دەيسىڭ“ دەگەن ايبىندى سەرتتى امالياتتا ايگىلەپ، جاڭا رەكوردتار جاراتىپ، جۇڭحۋا پەرزەنتتەرىن اسقاق جىگەرمەن قايراتتانا ۇمتىلۋعا، قاجىماي - تالماي كۇرەس جۇرگىزۋگە شابىتتاندىردى جانە ىنتالاندىردى.
بۇل وڭاي - وسپاق قولعا كەلمەگەن ەرەكشە ۋادە بولدى. ىندەت اكەلگەن قيىندىقتار مەن قولايسىزدىقتار الدىندا، جۇڭگو جاسىل، بىرگە يگىلىكتەنەتىن، اشىق، پاك وليمپيادا وتكىزۋ ۇستانىمىن ۇستانىپ، ىندەتتىڭ ىقپالىن بار كۇشپەن ەڭسەردى. ”قاراپايىم، حاۋىپسىز، تارتىمدى بولۋ“ سىندى جارىس وتكىزۋ تالابىن كورنەكتىلەندىرۋدەن، ”قوس جابىق اينالىمدىق“ باسقارۋدى قاتاڭ تياناقتاندىرۋعا، ونان الاڭ - سارايلارداعى ىندەتتەن ساقتانۋ شارالارىن كەمەلدەندىرۋگە دەيىنگى الۋان - الۋان پارمەندى شارالار ىندەتتىڭ تارالۋ قاتەرىن بارىنشا تومەندەتىپ، جارىسقا قاتىناسۋشىلار مەن قاتىستى قىزمەتكەرلەردىڭ، جۇڭگو حالقىنىڭ سالاماتتىق حاۋىپسىزدىگىن ءونىمدى قامتاماسىز ەتىپ، دۇنيە جۇزىنە ادامزاتتىڭ قيىندىق پەن سىن - سايىستى جەڭىپ شىعۋىنىڭ قۋاتتى كۇشىن كورسەتتى.
بۇل كەمەلدىلىككە تالپىنۋدىڭ ەرەن كورىنىسى بولدى. جۇڭگونىڭ جوباسى، جۇڭگونىڭ تەحنيكاسى، جۇڭگونىڭ ماتەريالى، جۇڭگونىڭ جاراتۋى، جۇڭگونىڭ جاساۋى نەبىر ”دۇنيە جۇزىلىك ماڭداي الدى ورەنى“ جاراتتى، شوۋگاڭ شاڭعىمەن سىرعاناپ سەكىرۋ تۇعىرى ونەركاسىپتەن قالعان مۇراعاتتى تيبىن وزگەرتىپ قايتا پايدالانۋدى جۇزەگە اسىرىپ، بارلىق جارىس الاڭ - سارايلارىنا جاسىل ەلەكتر قۋاتى قولدانىلدى، نەگىزگى الاۋعا وليمپيادا سپورتى تاريحىندا تۇڭعىش رەت ”ميكرو الاۋ“ ءتاسىلى پايدالانىلدى... بۇلاردىڭ بارلىعى عىلىم - تەحنيكانىڭ، پاراساتتىڭ، جاسىلدىقتىڭ، ۇنەمشىلدىكتىڭ ايقىن ەرەكشەلىگىن كورسەتتى؛ ”قار ايداعار“، ”قار قۇتى“، ”قاردا سامعاۋ“، ”مۇز جىبەكباۋ“، ”مۇز تەكشە“، ”مۇز قىرمىزى“... وليمپيادا الاڭ - سارايلارى سپورتشىلاردىڭ جوعارى دەڭگەيدە باسەكەلەسۋىنە جوعارى ساپالى ساحنا ازىرلەدى؛ نەگىزگى مەديا ورتالىعى ءتۇرلى جۇمىس جۇرگىزۋ، قىزمەت وتەۋ، قامتاماسىز ەتۋ قىزمەتتەرىن ويداعىداي ىستەپ، اقپاراتتىق حابارلار ارقىلى جەتكىزۋ، جالعاپ تاراتۋ فۋنكتسيالارىنىڭ حاۋىپسىز جۇرگىزىلۋىنە شىنايى كەپىلدىك ەتىپ، بەيجيڭ قىسقى وليمپيادا سپورت جارىسىنىڭ سالتاناتىن بۇكىل دۇنيە جۇزىنە جان - جاقتى، ستەرەولدى، جاندى تۇردە جەتكىزۋگە مىعىم تىرەك ازىرلەدى؛ قىسقى وليمپيادا قىستاعى حاۋىپسىز، جىلى، جايلى بولۋىمەن ەرەكشەلەنىپ، ”سپورتشىلاردىڭ قامىن ويلاۋدى، سپورتشىلاردىڭ قاجەتىن شەشۋدى“ شىن مانىندە جۇزەگە اسىردى... ەرەن بولۋعا تالپىنىپ، كەمەلدىلىككە ۇمتىلعان جۇڭگو ءارقايسى جارىستاردى ۇيىمداستىرۋ، جارىسقا قىزمەت وتەۋ، قولباسشىلىق ەتۋ، ورنالاستىرۋ سياقتى قىزمەتتەردى بار كۇشپەن ويداعىداي ىستەپ، ”وليمپيادانىڭ جاڭا ۇلگىسىن“ ورناتتى.
ءتوراعا شي جينپيڭ تەرەڭ ماعىنادا بىلاي دەپ اتاپ كورسەتتى: ”ەجەلدەن بەرى وليمپيادا سپورتى ادامزاتتىڭ بەيبىتشىلىككە، ىنتىماققا، العا باسۋعا دەگەن تاماشا تالپىنىسىن ارقالاعان“. قازىر 100 جىلدا بولماعان وزگەرىس پەن عاسىرلىق ىندەت قاباتتاسىپ، دۇنيە ءجۇزى جاڭا الماعايىپ وزگەرىس كەزەڭىنە ءوتىپ، ادامزات كوپ قات - قابات سىناققا ءدوپ كەلدى. ىندەتتى قالاي جەڭىپ شىعۋعا بولادى؟ ىندەتتەن كەيىنگى دۇنيە ءجۇزىن قالاي قۇرۋ كەرەك؟ بۇل دۇنيە جۇزىندەگى ءار ەل حالقى ورتاق كوڭىل ءبولىپ وتىرعان كەلەلى ماسەلە ءارى ءبىز، ءسوز جوق، جاۋاپ بەرۋگە ءتيىستى كوكەي تەستى كەلەلى تاقىرىپ. بەيجيڭ قىسقى وليمپيادا سپورت جارىسىنىڭ تولىق تابىسپەن ءوتۋى ادامزاتتىڭ ءبىر جەر شارى قىستاعىندا ءومىر ءسۇرىپ جاتقاندىعىن، تاعدىرلارىنىڭ تىعىز بايلانىستى ەكەندىگىن، ءتۇرلى قىسىلتاياڭ جاھاندىق سىناقتار الدىندا، تەك ىنتىماق پەن سەلبەستىكتى كۇشەيتىپ، جاڭا ءداۋىردىڭ ”نۇح كەمەسىنە“ بىرگە وتىرىپ، بەيبىتشىلىكتىڭ، ىنتىماقتىڭ، العا باسۋدىڭ ءداۋىر سيمفونياسىن اسقاقتاتقاندا عانا، ەرتەڭىمىزدىڭ اناعۇرلىم جارقىن بولاتىندىعىن تاعى ءبىر مارتە كورسەتىپ بەردى.
وليمپيادا سپورتىنىڭ اۋەلگى ماقساتىن ەسىمىزدە بەرىك ساقتاپ، دۇنيە ءجۇزىنىڭ بەيبىتشىلىگىن بىرگە قورعايىق. بەيبىتشىلىك ادامزاتتىڭ ورتاق ارمانى جانە اسقاق نىساناسى. وليمپيادا سپورتى بەيبىتشىلىك ءۇشىن جارىققا شىققان، بەيبىتشىلىكتىڭ ارقاسىندا وركەندەگەن. بىلتىر 12 - ايدا بىرلەسكەن مەملەكەتتەر ۇيىمى جينالىسى ءبىر اۋىزدى كەلىسىممەن وليمپيادا كەزىندە سوعىستى توقتاتا تۇرۋ تۋرالى قارار ماقۇلداپ، دەنە تاربيە ارقىلى بەيبىتشىلىكتى جەبەۋدى ۇندەپ، حالىقارالىق قوعامنىڭ ورتاق جۇرەك ۇنىنە ۋاكىلدىك ەتتى. تاريح قارسىلاسۋدىڭ ەشنارسەگە پايداسىز ەكەندىگىن، قايتا اپاتتىق زارداپ اكەلەتىندىگىن، بەيبىت دامۋ، سەلبەسىپ تەڭ يگىلىكتەنۋ عانا دۇنيەنىڭ دۇرىس جولى ەكەندىگىن قايتا - قايتا دالەلدەدى. العا باسۋ جولىندا ءبىز ءوزارا قۇرمەت ەتۋگە، تەڭ تۇرعىدا مامىلە جاساۋعا، كەڭەسۋگە، اقىلداسۋعا تاباندى بولىپ، الاۋىزدىقتان ارىلۋعا، قاقتىعىستاردى جويۋعا قۇلشىنىپ، باياندى بەيبىت دۇنيە ءجۇزىن بىرگە قۇرۋىمىز كەرەك.
ءبىز وليمپيادا سپورتى رۋحىن اسقاقتاتىپ، حالىقارالىق قوعامعا ورتاق سىن - سايىستارعا ىنتىماقتاسا توتەپ بەرەيىك. ادامزات تاپ بولعان ءتۇرلى قيىن ماسەلەلەر الدىندا، وليمپيادا سپورتى دۇنيە ءجۇزىنىڭ ۋاقىتشا قيىندىقتى بىلەك بىرىكتىرە جەڭۋىن، ىنتىماقتاسا سەلبەسۋىن ىلگەرىلەتۋدە ماڭىزدى ءارى وزىندىك دارا رول اتقاردى. كەزەكتە ىندەت ءالى ورشۋدە، كليمات وزگەرىسى، لاڭكەستىك قاتارلى الەمدىك ماسەلەلەر تولاسسىز جارىققا شىعۋدا. وليمپيادا سپورتى دارىپتەگەن ”اناعۇرلىم ىنتىماقتاسۋ“ ءدال قازىرگى داۋىرگە ەڭ قاجەت بولىپ وتىر، حالىقارالىق قوعام ”اناعۇرلىم ىنتىماقتى بولۋعا“ ءتيىس. اماليات شاعىن قايىقتىڭ داۋىلدى تولقىنعا توتەپ بەرە المايتىندىعىن، الىپ كەمە عانا اساۋ تولقىنعا توتەپ بەرە الاتىندىعىن، دۇنيە جۇزىندەگى ءار ەلدىڭ 190 نەشە شاعىن قايىقتا بولعاننان گورى، ءبىر ۇلكەن كەمەدە بولىپ، اناعۇرلىم جارقىن بولاشاققا بىرگە قۇشاق اشقانى ءجون ەكەندىگىن تولىق دالەلدەدى. ءار ەل تەك ءبىر نيەتپەن ىنتىماقتاسىپ، قول ۇستاسا سەلبەسىپ، بولاشاققا بىرگە اتتانعاندا عانا ءتۇرلى حاۋىپ - قاتەرگە، سىن - سايىسقا ءونىمدى توتەپ بەرە الادى. العا باسۋ جولىندا ءبىز ناعىز كوپ جاقتىلىقتى امالياتتا ايگىلەپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى قورعاپ، حالىقارالىق زاڭدى نەگىز ەتكەن حالىقارالىق ءتارتىپتى قورعاپ، جاراسىمدى، سەلبەسەتىن حالىقارالىق ۇلكەن شاڭىراقتى بىرگە قۇرۋىمىز كەرەك.
وليمپيادا سپورتىنىڭ باس ماقساتىن امالياتتا ايگىلەپ، ادامزاتتىڭ العاباسارلىق ىستەرىن ۇزدىكسىز ىلگەرىلەتەيىك. وليمپيادا سپورتىنىڭ نىساناسى − ادامنىڭ جان - جاقتى دامۋىن جۇزەگە اسىرۋ. قازىر الەمدىك دامۋ ءۇردىسى اۋىر سوققىعا ۇشىراۋدا، ادامزاتتىڭ دامۋ كورسەتكىشى 30 جىلدان بەرى تۇڭعىش رەت تومەندەپ وتىر. ءبىراق داۋىل سوعىپ، نوسەر قۇيعان كۇندە دە ادامزات قالايدا العا باسۋى كەرەك. مەيلى قانداي قيىندىققا جولىقساق تا، ءبىز حالىقتى وزەك ەتكەن دامۋ يدەياسىنا تاباندى بولىپ، دامۋدى جەبەۋدى، حالىق تۇرمىسىن قامتاماسىز ەتۋدى الەمدىك ماكرولىق ساياساتتاعى كورنەكتى ورىنعا قويىپ، قازىرگى دامۋ سەلبەستىك مەحانيزمىنىڭ ونىمدىلىكتى سايكەسە ارتتىرۋىن جەبەپ، بۇكىل الەمنىڭ تەڭگەرىمدى دامۋىن جەبەۋىمىز كەرەك. العا باسۋ جولىندا ءبىز ءداۋىر اعىمىنا ۇيلەسىپ، بەيبىتشىلىك، دامۋ، ادىلدىك، تۋراشىلدىق، دەموكراتيا، ەركىندىك سىندى بۇكىل ادامزاتقا ورتاق قۇندىلىقتاردان جازباي، تۇرلىشە وركەنيەتتەردىڭ ارالاسۋىن، ءوزارا ۇلگى الۋىن جەبەپ، ادامزاتتىڭ تاعدىرلاس ورتاق تۇلعاسىن بىرگە قۇرۋىمىز كەرەك.
ءتوراعا شي جينپيڭ بىلاي دەپ اتاپ كورسەتتى: ”2008 - جىلعى ’ورتاق الەم، ورتاق ارماننان‘ 2022 - جىلعى ’بولاشاققا بىرگە اتتانۋعا‘ دەيىن جۇڭگو وليمپيادا سپورتىنا بەلسەنە ات سالىسىپ، وليمپيادا رۋحىن قاجىماي - تالماي اسقاقتاتتى، وليمپيادا مۇراتىنىڭ تاباندى تالپىنۋشىسى، ارەكەتتەنۋشىسى بولدى“. بەيجيڭ قىسقى وليمپيادا سپورت جارىسىنىڭ تابىستى وتكىزىلۋى ادامداردىڭ وليمپيادا سپورتىنا دەگەن ىستىق ىقىلاسىن ونان ارى قاۋلاتىپ، اناعۇرلىم كوپ ادامدى قار - مۇز سپورتىنا كوڭىل بولۋگە، ونى قىزۋ سۇيۋگە، وعان قاتىناسۋعا باستاپ، دۇنيە جۇزىنە شۇعىلالى، باي دا قۋاتتى، اشىق، ۇمىتكە تولى جۇڭگو وبرازىن ايگىلەپ، بۇكىل الەمدىك قار - مۇز سپورتىنىڭ دامۋىنا اناعۇرلىم كەڭ ءورىس اشىپ، وليمپيادا سپورتىنىڭ دامۋى مەن وليمپيادا رۋحىنىڭ تارالۋى ءۇشىن بەلسەندى ۇلەس قوستى. بولاشاققا بەت العاندا جۇڭگو قاشاندا تاريحتىڭ دۇرىس جاعىندا تۇرىپ، ادامزاتتىڭ العا باسۋ جاعىندا تۇرىپ، قاشاندا دۇنيە ءجۇزى بەيبىتشىلىگىنىڭ قۇرۋشىسى، الەمدىك دامۋدىڭ ۇلەسكەرى، حالىقارالىق ءتارتىپتىڭ قورعاۋشىسى بولىپ، تاريح دوڭعالاعىنىڭ نۇرلى بولاشاقتى بەتكە الىپ العا زىمىراۋىن ىلگەرىلەتىپ، الەمدىك وليمپيادا ىستەرى ءۇشىن ۇزدىكسىز تۇردە تىڭ، اناعۇرلىم كەسەك ۇلەس قوسادى.
”جاس وركەنى بۇرشىك جارىپ، بۇتا - بۇرگەن شوپتەردىڭ، تاۋ - دالادان لەبى ەستى گۇل شىرايلى كوكتەمنىڭ“. بارشا تىرشىلىك قايتا ويانار وسى مەزگىلدە، ءبىز بەيجيڭ قىسقى وليمپيادا سپورت جارىسى سالتاناتىن ماقتانىش ەتەمىز، سونىمەن بىرگە ءبىز 4 جىلدان كەيىن كەزدەسۋدى شىنايى كۇتەمىز. وليمپيادا ۇلى ارمانىنا بىرگە بولەنىپ، وليمپيادا ۇلى داڭقىن بىرگە جاراتىپ، ادامزاتتىڭ اناعۇرلىم جارقىن بولاشاعىنا قاراي بىرگە اتتانايىق!
(شينحۋا اگەنتتىگىنىڭ 2 - ايدىڭ 20 - كۇنى بەيجيڭنەن بەرگەن حابارى)
