− رايونىمىزداعى ءار ۇلت كادر - بۇقاراسى بەيجيڭ قىسقى وليمپيادا سپورت جارىسىنىڭ تابىسپەن وتكىزىلگەندىگىن سالتانات ەتتى
□ انار بۇلت / شينجياڭ گازەتىنىڭ تىلشىلەرى
2 - ايدىڭ 20 - كۇنى بەيجيڭ 24 - كەزەكتى قىسقى وليمپيادا سپورت جارىسى اياقتالدى، جۇڭگو سالتاناتتى ۋادەسىن ورىنداپ، دۇنيە جۇزىنە ءبىر كەزەكتى قاراپايىم، حاۋىپسىز، تارتىمدى وليمپيادا سپورت جارىسى سالتاناتتى جينالىسىن تارتۋ ەتتى. رايونىمىزداعى ءار ۇلت كادر - بۇقاراسى الۋان ءتۇرلى تاسىلدەرمەن بەيجيڭ قىسقى وليمپيادا سپورت جارىسىنىڭ اياقتاۋ سالتىن كوردى. وسىناۋ قىسقا عانا ون نەشە كۇنگە قايىرىلا قاراعاندا، تارتىمدى، مەيىرگە تولى سانسىزداعان كورىنىستەر ۇمىتىلعىسىز ەستە قالدى، وليمپيادانىڭ نۇر شۇعىلاسى جۇرەكتەردى تەربەتىپ، كوپشىلىك شىن جۇرەكتەن قىسقى وليمپيادا سپورت جارىسىن سالتانات ەتىپ، وتاندى ماقتانىش تۇتتى! وليمپيادا سپورتىنىڭ رۋحى تيانشان پەرزەنتتەرىن جاڭا جورىقتا قاجىماي - تالماي كۇرەس جۇرگىزۋگە، ارمانعا جەتۋدى مۇرات ەتىپ، بولاشاققا بىرگە اتتانۋعا اناعۇرلىم جىگەرلەندىردى.
”جۇڭگو دەنە تاربيە ۋاكىلدەر ۇيىرمەسى قيىندىقتاردى جەڭىپ، قاجىرلىلىقپەن ىلگەرىلەپ، قىسقى وليمپيادا سپورت جارىسىنا قاتىناسقاننان بەرگى تاريحتاعى ەڭ تاماشا ناتيجەنى جاراتتى. جۇڭگو ساڭلاقتارىنىڭ مەدال العاندىعىن كورگەندە، اسەرلەنگەن كوڭىل كۇيىمدى تىلمەن ايتىپ جەتكىزە المايمىن“! التاي ايماقتىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى نۇرمانات قابدىل بەيجيڭ قىسقى وليمپيادا سپورت جارىسى اياقتاۋ سالتىنىڭ تىكە تاراتىلىمىن كورگەننەن كەيىن مىنالاردى ءبىلدىردى: قىسقى وليمپيادا سپورت جارىسىنىڭ سوڭعى ساتىندەگى ”قار - مۇز ىنتاسىن“ بەرىك يگەرىپ، التاي ايماعىنىڭ ايرىقشا قار - مۇز بايلىعى باسىمدىلىعىن ساۋلەلەندىرىپ، ءبىرسىپىرا جاڭا شارالاردى قولدانىپ، قار - مۇز كاسىپ سالاسىنىڭ، قار - مۇز سپورتىنىڭ جوعارى ساپالى دامۋىن ىلگەرىلەتۋ كەرەك.
الاتاۋ ساعاسى كەدەنى جالپىلىق كاسىپ ءبىرىنشى ءبولىمىنىڭ باستىعى جاڭ شياۋدۇڭ قىزمەتتەستەرىمەن بىرگە بەيجيڭ قىسقى وليمپيادا سپورت جارىسى اياقتاۋ سالتىنىڭ تىكە تاراتىلىمىن كوردى، قار گۇلى الاۋ تەكشەسى الىپ قىزىل ءتۇستى جۇڭگو تۇيىنشەگىنە وزگەرگەندىگىن كورگەندە، اسەرلەنە شاپالاق سوقتى. ”بۇل وتە كەرەمەت بولدى، ناعىز جۇڭگوشا رومانتيكا بولدى“. جاڭ شياۋدۇڭ بىلاي دەدى: جۇڭگو تۇيىنشەگى ىرىس - قۇتتىڭ، ىنتىماقتىڭ نىشانى، مۇنداعى وزگەرىستىڭ ماعىناسى توتەنشە تاماشا بولدى، بەيجيڭ قىسقى وليمپيادا سپورت جارىسى كوپشىلىكتىڭ قار - مۇز سپورتى جونىندەگى تانىمى مەن تۇسىنىگىن اناعۇرلىم تەرەڭدەتتى، ءوزىم دە وسى سەبەپتى قار - مۇز سپورتىنا قۇمارتىپ قالدىم.
بەيجيڭ قىسقى وليمپيادا سپورت جارىسى باستالعاننان كەيىن شينجياڭ باييۇن حالىقارالىق شاڭعى الاڭىنا كەلگەن شاڭعى اۋەسكەرلەرى بىرتىندەپ كوبەيدى. سونىمەن وسى شاڭعى الاڭى تۇندە شاڭعى تەبۋ ءتۇرىن اشتى، جۋىقتان بەرى تەك تۇندە شاڭعى تەبۋدىڭ وزىنەن كۇنىنە قابىلداعان شاڭعىشىلار 1000نان استى. ”بەيجيڭ قىسقى وليمپيادا سپورت جارىسى ادامداردىڭ قار - مۇز سپورتىنا قاتىناسۋ ىنتاسىن قوزعادى، كوپتەگەن اتا - انالار بالالارىن ەرتە كەلىپ شاڭعى تەپتى“، - دەدى شينجياڭ باييۇن حالىقارالىق شاڭعى الاڭىنىڭ ورىنباسار باس ديرەكتورى ليۋ يانان. قىزعىندى راي قالىپتاستىرۋ ءۇشىن بۇل شاڭعى الاڭى قار قۇرال - جابدىقتار زالىندا قىسقى وليمپيادا سپورت جارىسىن قويىپ بەردى، شاڭعى اۋەسكەرلەرى ارت - ارتىنان كەلىپ جارىستى تاماشالادى. ”ءبىز بەيجيڭ قىسقى وليمپيادا سپورت جارىسىنىڭ تابىسپەن وتكىزىلۋى سىندى ماڭىزدى ورايدى مىقتى يگەرىپ، دامۋدى جەدەلدەتىپ، قاتتى بولشەك ۇسىنىلىمىن مولايتىپ، قىزمەت وتەۋ قابىلەتىن جوعارىلاتىپ، ءتىپتى دە كوپ ادامدى شينجياڭعا كەلىپ شاڭعى تەبۋگە باۋراپ، شينجياڭنىڭ قار - مۇز شارۋاشىلىعىنىڭ دامۋىنا كۇش قوسامىز“، - دەدى ول.
بەيجيڭ قىسقى وليمپيادا سپورت جارىسى كەزىندە، بيڭدۇندۇننىڭ سۇيكىمدى وبرازى سانسىز جانكۇيەردى باۋرادى. ”مەن مەكتەپتە ءدال تاس ويما تەحنيكاسىن ۇيرەنىپ جاتقان ەدىم، تاستان ءبىر بيڭدۇندۇن ويىپ جاساپ، بەيجيڭ قىسقى وليمپيادا سپورت جارىسىنا دەگەن تىلەگىمدى بەينەلەيمىن“. بۇراتالا قالاسى تەحنيك جۇمىسشىلار مەكتەبىنىڭ وقۋشىسى لۋ جيانگو بىلاي دەدى: بەيجيڭ قىسقى وليمپيادا سپورت جارىسىنىڭ تابىستى وتكىزىلۋى دۇنيە جۇزىنە جۇڭگونىڭ ناقتى قۋاتىن ايگىلەدى، اياقتاۋ سالتى اياقتالعاندىقتى بىلدىرمەيدى، ءسوز جوق، تەرەڭ دە ۇزاق ۋاقىتتىق ىقپال تۋدىرادى.
2 - ايدىڭ 20 - كۇنى كەشتە كۇشار قالاسى ۇلىقشات قالاشىعى چيڭشۇي قىستاعىنداعى كادر - بۇقارا بەيجيڭ قىسقى وليمپيادا سپورت جارىسى اياقتاۋ سالتىنىڭ تىكە تاراتىلىمىن كورگەن كەزدە جۇزدەرىنەن ماقتانىش پەن باقىت مەن مۇندالاپ تۇردى. وسى قىستاقتىڭ پارتيا ياچەيكا شۋجيى تۇرسۇناي ءشادىل بىلاي دەدى: كوكتەم كىرگەننەن كەيىن قىستاق ”ەكى كوميتەتى“ مەن ”ۇعىسۋ، تيىمدىلىك جاساۋ، توعىستىرۋ“ بويىنشا قىستاقتا تۇراتىن قىزمەت اترەتى كادرلار مەن بۇقارانى باستاپ، ءبىر جاعىنان، بەيجيڭ قىسقى وليمپيادا سپورت جارىسىنا نازار اۋدارسا، ەندى ءبىر جاعىنان، كوكتەمگى ەگىس ءوندىرىسىن الدىن الا جوسپارلادى، وليمپيادا رۋحى دامۋ سەنىمىنە دەم بەردى، كوپشىلىك بىرگە كوكونىس پارنيكتەرىن جوندەدى، كوكتەمگى ەگىس ماتەريالدارىن دايىندادى، باعىمشىلىق تەحنيكاسى كۋرسىنا قاتىناستى، دامۋ تەبىنى مىعىم بولدى. ”وليمپيادا رۋحىنىڭ شابىتتاندىرۋىندا، ءبىز بۇكىل قىستاقتاعى ادامداردىڭ باقىتتى تۇرمىسى ءۇشىن قاجىماي - تالماي قۇلشىنامىز“، - دەدى تۇرسۇناي ءشادىل.
وليمپيادا ساڭلاقتارىنىڭ ايانباي سايىسۋ رۋحى شينجياڭ اۋىل شارۋاشىلىق داشۋەسى كومپيۋتەر شۋەيۋانىنىڭ وقۋشىسى ءدىلارىم تۇردىيۇسۇپكە دە شابىت بەردى. ”مەن گۋ ايليڭ، ۋ داجيڭ، شۇي مىڭتاۋ قاتارلى سپورتشىلاردىڭ جارىس مايدانىندا قۇلشىنا سايىسىپ، وتانعا داڭق اپەرگەن ءساتىن كورگەنىمدە، جۇرەگىمدى ماقتانىش سەزىم كەرنەدى“. ول بىلاي دەدى: وليمپيادا سپورت ساڭلاقتارى سياقتى قۇلشىنا سايىسىپ، كاسىپتىك بىلىمدەردى ويداعىداي ۇيرەنىپ، جاستىق كوكتەمنىڭ جالىنىن قاۋلاتىپ، ءوز ارمانىمدى جۇڭگو ارمانىمەن توعىستىرىپ، قاجىماي - تالماي قايراتتانا العا باسامىن.
(ءتىلشى جاڭ يانفاڭ، قاتىناسقان تىلشىلەر لي ياڭ، جاڭ يۇنمەي، رىن جياڭ، جاڭ تيڭ، جاڭ جىلي، چىن چياڭۋي، ەرىكتى ءتىلشى ياڭ ۋيشۋان، جوۋ چيۋلي)
