− بەيجيڭ 2022 - جىلعى قىسقى وليمپيادا سپورت جارىسىنىڭ اياقتاۋ سالتىنان ەستەلىك
□ شينحۋا اگەنتتىگىنىڭ تىلشىلەرى
كوكتەم باسىندا بەيجيڭ قىسقى وليمپيادا سپورت جارىسى ءبىر شوق قار گۇلىمەن جىلى لەپ ىشىندە باستالدى؛ يۋانشياۋ مەرەكەسىنەن كەيىن قار گۇلى شامدارى جۇلدىزشا جايناپ، قىسقى وليمپيادا سپورت جارىسىنا قوش ايتار ءسات تە كەلىپ جەتتى.
بۇگىن تۇندە 2008 - جىلعى جارقىراعان بەس ساقينا 2022 - جىلعى ”ۇلكەن قار گۇلى“ نەگىزگى الاۋىمەن بىرگە ساۋلە شاشىپ، ”الەم حالقى ءبىر وتباسى“، ”ONE WORLD ONE FAMILY“ تاماشا تىلەكتەرمەن ارلەنىپ، جارقىراي نۇرلاندى.
بەس قۇرلىقتان كەلگەن سپورتشىلار، قىزمەتكەرلەر، ەرىكتىلەر، اقپارات قۇرالدارى تىلشىلەرى ”قۇس ۇياسىندا“ تاعى ءبىر رەت شاتتىقپەن باس قوستى. كوكتەم مەرەكەسىنەن يۋانشياۋ مەرەكەسىنە دەيىن، كوپشىلىك ۇمىتىلماس جۇڭگو جىلىن بىرگە وتكىزدى، سونداي - اق ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋداي“ وليمپيادا ناقىلى ونان ارى جارقىرادى.
سايىسۋ مەن باسىپ وزۋ، قىزۋ سۇيىسپەنشىلىك پەن ىنتىماق جارىس الاڭىن تولقىتتى؛ الاقايلاۋ مەن شاپالاق ءۇنى، اتتەگەن - اي مەن كوز جاسى جۇرەكتەردى تەبىرەنتتى. وسى ساتتە بارلىق سۇيىسپەنشىلىك وسى ارادا توپتالىپ، توعىسىپ، شەشەك اتتى.
بۇگىن ءتۇندى قيماستىقپەن اتتاندىردىق؛ بۇگىن تۇندە بولاشاققا قۇشاق جايدىق.
ءاربىر سپورتشى اسەرلى سەزىممەن قىسقى وليمپيادا سالتاناتىن بىرگە سومدادى، بۇگىن ءتۇن ولارعا ءتان مەرەيلى ءسات
بۇكىل الەمدەگى سان ميلليونداعان كورەرمەننىڭ كوز تىگۋىندە نورۆەگيا سپورتشىسى تەرەس يۋحاۋگ پەن رەسەي وليمپيادا كوميتەتىنىڭ سپورتشىسى الەكساندر بولشۋنوۆ ىلگەرىندى - كەيىندى دالالىق شاڭعى ايەلدەردىڭ 30 كيلومەترگە جانە ەرلەردىڭ 50 كيلومەترگە توپتىق اتتانۋ (ەركىن شەبەرلىك) ءتۇرى بويىنشا ەڭ جوعارى سيلىق الۋ تۇعىرىنا شىقتى. قۇتتىقتاۋ مەن قۇرمەتكە تولى شاپالاق ءۇنى ىشىندە سيلىق يەگەرلەرى مەدالدى كەۋدەسىنە اپارىپ، قولدارىنداعى گۇل شوعىن كۇشپەن بۇلعاپ، ارماندارى ورىندالعان اسەرلى ءساتتى دۇنيە جۇزىمەن بىرگە ءبولىستى.
ولار وسى ءبىر بايىرعى ءتۇردىڭ باس بايگەسىن الدى، ادامزاتتىڭ ەڭ جوعارى شەككە سايىس جاريالاۋداعى ەڭ قاراپايىم تالپىنىسىن ارقالاعان بۇل ءتۇر دەنە قۋاتى مەن ەرىك - جىگەردى بىردەي سىننان وتكىزەدى. قيىندىقتان قورىقپاي، باتىلدىقپەن ناتيجە جاراتقان بۇل كورىنىس وتكەن ون نەشە كۇندە ۇزدىكسىز جارىققا شىعىپ، دۇنيە ءجۇزىنىڭ جەر - جەرىنەن كەلگەن قىسقى وليمپيادا ساڭلاقتارى بىرىنەن سوڭ ءبىرى وليمپيادا سپورت جارىسىنىڭ كەرەمەتتەرىن جاراتتى.
”قۇس ۇياسىنداعى“ ”ۇلكەن مۇز ايدىنىندا“ 12 مۇشەلدىڭ مودەلىنەن جاسالعان الىپ ”كونكي“ بالالاردى باسىپ الىپ، قالىقتاي سىرعانادى. الىپ جۇڭگو تۇيىنشەگىنىڭ ايشىقتاۋىندا «شاتتىق جىرى» اۋەنىمەن ءارقايسى ۋاكىلدەر ۇيىرمەسىندەگى سپورتشىلار ارشىندى قاداممەن الاڭعا شاتتانا كىردى.
بەيجيڭ قىسقى وليمپيادا سپورت جارىسىنا قاتىناسقان 3000عا جۋىق سپورتشىنىڭ كوبى قار - مۇز سپورتىندا ءداستۇرلى قۋاتتى ەلدەن كەلگەن، ولار بەيجيڭدە كەرەمەتتەردى جالعاستىردى؛ سونداي - اق ءبىرتالايى قار - مۇز بايلىعى كەمشىن مەملەكەتتەر مەن وڭىرلەردەن كەلگەن، ولاردىڭ جارىس الاڭىندا تۇرۋىنىڭ ءوزى كەرەمەت تابىس. ءۇندىستاننىڭ بىردەن - ءبىر سپورتشىسى مۇحاممەد اليب حان، 30 جىلدان بەرى مەكسيكادان تۇڭعىش رەت قىسقى وليمپيادا سپورت جارىسىنا قاتىناسقان مۇزدا مانەرلەپ سىرعاناۋ ساڭلاعى دونوۆان كارريللو... ولار قىزۋ سۇيىسپەنشىلىك جانە تاباندىلىق ارقىلى ءوزارا تۇسىنىك، دوستىق، ىنتىماق جانە ءادىل باسەكە سىندى وليمپيادا رۋحىن پارمەندى ءتۇسىندىردى.
ءوز الاڭىندا سايىسقا تۇسكەن جۇڭگو دەنە تاربيە ۋاكىلدەر ۇيىرمەسى اسقاق بەينەمەن قىسقى وليمپيادا سپورت جارىسىنىڭ الاڭىن نۇرعا بولەدى. قىسقى وليمپيادا سپورت جارىسىن وتكىزۋ ءوتىنىشى ءساتتى قابىلدانعان كەزدە، قىسقى وليمپيادا سپورت جارىسىنىڭ 100 نەشە شاعىن ءتۇرىنىڭ شامامەن ۇشتەن ءبىرى جۇڭگودا ەجەلدەن ورىستەتىلمەگەن ەدى. ال بۇگىنگى كۇنى 7 ۇلكەن ءتۇر، 15 بولىمشە ءتۇر بويىنشا ”بارلىق جارىس تۇرىنە قاتىناسۋ“ نىساناسى جۇزەگە استى، كەزىندە ”مۇز سپورتىندا قۋاتتى، قار سپورتىندا ءالسىز“ جۇڭگونىڭ تۇڭعىش رەت قار سپورتى ءتۇرى بويىنشا العان مەدال سانى مۇز سپورتى تۇرىنەن استى، اۋەلى، 9 التىن، 4 كۇمىس، 2 قولا مەدال، جيىنى 15 مەدالمەن تاريحتاعى ەڭ تاماشا ناتيجەنى جاراتتى.
اياقتاۋ سالتىنداعى ەكراندا سپورتشىلاردىڭ جارىس الاڭىندا مەدال الىپ، ەرلىكپەن شايقاسقان تارتىمدى ساتتەرى ءبىر - بىرلەپ كورسەتىلىپ، ادامداردىڭ وي الەمىن اسەرلى سەزىم تولقىعان جارىس الاڭىنا قايتا باستادى. بۇلار قىسقى وليمپيادا سپورت جارىس الاڭىنداعى ءبىر - بىرلەپ ناتيجە جاراتقان جانە ارمانداردى ورىنداعان حيكايالاردىڭ ىقشام كورىنىسى عانا. سپورتشىلار دارالىققا يە ”مەن“ ارقىلى بەيجيڭ قىسقى وليمپيادا سپورت جارىسىنىڭ ارمانعا قۇلاش سەرمەۋ كارتيناسىن بىرگە سۇلبالادى.
باسەكەلىك جارىس الاڭىنىڭ سىرتىندا دا اسەرلى حيكايالار جارىققا شىقتى. ساڭلاقتار زناكتارىن اۋىستىرىپ، ءبىر - ءبىرىن جۇباتىپ، بىرگە قۇتتىقتادى، ءدال وسىنداي نە قۋانعان، نە وكىنگەن، نە اسەرلەنگەن وليمپيادا ساتتەرى جارقىراعان جۇلدىزداي جارىس الاڭىنىڭ ءىشى - سىرتىن نۇرعا بولەدى.
وسى ساتتە، مەيلى تابىسقا جەتسىن، الدە ساتسىزدىككە جولىقسىن، ولار اقىرى بارلىق قىسىمدى تاستاپ، شاتتانا كۇلدى. سپورتشىلار ەڭ قاراپايىم، ەڭ تىكە ءتاسىل ارقىلى قول تەلەفوندارىمەن وزدەرىن سۋرەتكە ءتۇسىرىپ، شاتتانا قول بۇلعاپ، اپپارات كوزىن الىستان ءسۇيىپ قۋانىشتارىن ءبىلدىرىپ جاتتى... وسى ءسات ولارعا ءتان مەرەيلى شاق.
ءاربىر قىزمەتكەر تارتىمدى جارىس ىستەرىن قامتاماسىز ەتۋ ءۇشىن قاجىرلىلىقپەن بوداۋ بەردى، بۇگىنگى ءتۇن ولارعا العىس ايتاتىن ءسات
چيڭحۋا داشۋەسىنىڭ 21 جاستاعى تولىق كۋرس وقۋشىسى سۇن زىيۇي قولىنا تۇمشالامالى شام ۇستاپ، وزىنە ەڭ تانىس ساحنا − ”قۇس ۇياسىنىڭ“ قاق ورتاسىندا تۇرىپ، تىلەكتەر مەن شاپالاق ۇنىنە بولەندى. ول وزگە 5 ەرىكتىمەن بىرگە 18 مىڭنان استام قىسقى وليمپيادا سپورت جارىسى ەرىكتىلەرىنىڭ ۋاكىلى رەتىندە، ناق مايداندا كوپتەگەن العىسقا يە بولدى.
2008 - جىلى بەيجيڭ وليمپيادا سپورت جارىسىندا ”ەرىكتىلەرگە قۇرمەت ءبىلدىرۋ“ بۋىنى قوسىلعان ەدى، وسىدان سوڭ بۇل وليمپيادا سپورت جارىسى اياقتاۋ سالتىنىڭ داستۇرىنە اينالعان بولاتىن. ال بۇگىن وسى كورىنىس ”قۇس ۇياسىندا“ قايتالاندى، مۇندا اتتاپ وتكەنى زىمىراپ وتە شىققان ۋاقىت، ماڭگىلىك بولعانى قىستىڭ قاقاعان ىزعارىنا دا بوي بەرمەيتىن جىلۋلىق پەن ماسكى دە قالقالاۋعا امالسىز قالعان كۇلىمسىرەۋ بولدى.
سۇن زىيۇي بەيجيڭ قىسقى وليمپيادا سپورت جارىسى باستالۋ سالتىنىڭ ۇلگىلى ەرىكتىسى، ونىڭ باستالۋ سالتىنداعى ”Wel come t o China (جۇڭگوعا كەلگەندەرىڭىزدى قارسى الامىز)“ دەگەن ءسوزىن امەريكاندىق قاردا سىڭار تاقتايمەن سىرعاناۋ سپورتشىسى تسسا مودى ەسىنە العان كەزدە ەرىكسىز كوزىنە جاس الدى. 18 جاستاعى مودى ”جۇڭگولىقتاردىڭ دوستىق كوڭىلى مەن قوناقجايلىلىعىن“ جۇرەگىندە ساقتادى.
انە سونداي ساحنادا تۇرعان يانشان داشۋەسىنىڭ تولىق كۋرس وقۋشىسى جاڭ حۇڭبو وتكەن ون نەشە كۇندە چۇڭليدىڭ ۇسكىرىگىندە جارىس جولىنا كىرەتىن ەسكتى كۇزەتىپ، كۋالىكتى تەكسەرۋ بارىسىن سانسىز قايتالادى. قىزمەت شارت - جاعدايى ماشاقاتتى بولعانىمەن، ول ەشقاشان كەيىمەدى. ”قىسقى وليمپيادا سپورت جارىسىنا ەرىكتى قىزمەت وتەۋى وتە تارتىمدى بولدى، وزگەلەرگە كومەكتەسۋمەن بىرگە، كوپتەگەن بىلىمدەردى ۇيرەندىك“. ول وسى رەتكى تاپتىرمايتىن كەشىرمەنى ەرەكشە قاستەرلەدى، ەرىكتى بولىپ تاڭدالعانىن باعىنىڭ جانعانىنا بالادى.
2008 - جىلى بەيجيڭ وليمپيادا سپورت جارىسىنداعى ەرىكتىلەردىڭ جايدارى جۇزدەرى دۇنيە ءجۇزىنىڭ ەسىندە ۇمىتىلماستاي ساقتالدى؛ 2022 - جىلى وسى ”كوك ءتۇستى بەينەلەر“ ءباز - باياعىسىنداي ”قوس وليمپيادا قالاسىنىڭ“ ەڭ جاقسى تانىسقىسىنا اينالدى. دەنە تاربيە باسەكەلىك جارىسى، الاڭ - سارايلاردى باسقارۋ، ءتىل جاعىنان قىزمەت وتەۋ، اقپارات اينالىمى سياقتى 41 كاسىپتىك سالادا ەرىكتىلەردىڭ قاربالاس بەينەسىن بارلىق جەردەن كورەسىز. ەكرانداعى جايدارى جۇزدەر قىسقى وليمپيادا سپورت جارىسىنداعى سەنىمدى، بايىپتى جاستىق ورالدىڭ ەرەكشە كورىنىسىنە اينالدى.
حىسۋان تەكسەرۋگە جاۋاپتى ”داباي“، ەمدەۋ سومكەسىن اسىنىپ شاڭعىمەن جۇرگەن شيپاگەرلەر، قاتىناسقا جەتەكشىلىك ەتكەن قىزمەتكەرلەر، اسحانانىڭ، تاعامجايدىڭ ارتقى شەپ قىزمەتىن قامتاماسىز ەتۋشىلەر... اق قار - كوك مۇزدا سانسىز قۇرىلىسشىلار، قىزمەت وتەۋشىلەر، باسقارۋشىلار ءۇن - ءتۇنسىز ۇلەس قوسىپ، جارىس الاڭىنداعى ءار رەتكى سايىسقا مەدەت بەرۋدىڭ ءۇنىن اسقاقتاتتى.
ەڭ سوڭىندا، ەرىكتىلەر قولدارىنداعى تۇمشالامالى شامدارىن بىرگە جاقتى. ءدال سول ساتتە، كورەرمەندەر شوق - شوق قىزىل جۇرەك گۇلدەرىن الىپ، تۇتاس الاڭ - سارايدى سۇيىسپەنشىلىك تەڭىزىنە اينالدىردى.
سۋدان تۇنىق سۇيىسپەنشىلىكتەر توعىسى.
وزدەرىن نۇرلاندىرىپ، دۇنيە جۇزىنە جىلۋ سيلادى. بۇگىنگى ءتۇن دۇنيە ءجۇزى مەيىر - ماحابباتتى سىزدەرگە سيلايدى!
ءاربىر تال شىبىقتا قيماستىق سۇيىسپەنشىلىك مەن مۇندالادى، بۇگىن ءتۇن ءبىزدىڭ دوستىعىمىزدىڭ ماڭگى جالعاساتىندىعىنا كۋا بولاتىن ءسات
جەر بەتى ەكرانىنىڭ مۇز ايدىنىندا بيشىلەر بۇرالا بيگە باسىپ، بىرتىندەپ ”جىلاۋىق تال“ بەينەسىنە ەندى. تال - تەرەكتەر جايقالىپ، تەرەك ۇلپاسى جەر بەتىن جاپتى، قوشتاسۋ قيماستىعى جۇرەككە بويلادى. «اتتاندىرىپ سالۋ» اتتى تانىس اۋەن ىشىندە ۇقساماعان جاستاعى، ۇقساماعان كاسىپتەگى 365 قاراپايىم جان نۇر شاشقان تال شىبىقتاردى قۇشاقتاپ الاڭ ورتالىعىنا توپتالدى.
”تال شىبىقتى سىندىرىپ، ۇزاتىپ سالۋ سۇيىسپەنشىلىگىن بەينەلەۋ“ بايىرعى ءانىن شىرقاپ قوشتاسۋ ءساتى بۇگىن تاعى دا سول تەرەڭ سۇيىسپەنشىلىكپەن قايتالاندى. جۇڭگولىقتار تاعى ءبىر مارتە ەرەكشە رومانتيكالىعىنان پايدالانىپ، دۇنيە جۇزىندەگى دوستارىنا ءبىر جىلدىڭ 365 كۇنىندەگى وزگەرمەس ساعىنىشىن جەتكىزدى.
اقىرىندا ءبىز ايرىلىسار ساتكە كەز بولدىق، جان قيارلىقپەن شايقاسقان، ىنتىماقپەن، دوستىقپەن وتكەن قىسقى وليمپيادا سپورت جارىسىنىڭ تارتىمدى ساتتەرى جۇرەكتەردىڭ تۇكپىرىنە تەرەڭ ۇيالادى.
”بۇل ءبىر رەتكى تەڭدەسسىز قىسقى وليمپيادا سپورت جارىسى بولدى، ءبىز جۇڭگونىڭ قار - مۇز سپورتىنداعى ءىرى ەلگە اينالعاندىعىن قارسى الامىز“. حالىقارالىق وليمپيادا كوميتەتىنىڭ ءتوراعاسى باح بەيجيڭ قىسقى وليمپيادا سپورت جارىسىن جوعارى باعالادى، ”وليمپيادا رۋحىنىڭ وسىنشاما شۇعىلا شاشۋى جۇڭگو حالقىنىڭ ءبىز ءۇشىن حاۋىپسىز وليمپيادا ساحناسىن تابىستى قۇرعاندىعىنىڭ ارقاسى“.
جۇڭگو ەڭ جاقسى شىنايىلىعىمەن جانە قىزۋ سۇيىسپەنشىلىگىمەن ۋادەسىن ورىنداپ، دۇنيە جۇزىنە ۇنەمدى، حاۋىپسىز، تارتىمدى قىسقى وليمپيادا سپورت جارىسىن تارتۋ ەتتى. ىندەتپەن شايقاسقان جاعدايدا، وسى رەتكى ءدال ۋاقىتىندا وتكىزىلگەن الەمدىك دەنە تاربيە سالتاناتى دۇنيە ءجۇزى مادەنيەتىنىڭ اۋىس - كۇيىسى، جۇرەكتەردىڭ توعىسۋى ءۇشىن قىمباتتى دانەكەر بولدى. وسى ارادا كوپشىلىك تاعدىرلاستىق توعىسۋدى تەرەڭ سەزىنىپ، ”ادامزاتتىڭ تاعدىرلاس ورتاق تۇلعاسى“ ۇستانىمى جۇرەكتەرگە تەرەڭ ۇيالادى.
الاڭ جيەكتەرىنىڭ جارىق شاشۋىنا ىلەسە، يتاليالىق 2 بالاقاي قولمەن جاسالعان جەر شارىن يتەرىپ الاڭ ورتالىعىنا قاراي بەتتەدى. كەلەسى كەزەكتى قىسقى وليمپيادا سپورت جارىسىن وتكىزەتىن ورىن ”قانات قوسقان قوس قالا · كۇش بىرىكتىرىپ، بىرگە شۇعىلا شاشۋ“ اتتى 8 مينۋتتىق قويىلىممەن شىمىلدىعىن اشتى. 4 جىلدان كەيىن ومىرشەڭ كۇشى شار تاراپقا تارالعان زاماناۋي قالا ميلان تاۋ - وزەنمەن قورشالعان كورتينا دامپەززومەن قول ۇستاسىپ، قىسقى وليمپيادا سپورت جارىسى سالتاناتىمەن ورتاقتاساتىن بولادى. تاۋ - وزەن قالامەن، تابيعات قۇرىلىستارمەن ءوزارا جاراسىم تاۋىپ، بىرگە بيگە باسۋ بارىسىندا ادامزات پەن جاراتىلىس ورتاسىنداعى ءبىر - بىرىنە دەگەن قۇرمەت، ءوزارا تىلدەسۋ ايگىلەندى.
وليمپيادا ناقىلىنا قوسىلعان ”اناعۇرلىم ىنتىماقتى بولۋدان“ (Together) بەيجيڭ قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىنىڭ نەگىزگى تاقىرىپتىق ۇرانى ”بولاشاققا بىرگە اتتانايىق“ (Together f or a Shared Future) دەگەنگە دەيىن، ونان يتاليانىڭ ”8 مينۋتتىق“ ”قانات قوسقان قوس قالا · كۇش بىرىكتىرىپ، بىرگە شۇعىلا شاشۋىنا“ (Dual ity，Together) دەيىن 3 ”Together“ ءبىر جەردەن شىعىپ، بۇكىل ادامزاتتىڭ ىنتىماقتى ءبىر اۋىزدىلىعىن، ۋاقىتتىق قيىنشىلىقتى بىرگە جەڭەتىن بەكىمىن تۇگەلدەي بەينەلەدى.
”مەن جانە سەن جۇرەكتەس بولىپ، جەر شارى قىستاعىندا بىرگە جاسايمىز...“ بالالار «مەن جانە سەن» اتتى ءاندى قايتالاي شىرقاعاندا بەس ساقينا 2008 - جىلعى سياقتى فورمادا كوتەرىلىپ، ”ۇلكەن قار گۇلى“ الاۋىمەن ارالاسىپ الاڭعا ءتۇسىرىلدى. ەكى كەزەكتى وليمپيادا سپورت جارىسى وسى ارادا توعىستى. 2008 - جىلدان 2022 - جىلعا دەيىن ”قوس وليمپيادا قالاسى“ وليمپيادا ءۇشىن تىڭ داڭق ۇستەدى.
”ۇلكەن قار گۇلى“ بىرتە - بىرتە جەرگە ءتۇستى، بالالاردىڭ ءسابي ۇنىمەن ايتىلعان «قار گۇلى» ءان اۋەنىندە اشىلۋ سالتىندا توڭىرەكتى جالت قاراتقان ”ميكرو الاۋ“ ءسوندى.
جارقىلداقتار كوككە كوتەرىلىپ، تۇنگى اسپاندى جارىقتاندىردى. ”قۇس ۇياسى“ ىشىندەگى جۇرتشىلىق شاتتانا ءان ايتىپ، الاقايلاپ، شاپالاق سوعىپ، ەڭ قىزۋ ىنتامەن قوشتاستى. مۇمكىن، كۇن ەرتەڭ ارامىزدى اسقار تاۋ، الىپ مۇحيت ءبولىپ جاتسا دا، ءبىراق دوستىعىمىز ماڭگى جالعاسا بەرمەك!
بۇگىن ءتۇن الاۋ ءسوندى، الايدا وليمپيادا نۇرى جۇرەكتەردى نۇرلاندىرا بەرمەك؛
بۇگىن ءتۇن قيماستىقپەن قوشتاستىق، الايدا وسى رەتكى ايرىلىسۋ تەك قانا قايتا قاۋىشۋىمىز ءۇشىن بولماق.
الداعى جولىمىز ءالى دە ۇزاق، بەيمالىم سايىسقا تولى، وليمپيادا ءبىزدى ءبىر اراعا ىنتىماقتاسۋعا مۇمكىندىك جاساپ، باتىلدىعىمىزدى شىڭداپ، قيىندىققا قاسقايا قارسى اتتاندىردى.
جينالۋ − الاۋداي لاۋلاۋ، تاراۋ − جۇلدىزداي جامىراۋ. مەيلى قاي مەزگىل بولسىن، قاي جەردە بولسىن، جەر شارىنداعى ءاربىر ”مەن“ ءتىپتى دە تاماشا ەرتەڭ ءۇشىن نۇر شاشىپ، جىلۋ تاراتادى.
بۇگىن ءتۇن قوشتاسۋدان كەيىن، بولاشاققا بىرگە اتتانامىز!
(تىلشىلەر حۋاڭ ياۋ، ۋاڭ زىميڭ، جي يە، جاۋ شۇي، ۋاڭ يۇڭ)
(شينحۋا اگەنتتىگىنىڭ 2 - ايدىڭ 20 - كۇنى بەيجيڭنەن بەرگەن حابارى)
