انار بۇلت / شينجياڭ گازەتىنىڭ ءتىلشىسى يۇي جياڭيان، ەرىكتى ءتىلشى جاڭ جۇن 2 - ايدىڭ 27 - كۇنى ۇرىمجىدەن حابارلايدى. 2 - ايدىڭ 22 - كۇنى جۇڭگو مۇناي حيميا باتىس سولتۇستىك مۇناي الابى سەرىكتەستىگىنەن قۋانىشتى حابار تارادى، شۇنبەي مۇناي الابى 4 - ءنومىرلى وپىرما بەلدەۋدەن تاعى ءبىر مىڭ توننالىق قۇدىق بۇرعىلاندى. وسىعان دەيىن بيىل جىل باسىنان بەرى باتىس سولتۇستىك مۇناي الابى مىڭ توننالىق 3 قۇدىقتى ىركەس - تىركەس بۇرعىلادى.
مۇندا شۇنبەي 8 - ءنومىرلى وپىرما بەلدەۋگە ورنالاسقان 801X قۇدىعىندا 1 - ايدىڭ 26 - كۇنى ولشەنگەن كۇندىك مۇناي - گاز بالاماسى 1007.6 تونناعا جەتىپ، 8 - ءنومىرلى وپىرما بەلدەۋدەن 100 ميلليون توننا دارەجەلى مۇناي - گاز الابىنا جاڭادان قول جەتەتىندىگى مەجەلەندى؛ 4 - ءنومىرلى وپىرما بەلدەۋگە ورنالاسقان شۇنبەي 5H-4 قۇدىعى 1 - ايدىڭ 27 - كۇنى بولەككە ءبولىپ، قىشقىلداندىرىلىپ قىسىم ارقىلى ايىرۋعا وزگەرتىلگەننەن كەيىن، كۇندىك مۇناي - گاز بالاماسى 1360 تونناعا جەتىپ، جۇڭگو مۇناي حيمياسىندا ءبىر قۇدىقتان ەڭ جوعارى ءونىم الۋ رەكوردىن جاراتتى.
باتىس سولتۇستىك مۇناي الابى سەرىكتەستىگىنىڭ ساناعى بويىنشا، قازىرگە دەيىن، شۇنبەي مۇناي - گاز الابىندا بۇرعىلانعان مىڭ توننالىق قۇدىق 11گە جەتىپ، مۇنداعى مىڭ توننالىق 9 قۇدىق 4 - ءنومىرلى وپىرما بەلدەۋگە ورنالاسقان.
2021 - جىلى 3 - ايدا اشىلىپ قۇرىلعاننان بەرى، شۇنبەي 4 - ءنومىرلى وپىرما بەلدەۋدە جالپى 13 قۇدىق سىناق رەتىندە قازىلىپ، جالپى 168 مىڭ توننا شيكى مۇناي، 340 ميلليون تەكشەمەتر تابيعي گاز وندىرىلگەن. قازىر شيكى مۇنايدىڭ كۇندىك ءتۇسىمى 2043 تونناعا، تابيعي گاز 3 ميلليون 760 مىڭ تەكشەمەترگە ارتىپ، شۇنبەي مۇناي الابىنىڭ جالپى ءتۇسىمىنىڭ ％78ىن يەلەپ، باتىس سولتۇستىك مۇناي الابىنىڭ قور توپتاۋ مىندەتىن الدىن الا نورمادان اسىرا ورىنداۋىنا نەگىز قالادى.
”4 - ءنومىرلى بەلدەۋدەن ءبىر جىلعا جەتپەيتىن ۋاقىتتا مىڭ توننالىق 9 قۇدىق بارلاندى، بۇل ادامدى جىگەرلەندىرەدى. مەن 4 - ءنومىرلى بەلدەۋدىڭ كارتاسىن جۇمىس ۇستەلىمە قويىپ قويدىم، سۇراعاندارعا كورسەتەمىن“، - دەدى جۇڭگو مۇناي حيميا ونەركاسىپ توبى شەكتى سەرىكتەستىگىنىڭ باسالقاسى ما يۇڭشىڭ بارلاپ اشۋدا مىندەتىن مەجەدەن اسىرعان باتىس سولتۇستىك مۇناي الابى سەرىكتەستىگى شۇنبەي 4 - ءنومىرلى وپىرما بەلدەۋگە ايرىقشا القاۋ ايتىپ.
باتىس سولتۇستىك مۇناي الابى سەرىكتەستىگىنەن ۇعىسۋىمىزشا، شۇنبەي 41X قۇدىعى 4 - ءنومىرلى وپىرما بەلدەۋدە بۇرعىلانعان ەلەۋلى بايقاۋداعى ەڭ شەشۋشى ءبىر قۇدىق ەكەن، بۇل قۇدىق 10 نەشە جىلدان بەرى جۇڭگو مۇناي حيميا ونەركاسىپ توبىنىڭ سىناقتا تۇڭعىش رەتكى كۇندىك ءتۇسىمى مىڭ تونناعا جەتكەن قۇدىق بولعان. قازىر 4 - ءنومىرلى وپىرما بەلدەۋدىڭ قۇرىلىسى دۋماندى ءجۇرىلىپ، بۇرعىلاۋ قۇدىقتارى قاتارلاسا ەڭسە كوتەردى.
بارلاۋدا ەلەۋلى بايقاۋعا قول جەتكىزۋمەن قاتار، جەر بەتىندەگى قۇرىلىس تا قاۋىرت ىلگەرىلەتىلۋدە. 2021 - جىلى باتىس سولتۇستىك مۇناي الابى 4 - ءنومىرلى وپىرما بەلدەۋدە قۇبىر تورابىن قۇرۋدى، سونداي - اق شۇنبەي مۇناي الابى بىرلەسكەن پۋنكتى قۇرىلىسى ينجەنەرياسىن باستاعان. 2021 - جىلى 8 - ايدا شۇنبەي مۇناي الابى بىرلەسكەن پۋنكتى سالىنىپ ىسكە قوسىلعاننان كەيىن، بيىل 2 - ايدىڭ 13 - كۇنى شۇنبەي مۇناي - گاز الابى 2 - رايون 110 كيلوۆولتتىق ەلەكتر جەتكىزۋ، كەرنەۋ وزگەرتۋ ينجەنەرياسى ىسكە قوسىلىپ، 4 - ءنومىرلى وپىرما بەلدەۋدىڭ حاۋىپسىز، جوعارى ءونىمدى، جاسىل اشىلۋىنا اناعۇرلىم سەنىمدى ەلەكتر قۋاتى كەپىلدىگىن ازىرلەدى. 2 - ايدىڭ 16 - كۇنى شۇنبەي مۇناي الابى بىرلەسكەن پۋنكتىنىڭ 2 - تىزبەك تابيعي گاز ءبىر جايلى ەتۋ قوندىرعىسى ىسكە قوسىلىپ، شيكى مۇنايدى ءبىر جايلى ەتۋ قۋاتى جىلىنا ءبىر ميلليون 500 مىڭ تونناعا، تابيعي گازدى ءبىر جايلى ەتۋ قۋاتى جىلىنا ءبىر ميلليارد 380 ميلليون تەكشەمەترگە كوتەرىلىپ، باتىس سولتۇستىك مۇناي الابىنىڭ جوعارى ساپالى دامۋدى ىلگەرىلەتۋىنە پارمەندى تىرەك ازىرلەدى.
