جۇڭگوشا شيپاگەرلىك ارقىلى ءتىپتى دە كوپ ناۋقاستى ۋايىمنان ارىلتىپ، قيىنشىلىعىن شەشەمىن

مۇشە يۇي مەي:

جۇڭگوشا شيپاگەرلىك ارقىلى ءتىپتى دە كوپ ناۋقاستى ۋايىمنان ارىلتىپ، قيىنشىلىعىن شەشەمىن

□ انار بۇلت / شينجياڭ گازەتىنىڭ ءتىلشىسى جاڭ يۇنمەي

　　2 - ايدىڭ 21 - كۇنى، ءتىلشى ءۇرىمجى قالالىق 4 - حالىق شيپاحاناسىنىڭ (شينجياڭ رۋحاني گيگەنا ورتالىعى) جۇڭگوشا شيپاگەرلىك پەن باتىسشا ەمدەۋدى ۇشتاستىرۋ ءبولىمىنىڭ ناۋقاستار اۋماعىنا كىرگەندە، مۇرنىنا كۇشتى ەرمەن ءيىسى كەلدى. ”بۇل شيپاحانامىزدا بىلتىر 7 - ايدا جاڭادان قۇرىلعان ءبولىم، جيىنى 40 ناۋقاس توسەگى بار، قازىرگە دەيىن جيىنى 345 ناۋقاستى قابىلداپ ەمدەدىك“، - دەدى بولىمدە قىزمەتكە جەتەكشىلىك ەتىپ جاتقان مەملەكەتتىك ساياسي كەڭەستىڭ شينجياڭداعى مۇشەسى، شيپاحانانىڭ ورىنباسار باستىعى يۇي مەي.

　　يۇي مەيدىڭ جۇڭگوشا شيپاگەرلىكپەن شۇعىلدانعانىنا 30 جىلعا تايادى. 2020 - جىلى 12 - ايدا، ول ءۇرىمجى قالالىق جۇڭگوشا شيپاگەرلىك شيپاحاناسىنان ءۇرىمجى قالالىق 4 - حالىق شيپاحاناسىنا (شينجياڭ رۋحاني گيگەنا ورتالىعى) اۋىسىپ كەلدى. كەلە سالا يۇي مەي جۇڭگوشا شيپاگەرلىكتىڭ رۋحاني گيگەنا سالاسىندا قولدانىلۋىن زەرتتەۋگە كىرىستى: ”جۇڭگوشا شيپاگەرلىك كىتاپتارىنان پسيحولوگيالىق كوپتەگەن اۋرۋلاردىڭ بەلگىلەرىن، جۇڭگوشا شيپاگەرلىكتى قولدانۋعا قاتىستى نازاريالاردى بايقاۋعا بولادى، ودان اۋرۋ سەبەبىن انىقتاپ قانا قالماستان، وزىندىك قۇنى بار ەمدەۋ ءتاسىلىن دە تابۋعا بولادى“.

　　جۇڭگوشا شيپاگەرلىك ارقىلى ەمدەۋدىڭ ارتىقشىلىعىن رۋحاني گيگەنا سالاسىندا ساۋلەلەندىرىپ، ءتىپتى دە كوپ ناۋقاستى ۋايىمىنان ارىلتىپ، قيىنشىلىعىن شەشۋگە بولا ما؟ يۇي مەي اماليات بارىسىندا وسى سۇراۋدىڭ جاۋابىن ىزدەدى.

　　كوپ وتپەي، شيپاحاناداعى جۇڭگوشا شيپاگەرلىك دارىندىلارى قوسىنى نەگىزىندە ءبىر جاڭا ءبولىم قۇرىلدى، ”جۇڭگوشا شيپاگەرلىك پەن باتىسشا ەمدەۋدى ۇشتاستىرۋ ءبولىمى جۇڭگوشا شيپاگەرلىك ىلىمىندەگى كوپتەگەن دارىندىلاردى وزىنە باۋرادى، ناۋقاستار دا ۇناتتى“، - دەدى يۇي مەي، ”ەمدەۋ ءبولىمى ەمدەۋگە قابىلداعان ناۋقاستاردان سىرت، جۇڭگوشا شيپاگەرلىك پەن باتىسشا ەمدەۋدى ۇشتاستىرۋ ءبولىمى باسقا بولىمدەرمەن سەلبەسىپ 1300دەن استام ادام - رەت بىرلەسىپ دياگنوز قويۋعا قاتىناستى. وسىدان رۋحاني گيگەنا سالاسىنىڭ جۇڭگوشا شيپاگەرلىككە دەگەن سۇرانىسنىڭ وتە جوعارى ەكەندىگىن بايقاۋعا بولادى“.

　　”ازاماتتاردىڭ سالاماتتىعىن رۋحاني سالاماتتىقتان بولە قاراۋعا بولمايدى، تۇتاس قوعام پسيحولوگيالىق سالاماتتىققا نازار اۋدارۋدى كۇشەيتۋ ءتيىس. سونىمەن بىرگە، مەن ءوز ارتىقشىلىعىمدى ساۋلەلەندىرىپ، جۇڭگوشا شيپاگەرلىك پەن باتىسشا شيپاگەرلىكتى ۇشتاستىرىپ ەمدەۋ تاسىلىنەن پايدالانىپ، رۋحاني گيگەنا سالاسىندا كوبىرەك ءىس تىندىرامىن“، - دەدى يۇي مەي.

　　ءبىر جاعىنان، اماليات بارىسىندا بەلسەندىلىكپەن ىزدەنىس جاساپ، ەندى ءبىر جاعىنان، قىزمەتپەن ۇشتاستىرىپ، مۇقيات مىندەت اتقارىپ، جاۋاپكەرشىلىگىن ادا ەتتى.

　　وسى جىلداردا، يۇي مەي تاپسىرعان ۇسىنىس جوبالار جۇڭگوشا شيپاگەرلىك، دارىگەرلىك ىستەرىنىڭ دامۋىن ىلگەرىلەتۋ، قوعامدانعان شۇعىل جاعدايعا توتەپ بەرۋ جۇيەسى قۇرىلىسى، سونداي - اق پسيحولوگيالىق سالاماتتىق جۇيەسى قۇرىلىسى سياقتى مازمۇنداردى قامتىپ، بارلىعىنا ۇستىنە العان قاتىستى مەكەمە - ورىندار مۇقيات، جۇيەلى جاۋاپ بەردى.

　　”بۇلاردىڭ ىشىندەگى كەيبىر پىكىرلەر مەن ۇسىنىستار قابىلداندى“، - دەدى يۇي مەي، مىسالى، پسيحولوگيالىق سىناق نىسانىن ەرەكشە سالالارمەن شۇعىلداناتىن ادامداردىڭ قىزمەتكە كىرۋىندەگى دەنساۋلىق تەكسەرۋىنە قوسۋ، ورتا، باستاۋىش مەكتەپ تاربيەسى كەزەڭىندەگى جاستار مەن وسپىرىمدەردىڭ پسيحولوگيالىق سالاماتتىعىنا كوڭىل ءبولۋ، قوعامدانعان پسيحولوگيالىق سالاماتتىق اقىل - كەڭەسى جانە قىزمەت وتەيتىن دارىندى شوعىرىن جەتىلدىرۋ سياقتىلار.

　　بيىل، يۇي مەي نازارىن تاعى رۋحاني گيگەنامەن شۇعىلداناتىن قىزمەتكەرلەرگە اۋداردى. ”ءبىر جىلدان استام ۋاقىتتىق قىزمەت ارقىلى، مەن رۋحاني گيگەنا سالاسىنداعى مامان شيپاگەر - سەسترالاردىڭ ءتىپتى دە كوپ تۇسىنىك پەن كوڭىل ءبولۋدى قاجەت ەتەتىندىگىن بايقادىم“، - دەدى يۇي مەي، كوپتەگەن ادامدار رۋحاني گيگەنا سالاسىنداعى شيپاگەرلەر ناۋقاستاردىڭ پسيحولوگيالىق ماسەلەلەرىن شەشەدى دەپ قارايدى، ال بۇل كاسىپتىك قىزمەتكەرلەردىڭ دە ءبىرشاما اۋىر پسيحولوگيالىق اۋىرتپالىعى بولاتىندىعىن اڭعاراتىن ادامدار تىم از. وسى كاسىپتىك قىزمەتكەرلەرگە كوبىرەك كوڭىل ءبولىپ، قامقورلىق جاساپ، ولاردىڭ ناۋقاستارعا اناعۇرلىم ويداعىداي قىزمەت وتەۋىنە، قوعامنىڭ پسيحولوگيالىق سالاماتتىق جۇيەسى قۇرىلىسىنا قىزمەت وتەۋىنە مۇمكىندىك جاساۋ كەرەك.