ۋاكىل ءورنيسا قادىر:
ءجۇزىم كاسىپ سالاسىنىڭ دامۋىنا سىندارلى اقىل - كەڭەس بەردى
□ انار بۇلت / شينجياڭ گازەتىنىڭ ءتىلشىسى لياڭ ليحۋا
شينجياڭ ءجۇزىمى بۇكىل ەلگە ايگىلى، وتە - موتە، تۇرپان ءجۇزىمىنىڭ داڭقى زور. تۇرپاندا ءجۇزىم ەگىلگەن اۋماق تۇتاس شينجياڭداعى ءجۇزىم ەگىلگەن اۋماقتىڭ تورتتەن ءبىرىن يەلەيدى، جەرگىلىكتى ديقاندار كىرىسىنىڭ ۇشتەن بىرىنەن استامى ءجۇزىم ەگۋدەن كەلەدى.
”ءجۇزىمنىڭ جاقسى ەگىلگەن - ەگىلمەگەندىگى ديقانداردىڭ اقشا قاپشىعىمەن بايلانىسىپ جاتىر“، - دەدى 2 - ايدىڭ 26 - كۇنى مەملەكەتتىك حالىق قۇرىلتايىنىڭ ۋاكىلى، تۇرپان قالالىق جەمىس ورمان كاسىبى تەحنيكا جالپىلاستىرۋ، قىزمەت وتەۋ ورتالىعىنىڭ ورىنباسار مەڭگەرۋشىسى ءورنيسا قادىر تىلشىگە.
تاماشا ءجۇزىم ەگۋ، تۇرپاننىڭ ءجۇزىم كاسىپ سالاسىن زورايتۋ، كۇشەيتۋ ءورنيسا قادىردىڭ مىندەت اتقارعان مەزگىلدەگى باستى قىزمەتىنە اينالدى.
قايتكەندە جوعارى سورتتى ءجۇزىم ەگۋگە، جوعارى باعادا ساتۋعا بولادى؟ ءىشىنارا ەگىمشىلىك وتباسىلارىنىڭ وسى جاعىنداعى تانىمى تىم تاياز ەدى. جەرگىلىكتى ورىنداعى ديقانداردىڭ ەگىمشىلىك دەڭگەيىن جوعارىلاتۋ ءۇشىن، ءورنيسا قادىر تۇرپانداعى ءجۇزىم ەگىمشىلىگىمەن اينالىساتىن بارلىق اۋىل - قىستاقتاردى ارالاپ، جۇزىمگە تىڭايتقىش بەرۋ، اعاش ءپىشىنىن رەتتەۋ، بۇتاقتاۋ، دەرت - دەربەزدەر مەن زياندى جاندىكتەردىڭ زيانىنان ساقتانۋ جانە ونى جويۋ سياقتى كاسىپتىك بىلىمدەردى ۇيرەتتى. سونىمەن بىرگە ول تاعى ديقانداردىڭ ەگىمشىلىك بارىسىندا كەزدەسكەن ءتۇرلى ماسەلەلەرىن بەلسەنە ءتۇسىندىرىپ ءارى وسى ماسەلەلەردى جيناقتاپ تيپتىك مىسال ەتىپ، بارعان جەرىندەگى ديقاندارعا ەگجەي - تەگجەيلى ءتۇسىندىردى.
2021 - جىلى ءورنيسا قادىر ”باتىس بولىك شۇعىلاسى“ بويىنشا ارالاي ءجۇرىپ ۇيرەنۋىن اياقتاتقاننان كەيىن، باسقا ولكەلەردەن، رايونداردان، قالالاردان ۇيرەنگەن وزىق تەحنيكالارىن عىلمي تاربيەلىك فيلم، قىسقا بەينەجازبا، ت. ب ەتىپ جاسادى ءارى قالىڭ بۇقاراعا ۇگىتتەپ ءتۇسىندىردى. ”قازىر ديقاندار تەحنيكانى قول تەلەفوننان - اق كەز كەلگەن جەردە، كەز كەلگەن ۋاقىتتا ۇيرەنە الاتىن بولدى“، - دەدى ءورنيسا قادىر.
مەملەكەتتىك حالىق قۇرىلتايىنىڭ ۋاكىلى رەتىندە ءورنيسا قادىر ءوزى ونەگە بولا ءبىلدى. مىندەت اتقارعان مەزگىلىندە ول نەگىزگى ساتىعا ىشكەرىلەي بارىپ، ”ءۇشتى جاڭالاۋ، ەكىنى مەڭگەرۋ، ءبىردى ساپالىلاندىرۋ“ تەحنيكاسىن − سورە جاڭالاۋ، اعاش جاڭالاۋ، باقشا جاڭالاۋ، گۇل - جەمىستى مەڭگەرۋ، ءونىم مولشەرىن مەڭگەرۋ، جاس ءجۇزىم ونىمدەرىن قوراپتاۋدى ساپالىلاندىرۋدى بار كۇشپەن جالپىلاستىرىپ، جەرگىلىكتى ورىنداعى ءجۇزىم ەگىمشىلىگىنىڭ ۇتىمسىز ەگىمشىلىكتەن ولشەمدەنگەن، ەگجەي - تەگجەيلىلەنگەن ەگىمشىلىككە بۇرىلىس جاساۋىنا مۇمكىندىك جاسادى.
ءورنيسا قادىردىڭ قۇلشىنۋىندا، جەرگىلىكتى ورىنداعى ديقانداردىڭ ەگىمشىلىك ءتاسىلى بارعان سايىن جاڭارىپ، كىرىستەرى دە كورنەكتى جوعارىلادى. ول بىلاي دەدى: ديقانداردىڭ كىرىستى ارتتىرىپ بايۋىنا كومەكتەسۋ، ءجۇزىم كاسىپ سالاسىنىڭ دامۋى ءۇشىن سىندارلى اقىل - كەڭەس بەرۋ ءبىر حالىق قۇرىلتايى ۋاكىلىنىڭ قىزمەت جاۋاپكەرشىلىگى بولىپ تابىلادى.
ءورنيسا قادىر ءجۇزىم ەگىمشىلىگىنىڭ ساپاسىن ءوسىرىپ، ونىمدىلىگىن جوعارىلاتۋ، ءجۇزىم كاسىپ سالاسىن جوعارى ساپالى دامىتۋ سياقتى ماسەلەلەردى ۇنەمى ويلاپ جۇرەدى. ول ءار جىلى دەرلىك مۇقيات تەكسەرۋ - زەرتتەۋ جۇرگىزىپ، ۇسىنىس جازۋمەن بولدى.
”مەن نەگىزگى ساتىداعى بۇقارامەن كوپ قارىم - قاتىناس جاسايمىن، بۇل مەندەگى ابزالدىلىق. مەن بۇقارا اڭىس ەتكەن ماسەلەلەردى دەر كەزىندە يگەرىپ، ولاردىڭ ءدوپ كەلگەن قيىنشىلىعىن بىلۋگە تىرىسامىن، مىنە بۇل جوعارى ساپالى ۇسىنىستى ورتاعا قويۋدىڭ نەگىزى“، - دەدى ءورنيسا قادىر.
ورتاعا قويعان ۇسىنىستارىنىڭ بارلىعى مەملەكەتتىڭ قاتىستى تاراۋلارىنىڭ جاۋاپ قاتۋىنا يە بولۋى، ءىشىنارا ۇسىنىستارىنىڭ كوپ ۇزاماي تياناقتانۋ الدىندا تۇرعاندىعى ءورنيسا قادىردى قۋانتتى. بيىلعى مەملەكەتتىك ەكى ماجىلىسكە ءورنيسا قادىر اۋىل شارۋاشىلىعى مەن ساياحات كاسىبىن توعىستىرا دامىتۋدى ىلگەرىلەتۋ جونىندەگى ۇسىنىسىن الا بارىپ، 1 -، 2 -، 3 - كاسىپتەردى توعىستىرا دامىتۋ ارقىلى اۋىل - قىستاقتى گۇلدەندىرۋگە دەم بەرۋدى ءۇمىت ەتەدى.
