قول ۇستاسا ەكپىندەي ىلگەرىلەپ، بولاشاققا بىرگە اتتانايىق

− بەيجيڭ 2022 - جىلعى مۇگەدەكتەر قىسقى وليمپيادا سپورت جارىسىنىڭ باستالعاندىعىن قىزۋ قۇتتىقتايمىز

حالىق گازەتى باسماقالاسى 

　　تاريح وسى ءىستى كەستەلەپ قالدىرادى، دۇنيە ءجۇزى وسى ءساتتى ماڭگى ەسىندە ساقتايدى. بۇگىن تۇندە جۇڭگو مەملەكەتتىك دەنە تاربيە الاڭىندا بەس جۇلدىزدى قىزىل تۋ، مۇگەدەكتەر وليمپيادا سپورت جارىسىنىڭ تۋى شىعارىلىپ، ىنتىماقتى، دوستىقتى، العا باسۋدى ۇيىستىرعان نەگىزگى الاۋ تۇتاندىرىلادى.

　　بۇل دۇنيە ءجۇزى كوز تىككەن مۇگەدەكتەر قىسقى وليمپيادا ۋادەسى. 5 قۇرلىق، 4 مۇحيتتان كەلگەن مۇگەدەك سپورتشىلار داڭقپەن، ارمانمەن قاۋىشىپ، قۇلشىنا ايانباي سايىسىپ، ەرلىكپەن اعالاۋعا تالپىنۋ ارقىلى ”ەرلىك، بەكىم، ىنتا، تەڭدىك“ سىندى مۇگەدەكتەر وليمپياداسى قۇن كوزقاراسىن ايگىلەيدى.

　　بۇل ادامزات وركەنيەتىنىڭ العا باسۋىنا سيمۆول بولعان سالتاناتتى مەرەكە. ”رۋح − سپورتتان بيىك“ دەگەن مۇگەدەكتەر وليمپياداسى ۇستانىمى ”تەڭدىك، قاتىناسۋ، بىرگە يگىلىكتەنۋ“ دەگەن جۇڭگو مۇگەدەكتەر ىستەرىن دامىتۋ ۇستانىمىمەن ءوزارا توعىسىپ، قوسىلىپ، ادامداردى دەنە تاربيە سپورتى الا كەلەتىن اسقاق سەزىم مەن شاتتىقتى بىرگە ءبولىسىپ، اناعۇرلىم تاماشا بولاشاقتى بىرگە جاراتۋعا شابىتتاندىرادى.

　　ەكى وليمپيادا سپورت جارىسى دا بىردەي تارتىمدى. باس شۋجي شي جينپيڭ سالتاناتپەن: ”بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن جاقسى وتكىزۋ − جۇڭگونىڭ حالىقارالىق قوعامعا بەرگەن ايبىندى ۋادەسى“، - دەپ جاريالادى. ءبىز ايتقانىمىزدى، ءسوز جوق، ورىنداپ، ارەكەتىمىزدەن، ءسوز جوق، ناتيجە شىعارىپ، دۇنيە جۇزىنە ايرىقشا ەرەن بەيجيڭ قىسقى وليمپيادا سپورت جارىسىن سيلاپ، حالىقارالىق قوعامنىڭ كەڭ كولەمدى ماداعىنا يە بولىپ، وليمپيادا سپورت تاريحىندا بوياۋى قانىق ءبىر پاراق جازىپ قالدىردىق. بىزدە بەيجيڭ مۇگەدەكتەر قىسقى وليمپيادا سپورت جارىسىن بىردەي جاقسى وتكىزىپ، ”بولاشاققا بىرگە اتتانايىق“ دەيتىن تاماشا سيمفونيانى شىعانداتاتىن سەنىم دە، قابىلەت تە بار.

　　1976 - جىلى 1 - كەزەكتى مۇگەدەكتەر قىسقى وليمپيادا سپورت جارىسى شۆەتسيادا وتكىزىلگەننەن بەرى مۇگەدەكتەر قىسقى وليمپيادا سپورت جارىسى ۇزدىكسىز دامىپ، زورايىپ، دۇنيە جۇزىندەگى مۇگەدەك سپورتشىلاردىڭ باسەكە ورەسى مەن رۋحاني بەت - بەينەسىن كورسەتەتىن تۇعىرىنا، تىرشىلىكتىڭ قۇنى مەن ءومىر كەرەمەتىن ورىندايتىن ساحناسىنا اينالدى. بۇگىن مۇگەدەكتەر وليمپياداسى قۇن كوزقاراسى مەن ۇستانىمى مۇگەدەكتەردىڭ دەنە تاربيەگە قاتىناسۋىن، دەنە شىنىقتىرىپ دەنساۋلىعىن قالپىنا كەلتىرۋىن، شاتتىقتان ءلاززاتتانۋىن ىشكەرىلەي ىلگەرىلەتىپ قانا قالماستان، ادامگەرشىلىك رۋحتىڭ ىشكەرىلەي اسقاقتاۋى مەن دامۋىن ىلگەرىلەتىپ، ادامزاتتىڭ قوعامدىق وركەنيەتىنىڭ العا باسۋىن جەبەۋگە ماڭىزدى ۇلەستەر قوستى.

　　سپورت ءۇمىتتى تۇتاندىرادى، ايانباي سايىسۋ ارماندى ىسكە اسىرادى. بەيجيڭ مۇگەدەكتەر قىسقى وليمپيادا سپورت جارىسىنىڭ قۇت بەلگىسى ”شۋەرۇڭرۇڭ“ ىقىلاسقا تولى قۇشاعىن ايقارا اشىپ، دۇنيە ءجۇزىنىڭ جەر - جەرىنەن كەلگەن كونە، جاڭا دوستاردى قارسى الادى. بۇل بۇكىل دۇنيە جۇزىندەگى مۇگەدەك سپورتشىلاردىڭ سالتاناتتى جينالىسى، ءوزىن قۇرمەتتەۋ، وزىنە سەنۋ، ءوزىن قۇدىرەتتەندىرۋ، ءوزىن الۋەتتەندىرۋ رۋحىن كورسەتىپ، شاتتىق، دوستىق، ارمان، تابىسقا جەتۋ حيكايالارىن جازادى؛ بۇل بۇكىل دۇنيە جۇزىندەگى مۇگەدەكتەردىڭ سالتاناتتى جينالىسى، ادامداردى مۇگەدەكتەردى ءتىپتى دە كوپ تۇسىنۋگە، قۇرمەتتەۋگە جانە ايالاۋعا، مۇگەدەكتەر ىستەرىنىڭ العا باسۋىن، دامۋىن جەبەۋگە شاقىرادى؛ بۇل دۇنيە جۇزىندەگى حالىقتاردىڭ سالتاناتتى جينالىسى، ەلىمىز حالقىنىڭ دۇنيە جۇزىندەگى ءار ەل حالىقتارىمەن ءوزارا ءتۇسىنىسۋىن ارتتىرىپ، تۇرلىشە وركەنيەتتەردىڭ اۋىس - كۇيىس جاساپ، ءوزارا ۇلگى الۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدىڭ شىت جاڭا تاراۋىن جازادى.

　　مۇگەدەكتەر − قوعام ۇلكەن شاڭىراعىنىڭ تەڭ مۇشەلەرى ءارى ادامزات وركەنيەتى دامۋىنىڭ ءبىر ماڭىزدى كۇشى. مۇگەدەكتەر دەنە تاربيە ىستەرى رۋح پەن مىنەز - قۇلىقتى كورسەتەتىن، سەنىم مەن كۇش ۇيىستىراتىن، ايالاۋ مەن ۇمىتكە تولى ءىس. ءبىز بەيجيڭ مۇگەدەكتەر قىسقى وليمپيادا سپورت جارىسىنىڭ ءساتتى وتكىزىلۋىن بەلگى ەتىپ، دۇنيە جۇزىندەگى مۇگەدەكتەر وليمپيادا سپورتىنىڭ، ءسوز جوق، ءتىپتى دە كوپ مۇگەدەكتەردى دەنە تاربيە سپورتىن ءتۇسىنىپ جانە وعان ات سالىسىپ، دەنە ساپالارىن جوعارىلاتىپ، قوعامدىق تۇرمىسقا اناعۇرلىم جاقسى ارالاسۋعا باۋرايتىندىعىنا، ءسوز جوق، بەيبىتشىلىك، دوستىق، ايالاۋ تۇقىمىن ءتىپتى دە كوپ ادامنىڭ جۇرەگىنە سەبەتىندىگىنە سەنەمىز.

　　باس شۋجي شي جينپيڭ بىلاي دەپ باسا دارىپتەدى: ”قالىڭ مۇگەدەكتەردىڭ تىنىش ءومىر، شات - شادىمان تىرشىلىك كەشىرۋىنە، ىشەر اس، كيەر كيىمنەن ۋايىمداماۋىنا، باقىتتى، تاماشا تۇرمىس كەشىرۋىنە مۇمكىندىك جاساۋ − پارتيامىزدىڭ بۇكىل ىنتا - پەيىلىمەن حالىق ءۇشىن قىزمەت ىستەۋدەي باس ماقساتىنىڭ ماڭىزدى بەينەسى، ەلىمىزدىڭ سوتسياليستىك ءتۇزىمىنىڭ قاجەتتى تالابى“. پارتيا 18 - قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى مۇگەدەكتەرگە ەرەكشە كوڭىل ءبولىپ، ەرەكشە نازار اۋدارىپ، باستان - اياق حالىقتى وزەك ەتۋگە تاباندى بولىپ، مۇگەدەكتەردىڭ قالاۋىنا قۇرمەت ەتىپ، مۇگەدەكتەردىڭ ادامدىق ۇقىعىن قامتاماسىز ەتىپ، مۇگەدەكتەردىڭ قوعامعا ات سالىسۋىنا ءمان بەرىپ، مۇگەدەكتەردىڭ شىن مانىندە ەكونوميكالىق، قوعامدىق دامۋدىڭ ات سالىسۋشىلارىنا، ۇلەس قوسۋشىلارىنا جانە يگىلىكتەنۋشىلەرىنە اينالۋىن ىلگەرىلەتتى. اسىرەسە، بەيجيڭ مۇگەدەكتەر قىسقى وليمپيادا سپورت جارىسىن وتكىزۋگە دايىندالۋدا الاڭ - ورىن قۇرىلعىلارى، جارىس ىستەرى جۇمىسى، قىزمەت وتەۋ، قامتاماسىزدىق سياقتى ءارقايسى بۋىنداردىڭ ۇزدىكسىز جاقسارىپ، دارەجەسىن جوعارىلاتۋىن جەبەپ، ”كەدەرگىسىزدىك“ ۇستانىمىنىڭ قالا دامۋىمەن توعىسۋىن ىشكەرىلەي ىلگەرىلەتىپ، مۇگەدەكتەردىڭ دەنە تاربيە، ساۋىعۋ، مادەنيەت، وقۋ - اعارتۋ، جۇمىستانۋ سياقتى جاقتارداعى ۇقىق - مۇددەسىن اناعۇرلىم ويداعىداي قامتاماسىز ەتىپ، جۇڭگو مۇگەدەكتەر ىستەرىنىڭ تەز دامۋىنىڭ جاندى كارتيناسىنا اينالدىردى. بەيجيڭ مۇگەدەكتەر قىسقى وليمپيادا سپورت جارىسىن جاڭا باستاما ەتىپ، جۇڭگو مۇگەدەكتەر ىستەرىنىڭ جوعارى ساپالى دامۋىن ىشكەرىلەي ىلگەرىلەتىپ، مۇگەدەكتەردىڭ جان - جاقتى دامۋىن جانە بىرگە بايۋىن جەبەپ، حالىقاراداعى مۇگەدەكتەر ىستەرىنىڭ بىرگە دامۋىن ءباز - باياعىسىنداي ىلگەرىلەتەدى.

　　بۇگىن تۇندە بەيجيڭ دۇنيە جۇزىنە قۇشاق اشادى، دۇنيە ءجۇزى جۇڭگوعا كوز تىگەدى. جارىس الاڭىندا ايانباي سايىسۋمەن ءومىر نۇرلانادى؛ جارىس الاڭىنىڭ سىرتىندا كۇرەس جاساۋ تاريحقا جازىلادى. اماليات وليمپيادا تۋىنىڭ استىندا مۇگەدەكتەردىڭ دە بىردەي ءوز ارماندارىن جۇزەگە اسىرۋىنا بولاتىندىعىن؛ تاسقىنداي العا تارتقان ءداۋىر زور اعىنىندا مۇگەدەكتەردىڭ دە بىردەي تىرشىلىكتىڭ قۋاتتى ءۇنىن شىعانداتا الاتىندىعىن تاعى ءبىر رەت دالەلدەيتىن بولادى.

　　قول ۇستاسا ەكپىندەي ىلگەرىلەپ، بولاشاققا بىرگە اتتانايىق!

(شينحۋا اگەنتتىگىنىڭ 3 - ايدىڭ 3 - كۇنى بەيجيڭنەن بەرگەن حابارى)