− باس شۋجي شي جينپيڭنىڭ ورتا جاس، جاس كادرلار كۋرسىنىڭ وقۋ باستاۋ سالتىندا سويلەگەن ماڭىزدى ءسوزىن ۇيرەنۋ، دايەكتىلەندىرۋ جونىندە
□ حالىق گازەتىنىڭ شولۋشىسى
”جاس كادرلار پارتيا مەن مەملەكەت ىستەرى دامۋىنىڭ ءۇمىتى“، ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسىنىڭ 2022 - جىلعى كوكتەمگى وقۋ ماۋسىمىنداعى وقۋ باستاۋ سالتىندا، باس شۋجي شي جينپيڭ پارتيا مەن حالىق ىستەرىنىڭ ءىزباسارى بولۋ سىندى ستراتەگيالىق بيىكتەن، جاس كادرلارعا ”مۇرات - سەنىم نەگىزىن بەكەمدەپ، شىرىكتەسۋدەن اۋلاق بولۋ، ازعىنداۋدان ساقتانۋ قورعانىس شەبىن مىقتاپ ساقتاپ، دۇرىس ناتيجە كوزقاراسىن ورناتىپ جانە امالياتتا ايگىلەپ، ەرەن قابىلەت شىڭداپ، جاۋاپكەرشىلىك ارقالاۋ جانە كۇرەس جاساۋ رۋحىن ساۋلەلەندىرىپ، پارتيانىڭ بۇقارالىق لۋشيانىن دايەكتىلەندىرۋ كەرەك“ دەگەن ايقىن تالاپ قويىپ، جاس كادرلاردى ”پارتياعا ادال بولاتىن ساياسي قاسيەتتى جەتىلدىرىپ، حالىقتىڭ ءۇمىتىن اقتايتىن وتباسى - وتان سۇيىسپەنشىلىگىن ورناتىپ، وسكەلەڭ دە كىرشىكسىز يدەيالىق دەڭگەيگە ۇمتىلىپ، پارتيا مەن حالىق ىستەرى جولىندا ايانباي ۇلەس قوسۋعا“ ىنتالاندىرىپ، قالىڭ جاس كادرلاردى اسقاق جىگەرمەن قايراتتانا ۇمتىلىپ، مويىماس تاباندىلىقپەن العا باسىپ، جاڭا ءداۋىردىڭ جاڭا جورىعىندا وكىنىشسىز كۇرەس ىزدەرىن قالدىرۋعا شابىتتاندىردى جانە جىگەرلەندىردى.
مۇرات - سەنىم پارتيا قۇرۋدىڭ، پارتيانى كوركەيتۋدىڭ نەگىزى ءارى پارتيالى كادرلاردىڭ تابان تىرەپ تۇرۋىنىڭ تياناعى. تاريح پەن اماليات مىنانى قايتا - قايتا دالەلدەدى: ءبىر ساياسي پارتيادا ۇلى مۇرات پەن وسكەلەڭ تالپىنىس بولعاندا عانا بەرىك تە قۋاتتى بولادى، المايتىن قامالى بولمايدى، جەڭىسكە جەتپەي تىنبايدى، ساتسىزدىكتەرگە ۇشىراۋ بارىسىندا قايتا سەرپىلىپ قايراتتانا العا ۇمتىلادى؛ پارتيالى كادرلاردا بەرىك مۇرات - سەنىم بولعاندا عانا، ءتۇرلى سىناقتاردان سۇرىنبەي ءوتىپ، نىق قاداممەن الىسقا جەتەدى. ماركسيزم سەنىمى، كوممۋنيزم ۇلى مۇراتى، جۇڭگوشا سوتسياليزم ورتاق مۇراتى − جۇڭگو كوممۋنيستەرىنىڭ رۋحاني تىرەگى جانە ساياسي جانى ءارى پارتيانىڭ ىنتىماعى مەن بىرلىگىن ساقتاۋدىڭ دا يدەيالىق نەگىزى. جاس كادرلار جاقسى ءىزباسار بولۋ ءۇشىن، ەڭ ماڭىزدىسى، ماركسيزم سەنىمىنە تاباندى بولىپ، كوممۋنيزم ۇلى مۇراتى مەن جۇڭگوشا سوتسياليزم ورتاق مۇراتى جولىندا كۇرەس جۇرگىزۋدىڭ جاقسى ءىزباسارى بولۋ كەرەك. پارتيالى كادرلار جونىنەن العاندا، دارقان پەيىلدە، اسقاق مۇراتتا بولىپ، اۋەلگى ماقساتتى، بورىشتى ۇمىتپاي، ءومىر مۇراتىن پارتيا مەن حالىق ىستەرىنە توعىستىرىپ، حالىقتىڭ باقىتى جولىندا كۇرەس جاساۋدى ءوزىنىڭ ەڭ زور باقىتى ساناعاندا عانا قاستەرلى دە ءماندى ومىرگە يە بولادى.
باس شۋجي شي جينپيڭ بىلاي دەپ باسا دارىپتەدى: ”مۇرات - سەنىمدى بەكەمدەۋدە، ءسوز جوق، الدىمەن تانۋ، ونان كەيىن سەنۋ، سەنگەننەن كەيىن ارەكەتتەنۋ كەرەك“. كوممۋنيزمدى جۇزەگە اسىرۋ − ءبىز كوممۋنيستەردىڭ ەڭ اسقاق مۇراتى، بۇل سان ۇرپاق ادامداردىڭ ۇتىلاپ كۇرەس جاساۋىن قاجەت ەتەدى. بۇگىن، جاڭا ۇزاق جورىق جولىندا، ەل ءىشى - سىرتىنان كەلگەن ەلەۋلى حاۋىپ - قاتەرلەر مەن سىن - سايىستاردى جەڭىپ، جۇڭگوشا سوتسياليزمنىڭ جاڭا جەڭىسىنە قول جەتكىزۋ ءۇشىن، اۋەلگىدەي بۇكىل پارتيانىڭ، بۇكىل ەل حالقىنىڭ بەرىك مۇرات - سەنىمى مەن قۋاتتى توڭكەرىستىك ەركىنە سۇيەنەمىز. جاس كادرلار پارتيا مەن مەملەكەت ىستەرى دامۋىنىڭ جالىندى كۇشى رەتىندە، ءسوز جوق، مۇرات - سەنىمنىڭ ايتۋ ءۇشىن، جىرلاۋ ءۇشىن ەمەس، ءتىپتى، سىرتقى بەينەسىن ادەمىلەۋ ءۇشىن دە ەمەس ەكەندىگىن، ارەكەت كورسەتكەندە عانا يلاندىرۋ قۋاتى بولاتىندىعىن تەرەڭ تانىپ جەتۋى كەرەك. مۇرات - سەنىمدى بەكەمدەۋ ءبىر مەزەتتىك ءىس ەمەس، قايتا ومىرلىك ءىس، ۇنەمى جەتىلىپ، ۇنەمى شىڭدالىپ، ءاردايىم ءتۇسىنىپ، ءاردايىم ىلگەرىلەپ، مەيلى ءتيىمدى جاعداي، الدە ءتيىمسىز جاعدايدا بولسىن، قاجىماس تاباندىلىق كورسەتىپ، سان وتكەلەكتىڭ سىنىنان سۇرىنبەي ءوتۋ كەرەك.
ءبىر كادردىڭ مۇرات - سەنىمى بەرىك بولعان - بولماعاندىعىن سىننان وتكىزۋدە، باستىسى، وسى كادردىڭ كەلەلى ساياسي سىناق الدىندا ساياسي تاباندىلىققا يە بولعان - بولماعاندىعىنا، باس ماقسات تانىمىن بەرىك ورناتا العان - الماعاندىعىنا، قىزمەتكە اسقان جاۋاپكەرشىلىكتە بولعان - بولماعاندىعىنا، جاپادا الدا، راقاتتا ارتتا بولعان - بولماعاندىعىنا، شۇعىل، قيىن، قاتەرلى، اۋىر مىندەت الدىندا ەرلىكپەن اۋىر مىندەت ارقالاي العان - الماعاندىعىنا، ۇقىقتىڭ، اقشانىڭ، سۇلۋدىڭ ارباۋىنان سۇرىنبەي وتە العان - الماعاندىعىنا قاراۋ كەرەك. جاس كادرلار پارتيا مەن حالىقتىڭ ادال دا سەنىمدى كادرى بولىپ جەتىلۋ ءۇشىن، ءسوز جوق، ۇكىمەت ىسىندە پاك بولۋدىڭ ”ءبىرىنشى تۇيمەسىن“ جاقسى تۇيمەلەپ، شىرىكتەسۋدەن اۋلاق بولۋ، ازعىنداۋدان ساقتانۋ قورعانىس شەبىن مىقتاپ ساقتاۋى، بەكەمدەۋى كەرەك. پاكتىك − قۇت، ءناپسى − جۇت دەيتىن قاعيدانى ەستە بەرىك ساقتاپ، پارتيانىڭ نازارياسىمەن جانە لۋشيان، باعىت - ساياساتتارىمەن ۇنەمى سالىستىرىپ، پارتيا ۋستاۆىمەن، پارتيا ەرەجەسىمەن، پارتيا تارتىبىمەن ۇنەمى سالىستىرىپ، اۋەلگى ماقساتپەن، بورىشپەن ۇنەمى سالىستىرىپ، كەيبىر ىستەردى ىستەۋ كەرەك پە - جوق پا، ىستەۋگە بولا ما - جوق پا دەگەنگە كوز جەتكىزىپ، قاي - قاشان دا ءوزىن قادىرلەپ، ءوزىن باعامداپ، تارتىپكە، زاڭعا، قاعيداعا قاتاڭ بويسۇنۋ كەرەك. كىشكەنە ىستەردەن، ەلەۋسىز بۋىنداردان باستاپ ۇستاپ، كوڭىلگە تۋراشىلدىق ۇيالاتىپ، ىزگىلىك ۇستانىپ، احىلاقتى، بايىپتى بولىپ، ”يدەياداعى شاڭ - توزاڭدى“ ۇنەمى قاعىپ، ”ءناپسىنىڭ زيانىن“ كوبىرەك ءبىلىپ، بوگدە نيەتتە بولماۋ، بەتالدى قيمىل جاساماۋعا كەپىلدىك ەتۋ كەرەك. ساتىلار بويىنشا شەپ قۇرۋ، بارلىق جەردە شەپ قۇرۋ، ساياسي وتكەلدى، ۇقىق وتكەلىن، بارىس - كەلىس وتكەلىن، تۇرمىس وتكەلىن، سۇيىسپەنشىلىك وتكەلىن ساقتاپ، ۇلكەن دۇرىس، ۇلكەن بۇرىس الدىندا، ساياسي پرينسيپ ماسەلەلەرىندە وي - سانانى ەرەكشە سەرگەك ۇستاپ، تۇرعىسى ەرەكشە بەرىك بولۋ، بيلىكتى ءادىل ىستەتۋگە، بيلىكتى زاڭ بويىنشا ىستەتۋگە، بيلىكتى حالىق ءۇشىن ىستەتۋگە، بيلىكتى پاك ىستەتۋگە تاباندى بولۋ، قوعامدىق قارىم - قاتىناس شەڭبەرىن، تۇرمىس شەڭبەرىن، دوستار شەڭبەرىن ۇزدىكسىز كىرشىكسىزدەندىرىپ، وتباسى تاربيەسىن، وتباسى ستيلىن قاتايتىپ، كوممۋنيستەردىڭ قاسيەتىن ساقتاۋ كەرەك.
كوڭىلدە سەنىم بولسا قادامىڭ نىق بولادى. جاپپاي سوتسياليستىك وسىزاماندانعان مەملەكەت قۇرۋدىڭ، ەكىنشى 100 جىلدىق كۇرەس نىساناسىنا شەرۋ تارتۋدىڭ جاڭا جورىعىنا قادام تاستاعان قالىڭ جاس كادرلار قاجىماي - تالماي شي جينپيڭ جاڭا ءداۋىر جۇڭگوشا سوتسياليزم يدەياسىمەن وي - سانانى قارۋلاندىرىپ، امالياتقا جەتەكشىلىك ەتىپ، قىزمەتتەردى ىلگەرىلەتىپ، ”ەكىنى تۇراقتاندىرۋدىڭ“ شەشۋشى سيپاتتى ماڭىزىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، ۇزدىكسىز سەنىم نەگىزىن بەكەمدەپ، رۋحاني كالتسيدى تولىقتاپ، يدەيا تىزگىنىن ورنىقتى ۇستاپ، بەرىك مۇرات - سەنىم ارقىلى پارتياعا شىن كوڭىلدەگى ادالدىقتى شىڭداپ، ماڭگى پارتياعا سەنىپ، پارتيانى ءسۇيىپ، پارتيا ءۇشىن ىستەپ، جۇرەكتىلىكپەن جاپالى، قيىن، اۋىر، قاتەرلى مىندەتتەردى ارقالاپ، پارتيانىڭ ۇمىتىنەن شىعاتىن، حالىقتىڭ ۇمىتىنەن شىعاتىن، ءداۋىردىڭ ۇمىتىنەن شىعاتىن ناتيجەگە قول جەتكىزۋگە قۇلشىنۋ كەرەك.
(شينحۋا اگەنتتىگىنىڭ 3 - ايدىڭ 2 - كۇنى بەيجيڭنەن بەرگەن حابارى)
