مىندەت اتقارىپ جاۋاپكەرشىلىكتى ادا ەتەمىز، ءبىر ءسات تە بۇيكۇيەزدىككە سالىنبايمىز

− ماجىلىستەن ىلگەرى شينجياڭنىڭ مەملەكەتتىك حالىق قۇرىلتايى ۋاكىلدەرى تۇرعان جەرگە تىلشىلىك ىستەي بارعاندا

　　انار بۇلت / شينجياڭ گازەتىنىڭ ءتىلشىسى لي ياڭ

　　حالىقتىڭ جاعدايىن باعامداۋ، حالىقتىڭ ۇنىنە قۇلاق اسۋ، حالىق رايىن بەينەلەۋ − حالىق قۇرىلتايى ۋاكىلدەرىنىڭ ەڭ ماڭىزدى بورىشى. اۋىر مىندەت ارقالاعان شينجياڭنىڭ مەملەكەتتىك حالىق قۇرىلتايى ۋاكىلدەرى ءبىر ءسات تە بۇيكۇيەزدىككە سالىنبادى. 3 - ايدىڭ 4 - كۇنى كەش، ءتىلشى ماجىلىستەن ىلگەرى ۋاكىلدەر تۇرعان جەرگە تىلشىلىك ىستەي بارعاندا، ۋاكىلدەردىڭ كەڭەستىك جوبا، ۇسىنىستارىن كەمەلدەندىرىپ وزگەرىس ەنگىزىپ، ماجىلىسكە قاتىناسۋعا مىعىم دايىندىق كورىپ جاتقاندىقتارىن كوردى.

　　ۋاكىل ءورنيسا قادىردىڭ بولمەسىندەگى ۇستەلدە تۇرپاننىڭ گۋمانيتارلىق تاريحىن تانىستىرعان سۋرەتتى كىتاپشا، تاعى ءبىر ەستەلىك داپتەر جاتتى، ونىڭ بەتىنە قولمەن كوپتەگەن ساندى مالىمەتتەر جازىلىپتى. ”2021 - جىلى تۇرپان قالاسىنىڭ گاۋچاڭ رايونى 9 ميلليون 680 مىڭ ادام - رەت ساياحاتشى قابىلداپ، ساياحات كىرىسى 5 ميلليارد 200 ميلليون يۋانعا جەتتى. بيىل تۇرپاننىڭ ساياحاتى، ءسوز جوق، ءتىپتى دە جاندانادى!“. ءورنيسا قادىردىڭ سوزىنەن جان تەبىرەنىسى اڭعارىلادى. ول تىلشىگە ءوزىنىڭ بيىل ”تۇرپاندى شينجياڭ ساياحاتىنىڭ ۇلكەن قوناق قابىلداۋ زالى ەتىپ تۇلعالاۋ ۇسىنىسىن“ الا كەلگەندىگىن ايتتى.

　　ءورنيسا قادىر تۇرپان قالالىق جەمىس ورمان شارۋاشىلىعى تەحنيكاسىن جالپىلاستىرۋعا قىزمەت وتەۋ ورتالىعىنىڭ ورىنباسار مەڭگەرۋشىسى، بۇرىنعى جىلدارى ونىڭ ۇسىنىسىنىڭ كوبى اۋىل شارۋاشىلىعىمەن قاتىستى بولىپ، تۇرپاننىڭ ەرەكشە جەمىس ورمان شارۋاشىلىعىنىڭ ءتىپتى دە الىستارعا قانات سەرمەۋىن جەبەۋدى ءۇمىت ەتكەن. بيىل ءورنيسا قادىر نازار ءتۇيىنىن ساياحاتقا بۇردى. ”بۇرىنعى جىلدارى مەن تۇرپاندا زات اينالىمى تورابىن جەدەل قۇرۋ ۇسىنىسىن، سونداي - اق ءجۇزىم كاسىپ سالاسىنىڭ ساپاسىن جوعارىلاتىپ، ونىمدىلىگىن ارتتىرۋ ۇسىنىسىن العا قويعانمىن، بۇل ۇسىنىستارىم تۇگەلدەي قابىلداندى. قازىر تۇرپاننىڭ نەگىزدىك قۇرىلعىلارى بىرتىندەپ كەمەلدەنىپ، كاسىپ سالاسىن دامىتۋ جولى دا بارعان سايىن كەڭەيىپ كەلەدى، جوعارى ساپالى دامۋدىڭ نەگىزى قالانىپ بولدى، ءسوز جوق، 1 -، 2 -، 3 - كاسىپ سالالارىن توعىستىرا دامىتۋ جولىمەن ءجۇرۋ كەرەك، ال ساياحات كاسىبى ’ەكى مەن ءۇشتى بايلانىستىراتىن‘ حالىقتى بايىتۋ كاسىپ سالاسى“، - دەدى ءورنيسا قادىر ۇسىنىسىنداعى العاشقى ويىن تۇسىندىرە.

　　كومپيۋتەردىڭ الدىندا وتىرعان ءورنيسا قادىر گانسۋ ولكەسى مەن شانشي ولكەسىنىڭ مادەنيەت پەن ساياحاتتى توعىستىرۋداعى شىعارعان جاڭا ساياساتتارىنا قاداعالاي زەر سالدى. ”دۇنحۋاڭ مەن شي - ان تۇرپان سەكىلدى تاريح - مادەنيەت جاعىنداعى ايگىلى قالا، سونداي - اق جىبەك جولى ەكونوميكالىق بەلدەۋىنە ورنالاسقان. مەنىڭشە، تۇرپان دا وسى 2 قالادان ۇيرەنگەنى ءجون. سونىمەن قاتار، ول 3 جەردىڭ بىرلەسىپ تاڭداۋلى ساياحات جەلىسىن قالىپتاستىرىپ، جان - جاقتى سەلبەستىكتى ورىستەتىپ، جىبەك جولى ەكونوميكالىق بەلدەۋىندەگى 3 جارقىراعان جاقۇتتى ’ءبىر جىپپەن جالعاۋعا بولادى‘“، - دەدى ءورنيسا قادىر.

　　ۋاكىل ادىل ابدۇرازاقتىڭ بولمەسىندە قىزۋ تالقى ءجۇرىپ جاتىر ەكەن، ول ۋاكىل سۇن چۇنۋاڭمەن بىرگە كەڭەستىك جوبانى تالقىلاپ، وزگەرىس ەنگىزىپ جاتىپتى. ”بۇل ارادا ’جەتەكشىلىك ەتۋ‘ دەگەن ءسوزدى پايدالانۋ ءبىرشاما ۇيلەسىمدى“، ”مىنا ارادا ورتالىقتىڭ ۇلت قىزمەتى ماجىلىسىندەگى بايىمداۋمەن بىردەي بولعانى ءجون“... ءالسىن - ءالى باس يزەپ، توقتاۋسىز وي جۇگىرتىپ وتىرعان ەكەۋى قاعاز بەتىن قىزىل الا شيمايعا تولدىردى.

　　بيىل ادىل ابدۇرازاق پەن سۇن چۇنۋاڭ قاتارلى ۋاكىلدەر ”جۇڭحۋا حالىق رەسپۋبليكاسىنىڭ وتانشىلدىق زاڭىن“ جاساۋ جونىندەگى كەڭەستىك جوبانى بىرلەسىپ ورتاعا قويدى. ولار مەملەكەتتىڭ زاڭ شىعارۋى ارقىلى وتانشىلدىقتى ازاماتتارعا قويىلاتىن نەگىزگى تالاپ ەتۋدى، ازاماتتاردىڭ ساياسي ۇقىعىن اتقارۋىنىڭ جانە ونان يگىلىكتەنۋىنىڭ العى شارتى ەتۋدى ۇسىنىس ەتتى.

　　ۋاكىل يوۋ لياڭيىڭ دە وزىنشە قاربالاس، ول سەلبەستىك كووپەراتيۆىندەگى مۇشەلەرگە بەينە ەكراندا سويلەسىپ، تاياۋدان بەرگى ەگىن شارۋاشىلىق ءوندىرىسىنىڭ قۇرال - جابدىقتارىن ساتىپ الۋ جاعدايىن ۇعىسا ءجۇرىپ، كووپەراتيۆ مۇشەلەرىنەن پىكىر الدى. بۇل رەت يوۋ لياڭيىڭ ”اۋىل شارۋاشىلىق ونىمدەرىن جىنتىكتەي مانەرلەۋ كاسىپ سالاسى تىزبەگىن اقاۋسىزداندىرۋ، ءورىسىن كەڭەيتۋ ۇسىنىسىن الا كەلدى“.

　　تاياۋ جىلداردان بەرى يوۋ لياڭيىڭنىڭ باستاماشىلدىعىمەن قۇرىلعان ارال قالاسىنداعى ۋاننۇڭ جەمىس - جيدەك ونىمدەرى ەگىمشىلىگى شارۋالار كاسىپتىك سەلبەستىك كووپەراتيۆى بىرلەستىگى جەدەل دامۋ ارناسىنا قادام تاستادى. قازىر بىرلەستىككە 400دەن استام ادام قوسىلىپ، ەگىمشىلىك كولەمى 15 مىڭ مۋدان استى.

　　”ونىمدەرىمىز تاۋارعا، تاۋارلارىمىز ساۋعا بۇيىمعا اينالعاندا عانا، كىشكەنتاي جەمىس - جيدەكتەرىمىز ۇلكەن بازارعا كىرە الادى“. يوۋ لياڭيىڭ بىلاي دەدى: ءماجىلىس كەزىندە ول باسقا ولكە - رايونداردىڭ ۋاكىلدەرىمەن، اسىرەسە، شارۋا ۋاكىلدەرىمەن كوبىرەك اڭگىمەلەسىپ، وي جەلىسىن كەڭەيتىپ، باعىتتامالىلىققا يە ءتىپتى دە كوپ ۇسىنىستاردى ورتاعا قويۋدى ءۇمىت ەتتى.