13 - كەزەكتى مەملەكەتتىك حالىق قۇرىلتايىنىڭ 5 - ءماجىلىسى بەيجيڭدە اشىلدى
شي جينپيڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار ءتوراعالار مىنبەسىنەن ورىن الدى
لي كىچياڭ ۇكىمەت قىزمەتىنەن بايانداما جاسادى، لي جانشۋ ءماجىلىستى باسقاردى
جەرگىلىكتى ورىنداردىڭ ۇيىمدىق زاڭىنا وزگەرىس ەنگىزۋ جوباسى، 14 - كەزەكتى مەملەكەتتىك حالىق قۇرىلتايى ۋاكىلدەرىنىڭ سانى جانە سايلاۋ ماسەلەلەرى جونىندەگى قاۋلى جوبا تۋرالى تۇسىنىك سياقتىلاردى تىڭدادى
3 - ايدىڭ 5 - كۇنى 13 - كەزەكتى مەملەكەتتىك حالىق قۇرىلتايىنىڭ 5 - ءماجىلىسى بەيجيڭ حالىق سارايىندا اشىلدى. پارتيا مەن مەملەكەت باسشىلارىنان شي جينپيڭ، لي كىچياڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار قاتىناستى، لي جانشۋ ءماجىلىستى باسقاردى.
□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
3 - ايدىڭ 5 - كۇنى 13 - كەزەكتى مەملەكەتتىك حالىق قۇرىلتايىنىڭ 5 - ءماجىلىسى بەيجيڭ حالىق سارايىندا اشىلدى. مەملەكەتتىك كەڭەستىڭ زۇڭليى لي كىچياڭ مەملەكەتتىك كەڭەس اتىنان ماجىلىسكە ۇكىمەت قىزمەتىنەن بايانداما جاسادى.
□ سۋرەتتى شينحۋا اگەنتتىگىنىڭ ءتىلشىسى ياۋ دا - ۋي تۇسىرگەن
3 - ايدىڭ 5 - كۇنى 13 - كەزەكتى مەملەكەتتىك حالىق قۇرىلتايىنىڭ 5 - ءماجىلىسى بەيجيڭ حالىق سارايىندا اشىلدى. ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى لي جانشۋ ءماجىلىستى باسقاردى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 3 - ايدىڭ 5 - كۇنى بەيجيڭنەن بەرگەن حابارى. 13 - كەزەكتى مەملەكەتتىك حالىق قۇرىلتايىنىڭ 5 - ءماجىلىسى 3 - ايدىڭ 5 - كۇنى تۇستەن بۇرىن بەيجيڭ حالىق سارايىندا اشىلدى. مەملەكەتتىك حالىق قۇرىلتايىنىڭ 3000عا تارتا ۋاكىلى حالىقتىڭ ماڭىزدى تاپسىرماسىن ارقالاپ ماجىلىسكە قاتىناسىپ، نەگىزگى زاڭ مەن زاڭداردا جۇكتەلگەن قاسيەتتى قىزمەت جاۋاپكەرشىلىكتەرىن مۇقيات وتەدى.
حالىق سارايىنىڭ 10 مىڭ ادامدىق ۇلكەن زالى سالتاناتتى دا دۋماندى مەرەيگە شومدى، ءتوراعالار مىنبەسىندەگى شىمىلدىقتىڭ ءدال ورتاسىنداعى مەملەكەت گەربى نارت قىزىل تۋدىڭ ايشىقتاۋىمەن نۇر - شۇعىلا شاشىپ تۇر.
ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى لي جانشۋ ءماجىلىستى باسقاردى. ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى ۋاڭ چىن، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ىشياڭ، چىن جۋ، ۋاڭ دۇڭميڭ، بايما چىلين، ديڭ جۇڭلي، حاۋ ميڭجين، ساي دافىڭ، ۋ ۋيحۋا، ياڭ جىن - ۋ ءتوراعالار مىنبەسىنىڭ اتقارۋشى ءتوراعالار ورنىنا جايعاستى.
شي جينپيڭ، لي كىچياڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان جانە ءماجىلىس ءتوراعالار القاسىنىڭ قۇرامىنداعىلار ءتوراعالار مىنبەسىنەن ورىن الدى.
13 - كەزەكتى مەملەكەتتىك حالىق قۇرىلتايىنىڭ 5 - ماجىلىسىنە قاتىناسۋعا ءتيىستى ۋاكىل 2951 ادام. 3 - ايدىڭ 5 - كۇنى تۇستەن بۇرىنعى ماجىلىسكە 2790 ادام قاتىناستى، 161 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
تۇستەن بۇرىن ساعات 9دا لي جانشۋ جۇڭحۋا حالىق رەسپۋبليكاسى 13 - كەزەكتى مەملەكەتتىك حالىق قۇرىلتايى 5 - ءماجىلىسىنىڭ اشىلعاندىعىن جاريالادى. زالداعىلار تۇگەل ورىندارىنان تۇرىپ، مەملەكەت ءانىن اسقاقتاتا شىرقادى.
ءماجىلىستىڭ كەڭەستىك ءتارتىبى بويىنشا مەملەكەتتىك كەڭەستىڭ زۇڭليى لي كىچياڭ مەملەكەتتىك كەڭەس اتىنان ماجىلىسكە ۇكىمەت قىزمەتىنەن بايانداما جاسادى. بايانداما جالپى 3 بولىكتەن قۇرالعان: ءبىرىنشى، 2021 - جىلعى قىزمەتتەرگە شولۋ؛ ەكىنشى، 2022 - جىلعى ەكونوميكالىق، قوعامدىق دامۋدىڭ جالپى تۇلعالىق تالابى جانە ساياساتتىق بەتالىسى؛ ءۇشىنشى، 2022 - جىلعى ۇكىمەت قىزمەتىنىڭ مىندەتتەرى.
لي كىچياڭ باياندامادا بىلاي دەپ اتاپ كورسەتتى: وتكەن ءبىر جىل پارتيا مەن مەملەكەت تاريحىندا بەلەستىك مانگە يە ءبىر جىل بولدى. شي جينپيڭ جولداستى ۇيتقى ەتكەن پارتيا ورتالىق كوميتەتى بۇكىل پارتيانى، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن سالتاناتپەن قۇتتىقتادى، پارتيا 19 - كەزەكتى ورتالىق كوميتەتىنىڭ التىنشى جالپى ءماجىلىسىن جەڭىسپەن اشىپ، پارتيانىڭ ءۇشىنشى تاريحي قارارىن جاسادى، كەدەيلىكتەن ارىلتۋدان قامال الۋ شايقاسىنىڭ جەڭىسىنە ۋاعىندا قول جەتكىزىپ، جاپپاي دوڭگەلەك داۋلەتتى قوعامدى ۋاعىندا ورناتىپ، ءبىرىنشى 100 جىلدىق كۇرەس نىساناسىن جۇزەگە اسىرىپ، جاپپاي سوتسياليستىك وسىزاماندانعان مەملەكەت قۇرۋدىڭ، ەكىنشى 100 جىلدىق كۇرەس نىساناسىنا شەرۋ تارتۋدىڭ جاڭا جورىعىن باستادى. ءبىر جىلدان بەرى كۇردەلى دە قاتاڭ ىشكى - سىرتقى جاعداي جانە كوپتەگەن حاۋىپ - قاتەر مەن سىن - سايىس الدىندا، بۇكىل ەل جوعارىدان تومەنگە دەيىن بىرگە قۇلشىنىپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى ءبىر تۇتاس جوسپارلاپ، تۇتاس جىلداعى باستى نىسانا - مىندەتتەردى ءبىرشاما جاقسى ورىندادى، ”14 - بەسجىلدىق“ پىلاننىڭ باستاماسى تاماشا باستالىپ، ەلىمىزدىڭ دامۋىندا تاعى دا تىڭ كەلەلى تابىستارعا قول جەتتى.
لي كىچياڭ باياندامادا بىلاي دەپ اتاپ كورسەتتى: ءبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ شەشىمدەرى مەن ورنالاستىرۋلارىن ىشكەرىلەي دايەكتىلەندىرىپ، ورتالىقتىڭ ەكونوميكالىق قىزمەت ءماجىلىسىنىڭ رۋحىن دايەكتىلەندىرىپ، تياناقتاندىرىپ، جاڭا دامۋ ۇستانىمىن تولىق، دۇرىس، جاپپاي دايەكتىلەندىرىپ، ”التىنى ورنىقتىرۋ“، ”التىنى قامتاماسىز ەتۋ“ قىزمەتىن تىڭعىلىقتى ويداعىداي ىستەپ، ماكرولىق ساياساتتىڭ مەرزىم ارالىق جانە كەرى اينالىمدىق رەتكە سالىنۋىنا باسا ءمان بەرىپ، ءتۇرلى حاۋىپ - قاتەر مەن سىن - سايىسقا ءونىمدى توتەپ بەردىك، باستىسى، مىناداي قىزمەتتەر ىستەلدى: ءبىرىنشى، ماكرولىق ساياساتتىڭ ۇلاسپالىلىعى، باعىتتامالىلىعى ساقتالىپ، ەكونوميكالىق اينالىمنىڭ ۇيلەسىمدى ارالىقتا بولۋى ىلگەرىلەتىلدى؛ ەكىنشى، كاسىپورىندارعا كومەك بەرىپ، قيىنشىلىقتان قۇتىلدىرۋ ساياساتى ساپالىلانىپ جانە تياناقتانىپ، ەكونوميكانىڭ قالپىنا كەلۋ نەگىزى بەكەمدەلدى؛ ءۇشىنشى، رەفورما ىشكەرىلەي جۇرگىزىلىپ، ەسىك ايقارا اشىلىپ، تيجارات - ساۋدا ورتاسى ۇزدىكسىز جاقساردى؛ ءتورتىنشى، جاڭالىق اشۋ ارقىلى جەتەكشىلىك ەتۋ كۇشەيتىلىپ، شارۋاشىلىق تىزبەگى مەن ۇسىنىلىم تىزبەگى ورنىقتىرىلدى؛ بەسىنشى، قالا مەن اۋىلدىڭ، وڭىرلەردىڭ سايكەستى دامۋى ىلگەرىلەتىلىپ، شارۋاشىلىق ورنالاسىمى ۇزدىكسىز ساپالىلاندى؛ التىنشى، ەكولوگيالىق ورتانى قورعاۋ كۇشەيتىلىپ، باياندى دامۋ جەبەلدى؛ جەتىنشى، حالىق تۇرمىسىن قامتاماسىز ەتۋگە جانە جاقسارتۋعا كۇش سالىنىپ، قوعامدىق ىستەردىڭ دامۋى جەدەلدەتىلدى؛ سەگىزىنشى، زاڭمەن باسقارىلاتىن ۇكىمەت قۇرىلىسىندا جانە باسقارۋدا جاڭالىق اشۋ ىلگەرىلەتىلىپ، قوعامنىڭ جاراسىمدىلىعى مەن ورنىقتىلىعى ساقتالدى.
لي كىچياڭ باياندامادا بىلاي دەپ اتاپ كورسەتتى: ءبىز تابىستاردى تۇراقتاندىرۋمەن بىرگە، ءدوپ كەلىپ وتىرعان ماسەلەلەر مەن سىن - سايىستاردى دا سەرگەكتىكپەن كورە ءبىلۋىمىز كەرەك. تاۋقىمەت تانىمىن كۇشەيتىپ، ماسەلەگە، سىن - سايىستارعا بەتپە - بەت كەلىپ، قىزمەتتى بار كۇشىمىزبەن ويداعىداي ىستەپ، حالىقتىڭ كۇتكەن ءۇمىتىن، ءسوزسىز، اقتاۋىمىز كەرەك.
لي كىچياڭ باياندامادا بىلاي دەپ اتاپ كورسەتتى: 2022 - جىلعى دامۋدىڭ باستى مەجەلى نىسانالارى مىنالار: ىشكى ءوندىرىستىڭ جالپى قۇنى ％5.5 اينالاسىندا ارتادى؛ قالا - قالاشىقتاردا 11 ميلليوننان استام ادام تىڭنان جۇمىستانادى، قالا - قالاشىقتاردا انىقتالعان جۇمىسسىزدىق مولشەرى تۇتاس جىلدا ％5.5 كولەمىندە تىزگىندەلەدى؛ تۇرعىنداردىڭ تۇتىنۋ باعاسىنىڭ قىمباتتاۋ مولشەرى ％3 شاماسىندا بولادى؛ تۇرعىندار كىرىسىنىڭ ارتۋى ەكونوميكانىڭ ارتۋىمەن نەگىزىنەن تەڭ بولادى؛ يمپورت - ەكسپورتتىڭ ورنىقتىلىعى قامتاماسىز ەتىلىپ، ساپاسى جوعارىلايدى، حالىقارالىق كىرىس - شىعىس نەگىزىنەن تەپە - تەڭ بولادى؛ استىق ءونىم مولشەرى ءبىر تريلليون 300 ميلليارد جىڭنان جوعارى دەڭگەيدى ساقتايدى؛ ەكولوگيالىق ورتانىڭ ساپاسى ۇزدىكسىز جاقسارادى، باستى لاس زاتتاردىڭ شىعارىلۋ مولشەرى ۇزدىكسىز تومەندەيدى؛ ەنەرگيا جۇمسالىمىنىڭ كۇشەمەلىلىك نىساناسى ”14 - بەسجىلدىق“ پىلان مەزگىلىندە ءبىر تۇتاس باعالانادى، سونداي - اق ۇيلەسىمدى يكەمدىلىك قالدىرىلادى، تىڭنان ارتقان تۋىندامالى ەنەرگيا مەن شيكىزاتتىق ەنەرگيا ەنەرگيا تۇتىنىلىمىنىڭ جالپى مولشەرىن تىزگىندەۋ كولەمىنە كىرگىزىلمەيدى.
لي كىچياڭ باياندامادا بىلاي دەپ اتاپ كورسەتتى: 2022 - جىلى ءتۇرلى قىزمەتتەردى تىڭعىلىقتى، جاقسى ىستەۋ كەرەك: ماكرولىق ەكونوميكانىڭ جالپى جاعدايى كۇش سالا ورنىقتىرىلىپ، ەكونوميكالىق اينالىم ۇيلەسىمدى ارالىقتا ساقتالادى؛ بازار سۋبيەكتتەرىن ورنىقتىرۋعا، جۇمىستانۋدى قامتاماسىزداندىرۋعا كۇش سالىنىپ، ماكرولىق ساياساتتى اتقارۋدىڭ تەبىنى ارتتىرىلادى؛ رەفورما تاباندىلىقپەن تەرەڭدەتىلىپ، بازاردىڭ ومىرشەڭدىگى مەن دامۋدىڭ ىشكى قوزعاۋشى كۇشى ونان ارى جانداندىرىلادى؛ جاڭالىق اشۋ ارقىلى دامۋعا دەم بەرۋ ستراتەگياسى ىشكەرىلەي اتقارىلىپ، تۇلعالىق شارۋاشىلىقتىڭ نەگىزى بەكەمدەلەدى جانە ۇلعايتىلادى؛ ىشكى سۇرانىمدى ۇلعايتۋ ستراتەگياسى باتىل اتقارىلىپ، وڭىرلىك سايكەسە دامۋ جانە جاڭاشا قالا - قالاشىقتانۋ ىلگەرىلەتىلەدى؛ اۋىل شارۋاشىلىق ءوندىرىسى كۇش سالا ويداعىداي يگەرىلىپ، اۋىل - قىستاقتى جاپپاي كوركەيتۋ جەبەلەدى؛ جوعارى دەڭگەيدە سىرتقا ەسىك اشۋ كەڭەيتىلىپ، سىرتقى ساۋدانىڭ، شەتەل قارجىسىنىڭ ورنىقتى دامۋى ىلگەرىلەتىلەدى؛ ەكولوگيالىق ورتا ۇزدىكسىز جاقسارتىلىپ، جاسىل، تومەن كومىر قىشقىل گازدى دامۋ ىلگەرىلەتىلەدى؛ حالىق تۇرمىسى شىنايى قامتاماسىزداندىرىلىپ جانە جاقسارتىلىپ، قوعامدىق باسقارۋ كۇشەيتىلەدى جانە وندا جاڭالىق اشىلادى.
باياندامادا لي كىچياڭ تاعى ۇكىمەتتىڭ وزىندىك قۇرىلىسىن كۇشەيتۋ، ۇلت، ءدىن جانە چياۋمين ىستەرى قىزمەتى، مەملەكەت قورعانىسى جانە ارميا قۇرىلىسى، شياڭگاڭنىڭ، اۋمىننىڭ دامۋى جانە ەكى جاعالاۋ قاتىناسى، سونداي - اق ەلىمىزدىڭ ديپلوماتيالىق ساياساتى سياقتىلارعا بايىمداۋ جاسادى.
ءماجىلىستىڭ كەڭەستىك تارتىبىنە ساي، ءماجىلىس مەملەكەتتىك كەڭەستىڭ 2021 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ جاعدايى جانە 2022 - جىلعى حالىق شارۋاشىلىعى مەن قوعامدىق دامۋ جوسپار جوباسى جونىندەگى بايانداماسىن، سونداي - اق 2022 - جىلعى حالىق شارۋاشىلىعى مەن قوعامدىق دامۋ جوسپار جوباسىن، مەملەكەتتىك كەڭەستىڭ ورتالىق پەن جەرگىلىكتى ورىننىڭ 2021 - جىلعى مەجە ەسەبىنىڭ اتقارىلۋ جاعدايى جانە ورتالىق پەن جەرگىلىكتى ورىننىڭ 2022 - جىلعى مەجە ەسەپ جوباسى جونىندەگى بايانداماسىن جانە ورتالىق پەن جەرگىلىكتى ورىننىڭ 2022 - جىلعى مەجە ەسەپ جوباسىن قاراپ تەكسەردى.
مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى ۋاڭ چىن جەرگىلىكتى ءار دارەجەلى حالىق قۇرىلتايلارى مەن جەرگىلىكتى ءار دارەجەلى حالىق ۇكىمەتتەرىنىڭ ۇيىمدىق زاڭىنا وزگەرىس ەنگىزۋ جوباسى تۋرالى تۇسىنىك، 14 - كەزەكتى مەملەكەتتىك حالىق قۇرىلتايى ۋاكىلدەرىنىڭ سانى جانە سايلاۋ ماسەلەلەرى جونىندەگى قاۋلى جوباسى تۋرالى تۇسىنىك، شياڭگاڭ ەرەكشە اكىمشىلىك رايونىنان 14 - كەزەكتى مەملەكەتتىك حالىق قۇرىلتايىنا ۋاكىل سايلاۋ ءادىسى جوباسى تۋرالى تۇسىنىك، اۋمىن ەرەكشە اكىمشىلىك رايونىنان 14 - كەزەكتى مەملەكەتتىك حالىق قۇرىلتايىنا ۋاكىل سايلاۋ ءادىسى جوباسى تۋرالى تۇسىنىك جاسادى.
جەرگىلىكتى ءار دارەجەلى حالىق قۇرىلتايلارى مەن جەرگىلىكتى ءار دارەجەلى حالىق ۇكىمەتتەرىنىڭ ۇيىمدىق زاڭىنا وزگەرىس ەنگىزۋ جوباسى تۋرالى تۇسىنىكتە بىلاي دەپ اتاپ كورسەتىلدى: جەرگىلىكتى ورىنداردىڭ ۇيىمدىق زاڭى جەرگىلىكتى حالىق قۇرىلتايلارىنىڭ، جەرگىلىكتى ۇكىمەتتەردىڭ ۇيىمدىق جانە قىزمەتتىك تۇزىمدەرى جونىندەگى ءتۇبىرلى زاڭ، نەگىزگى زاڭداعى جەرگىلىكتى بيلىك قۇرىلىسى جونىندەگى بەلگىلەمەلەردىڭ زاڭ بولىپ شىعارىلۋى، اتقارىلۋى، جەرگىلىكتى ءار دارەجەلى مەملەكەتتىك بيلىك ورگاندارىنىڭ، اكىمشىلىك ورگانداردىڭ قىزمەت بيلىگىن جۇرگىزۋىنىڭ، قىزمەت جاۋاپكەرشىلىگىن وتەۋىنىڭ ماڭىزدى تۇزىمدىك كەپىلى. پارتيا 18 - قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى مەملەكەتتىڭ بيلىك ورگاندارىنىڭ قىزمەتى مەن قۇرىلىسىنا ايرىقشا ءمان بەرىپ، ءبىرسىپىرا كەلەلى ورنالاستىرۋلار جاساپ، ءبىرسىپىرا كەلەلى قىزمەتتەردى ىلگەرىلەتىپ، ءبىرسىپىرا كەلەلى تابىستارعا قول جەتكىزدى. شي جينپيڭنىڭ زاڭمەن باسقارۋ يدەياسىن، باس شۋجي شي جينپيڭنىڭ حالىق قۇرىلتايى تۇزىمىنە تاباندى بولۋ جانە ونى كەمەلدەندىرۋ جونىندەگى ماڭىزدى يدەياسىن دايەكتىلەندىرىپ، پارتيا ورتالىق كوميتەتىنىڭ كەلەلى شەشىمدەرى مەن ورنالاستىرۋلارىن جانە ورتالىقتىڭ حالىق قۇرىلتايى قىزمەتى ءماجىلىسىنىڭ رۋحىن تياناقتاندىرۋ ءۇشىن، امالياتتىق تاجىريبەلەردى مۇقيات قورىتىندىلاۋ نەگىزىندە، جەرگىلىكتى ورىنداردىڭ ۇيىمدىق زاڭىنا وزگەرىس ەنگىزۋ جانە ونى كەمەلدەندىرۋ قاجەت بولىپ وتىر. جالپى 48 تارماقتان تۇراتىن جوبادا وزگەرىس ەنگىزىلگەن باستى مازمۇندار مىنالار: ”جالپى ەرەجە“ تاراۋىنىڭ مازمۇنى تولىقتىرىلدى؛ جەرگىلىكتى ءار دارەجەلى حالىق قۇرىلتايلارى مەن ونىڭ تۇراقتى كوميتەتتەرىنىڭ ۇيىمدارى، قىزمەت ۇقىعى سياقتىلارعا قاتىستى بەلگىلەمەلەر كەمەلدەندىرىلدى؛ جەرگىلىكتى ءار دارەجەلى حالىق ۇكىمەتتەرىنىڭ ۇيىمدارى، قىزمەت ۇقىعى سياقتىلارعا قاتىستى بەلگىلەمەلەر كەمەلدەندىرىلدى؛ باقىلاۋ - تەكسەرۋ ءتۇزىلىسى رەفورماسىنىڭ قاجەتىنە سايكەسۋ ماقساتىندا قاتىستى مازمۇندار قوسىلدى؛ وڭىرلەردىڭ دامۋىنىڭ سەلبەستىك مەحانيزمى ايقىندالدى؛ جۇڭحۋا ۇلتى ورتاق تۇلعا تانىمىن مىقتاپ ورناتۋ سياقتى مازمۇندار تولىقتاندى ءارى قاتىستى بەلگىلەمەلەر كەمەلدەندىرىلدى.
14 - كەزەكتى مەملەكەتتىك حالىق قۇرىلتايى ۋاكىلدەرىنىڭ سانى جانە سايلاۋ ماسەلەلەرى جونىندەگى قاۋلى جوبا تۋرالى تۇسىنىكتە بىلاي دەپ اتاپ كورسەتىلدى: نەگىزگى زاڭ مەن قاتىستى زاڭدارداعى بەلگىلەمەلەرگە ساي، 2023 - جىلى 3 - ايدا 13 - كەزەكتى مەملەكەتتىك حالىق قۇرىلتايىنىڭ مىندەت وتەۋ مەرزىمى تولادى، 14 - كەزەكتى مەملەكەتتىك حالىق قۇرىلتايىنىڭ ۋاكىلدەرى 2023 - جىلى 1 - ايدا سايلانىپ بولۋعا ءتيىس. مەملەكەتتىك حالىق قۇرىلتايى ۋاكىلدەرىن سايلاۋ قىزمەتىن ويداعىداي ىستەۋ پارتيا مەن مەملەكەتتىڭ ساياسي ومىرىندەگى ءىرى ءىس، پارتيانىڭ ۇزاق ۋاقىت بيلىك جۇرگىزۋ نەگىزىن بەكەمدەۋ، مەملەكەتتىڭ بيلىك قۇرىلىسىن كۇشەيتۋ، جالپى بارىستىق حالىق دەموكراتياسىن دامىتۋ، حالىق قۇرىلتايى تۇزىمىنە تاباندى بولۋ جانە ونى كەمەلدەندىرۋ، مەملەكەتتى باسقارۋ جۇيەسى مەن باسقارۋ قابىلەتىن وسىزامانداندىرۋدى ىلگەرىلەتۋ، ءار جاقتىڭ اقىل - پاراساتى مەن كۇش - قۋاتىن ۇيىستىرىپ جاپپاي سوتسياليستىك وسىزاماندانعان مەملەكەت قۇرۋ جونىنەن توتەنشە كەلەلى ماڭىز الادى. نەگىزگى زاڭداعى، سايلاۋ زاڭىنداعى قاتىستى بەلگىلەمەلەرگە ساي، قاتىستى جاقتاردان كەڭ كولەمدە پىكىر الۋ نەگىزىندە، مەملەكەتتىك حالىق قۇرىلتايى تۇراقتى كوميتەتىنىڭ كوميتەت باستىقتارى ءماجىلىسى 13 - كەزەكتى مەملەكەتتىك حالىق قۇرىلتايى 5 - ءماجىلىسىنىڭ 14 - كەزەكتى مەملەكەتتىك حالىق قۇرىلتايى ۋاكىلدەرىنىڭ سانى جانە سايلاۋ ماسەلەلەرى جونىندەگى قاۋلى جوبانى دايىنداپ، 2021 - جىلى 12 - ايدا 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 32 - رەتكى ءماجىلىسىنىڭ قاراۋىنا ۇسىندى، ءماجىلىس 13 - كەزەكتى مەملەكەتتىك حالىق قۇرىلتايى 5 - ءماجىلىسىنىڭ قاراۋىنا ۇسىنۋدى ۇيعاردى.
شياڭگاڭ ەرەكشە اكىمشىلىك رايونىنان 14 - كەزەكتى مەملەكەتتىك حالىق قۇرىلتايىنا ۋاكىل سايلاۋ ءادىسى جوباسى تۋرالى تۇسىنىك پەن اۋمىن ەرەكشە اكىمشىلىك رايونىنان 14 - كەزەكتى مەملەكەتتىك حالىق قۇرىلتايىنا ۋاكىل سايلاۋ ءادىسى جوباسى تۋرالى تۇسىنىكتە مىنالار اتاپ كورسەتىلدى: سايلاۋ زاڭىنداعى بەلگىلەمەلەر بويىنشا شياڭگاڭ ەرەكشە اكىمشىلىك رايونىنان، اۋمىن ەرەكشە اكىمشىلىك رايونىنان مەملەكەتتىك حالىق قۇرىلتايىنا سايلاناتىن ۋاكىلدەردىڭ سانى مەن ۋاكىلدەردى سايلاۋ ءادىسىن مەملەكەتتىك حالىق قۇرىلتايى ايىرىم بەلگىلەيدى. سوندىقتان وسى كەزەكتى مەملەكەتتىك حالىق قۇرىلتايىنىڭ مىندەت وتەۋ مەرزىمى تولۋدان بۇرىن شياڭگاڭنان، اۋمىننان 14 - كەزەكتى مەملەكەتتىك حالىق قۇرىلتايىنا ۋاكىل سايلاۋ ءادىسىن جاساۋ قاجەت. قاتىستى قىزمەت ورنالاستىرۋىنا ساي، مەملەكەتتىك حالىق قۇرىلتايى تۇراقتى كوميتەتىنىڭ زاڭ قىزمەتى كوميتەتى، شياڭگاڭ، اۋمىن ءتۇبىرلى زاڭ كوميتەتى ورتالىقتىڭ قاتىستى تاراۋلارىمەن بىرگە شياڭگاڭ ەرەكشە اكىمشىلىك رايونىنان، اۋمىن ەرەكشە اكىمشىلىك رايونىنان 14 - كەزەكتى مەملەكەتتىك حالىق قۇرىلتايىنا ۋاكىل سايلاۋ ءادىسى جوباسىن اقىلداسىپ دايىندادى ءارى شياڭگاڭ ەرەكشە اكىمشىلىك رايونىنىڭ اكىمىنەن، اۋمىن ەرەكشە اكىمشىلىك رايونىنىڭ اكىمىنەن، شياڭگاڭ ەرەكشە اكىمشىلىك رايونىنداعى جانە اۋمىن ەرەكشە اكىمشىلىك رايونىنداعى مەملەكەتتىك حالىق قۇرىلتايى ۋاكىلدەرىنەن، مەملەكەتتىك ساياسي كەڭەس مۇشەلەرىنەن پىكىر الدى.
ديڭ شۋەشياڭ، ليۋ حى، شۇي چيلياڭ، سۇن چۇنلان، لي شي، لي چياڭ، لي حۇڭجۇڭ، ياڭ جيەچى، ياڭ شياۋدۋ، جاڭ يوۋشيا، چىن شي، چىن چۋانگو، چىن مين - ىر، حۋ چۇنحۋا، گو شىڭكۇن، حۋاڭ كۇنميڭ، ساي چي، يوۋ چۋان، ۋي فىڭحى، ۋاڭ يۇڭ، ۋاڭ ي، شياۋ جيە، جاۋ كىجى، جوۋ چياڭ، جاڭ جۇن، جاڭ چيڭلي، ليۋ چيباۋ، پابالا گىلەلاڭجيە، ۋان گاڭ، حى حوۋحۋا، لۋ جانگۇڭ، ما بياۋ، چىن شياۋگۋاڭ، لياڭ جىنيىڭ، شيا باۋلۇڭ، لي بين، باتىر، ۋاڭ يۇڭچيڭ، حى ليفىڭ، سۋ حۇي، جىڭ جيانباڭ، گۋ شىڭزۋ، ليۋ شينچىڭ، حى ۋي، شاۋ حۇڭ، گاۋ يۇنلۇڭ، سونداي - اق ورتالىق اسكەري ىستەر كوميتەتىنىڭ مۇشەلەرى لي زوچىڭ، مياۋ حۋا، جاڭ شىڭمين قاتارلىلار دا ءتوراعالار مىنبەسىنەن ورىن الدى.
اۋمىن ەرەكشە اكىمشىلىك رايونىنىڭ اكىمى حى يچىڭ ماجىلىسكە سىرتتاي قاتىناستى ءارى ءتوراعالار مىنبەسىنەن ورىن الدى.
مەملەكەتتىك ساياسي كەڭەس 13 - كەزەكتى كوميتەتىنىڭ 5 - ماجىلىسىنە قاتىناسقان ساياسي كەڭەس مۇشەلەرى ماجىلىسكە سىرتتاي قاتىناستى.
ورتالىق پەن مەملەكەت ورگاندارىنىڭ قاتىستى تاراۋلارىنىڭ، ازاتتىق ارميانىڭ قاتىستى ورىندارىنىڭ، حالىقتىق ۇيىمداردىڭ قاتىستى جاۋاپتىلارى ماجىلىسكە سىرتتاي قاتىناستى نەمەسە سىرتتاي تىڭدادى.
شەتەلدەردىڭ جۇڭگوداعى ەلشىلەرى ءماجىلىستى سىرتتاي تىڭدادى.
