شي جينپيڭ استىق حاۋىپسىزدىگىنە ايالدادى:
ءارقانداي ىستە ىشەر اس ماسەلەسى ەڭ ماڭىزدى
□ شينحۋا اگەنتتىگىنىڭ تىلشىلەرى جاڭ شياۋسۇڭ، لين حۇي
”استىق حاۋىپسىزدىگى ’مەملەكەتتىڭ زور ءىسى‘. ءارقانداي ىستە ىشەر اس ماسەلەسى ەڭ ماڭىزدى“.
3 - ايدىڭ 6 - كۇنى تۇستەن كەيىن، باس شۋجي شي جينپيڭ مەملەكەتتىك ساياسي كەڭەس 13 - كەزەكتى كوميتەتىنىڭ 5 - ماجىلىسىنە قاتىناسىپ جاتقان اۋىل شارۋاشىلىعى سالاسىنداعى، قوعامدىق يگىلىك جانە قوعامدىق قامتاماسىزداندىرۋ سالاسىنداعى مۇشەلەرگە امانداسا بارعاندا ءارى بىرىككەن گرۋپپالار ماجىلىسىنە قاتىناسقاندا، استىق حاۋىپسىزدىگىن قامتاماسىز ەتۋ ماسەلەسىن ءتۇيىن ەتىپ سويلەدى.
ماجىلىستە، مەملەكەتتىك ساياسي كەڭەستىڭ بىرنەشە مۇشەسى ۇقساماعان تۇرعىدان، ۋادەلەسىپ العانداي - اق استىق حاۋىپسىزدىگى ماسەلەسىن تىلگە الدى: اۋىل شارۋاشىلىعى ونىمدەرىنىڭ ساپا حاۋىپسىزدىگى نەگىزىن بەكەمدەۋ، تۇقىم شارۋاشىلىعىندا دەربەس جاڭالىق اشۋدى جەبەۋ، اۋىل شارۋاشىلىعىن، اۋىل - قىستاقتى وسىزامانداندىرۋدى جاپپاي ىلگەرىلەتۋ...
باس شۋجي شي جينپيڭ مۇقيات تىڭداپ، مۇشەلەرمەن اۋىق - اۋىق ىشكەرىلەي اڭگىمەلەستى.
”جۇڭگونى كىم باعادى؟“، كوپشىلىكتىڭ ءسوزىن ەستىگەننەن كەيىن، باس شۋجي وسى ءبىر ماسەلەگە جاۋاپ بەردى.
”جۇڭگو ءوز كۇشىنە سۇيەنىپ ءومىر ءسۇرىپ، ءوزىن ءوزى باعۋى كەرەك“. باس شۋجي شي جينپيڭ كەسكىن ەمەۋرىن تانىتىپ: ”قولىڭدا استىق بولسا، كوڭىلىڭدە الاڭ بولمايدى“، - دەدى. ”ەگەر ءوز توستاعانىمىزدى مىقتى ۇستاي الماساق، وزگەلەردىڭ ىرقىندا كەتەمىز“. ”استىق حاۋىپسىزدىگى ستراتەگيالىق ماسەلە“.
بىلتىر باس شۋجي شي جينپيڭ ارناۋلى تۇردە ءبىر ءبولىم جەرلەردەگى جاۋاپتى جولداستارعا قاتاڭ تۇردە: ”استىق“، ”كوجە قاتىق“ جاۋاپكەرشىلىگىن بۇكىلدەي بازارعا ارتىپ قويۋعا بولمايدى، استىقسىز قالۋعا بولمايدى، - دەگەن بولاتىن.
ماجىلىستە، باس شۋجي وسى ءىستى تىلگە الىپ، استىق حاۋىپسىزدىگىندە پارتيا مەن ۇكىمەت بىرگە جاۋاپكەرشىلىك ارقالاۋدى جاپپاي تياناقتاندىرۋ، استىق حاۋىپسىزدىگى جاۋاپكەرشىلىك ءتۇزىمىن تەكسەرۋدى قاتاڭداستىرۋ، استىق وندىرىلەتىن نەگىزگى رايوندار، استىق ساتىلاتىن نەگىزگى رايوندار، ءوندىرۋ مەن ساتۋ تەڭگەرىلگەن رايوندار توستاعاندارىن بىرگە كوتەرۋى، جاۋاپكەرشىلىكتى بىرگە ارقالاۋى كەرەكتىگىن باسا دارىپتەدى.
ەگىستىك جەر استىق ءوندىرىسىنىڭ جان تامىرى.
ەگىستىك جەردى قورعاۋ ماسەلەسىنە توقتالعاندا، باس شۋجي شي جينپيڭ كەزەكتەگى بىرنەشە ءتۇرلى كورنەكتى ماسەلەنى ساناپ كورسەتىپ بىلاي دەدى: كول ورناتىپ كورىنىس جاساۋ، بالىق كولشىگىن قازۋ، باعىمشىلىق الاڭىن قۇرۋ، گۇل - ءشوپ، جەمىس اعاشىن ءوسىرۋ سياقتى ەگىستىك جەردى بەتالدى يەلەنۋ بىلىققان جايتتەرى تالاي رەت تيداۋ سالىنسا دا تيىلمادى؛ ەگىستىك جەردى يەلەۋ مەن تولىقتاۋدى تەڭەستىرۋ جاعىندا الدامكوستىك ەتىلىپ، ”جالعاندىق جاسالۋدا“؛ ەگىستىك جەرلەرگە بەتالدى قۇرىلىس سالۋ ەركىنە جىبەرىلىپ، ”اتانىڭ توككەن تەرىن بالاسى ايالامايتىن“ بولدى...
ول بىلاي دەپ باسا دارىپتەدى: ”ازۋلى“ قاتاڭ شارالاردى قولدانىپ، ءار دارەجەلى جەرگىلىكتى پارتكومدار مەن ۇكىمەتتەردىڭ ەگىستىك جەرلەردى قورعاۋ جاۋاپكەرشىلىگىن جاپپاي قاتايتىپ، ءبىر ميلليارد 800 ميلليون مۋ ەگىستىك جەردىڭ اتى زاتىنا ساي بولۋىنا شىنايى كەپىلدىك ەتۋ كەرەك.
جۋىق جىلداردان بەرى، باس شۋجي شي جينپيڭ تالاي رەت اس - سۋ ىسىراپشىلدىعىن تەجەۋدى تالاپ ەتىپ، ۇنەمشىل قوعام قۇرۋدى ىلگەرىلەتتى.
باس شۋجيدىڭ قاراۋىنشا، ءبىزدىڭ استىقتى ۇنەمدەۋ جاعىندا ىستەگەندەرىمىز ءالى دە جەتكىلىكتى ەمەس، اسىرەسە، استا - توك ءىشىپ - جەۋ، ءسان - سالتاناتقا بەرىلۋ، باردامدىعىن ايگىلەۋ، ابىروي ساناپ، ىسىراپشىلدىق تۋدىرۋ دەگەندەي ءبىرسىپىرا ناشار ادەتتەر قوعامدا ءالى دە ءومىر سۇرۋدە.
”جۇڭگولىقتاردىڭ قارنى تويعانىنا قانشا ۋاقىت بولدى عوي دەيسىڭ؟ وتكەن عاسىردىڭ 80 - جىلدارىنان كەيىن تۋىلعان بالالار عانا اشارشىلىق كورمەدى ەمەس پە. بۇرىن كىمدەر اش جۇرمەدى دەيسىز؟ ءبىراق ادام ۇمىتشاق كەلەدى عوي“. باس شۋجي شي جينپيڭ بىلاي دەپ باسا دارىپتەدى: ەلىمىزدىڭ استىق حاۋىپسىزدىگىن قاتاڭ تەڭگەرۋ جاعدايى ۇزاق ۋاقىت بويى وزگەرمەيدى. استىق حاۋىپسىزدىگى سىندى وسى ماسەلەدە تيتتەي دە سەلقوستىق ىستەۋگە بولمايدى.
(شينحۋا اگەنتتىگىنىڭ 3 - ايدىڭ 6 - كۇنى بەيجيڭنەن بەرگەن حابارى)
