ۋاكىل لي بين:
كورلا المۇرتىن ماڭگى ماۋەلەتەمىز
□ انار بۇلت/ شينجياڭ گازەتىنىڭ ءتىلشىسى ليۋ ي
اۋىل - قىستاقتى گۇلدەندىرۋدە كاسىپ سالاسىن الدىمەن دامىتۋ كەرەك. كورلا المۇرتى بايىنعولين موڭعۇل اۆتونوميالى وبلىسىنىڭ ەرەكشە، ابزال كاسىپ سالاسى، سونداي - اق مەملەكەتتىك حالىق قۇرىلتايىنىڭ ۋاكىلى، كورلا قالاسى تەكەشى اۋىلدىق پارتكومنىڭ ورىنباسار شۋجيى لي بين كوپ جىلدان بەرى ۇزدىكسىز نازار اۋدارىپ كەلە جاتقان سالا.
”ءبىز، ءسوز جوق، اۋىلىمىزدىڭ ەرەكشە، ابزال كاسىپ سالاسىن ويداعىداي دامىتىپ، ونى شارۋالار بۇقاراسىنىڭ كىرىسىن ارتتىرىپ، اۋقاتتانۋىنا جەتەكشىلىك ەتۋدىڭ، اۋىل - قىستاق كاسىپ سالاسىن گۇلدەندىرۋدىڭ ماڭىزدى تۇتقاسىنا اينالدىرۋىمىز كەرەك“. 3 - ايدىڭ 4 - كۇنى لي بين ءتىلشىنىڭ سۇحباتىن قابىلداعاندا بىلاي دەدى: كوپ جىلدىق دامۋ ارقىلى بۇگىنگى تاڭدا كورلا المۇرتى كاسىپ سالاسىنىڭ جوعارى ساپالى دامۋىنىڭ جەدەل ارناسىنا ءتۇسىپ، ساپاسى اناعۇرلىم جاقسى، ونىمدىلىگى اناعۇرلىم جاقسى بولۋ نىساناسىنا قاراي ۇزدىكسىز ىلگەرىلەۋدە.
مەملەكەتتىك حالىق قۇرىلتايىنىڭ ۋاكىلى بولىپ سايلانعاننان بەرى لي بين تالاي رەت ءبىرىنشى شەپكە بارىپ تەكسەرۋ - زەرتتەۋ جۇرگىزىپ، كاسىپ سالاسىنىڭ دامۋىنداعى قيىن تۇيىندەردى، بوگەتتەردى دەر كەزىندە بايقاپ، قىزمەتتەستەرىمەن بىرگە ءادىس - امال قاراستىرىپ بىرگە شەشتى.
”سوڭعى جىلدارى كورلا المۇرتى مەملەكەتتىڭ ابزال، ەرەكشە كاسىپ شوعىرى قۇرىلىس نىسانىنا، مەملەكەتتىڭ جاعراپيالىق بەلگىسىنە، تۇڭعىش توپتاعى جۇڭگو - ەۆروپا جاعراپيالىق بەلگىسىن قورعاۋ تىزىمدىگىنە ەنگىزىلىپ، ماركا باسەكەلىك قۋاتى مەن ىقپالى جەدەل جوعارىلادى“. ۋاكىل لي بين بىلاي دەدى: كورلا المۇرتى ماركاسىنىڭ ىقپالى ۇزدىكسىز جوعارىلاۋمەن بىرگە، المۇرت اعاشتارىنىڭ جاسامىس تارتۋى، ءونىم مولشەرىنىڭ ازايۋى، ساپاسىنىڭ تومەندەۋى سياقتى ماسەلەلەر دە كورنەكتىلەنىپ، ساپاسىن جوعارىلاتىپ، ونىمدىلىگىن ارتتىرۋ كەزەك كۇتتىرمەيتىن ماسەلەگە اينالدى.
جاپپاي تەكسەرۋ - زەرتتەۋ جۇرگىزۋ، سونداي - اق كاسىپتىك مامانداردىڭ زەرتتەۋى مەن دالەلدەۋى ارقىلى ۋاكىل لي بين مەن قىزمەتتەستەرى تولىقتاپ ەگۋ، تولىقتاپ جاساۋ، كەسىپ جاڭالاۋ، اعاش تۇلعاسىن جاڭالاۋ سياقتى شارالاردى قولدانىپ، ساپالى جەمىس بەرۋ مولشەرى تومەن، مۋ باسىندىق ورتاشا ءونىم مولشەرى ءۇرتىس تومەن بولعان تومەن ءتۇسىمدى، تومەن ءونىمدى باقتاردى وزگەرتىپ، المۇرتتىڭ ءونىم مولشەرى مەن ساپاسىن ونان ارى جوعارىلاتۋدى ۇيعاردى.
الايدا جاسامىس جەمىس اعاشتارىن جاس اعاشتارعا اۋىستىرىپ، ودان جەمىس العانشا 3 جىل ۋاقىت كەتەدى، بۇل قىسقا مەرزىمدە كىرىسكە ىقپال جاسايدى، ال جەمىس اعاشتارىن اۋىستىرماسا، كاسىپ سالاسىنىڭ ۇزاق ۋاقىت اقاۋسىز دامۋىنا ىقپال جاسايدى، بۇل ماسەلەنى قالاي شەشۋ كەرەك؟ ۋاكىل لي بين بۇنىڭ جاۋابىن تابۋ ءۇشىن، كوپ رەت جەرگىلىكتى شارۋالار سەلبەستىك كووپەراتيۆىنە بارىپ تۇيىندە تۇرىپ تەكسەرۋ - زەرتتەۋ جۇرگىزىپ، شارۋالارمەن، تەحنيكتەرمەن شەشۋ جوباسىن ىشكەرىلەي تالقىلاپ، قاتىستى پىكىرلەردى جيناپ، شارالاردى ساپالىلاندىرىپ، جاسامىس جەمىس اعاشتارىن اۋىستىرۋ قىزمەتىن ۇيلەسىمدى دە بايىپتىلىقپەن ىلگەرىلەتتى.
ۇزدىكسىز تەكسەرۋ - زەرتتەۋ جۇرگىزۋ ارقىلى ءبىر توپ ءونىمدى ”كەشەندى شارالار“ شارۋا بۇقاراسىن ۋايىمنان ارىلتتى. ”جەمىس اعاشتارىن اۋىستىرعاننان كەيىن ماقتا سياقتى داقىلداردى كىرىستىرىپ ەگىپ، قىسقا مەرزىمدىك كىرىس زيانىنىڭ ورنىن تولتىرۋعا بولادى، ۇزاق ۋاقىتتى كوزدەي وتىرىپ، ءبىز ازىقتىق ساڭىراۋقۇلاق جەتىلدىرۋ كاسىپ سالاسىن ەنگىزىپ، ءوندىرىس ونىمدىلىگىن ەڭ تومەنگى شەكتەن تۇسىرمەدىك“. ۋاكىل لي بين بىلاي دەدى: ازىقتىق ساڭىراۋقۇلاق جەتىلدىرۋ جەمىس اعاشتارىن اۋىستىرعاننان كەيىن قالىپتاسقان كونە جەمىس اعاشتارىنىڭ ورنىن باسىپ، بايلىقتان تولىق پايدالانۋدى جۇزەگە اسىرادى، سونىمەن بىرگە ساڭىراۋقۇلاقتىڭ ءار بايلامىنان شارۋالار 4 يۋان پايدا تابادى. بىرنەشە جىل قۇرىلىس جۇرگىزۋ ارقىلى تەكەشى اۋىلى 400 ازىقتىق ساڭىراۋقۇلاق جىلىجايىن سالىپ، توڭىرەكتەگى اۋىل - قالاشىقتاردان 2000عا جۋىق ادامنىڭ جۇمىسقا ورنالاسۋىنا تۇرتكى بولدى.
بيىلعى مەملەكەتتىك ەكى ماجىلىستە ۋاكىل لي بين ”كورلا المۇرتى كاسىپ سالاسى تىزبەگىن ورناتىپ، كەمەلدەندىرىپ، اۋىل - قىستاقتى گۇلدەندىرۋگە دەم بەرۋ“ جونىندەگى ۇسىنىستى الا كەلدى. ول بىلاي دەدى: اۋىل شارۋاشىلىعىنىڭ تۇتاس كاسىپ سالاسى تىزبەگىن دامىتۋ اۋىل - قىستاق كاسىپ سالاسىن گۇلدەندىرۋدى ىلگەرىلەتۋدىڭ، شارۋالاردىڭ بايۋ ارناسىن كوبەيتۋدىڭ، بىرگە بايۋدى جۇزەگە اسىرۋدىڭ تابيعي تالابى، باستاماشى كاسىپورىنداردى جەتەكشى، وتباسىلىق ەگىس الاڭىن نەگىز، شارۋالار كاسىپتىك سەلبەستىك كووپەراتيۆىن دانەكەر ەتكەن ءبىر تۇلعالانعان اۋىل شارۋاشىلىعى تيجارات ۇيىمدارى وداعىن جەدەل قۇرىپ، ”شوعىر“ فورماسىمەن كورلا المۇرتىنىڭ تۇتاس كاسىپ سالاسى تىزبەگىن قالىپتاستىرىپ، كاسىپ سالاسىنىڭ دامۋ دەڭگەيى مەن جالپىلىق ونىمدىلىگىن اناعۇرلىم جوعارىلاتىپ، اناعۇرلىم كوپ شارۋانى كاسىپ سالاسىنىڭ دامۋ پايداسىنان يگىلىكتەندىرۋ كەرەك.
