شي جينپيڭ استاناداعى مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى
بۇكىل قوعام جاپپاي ەكولوگيالىق وركەنيەت قۇرىلىسىن امالياتتا ايگىلەۋشىلەردەن، ىلگەرىلەتۋشىلەردەن بولىپ، وتانىمىزدىڭ اسپانىنىڭ اناعۇرلىم اشىق، تاۋىنىڭ اناعۇرلىم جاسىل، سۋىنىڭ اناعۇرلىم تۇنىق، ەكولوگيالىق ورتاسىنىڭ اناعۇرلىم تاماشا بولۋىنا مۇمكىندىك جاساۋ كەرەك
لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتىناستى
3 - ايدىڭ 30 - كۇنى پارتيا مەن مەملەكەت باسشىلارىنان شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار بەيجيڭ قالاسى داشيڭ رايونى حۋاڭسۇن قالاشىعىنا كەلىپ، استاناداعى مىندەتتى اعاش ەگۋ قيمىلىنا قاتىناستى. سۋرەتتە: شي جينپيڭ كوپشىلىكپەن بىرگە اعاش ەگۋدە.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 3 - ايدىڭ 30 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 3 - ايدىڭ 30 - كۇنى تۇستەن بۇرىن استاناداعى مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى: پارتيا 18 - قۇرىلتايىنان بەرى مەن ۇدايى 10 جىل كوپشىلىكپەن بىرگە استاناداعى مىندەتتى اعاش ەگۋگە قاتىناسىپ كەلەمىن، بۇندا كورىكتى جۇڭگو قۇرۋعا ءبىر كىسىلىك ۇلەسىمدى قوسۋدى ءارى بۇكىل قوعامدا، اسىرەسە، جاستار مەن ورەندەردىڭ جۇرەگىنە ەكولوگيالىق وركەنيەتتىڭ تۇقىمىن سەبۋدى ىلگەرىلەتىپ، كوپشىلىكتى ەكولوگيالىق وركەنيەت قۇرىلىسىن امالياتتا ايگىلەۋشىلەردەن، ىلگەرىلەتۋشىلەردەن بولۋعا، تاباندىلىقپەن ۇزاق ۋاقىت ەڭبەك ەتىپ، وتانىمىزدىڭ اسپانىنىڭ اناعۇرلىم اشىق، تاۋىنىڭ اناعۇرلىم جاسىل، سۋىنىڭ اناعۇرلىم تۇنىق، ەكولوگيالىق ورتاسىنىڭ اناعۇرلىم تاماشا بولۋىنا مۇمكىندىك جاساۋعا ۇندەۋدى ماقسات ەتتىم.
بايتاق دالاعا كوكتەم كەلىپ، بارشا تىرشىلىك جاڭاردى. تۇستەن بۇرىن ساعات 10نان 30 مينۋت وتكەن مولشەردە، پارتيا مەن مەملەكەت باسشىلارىنان شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار توپتىق اۆتوكولىككە وتىرىپ، بەيجيڭ قالاسى داشيڭ رايونى حۋاڭسۇن قالاشىعىنداعى اعاش ەگۋ تۇيىنىنە كەلىپ، استاناداعى بۇقارامەن بىرگە مىندەتتى اعاش ەگۋگە قاتىناستى.
اعاش ەگۋ ءتۇيىنى داشيڭ شينچىڭ قالا سەيىل - سەرۋەن باقشاسىنا ورنالاسقان، جەر اۋدانى شامامەن 1500 مۋ. بۇل جەر بۇرىن سۋ قويماسىنىڭ قايراڭى بولاتىن، قازىر قالا باقشاسى بولىپ جوبالانعان، سالىنىپ بولعاننان كەيىن ول توڭىرەكتەگى بۇقارانىڭ سەيىل - سەرۋەن جاسايتىن، كوڭىل اشاتىن، تابيعاتپەن قاۋىشاتىن ەكولوگيالىق كەڭىستىگىنە اينالادى.
باس شۋجيدىڭ كەلگەنىن كورىپ، وسى ارادا اعاش ەگىپ جاتقان كادرلار مەن بۇقارا باس شۋجيمەن ىستىق ىقىلاسپەن امانداستى. شي جينپيڭ كوپشىلىككە قول بۇلعاپ قۇرمەت ءبىلدىرىپ، قولىنا كۇرەك الىپ اعاش ەگەتىن جەرگە قاراي ءجۇردى، ونان سوڭ بەيجيڭ قالاسىنداعى، مەملەكەتتىك ورمان شارۋاشىلىعى جانە جايلىم مەكەمەسىندەگى جاۋاپتى جولداستارمەن، سونداي - اق استاناداعى كادر - بۇقارامەن، پيونەرلەرمەن بىرگە قاۋىرت جۇمىسقا كىرىستى.
كۇرەك كوتەرىپ توپىراق كۇرەدى، توپىراق قومداپ بوگەن جاسادى، شەلەك كوتەرىپ، اعاش سۋاردى... شي جينپيڭ ماي قاراعاي، اسەم شابدالى، ماگنوليا، تاس الما اعاشى، ۇساق جاپىراقتى ەرەن سياقتى كوپتەگەن ءتۇپ قالامشا وتىرعىزدى. شي جينپيڭ ەڭبەك ىستەي ءجۇرىپ، بالالاردىڭ ۇيرەنۋ، تۇرمىس جاعدايىن ۇعىسىپ، ولارعا احىلاق، اقىل - وي، دەنە، ەستەتيكا، ەڭبەك جاقتارىنان جان - جاقتى دامىپ، ”ەڭبەكتىڭ“ رولىنا نەمقۇرايدى قاراماي، كىشكەنتايلارىنان ەڭبەك تانىمىن، قورشاعان ورتانى قورعاۋ تانىمىن، ۇنەمشىلدىك تانىمىن جەتىلدىرىپ، بولىمسىز بولسا دا جاقسىلىق ىستەۋدەن قاشپاي، كىشكەنتاي ىستەردەن باستاپ ىستەپ، پارتيا مەن حالىق قاجەت ەتەتىن جارامدى دارىندى بولىپ جەتىلۋگە قۇلشىنۋدى تاپسىردى. اعاش ەگۋ قيمىلى قاربالاس ءجۇرىلىپ، ەڭبەككە قاتىناسقان باسشى جولداستار كوپشىلىكپەن بىرگە توپىراق قومداپ، اعاش سۋارىپ، ىقىلاسپەن اڭگىمەلەسىپ، قىزۋ مەرەيگە شومدى.
اعاش ەگۋ ارەدىگىندە شي جينپيڭ سول جەردەگى كادرلار مەن بۇقاراعا بىلاي دەپ باسا دارىپتەدى: جۇڭحۋا ۇلتىنىڭ ماڭگى باياندى دامۋىن جۇزەگە اسىرۋ − ءبىزدىڭ ءارقاشان تالىقپاي تالپىناتىن نىسانامىز. جاڭا جۇڭگو قۇرىلعاننان بەرى پارتيا بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، اعاش ەگىپ، ورمان ءوسىرىپ، وتاندى جاسىلداندىرىپ، تاريحي تابىستارعا قول جەتكىزىپ، دۇنيە ءجۇزىن جالت قاراتقان ەكولوگيالىق كەرەمەتتەر جاسادى. پارتيا 18 - قۇرىلتايىنان بەرى ءبىز تۇنىق سۋ، جاسىل تاۋ − باعالى بايلىق ۇستانىمىنا تاباندى بولىپ، ەكولوگيالىق وركەنيەت قۇرىلىسىن جاپپاي كۇشەيتىپ، مەملەكەت جەرىن جاسىلداندىرۋدى ىلگەرىلەتىپ، قالا مەن اۋىلدىڭ قونىس ورتاسىن جاقسارتتىق، كورىكتى جۇڭگو ۇزدىكسىز رەالدىققا اينالۋدا. سونىمەن بىرگە، ءبىز مىنانى دا كورە ءبىلۋىمىز كەرەك: ەكولوگيالىق جۇيەنى قورعاۋ جانە قالپىنا كەلتىرۋ، ەكولوگيالىق ورتانى ءۇزىلدى - كەسىلدى جاقسارتۋ سالعان جەردەن بىتە سالاتىن وڭاي ءىس ەمەس، ول ءالى دە ۇزاق ۋاقىت جاپالى قۇلشىنىس جاساۋدى قاجەت ەتەدى، ءسوز جوق، تايماي - تالىقپاي، كىدىرمەي العا باسۋ كەرەك.
شي جينپيڭ بىلاي دەپ اتاپ كورسەتتى: ورمان - توعاي − سۋ قويماسى، اقشا قامباسى، استىق قامباسى، قازىر وعان تاعى ”كومىرتەگى قامباسى“ دەگەندى قوسۋعا ءتيىسپىز. ورمان - توعاي مەن جايلىم مەملەكەتتىڭ ەكولوگيالىق حاۋىپسىزدىگى جونىنەن نەگىزدىك، ستراتەگيالىق رول اتقارادى، ورمان - توعاي، جايلىم كوركەيسە ەكولوگيا كوركەيەدى. قازىر ەلىمىزدىڭ ەكولوگيالىق وركەنيەت قۇرىلىسى ەكولوگيالىق ورتانىڭ جاقسارۋىن سان وزگەرىسىنەن ساپا وزگەرىسىنە اينالدىرۋدى جۇزەگە اسىرۋدىڭ شەشۋشى كەزەڭىنە ءوتتى. ءبىز جاڭا دامۋ ۇستانىمىن مىزعىماس تاباندىلىقپەن دايەكتىلەندىرىپ، ەكولوگيانى الدىڭعى ورىنعا قويۋ، جاسىل دامۋ جولىمەن بۇلجىماي ءجۇرىپ، تاۋ، سۋ، ورمان، اتىز، كول، جايلىم، قۇمدى ءبىر تۇلعالاندىرىپ قورعاۋدى جانە جۇيەلى جونگە سالۋدى ءبىر تۇتاس جوسپارلاپ ىلگەرىلەتىپ، مەملەكەت جەرىن جاسىلداندىرۋدى عىلمي ورىستەتىپ، ورمان - توعاي، جايلىم بايلىعىنىڭ جالپى مولشەرى مەن ساپاسىن جوعارىلاتىپ، ەكولوگيالىق جۇيەنىڭ كومىرتەگىن جيناۋ قابىلەتىن بەكەمدەپ جانە كۇشەيتىپ، جاھاندىق قورشاعان ورتا مەن كليماتتى جونگە سالۋدى ىلگەرىلەتۋگە، ادام مەن تابيعات جاراسىمدى، قاتار ءومىر سۇرەتىن وسىزاماندانۋدى قۇرۋعا اناعۇرلىم زور ۇلەس قوسۋىمىز كەرەك.
شي جينپيڭ بىلاي دەپ باسا دارىپتەدى: جاسىل جامىلعى ەگۋ، جاسىل جامىلعىنى قورعاۋ، تابيعاتتى ايالاۋ − جۇڭحۋا ۇلتىنىڭ ءداستۇرلى تاماشا ءمورالى. سايحانبا رۋحىن اسقاقتاتىپ، جالپى حالىقتىڭ مىندەتتى اعاش ەگۋ قىزمەتىن ۇزدىكسىز ىلگەرىلەتىپ، ءادىس - تاسىلگە جاڭالىق ەنگىزىپ، ۇگىت تاربيەنى كۇشەيتىپ، مىندەتتى اعاش ەگۋ قيمىلىن عىلمي، ۇنەمشىل، ناقتى ۇيىمداستىرىپ ورىستەتۋ كەرەك. ءار دارەجەلى باسشى كادرلار مەملەكەت جەرىن جاسىلداندىرۋدىڭ جانە ەكولوگيالىق وركەنيەت قۇرىلىسىنىڭ ءتۇرلى قىزمەتتەرىن ويداعىداي يگەرىپ، كورىكتى تاۋ - وزەندەردىڭ حالىققا باقىت اكەلۋىنە مۇمكىندىك جاساۋ كەرەك.
بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك كەڭەستىڭ مۇشەلەرى قاتارلىلار اعاش ەگۋ قيمىلىنا قاتىناستى.
