انار بۇلت / شينجياڭ گازەتىنىڭ ءتىلشىسى شيە حۇيبيان 4 - ايدىڭ 4 - كۇنى ۇرىمجىدەن حابارلايدى. جۋىقتا مەملەكەتتىك كەڭەس مەملەكەت مەنشىگىندەگى كاسىپورىندار رەفورماسى باسشىلىق گرۋپپاسى كەڭسەسى ەڭ جاڭا ”عىلىم - تەحنيكا رەفورماسىنان ۇلگى كورسەتەتىن كاسىپورىن“ ءتىزىمىن جاريالادى، ورتالىق كاسىپورىندارىن، مەملەكەت مەنشىگىندەگى كاسىپورىنداردى قامتىعان 440 كاسىپورىن تاڭدالدى، شينجياڭنان 5 كاسىپورىن قاتاردان كورىندى.
وسى 5 كاسىپورىن جەكە - جەكە شينجياڭ شۋەفىڭ عىلىم - تەحنيكا (توبى) جارنا شەكتى سەرىكتەستىگى، تيانكاڭ بيولوگيا جارنا شەكتى سەرىكتەستىگى، شينجياڭ تيانرۇن ءسۇت شارۋاشىلىعى جارنا شەكتى سەرىكتەستىگى، شينجياڭ كۇيتۇن جينجياڭ حيميا - ونەركاسىپ شەكتى سەرىكتەستىگى، شينجياڭ جىجىن حيميا - ونەركاسىپ ينجەنەريا زەرتتەۋ ورتالىعى شەكتى سەرىكتەستىگى. مۇنىڭ ىشىندە شينجياڭ كۇيتۇن جينجياڭ حيميا - ونەركاسىپ شەكتى سەرىكتەستىگى، شينجياڭ جىجىن حيميا - ونەركاسىپ ينجەنەريا زەرتتەۋ ورتالىعى شەكتى سەرىكتەستىگى سىندى 2 كاسىپورىن جاڭادان تاڭدالىپ قوسىلدى.
مۇنان تىس، وسى ءتىزىمنىڭ ىشىندە تاعى كەيبىر ورتالىقتىڭ شينجياڭدا تۇراتىن كاسىپورىندارى، ماسەلەن، مەملەكەتتىك قارجى قوسۋ توبى شينجياڭ لوپنۇر كالي تۇزى شەكتى جاۋاپكەرشىلىك سەرىكتەستىگى، شينجياڭ گوتۇڭ قۇبىر جارنا شەكتى سەرىكتەستىگى سياقتىلار بار.
”عىلىم - تەحنيكا رەفورماسىنان ۇلگى كورسەتۋ ارەكەتى“ مەملەكەت مەنشىگىندەگى كاسىپورىندارى رەفورماسىنداعى ”قوس 100 ارەكەتى“، ”وڭىرلىك جالپىلىق رەفورما سىناعى“ سياقتىلاردان كەيىنگى تاعى ءبىر مەملەكەت مەنشىگىندەگى كاسىپورىندار رەفورماسى ارناۋلى ينجەنەرياسى، ءبىر توپ مەملەكەت مەنشىگىندەگى عىلىم - تەحنيكالىق كاسىپورىندار رەفورماسى ۇلگىسىن جانە دەربەس جاڭالىق اشۋ اتويشىلارىن تۇلعالاپ، وسى نەگىزدە تابىستى تاجىريبەلەردى كوشىرۋدى، جالپىلاستىرۋدى ماقسات ەتەدى.
وسى رەفورما رەفورما جاساۋ، جاڭالىق اشۋ كوكەي تەستىلىگى ءبىرشاما كۇشتى مەملەكەت مەنشىگىندەگى عىلىم - تەحنيكالىق كاسىپورىنداردى تاڭداپ الىپ، پارتيانىڭ مەملەكەت مەنشىگىندەگى كاسىپورىندارعا جاپپاي باسشىلىعىن شىن مانىندە كۇشەيتۋ، مەملەكەت مەنشىگىندەگى مال - مۇلىكتىڭ زايا بولۋىنان باتىل ساقتانۋ العى شارتىندا، جوعارى ساپالى دامۋ تالابى بويىنشا بازارلاندىرۋ رەفورماسىن تەرەڭدەتۋدى ونان ارى ىلگەرىلەتىپ، ءتۇيىندى تۇردە سەرىكتەستىك باسقارۋدى كەمەلدەندىرۋ، بازارلاندىرىپ كادر تاڭداۋ، كادر ىستەتۋ، شابىتتاندىرۋ مەن تەجەۋدى كۇشەيتۋ سياقتى جاقتاردا جاڭالىق اشۋعا ىزدەنىس جاساپ، سەرپىلىسكە قول جەتكىزۋ كەرەك.
”عىلىم - تەحنيكا رەفورماسىنان ۇلگى كورسەتۋ ارەكەتى“ 2020 - جىلى 4 - ايدا باستاپ اتقارىلعان، العاشقى توپتا جاريالانعان تىزىمدە 204 كاسىپورىن رەفورما جوباسىن ەستەلىككە الدىرۋدى اياقتاتقان بولاتىن.
