تيانشان تورى   ›   جاڭالىقتار   ›   ماڭىزدى حابارلار

ارمانعا جەتىپ، تاعى ساپارعا اتتانۋ

 − باس شۋجي شي جينپيڭنىڭ بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن قورىتىندىلاۋ، ماداقتاۋ - سيلاۋ جينالىسىنا قاتىناسقاندىعى جونىندە ەستەلىك

شينحۋا اگەنتتىگىنىڭ تىلشىلەرى ياڭ يجۇن، گاۋ پىڭ

  بۇل ادامدار ىقىلاسپەن كۇتكەن ءبىر كۇن −

  سالتاناتتى حالىق سارايىندا قىزۋ شاپالاق ءۇنى قايتا - قايتا كوتەرىلىپ، ىنتىماقتاسا كۇرەسىپ بولاشاققا اتتانۋدىڭ كۇش - قۋاتىن ۇيىستىردى.

  2022 - جىلى 4 - ايدىڭ 8 - كۇنى تۇستەن بۇرىن، بەيجيڭ حالىق سارايى. بەيجيڭ قىسقى وليمپيادا سپورت جارىسىنا، مۇگەدەكتەر قىسقى وليمپيادا سپورت جارىسىنا ۇلەس قوسقان 3000عا جۋىق ءار سالا ۋاكىلدەرى وسى داڭقتى سالتاناتتى سارايدا باس قوسىپ، بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن قورىتىندىلاۋ، ماداقتاۋ - سيلاۋ جينالىسىنا بىرگە قاتىناستى.

  بۇكىل پارتيا، بۇكىل ەلدەگى ءار ۇلت حالقى پارتيانىڭ 20 - قۇرىلتايىن قۋانىشپەن قارسى العان، تاسقىنداعان سەنىممەن ەكىنشى 100 جىلدىق كۇرەس نىساناسىنا قاراي قادام تاستاعان شەشۋشى ساتتە، بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ تابىستى تاجىريبەلەرىن قورىتىندىلاپ، وزات تيپتەردى سالتاناتتى تۇردە ماداقتاپ - سيلاپ، بەيجيڭ قىسقى وليمپيادا رۋحىن اسقاقتاتۋ ايرىقشا كەلەلى ءارى تەرەڭ مانگە يە.

  كوكتەمگى بەيجيڭدە كۇن شۇلەن شۋاعىن توگىپ، سامال جەل بەتتەن وبەدى. حالىق سارايىنىڭ 2 - قاباتىنداعى قوناعاسى زالىندا اشەكەيلى شامدار جايناپ، مەيىرلى لەپ ەسەدى.

  ماداقتاۋ - سيلاۋ جينالىسى باستالۋدان ىلگەرى باس شۋجي شي جينپيڭ وسى ارادا ماداقتاپ - سيلاناتىن بەيجيڭ قىسقى وليمپيادا سپورت جارىسىندا مۇگەدەكتەر قىسقى وليمپيادا سپورت جارىسىندا كورنەكتى ۇلەس قوسقان كوللەكتيۆتەردىڭ ۋاكىلدەرىمەن، كورنەكتى ۇلەس قوسقان جەكەلەرمەن جانە جۇڭگو دەنە تاربيە ۋاكىلدەر ۇيىرمەسىنىڭ مۇشەلەرىمەن ىقىلاسپەن كەزدەستى ءارى كوپشىلىكپەن بىرگە سۋرەتكە ءتۇسىپ ەستەلىك قالدىردى.

  بۇل كوپشىلىك اسىعا كۇتكەن ءسات − ساعات 10نان 7 مينۋت وتكەندە باس شۋجي شي جينپيڭ نىق قاداممەن زالعا كىرگەندە، زالدا قىزۋ شاپالاق ءۇنى ۇزاق ۋاقىت تولاستامادى.

  ”باس شۋجي، سالەمەتسىز بە!“ كوپشىلىك باس شۋجيمەن ىقىلاسپەن سالەمدەستى. باس شۋجي دا كۇلىمسىرەپ، كوپشىلىككە قول بۇلعاپ قۇرمەت ءبىلدىردى.

  سالەمدەسۋلەر جۇرت جۇرەگىن مەيىرگە بولەدى.

  جايدارى جۇزدەردەن باقىت لەبى ەستى.

  مەملەكەتتىك قىسقا ارالىققا تەز سىرعاناۋ كومانداسىنىڭ سپورتشىسى ۋ داجيڭدى كورگەندە، باس شۋجي كۇلىمسىرەپ: ”ءبىز العاش رەت 8 جىلدىڭ الدىندا، 2014 - جىلعى سوچي قىسقى وليمپيادا سپورت جارىسىندا كەزدەسكەن ەدىك“، - دەدى.

  ”سولاي، باس شۋجي، ءسىزدىڭ باستان - اياق كوڭىل ءبولىپ جانە شابىتتاندىرىپ كەلە جاتقانىڭىزعا العىس ايتامىن“، - دەدى ۋ داجيڭ اسەرلەنە جاۋاپ قايتارىپ.

  ادامداردىڭ ويى تاعى دا اناۋ ۇمىتىلماس كۇندەرگە ورالدى −

  2013 - جىلى شي جينپيڭ جولداستى ۇيتقى ەتكەن پارتيا ورتالىق كوميتەتى بەيجيڭ مەن جاڭجياكوۋدىڭ بىرلەسىپ 2022 - جىلعى قىسقى وليمپيادا سپورت جارىسىن وتكىزۋگە ءوتىنىش بەرۋىن قولداۋ ماڭىزدى شەشىمىن جاسادى.

  سول ساتتەن باستاپ، بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ تۇتاس وتكىزۋگە ءوتىنىش بەرۋ، وتكىزۋگە دايىندالۋ، وتكىزۋ بارىسىندا باس شۋجي شي جينپيڭ باستان - اياق ءوزى جوسپارلاپ، ءوزى ورنالاستىرىپ، ءوزى ىلگەرىلەتىپ، بيىكتە تۇرىپ الىسقا كوز جىبەرىپ، رول ۇستاپ جول باستادى.

  8 جىلدان استام ۋاقىتتان بەرى ساپارعا شىققان كەزدە حالىقارالىق وليمپيادا كوميتەتىنىڭ ءتوراعاسى باحپەن كوسىلە كەڭەسۋدەن وتكىزۋگە ءوتىنىش بەرۋدىڭ ەڭ سوڭعى ۇمتىلىس ساتىندە بەينەجازباعا ءتۇسىپ بەيجيڭدى قايراتتاندىرۋعا دەيىن؛

  قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن 5 رەت ارنايى بارىپ تەكسەرۋدەن جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن ”ۇنەمشىل، حاۋىپسىز، تارتىمدى بولۋ“ سىندى جارىس وتكىزۋ تالابىن العا قويۋعا دەيىن؛

  قىسقى وليمپيادا سپورتشىلارىنا، مۇگەدەكتەر قىسقى وليمپيادا سپورتشىلارىنا سان مارتە ىقىلاسپەن امانداسىپ، جىگەرلەندىرىپ، جۇڭگو دەنە تاربيە ۋاكىلدەر ۇيىرمەسىن تاريحتاعى ەڭ تاماشا ناتيجەگە قول جەتكىزۋگە شابىتتاندىرۋدان 346 ميلليون ادامنىڭ قار - مۇز سپورتىنا ات سالىسۋىن تابىستى ىلگەرىلەتۋگە دەيىن...

  وزگەشە بارىستى باس شۋجي شي جينپيڭ جۇرتتى باستاپ بىرگە ءجۇرىپ ءوتتى؛ شۇعىلالى تابىسقا باس شۋجي شي جينپيڭ جۇرتتى باستاپ بىرگە شايقاس جاساپ قول جەتكىزدى.

  ساعات 10نان 30 مينۋت وتكەن مولشەرىندە قورىتىندىلاۋ، ماداقتاۋ - سيلاۋ جينالىسى حالىق سارايىنىڭ ۇلكەن زالىندا رەسمي باستالدى، ايبىندى جۇڭحۋا حالىق رەسپۋبليكاسىنىڭ مەملەكەت ءانى شىرقالدى. جينالىسقا قاتىناسقان بەيجيڭ قىسقى وليمپيادا سپورت جارىسىنىڭ سىڭار تاقتايلى شاڭعىمەن سىرعاناۋدىڭ اعا جۇلدەگەرى سۋ يميڭ كوڭىلى كولدەي تولقىپ بىلاي دەدى: ”مەن سيلىق تۇعىرىنا شىعىپ، بەس جۇلدىزدى قىزىل تۋدىڭ باياۋ كوتەرىلگەنىنە قاراپ تۇرعان ساتكە قايتا ورالعانداي بولدىم“.

  تالايعا دەيىن تولاستاماعان شاپالاق ۇنىمەن بىرگە، باس شۋجي شي جينپيڭ قاتارلى باسشى جولداستار كەۋدەلەرىنە ۇلكەن قىزىل گۇل تاققان ماداقتالىپ - سيلانعان كورنەكتى ۇلەس قوسقان جەكەلەر مەن كورنەكتى ۇلەس قوسقان كوللەكتيۆتەردىڭ ۋاكىلدەرىنە جەكە - جەكە مەدال، كۋالىك جانە سيلىق ۇسىندى.

  پارتيا ورتالىق كوميتەتى، مەملەكەتتىك كەڭەس اتىنان 148 كورنەكتى ۇلەس قوسقان كوللەكتيۆ، 148 كورنەكتى ۇلەس قوسقان جەكە پارتيا مەن مەملەكەتتىڭ ەڭ جوعارى مارتەبەلى ماراپاتىنا يە بولدى.

  بۇل ءبىر - بىرلەگەن كۇرەسكەرگە، ۇلەسكەرگە دەگەن قۇرمەت، سونداي - اق جۇڭگو رۋحىنا، جۇڭگو كۇش - قۋاتىنا دەگەن القاۋ.

  ”دوپتى كەرەمەت كىرگىزدىڭىز، مۇز دوپ قۇرامالارىڭىز مۇگەدەكتەر قىسقى وليمپيادا سپورت جارىسىنا تۇڭعىش رەت قاتىناسقاندا - اق سيلىق الدى، وتە كەرەمەت“. مەملەكەتتىك مۇگەدەكتەر وليمپياداسى مۇز دوپ قۇراماسىنا كورنەكتى ۇلەس قوسقان كوللەكتيۆ سيلىعىن بەرگەندە، باس شۋجي شي جينپيڭ ۋاكىل بولىپ سيلىق العان قۇراما باستىعى سۇي يۇيتاۋعا وسىلاي دەدى.

  ”باس شۋجيدىڭ ءبىز مۇگەدەكتەر وليمپياداسى مۇز دوپ قۇراماسىن وسىنشاما بىلەتىنىن ويلاماعان ەكەنمىن“. سۇي يۇيتاۋدىڭ كوڭىلى تالايعا دەيىن تولقىدى، - ”ءبىز، ءسوزسىز، باس شۋجيدىڭ كوڭىل ءبولۋىن، قامقورلىعىن قوزعاۋشى كۇش ەتىپ، جاڭا سىن - سايىستاردى ەرلىكپەن قارسى الىپ، بورىشتى اقتاپ، تاماشا ناتيجە جاراتۋعا قۇلشىنامىز“!

  بەيجيڭ قىسقى وليمپيادا سپورت جارىسىنا، مۇگەدەكتەر قىسقى وليمپيادا سپورت جارىسىنا دايىندالۋ، وتكىزۋ توتەنشە قيىن جاعدايدا ىلگەرىلەتىلدى. عاسىرلىق ىندەت پەن 100 جىلدىق وزگەرىس ارالاسا قاباتتاسقان قيىن - قىستاۋ ساتتە، جول باستاۋشىمىزدىڭ كورەگەندىگى قويۋ تۇماندى جارىپ ءوتتى، رول ۇستاۋشىمىزدىڭ سەنىمى تولقىن جارا العا ىلگەرىلەۋ قايسارلىعىمىزدى شىڭدادى.

  پارتيانىڭ ورتالىقتانعان ءبىر تۇتاس باسشىلىعىنا تاباندى بولۋ، كۇشتى شوعىرلاندىرىپ ءىرى ءىس تىندىرۋعا تاباندى بولۋ، ءتۇرلى حاۋىپ - قاتەردەن، سىن - سايىستان ىرىقتىلىقپەن ساقتانۋعا جانە وعان توتەپ بەرۋگە تاباندى بولۋ، جارىس وتكىزۋدى جانە حالىققا قىزمەت ەتۋدى، دامۋدى جەبەۋدى ءوزارا ۇشتاستىرۋعا تاباندى بولۋ − باس شۋجي شي جينپيڭ 4 ”تاباندى بولۋ“ دەگەن ءسوز ارقىلى بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن تابىستى وتكىزۋدىڭ تاجىريبەلەرىن قورىتىندىلادى.

  ”ءبىز تەك پارتيا ورتالىق كوميتەتى مەن باس شۋجي شي جينپيڭنىڭ شەشىمدەرىن، ورنالاستىرۋلارىن باتىل تياناقتاندىرىپ، ەلىمىز سوتسياليستىك ءتۇزىمىنىڭ كۇشتى شوعىرلاندىرىپ ءىرى ءىس تىندىراتىن ارتىقشىلىعىن ويداعىداي ساۋلەلەندىرسەك بولعانى، جەڭە المايتىن قيىنشىلىق، ورىنداي المايتىن مىندەت بولمايتىندىعىنا كامىل سەنەمىز“! مەملەكەتتىك دەنە تاربيە باس مەكەمەسى قىسقى سپورت باسقارۋ ورتالىعىنىڭ مەڭگەرۋشىسى ني حۇيجۇڭنىڭ جينالىستاعى ءسوزى قىسقى وليمپيادا سپورت جارىسىنا، مۇگەدەكتەر قىسقى وليمپيادا سپورت جارىسىنا قاتىناسقانداردىڭ ورتاق جۇرەك ءۇنىن جەتكىزدى.

  باس شۋجي شي جينپيڭنىڭ قويۋ سۇيىسپەنشىلىككە تولى سوزدەرىن ەت قۇلاعىمەن ەستىگەندە، بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ جانە وتكىزۋ بارىسىنداعى تارتىمدى كورىنىستەر، مەيىرلى حيكايالار، ءوزىن ارناعان ادەمى اڭگىمەلەر ادامداردىڭ كوز الدىنا قايتا ەلەستەپ، جۇرت جۇرەگىندە تەربەلدى −

  ”ءيىسى مۇرىن جاراتىن بۇرشاق ءمانتى“ دەگەندى تىلگە العانداعى جاندى دا ىقىلاستى سوزدەر بۇكىل الاڭدى قىزۋ شاپالاق ۇنىنە بولەدى. باس شۋجي ءسوز ءماتىنىن قايىرىپ قويىپ، كۇلىمسىرەي: ”گۋ ايليڭ ءبالىشتى ۇناتادى، شەتەلدىكتەر تاعى تۇشپارا جەۋدى جاقسى كورەدى“، - دەدى. الاڭنان تاعى جۇرەكجاردى كۇلكىلەر مەن شاپالاق ءۇنى كوتەرىلدى.

  باس شۋجي بەيجيڭنىڭ الەمدەگى تۇڭعىش ”قوس وليمپيادا قالاسىنا“ اينالعاندىعىن ايتقاندا، 346 ميلليلون ادامنىڭ قار - مۇز سپورتىنا ات سالىسقاندىعىن ايتقاندا، ىندەتكە توتەپ بەرۋدىڭ التىن مەدالى بارلىق وليمپيادا سپورت جارىسىن وتكىزۋگە دايىندىق كورۋشى قىزمەتكەرلەرگە تاۋەلدى ەكەندىگىن ايتقاندا... الاڭنىڭ ءىشى - سىرتىنداعىلار جاپپاي ماقتانىش سەزىندى جانە جىگەرلەندى.

  بەيجيڭ قىسقى وليمپيادا سپورت جارىسىندا 2 التىن مەدال، ءبىر كۇمىس مەدال العان گۋ ايليڭ باس شۋجيدىڭ ونىڭ ءبالىش جەۋدى ۇناتاتىندىعىن تىلگە العاندىعىنا قاتتى قۋاندى. ”ءتىپتى دە كوپ ادامنىڭ جۇڭگو مادەنيەتىن تانۋىنا مۇمكىندىك جاساعاندىعىمدى ايرىقشا داڭق سەزىنەمىن“.

  بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ باستالۋ، اياقتالۋ سالتىنىڭ باس رەجيسسەرى جاڭ يموۋ باس شۋجيدىڭ باستالۋ، اياقتالۋ سالتىنىڭ جارقىن تۇيىندەرىن بۇگە - شىگەسىنە دەيىن بىلگەندىگىنەن ايرىقشا اسەرلەندى. ”ءتورت سالتتىڭ استارىندا سان مىڭداعان جاسىرىن قاھارماندار بار، جۇمىسىمىزدى پارتيا مەن مەملەكەتتىڭ كورگەندىگىن، حالىقتىڭ ەستە ساقتاعاندىعىن ەرەكشە داڭق سانايمىز“.

  حالىققا قۇرمەت!

  ”بەيجيڭ قىسقى وليمپيادا سپورت جارىسى، مۇگەدەكتەر قىسقى وليمپيادا سپورت جارىسى − جۇڭگو حالقىنىڭ وتانشىلدىق ىنتاسىنىڭ اسقاق ايگىلەنۋى“. باس شۋجي شي جينپيڭ سوزىندە ”قالىڭ“ دەگەن سوزدەر ارقىلى ءجۇز ميلليونداعان جۇڭگو حالقىن جىرلادى جانە القادى −

     ولاردىڭ اراسىندا جارىس الاڭىندا ايانباي قايىسپاي سايىسقان سپورتشىلار، جاتتىقتىرۋشىلار بار، كۇندى - تۇنگە جالعاپ ءبىرىنشى شەپتە ەرلىكپەن شايقاسقان الاڭ - ساراي قۇرىلىسشىلارى بار، كوڭىلدەگىدەي تىڭعىلىقتى قىزمەت وتەگەن ەرىكتىلەر مەن قىزمەتكەرلەر بار، وليمپياداعا قاتىستى ادامداردىڭ دەنساۋلىعىن قورعاعان مەديتسينالىق ىندەتتەن ساقتانۋ قىزمەتكەرلەرى بار...

  سىلدىراي اققان بۇلاقتار تەڭىز بولىپ توعىسىپ، كىشكەنتاي جۇلدىزدار قۇس جولىن نۇرلاندىردى.

  ءدال ءبىر - بىرلەگەن ات سالىسۋشىلاردىڭ كورنەكتى ۇلەسى قار - مۇز سالتاناتىنىڭ وزگەشە تارتىمدىلىعىن ايگىلەدى.

  ”كەلەلى جاعدايدى كوكەيدە ساقتاۋ، سەنىمدى دە اشىق بولۋ، قيىندىقتان تايسالماي العا ۇمتىلۋ، ەرەندىككە تالپىنۋ، بولاشاقتى بىرگە اشۋ“. جينالىستا باس شۋجي شي جينپيڭ العاش رەت بەيجيڭ قىسقى وليمپيادا رۋحىن العا قويدى ءارى ءتۇسىندىردى.

  بۇل جۇڭگو حالقىنىڭ رۋحاني بەت - بەينەسىنىڭ داۋىرلىك ايعاعى، سونداي - اق جۇڭحۋا ۇلتىنىڭ بولاشاق اشۋداعى رۋحاني بايلىعى.

  قىسقى وليمپيادا سپورت جارىسى ارمانىنا جەتىپ، بولاشاققا بىرگە اتتانايىق.

  چيڭحۋا داشۋەسى قىسقى وليمپيادا ەرىكتى قىزمەت وتەۋ ۇجىمى اتىنان باس شۋجيدىڭ قولىنان سيلىق العان چيڭحۋا داشۋەسى عارىش، اۆياتسيا شۋەيۋانىنىڭ وقۋشىسى داڭ جاڭچى باس شۋجيدىڭ جينالىستا ايتقان ”وتاننىڭ ۇمىتىنەن شىعۋ، حالىقتىڭ ۇمىتىنەن شىعۋ، ءداۋىردىڭ ۇمىتىنەن شىعۋ“ دەگەن سوزىنەن تەرەڭ اسەر الدى. ”بۇل جاڭا داۋىردەگى جۇڭگو جاستارى بولعان ءبىزدىڭ قۇلشىنا ىستەۋگە ءتيىستى ءىسىمىز. ءبىز، ءسوز جوق، باس شۋجيدىڭ تاپسىرماسىن ەستە بەرىك ساقتاپ، وتانمەن تىلەكتەس بولىپ، اسقاق ارمان ارقالاپ، وتان مەن حالىققا تيەسىلى ۇلەس قوسامىز“.

  (شينحۋا اگەنتتىگىنىڭ 4 - ايدىڭ 9 - كۇنى بەيجيڭنەن بەرگەن حابارى)

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.