”ءسىزدىڭ لياڭجياحىعا تاعى دا كەلىپ، بۇگىنگى تاماشا جاعدايدى كورۋىڭىزدى كۇتىپ ءجۇرمىز“
شينحۋا اگەنتتىگىنىڭ ءتىلشىسى لياڭ ايپيڭ
باس شۋجي شي جينپيڭ 2015 - جىلى 2 - ايدىڭ 13 - كۇنى شانشي يان - ان يانچۋان اۋدانى ۋىنان - ي قالاشىعى لياڭجياحى قىستاعىنا بارىپ، قىستاق تۇرعىندارىنا امانداسىپ، ءوزى اۋىلعا تۇسكەندە تۇرعان ءۇي يەسى ليۋ جينلياننىڭ ۇيىنە باردى. جاقىندا شينحۋا اگەنتتىگىنىڭ ءتىلشىسى ليۋ جينليانگە قايتالاي تىلشىلىك ىستەدى.
【سول كەزگە قايىرىلا قاراۋ】
باس شۋجي شي جينپيڭ كەزىندە لياڭجياحىدا 7 جىل ەڭبەك ىستەپ، تۇرمىس كەشىرگەن، بۇل ارانىڭ ءار ءتۇپ ءشوبى مەن اعاشى، جىلعا - ساي، قىرقا - قىراتتارىن تەرەڭ سۇيىسپەنشىلىكپەن ءار دايىم ەسكە الىپ وتىرادى.
قىستاق تۇرعىنى ليۋ جينلياننىڭ ءۇيى سول جىلدارى شي جينپيڭنىڭ قىستاققا بارعاننان كەيىنگى ەڭ العاشقى تۇراعى بولدى. لياڭجياحى قىستاعىنا بارعانداعى العاشقى تۇنەگەن جەر كەپەنىڭ سول جىلدارداعى بەينەسى سول بەتىندە ساقتالىپتى. اۋلاعا كىرىسىمەن باس شۋجي ونداعى وزىنە ابدەن تانىس جەر كەپەلەردى نۇسقاپ، بۇرىنعى ىستەردى ەسىنە الدى. ليۋ جينليان باس شۋجيگە: سونشاما جىل وتسە دە، ءسىز ءالى ۇمىتپاپسىز عوي، - دەدى. باس شۋجي: ”قايدان ۇمىتايىن؟ ءسىز ەكەۋلەرىڭىز ۇيلەنگەن سول جىلى ءبىز زيالى جاستار كەلىپ وتاۋدى دۋمانداتقان ەدىك قوي“، - دەدى.
كوكتەم مەرەكەسىنىڭ قارساڭى، باس شۋجي شي جينپيڭ ءوزى اقشا شىعارىپ ساتىپ العان ”مەرەكەلىك بۇيىمدارى“ − تۇشپارا ۇنى، كۇرىش، ازىقتىق ماي، ەت ونىمدەرىن جانە كوكتەم بوساعالىعىن، جاڭا جىل مەرەكەسىندىك سۋرەتتى الىپ اۋىلداستاردىڭ كوكتەم مەرەكەسىن قۇتتىقتادى.
لياڭجياحى قىستاق تۇرعىندار كوميتەتىنىڭ شاعىن الاڭىندا، باس شۋجي شي جينپيڭ اۋىلداستارمەن جاعالاي قول الىسىپ، ىقىلاستى اڭگىمەلەستى، سونداي - اق ءاربىر وتباسىمەن بىرگە ەستەلىك سۋرەتكە ءتۇستى. ول تەرەڭ سەزىممەن: ”مەن ءومىرىمنىڭ العاشقى قادامىندا لياڭجياحىعا كەلدىم، 7 جىل ۋاقىتتا لياڭجياحىداعى ۇلكەن - كىشى اۋىلداستار ماعان سانسىز قامقورلىق جاسادى، مۇنىڭ پايداسىن ءومىر بويى كورىپ كەلەمىن. مەن لياڭجياحىنى ماڭگى ۇمىتپايمىن، ۇلكەن - كىشى اۋىلداستاردى ماڭگى ۇمىتپايمىن، بايىرعى رايوندارداعى حالىقتى ماڭگى ۇمىتپايمىن“.
【ليۋ جينلياننىڭ جۇرەك ءسوزى】
7 جىلدان استام ۋاقىت وتسە دە، باس شۋجيدىڭ لياڭجياحىعا قايتا كەلگەن سول كۇن الىگە دەيىن انىق ەسىمدە. ونىڭ لياڭجياحىدان كەتكەنىنە 40 نەشە جىل بولسادا، قايتا كەلگەندە اۋىلداستاردى كەرەمەت جاقىن تارتىپ، كورىسە سالا تالاي ادامنىڭ بالا كەزدەگى جاناما ەسىمىن اتادى، ول ءبىزدى ەشقاشان ۇمىتپاپتى.
سول جولى مەن باس شۋجيگە ءوزىم تىككەن 2 جۇپ شۇپەرەك شاقايىمدى، بىرنەشە پار ۇلتاراعىمدى سيلادىم، ول قويار دا قويماي ماعان اقشا بەرىپ كەتتى. باس شۋجي تاعى مەنەن اۋىز سۋ، وتىن سياقتى جاقتارداعى ماسەلەلەردى تاپتەشتەي ۇعىستى. ول ۇنەمى ماعان سونشاما كوڭىل ءبولىپ كەلەدى، جۇرەگىم مەيىرگە بولەنىپ سالا بەرەتىن.
2015 - جىلى قىستاعىمىزدا اۋىل - قىستاق مادەنيەتىن، ساياحاتىن دامىتۋ شەكتى سەرىكتەستىگى قۇرىلدى. مەن دە سەرىكتەستىكتە تازالىقشى بولىپ قىزمەت ىستەپ، ايىنا 1200 يۋان ەڭبەكاقى الىپ تۇردىم. مەن تاعى ءۇيىمنىڭ الدىنان شاعىن دۇكەن اشىپ، شىلان، تارى، شۇپەرەك شاقاي، ۇلتاراق سياقتىلاردى ساتتىم، ساۋدام كۇسەت بولعان جىلى ونان 10 مىڭ يۋان تاپتىم. قازىر قارتايدىم، قالاشىق مەنى قىستاقتاعى الەۋمەتتىك يگىلىك سيپاتتى قىزمەت ورنىنا ورنالاستىردى، ءار ايدا ەڭبەكاقى العاننىڭ سىرتىندا، قارتتاردى كۇتىمدەۋ قامسىزداندىرۋىم دا بار، تۇرمىسىم وتە جاقسى.
وسى جىلدارداعى قىستاقتىڭ وزگەرىستەرىن ساۋساقپەن ساناپ تاۋىسقىسىز. قىستاقتا بانكە قىزمەت وتەۋ ءتۇيىنى، ەمحانا، حالىققا قولايلى قىزمەت وتەۋ پۋنكتى سالىندى، قىستاق تۇرعىندارى قيمىل الاڭى دا سالىندى. كوپشىلىك تۇگەل جۇمىس ىستەپ جاتىر، بۇكىل قىستاق 1000 مۋدان استام تاۋلى جەرگە الما اعاشىن ەگىپ، المانى بايۋدىڭ ”التىن جۇمىرتقاسىنا“ اينالدىردى. تاعى دا كوپ ادامدار باعىمشىلىق سەلبەستىك كووپەراتيۆىن قۇردى، شارۋالار شاتتىعى ساياجايىن اشتى، جۇڭي ءدارى ماتەريالدارىن ەكتى. جۇمىس ىستەۋگە سىرتقا كەتكەن كەيبىر جاستار دا قايتىپ كەلىپ، ينتەرنەتتە قىستاقتىڭ ەرەكشە ونىمدەرىن ساتۋدا، تارى پراندىك، كىرتىلدەك شىلان، المانىڭ ساتىلۋى دا جاقسى بولىپ تۇر.
سول جىلدارى باس شۋجي ءبىزدىڭ بۇل ارادا ۇلكەن اترەت پارتيا ياچەيكاسىنىڭ شۋجيى بولىپ، كوپشىلىكپەن بىرگە تاماقتانىپ، بىرگە تۇرىپ، بىرگە ەڭبەك ىستەپ، كوپشىلىكتى باستاپ ءوندىرىستى دابىرالى جۇرگىزىپ، شالشىق گازى كولشىگىن سالىپ، سۋارۋ قۇدىقتارىن قازىپ... تالاي - تالاي يگىلىكتى ءىس تىندىردى. قازىر ءبىزدىڭ لياڭجياحىلىقتاردىڭ جىگەر - قايراتى تاسقىنداپ تۇر، قىستاق ساپالى ”شاعىن كوكونىس باقشاسىن“، ”شاعىن گۇلباقشا“، ”شاعىن جەمىس باقشاسىن“ سالماقشى، كەيىن، ءسوز جوق، بارعان سايىن گۇلدەنەدى، مۇنى باس شۋجي بىلسە، ءسوز جوق، قاتتى قۋاناتىن بولادى.
قازىر اۋىلداستار دا باس شۋجيدى ۇنەمى تىلگە الادى، بارلىعى قۇلشىنا ىستەپ، لياڭجياحىنى جاقسى گۇلدەندىرەمىز دەسۋدە. باس شۋجي، ءبىز بارلىعىمىز ءسىزدىڭ لياڭجياحىعا تاعى دا كەلىپ، بۇگىنگى تاماشا جاعدايدى كورۋىڭىزدى كۇتىپ ءجۇرمىز.
(شينحۋا اگەنتتىگىنىڭ 4 - ايدىڭ 19 - كۇنى شي − اننان بەرگەن حابارى)
