شينحۋا اگەنتتىگىنىڭ 4 - ايدىڭ 25 - كۇنى بەيجيڭنەن بەرگەن حابارى. 4 - ايدىڭ 25 - كۇنى مەملەكەت ءتوراعاسى شي جينپيڭ كوك جۋسان زاتىنىڭ جارىققا شىققاندىعىنىڭ 50 جىلدىعى جانە ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن بىرگە قۇرۋعا دەم بەرۋ جونىندەگى حالىقارالىق تالقى مىنبەرىنە قۇتتىقتاۋ حات جولدادى.
شي جينپيڭ بىلاي دەپ اتاپ كورسەتتى: كوك جۋسان زاتى جۇڭگو الدىمەن بايقاعان ءارى ءساتتى ايىرىپ شىققان بەزگەككە قارسى ەرەكشە ءونىمدى ءدارى، جارىققا شىققان 50 جىلدان بەرى جۇڭگونىڭ بەزگەكتى بۇكىلداي جويۋىنا كومەكتەستى، سونىمەن بىرگە جۇڭگو ءدارى - دارمەكپەن قامداۋ، تەحنيكالىق كومەك بەرۋ، بەزگەككە قارسى تۇرۋ ورتالىعىن كومەكتەسىپ قۇرۋ، ادامداردى تاربيەلەۋ سياقتى كوپ ءتۇرلى ءتاسىل ارقىلى بۇكىل الەمدە بەلسەندى تۇردە كوك جۋسان زاتىن جالپىلاستىرىپ، پايدالانىپ، بۇكىل الەمدەگى، اسىرەسە، وركەندەپ كەلە جاتقان ەلدەردەگى نەشە ميلليون ادامنىڭ ءومىرىن قۇتقارىپ، بۇكىل الەمنىڭ بەزگەكتەن ساقتانۋىنا، ەمدەۋىنە، ادامزاتتىڭ سالاماتتىعىن قورعاۋعا ماڭىزدى ۇلەس قوستى.
شي جينپيڭ بىلاي دەپ باسا دارىپتەدى: جۇڭگو حالىقارالىق قوعاممەن بىرگە، الەۋمەتتىك دەنساۋلىق ساقتاۋ سالاسىنداعى اۋىس - كۇيىستى، سەلبەستىكتى جيىلەتىپ، بۇكىل الەمدىك حاۋىپ - قاتەر مەن سىن - سايىستارعا قول ۇستاسا توتەپ بەرىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن بىرگە قۇرۋدى ىلگەرىلەتىپ، ءار ەل حالقىنىڭ سالاماتتىعىن قورعاۋعا ءتىپتى دە زور ۇلەس قوسۋدى قالايدى.
4 - ايدىڭ 25 - كۇنى ”دۇنيە جۇزىلىك بەزگەكتەن ساقتانۋ جانە ەمدەۋ كۇنى“. كوك جۋسان زاتىنىڭ جارىققا شىققاندىعىنىڭ 50 جىلدىعى جانە ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن بىرگە قۇرۋعا دەم بەرۋ جونىندەگى حالىقارالىق تالقى مىنبەرى سول كۇنى بەيجيڭدە وتكىزىلدى، نەگىزگى تاقىرىبى ”كوك جۋسان زاتى ارقىلى بەزگەككە قارسى تۇرۋ حالىقارالىق دامۋ سەلبەستىگىن كۇشەيتىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن بىرگە قۇرۋ“، ونى مەملەكەتتىك حالىقارالىق دامۋ سەلبەستىگى مەكەمەسى، مەملەكەتتىك دەنساۋلىق ساقتاۋ، سالاماتتىق كوميتەتى، مەملەكەتتىك جۇڭي ءدارى - دارمەكتەرىن باسقارۋ مەكەمەسى بىرگە وتكىزدى.
