انار بۇلت \ شينجياڭ گازەتىنىڭ ءتىلشىسى شيە حۇيبيان 5 - ايدىڭ 1 - كۇنى ۇرىمجىدەن حابارلايدى. 4 - ايدىڭ 29 - كۇنى اشىلعان اۆتونوميالى رايوننىڭ عىلىم - تەحنيكادا جاڭالىق اشۋ جينالىسىنان ۇعىسۋعا قاراعاندا، ”13 - بەسجىلدىقتان“ بەرى رايونىمىز جاڭالىق اشۋ ارقىلى دامۋعا دەم بەرۋ ستراتەگياسىن تىڭعىلىقتى ىلگەرىلەتىپ، كۇن ەنەرگياسى، جەل ەنەرگياسى، ەرەكشە جوعارى كەرنەۋلى ەلەكتر جەتكىزۋ، كەرنەۋ وزگەرتۋ، كرەمني نەگىزدى جاڭا ماتەريالدار، ماقتا ءوندىرىسى، جىلقى ءناسىلىن جاقسارتۋ، جەتىلدىرۋ، جوعارى ءونىمدى سۋ ۇنەمدەۋ سياقتى سالالاردا ءبىر توپ شەشۋشى، وزەكتى تەحنيكالىق جەتىستىكتەرگە قول جەتكىزگەن.
پارتيا 18 - قۇرىلتايىنان بەرى بۇكىل رايوننان جيىنى 40تان استام جەتىستىك مەملەكەتتىك عىلىم - تەحنيكا العاباسارلىعى سيلىعىن جانە مەملەكەتتىك تەحنيكا تاپقىرلىعى سيلىعىن الدى. 2021 - جىلى 6 نىسان 2020 - جىلعى مەملەكەتتىك عىلىم - تەحنيكا العاباسارلىعى سيلىعىنىڭ 2 - دارەجەلى سيلىعىن ەنشىلەدى.
اۆتونوميالى رايوندىق عىلىم - تەحنيكا مەڭگەرمەسى بايلىق ۇلەستىرۋ جانە باسقارۋ باسقارماسىنىڭ باستىعى جاڭ حايتاۋ بىلاي دەدى: سوڭعى جىلدارى رايونىمىز كاسىپ سالاسى تىزبەگىن ارقاۋ ەتە وتىرىپ جاڭالىق اشۋ تىزبەگىن ورنالاستىرىپ، جاڭالىق اشۋ تىزبەگىن ارقاۋ ەتە وتىرىپ كاسىپ سالاسى تىزبەگىن ورنالاستىرىپ، جاڭالىق اشۋ تىزبەگى مەن كاسىپ سالاسى تىزبەگىن تەرەڭدەي توعىستىرۋداعى تەحنيكا ءتىزىمىن سالالاپ، كاسىپورىنداردىڭ سۇراۋ شىعارۋشى رولىن تولىق ساۋلەلەندىرىپ، ءبىر توپ ءتۇيىندى، ەرەكشەلىككە يە كاسىپ سالالارىنىڭ دامۋىنداعى شەشۋشى، تەحنيكالىق قيىن ماسەلەلەردى شەشتى. ”وسى تەحنيكالىق جەتىستىكتەر رايونىمىزداعى ءتۇيىندى كاسىپ سالالارىنىڭ دارەجەسىن جوعارىلاتۋىنا تىرەك بولۋدا شەشۋشى رول اتقاردى. عىلىم - تەحنيكادا جاڭالىق اشۋدىڭ ەكونوميكالىق دامۋدى، قوعام ورنىقتىلىعىن جانە حالىق تۇرمىسىن جاقسارتۋدى جەبەۋ قابىلەتى ۇزدىكسىز نىعايدى“.
ەرەكشە ترانسفورماتور شەكتى جارنا سەرىكتەستىگى قۇرىلىسقا ات سالىسقان ”800kV ± تۇراقتى توك تۇرلەندىرۋ ترانسفورماتورىن دەربەس زەرتتەپ جاساۋ جانە ينجەنەريالىق قولدانىلىم“ نىسانىنا 2020 - جىلعى مەملەكەتتىك عىلىم - تەحنيكا العاباسارلىعى سيلىعىنىڭ 2 - دارەجەلى سيلىعى بەرىلدى. اتالعان نىسان ەلىمىزدىڭ 800kV ± وزىق تۇرلەندىرگىش ترانسفورماتوردى دەربەس زەرتتەپ جاساۋىن جۇزەگە اسىرىپ، شەتەل كاسىپورىندارىنىڭ وزىق تۇرلەندىرگىش ترانسفورماتور سالاسىنداعى ۇزاق ۋاقىت تەحنيكالىق مونوپولداۋىن تالقاندادى.
”سوڭعى جىلدارى ءبىز مەملەكەتتىڭ كەلەلى ستراتەگيالىق قاجەتىن شىعار ءتۇيىن ەتىپ، جىلدىق ساتۋ كىرىسىنىڭ ％4تەن استامىن زەرتتەۋ - اشۋعا پايدالانۋعا تاباندى بولدىق، ەل ءىشى - سىرتىنداعى وزىق عىلمي زەرتتەۋ ورىندارىمەن، مەكتەپتەرمەن، كاسىپورىندارمەن سايكەسە جاڭالىق اشۋى ارقىلى ءپان جەتەكشىلەرىنەن، وزەكتى تەحنيكا تىرەكتىلەرىنەن قۇرالعان عىلم - تەحنيكا دارىندىلارى قوسىنىن قۇرىپ، ىلگەرىندى - كەيىندى مەملەكەت دارەجەلى 15 كولەمدى جاڭالىق اشۋ تۇعىرىن ورناتتىق“، - دەدى ەرەكشە ترانسفورماتور شەكتى جارنا سەرىكتەستىگىنىڭ القا باستىعى جاڭ شين.
شينجياڭ اۋىل شارۋاشىلىق عىلىم اكادەمياسى نەگىزگى ورىنداردىڭ ءبىرى رەتىندە ات سالىسىپ تامامداعان ”ءسۇت جانە ءسۇت ونىمدەرى حاۋىپسىزدىگىن مەڭگەرۋ جانە ساپاسىن جوعارىلاتۋ شەشۋشى تەحنيكاسى“ دا 2020 - جىلعى مەملەكەتتىك عىلىم - تەحنيكا العاباسارلىعى سيلىعىنىڭ 2 - دارەجەلى سيلىعىن الدى. اتالعان نىسان شينجياڭ شيكى ءسۇت، سونداي - اق سۇيىق كۇيدەگى ءسۇت ونىمدەرى ساپاسىنىڭ حاۋىپسىزدىگى ساندى مالىمەت قويماسى مەن تۇتاس كاسىپ سالاسى تىزبەگىنىڭ حاۋىپ - قاتەرىن تىزگىندەۋ تەحنيكالىق جۇيەسىن ورناتىپ، شينجياڭنىڭ ءسۇت جانە ءسۇت ونىمدەرى ساپاسىنىڭ حاۋىپسىزدىگى جاعدايىن قانىق ءبىلىپ، ءتۇيىندى حاۋىپ - قاتەرلەردى، كومەسكى اقاۋلاردى ايقىنداپ، رايونىمىزدىڭ ءسۇت شارۋاشىلىعىنىڭ اقاۋسىز، باياندى دامۋىنا عىلىم تىرەگىن ازىرلەدى.
جاڭ حايتاۋ بىلاي دەپ تانىستىردى: الداعى جەردە رايونىمىز ”قابىلەتتىلەر باستاماشى بولىپ ىستەۋ“، ”بايگەگە سالۋ“ قاتارلى تۇزىمدەردى اتقارىپ، مۇناي، مۇناي حيميا، كومىر، كومىر حيميا ونەركاسىبى، جاڭا ەنەرگيا، جاڭا ماتەريالدار، وزىق جابدىقتار جاساۋ سياقتى باسىمدىققا يە ءداستۇرلى كاسىپ سالاسى مەن ستراتەگيالىق جاڭادان گۇلدەنگەن كاسىپ سالالارىندا شەشۋشى، جالپىلىق سيپاتتى تەحنيكالاردان قامال الۋدى جانە ءونىمدى زەرتتەپ - اشۋدى ۇزدىكسىز جەدەلدەتىپ، كاسىپ سالاسىنىڭ جوعارى دەڭگەيلى، زەردەلى، جاسىل دامۋىن جەبەيدى.
