تيانشان تورى   ›   جاڭالىقتار   ›   ەل ءىشى حابارى

”اناعۇرلىم كوپ ’القىمداعان‘ قيىن ماسەلەلەردى شەشۋگە سەنىمدىمىز“

شينحۋا اگەنتتىگىنىڭ تىلشىلەرى سۇن لياڭچۋان، جان يان

  باس شۋجي شي جينپيڭ 2020 - جىلى 5 - ايدا سانشيدا قىزمەت تەكسەرگەن كەزدە تاييۋان بولات - تەمىر توبى تاتتانبايتىن بولات، نازىك تاسپا بولات شەكتى سەرىكتەستىگىنە كەلىپ، قالىڭدىعى نەبارى 0.02 ميلليمەترلىك ”قولمەن جىرتۋعا بولاتىن بولات“ ءونىمىن كوزدەن كەشىردى، سونداي - اق جوعارى دەڭگەيلى جاساۋ كاسىبىندە عىلىم - تەحنيكالىق جاڭالىق اشۋدى ىلگەرىلەتۋ جونىندە تالاپ قويدى. ءتىلشى جۋىقتا سول كەزدە باس شۋجيمەن اڭگىمەلەسكەن تاييۋان بولات - تەمىر توبىنىڭ تاتتانبايتىن بولات جاپىراقشا ماتەريالدار تەحنولوگياسىنىڭ باس ينجەنەرى لياۋ شيگە قايتالاي تىلشىلىك جاسادى.

  【سول كەزگە قايىرىلا قاراۋ 】

  تاييۋان بولات - تەمىر توبى تاتتانبايتىن بولات، نازىك تاسپا بولات شەكتى سەرىكتەستىگىنىڭ سەحىندا ءتىستى دوڭگەلەكتەر شىر اينالىپ، ماشينالار گۇرىلدەپ تۇر. باس شۋجي شي جينپيڭ ءوندىرىس سەحىنا كىرىپ، كاسىپورىننىڭ تيپ جاڭالاپ، دارەجەسىن جوعارىلاتقان ونىمدەر كورمەسىن كورىپ، كاسىپورىننىڭ اينالىم جاعدايىن ۇعىستى.

  ەرەكشە جۇقا، نازىك، تاتتانبايتىن تاسپا بولات وندىرەتىن ماشينالار شوعىرىنىڭ الدىندا باس شۋجي ايالداپ، ”قولمەن جىرتۋعا بولاتىن بولاتتان“ بىرەۋىن قولىنا الىپ زەر سالا قاراپ، ساۋساعىمەن اقىرىن مايىستىرىپ كورىپ: ”جاسالۋ تەحنولوگياسى، شىنىمەن، جاقسى ەكەن، قالايى قاعازداي جۇقا، سان وڭدەۋدەن ءوتىپ، ساۋساققا وراپ الارداي جۇمسارىپتى“، - دەپ القادى.

  بۇل تۇردەگى بولاتتىڭ قالىڭدىعى نەبارى 0.02 ميلليمەتر، ادەتتەگى A4 قاعازدىڭ قالىڭدىعىنىڭ تورتتەن بىرىندەي عانا بولادى، وپ - وڭاي جىرتۋعا بولاتىندىقتان، وبرازدى تۇردە ”قولمەن جىرتۋعا بولاتىن بولات“ دەپ اتالعان. ول زاماناۋي عارىش ىستەرى، اۆياتسيا، جوعارى دەڭگەيلى ەلەكتروندىق جابدىقتار، جاڭا ەنەرگيا سالاسىنان قازىر جاڭادان گۇلدەنىپ كەلە جاتقان بۇكتەمە ەكراندى قول تەلەفونعا دەيىن قولدانىلادى.

  ءوندىرىس سەحىنىڭ ەسىك الدىندا باس شۋجي شي جينپيڭ جۇمىسشى - قىزمەتكەرلەردىڭ ۋاكىلدەرىمەن ىقىلاستى اڭگىمەلەستى، ول ءونىم مەن تەحنيكا كاسىپورىننىڭ تابان تىرەپ تۇرۋىنىڭ تياناعى ەكەندىگىن اتاپ كورسەتىپ، ”سىزدەردىڭ جوعارى دەڭگەيلى جاساۋ كاسىبىندە عىلىم - تەحنيكالىق جاڭالىق اشۋ جاعىندا تاعى دا قۇلشىنىس جاساپ، ەرلىكپەن بيىك بەلەسكە شىعىپ، تىرەكتى، وزىق جاساۋ كاسىبى جاعىندا تىڭ دا اناعۇرلىم زور قادام باسۋلارىڭىزدى ءۇمىت ەتەمىن“، - دەدى.

  【لياۋ شيدىڭ جۇرەك ءۇنى 】

  باس شۋجيدىڭ ءسوزىن باسى - قاسىندا تىڭداعانىم ءۇشىن ءوزىمدى ايرىقشا تالەيلى سەزىنەمىن. باس شۋجي كاسىپورىننىڭ ءوندىرىسى مەن تەحنيكالىق جاڭالىق اشۋىنا نازار سالىپ قانا قويماي، ءبىز سياقتى جۇمىسشىلاردىڭ قىزمەتى مەن تۇرمىسىنا ايرىقشا كوڭىل بولەدى. ونىڭ قامقورلىعى مەن ىنتالاندىرۋى ءبىزدىڭ سالاداعى الەمدىك قيىن تاقىرىپتارعا ۇزدىكسىز اتوي سالۋىمىزدىڭ رۋحاني كۇشىنە اينالدى.

  باس شۋجيدىڭ تالابىن تياناقتاندىرۋ ءۇشىن، ءبىز زەرتتەۋ - اشۋ جۇمىسىنىڭ ماڭىزدى ءتۇيىنىن قايتا ايقىنداپ، سايلاۋىت، مىعىم جاساق شىعارىپ، 7 قامال الۋ گرۋپپاسىن قۇردىق. سولاردىڭ ىشىندەگى ءبىر قامال الۋ ۇجىمىنىڭ مىندەتى 0.02 ميلليمەترلىك قالىڭدىقتاعى ”قولمەن جىرتۋعا بولاتىن بولاتتى“ ونان ارى جۇقارتىپ، قازىرگى شەكتەن ونان ارى اسىپ، ماركا قالىپتاستىرۋ بولدى.

  ءبىز، ءبىر جاعىنان، قازىرگى جابدىقتاردى جاڭالاپ، جاقسارتىپ، ەندى ءبىر جاعىنان، تۇرلىشە بولات ماتەريالدارىن اۋىستىرىپ، ءتىپتى، جابدىقتىڭ ”كوزىنە“ سۇيەنبەي، ادامي تاجىريبەگە سۇيەنۋ ارقىلى قايتا - قايتا سىناق جاسادىق.

  باس شۋجي قىزمەت تەكسەرگەننەن 3 ايدان سوڭ، ءبىز اقىرى 600 ميلليمەترلىك قالىڭدىقتاعى تاتتانبايتىن نازىك جاپىراقشانىڭ قالىڭدىعىن 0.015 ميلليمەترگە دەيىن تاپتاپ جۇقارتتىق، بۇل جاڭا الەمدىك رەكورد سانالادى.

  2 جىلدان بەرى ”قولمەن جىرتۋعا بولاتىن بولات“ باعىتىنان تىس، باسقا 6 گرۋپپانىڭ زەرتتەۋ - اشۋ باعىتىنىڭ بارلىعىندا تىڭ سەرپىلىستەر جارىققا شىقتى. ءبىزدىڭ زەرتتەۋ - اشۋ ۇجىمىمىز ۇزدىكسىز كەڭەيىپ، ماتەريال زەرتتەۋ - جاساۋدىڭ جالپى كاسىپ سالاسى تىزبەگى بىرتىندەپ قالىپتاستى، كوپتەگەن جاڭا ونىمدەرىمىزدىڭ زەرتتەلۋ - جاسالۋ بارىسى ۇزدىكسىز قىسقاردى. قازىر كاسىپورنىمىز دۇنيە ءجۇزى كولەمىندە جىل سايىن جاڭا ونىمدەردىڭ تۇساۋىن كەسىپ وتىرادى.

  مەن باس شۋجيگە مىنانى ايتقىم كەلەدى: اناعۇرلىم كوپ ”القىمداعان“ قيىن ماسەلەلەردى شەشۋگە، كاسىپ سالاسىندا شىن مانىندە ءوز كۇشىمىزگە سۇيەنۋدى جانە ءوز قولىمىزدا مەڭگەرۋدى جەبەپ، مەملەكەتتىڭ دامۋى ءۇشىن ۇلەس قوسۋعا سەنىمىمىز دە، بەكىمىمىز دە بار“.

(شينحۋا اگەنتتىگىنىڭ 4 - ايدىڭ 29 - كۇنى تاييۋاننان بەرگەن حابارى)

جاۋاپتى رەداكتور : الىمبەك نۇرالين

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.