− ”ەڭ ارداقتى جۇمىسشى - قىزمەتكەرلەر“ جونىندە (2)
شينحۋا اگەنتتىگىنىڭ تىلشىلەرى يە حاۋميڭ، ليۋ شياسۇن
ەڭبەك بارلىق باقىتتىڭ قاينارى، ەڭبەك بارلىق ارماننىڭ باستاماسى.
ەڭبەك ۇلگىلەرى رۋحىن، ەڭبەك رۋحىن، ۇستا رۋحىن زور كۇشپەن اسقاقتاتىپ، جۇڭگو جۇمىسشىلارىنىڭ حيكاياسىن ويداعىداي بايانداۋ ءۇشىن، ”1 - مامىر“ حالىقارالىق ەڭبەكشىلەر مەرەكەسى بايلانىسىمەن، ورتالىق كوميتەت ۇگىت ءبولىمى، مەملەكەتتىك باس جۇمىسشى ۇيىمى 2022 - جىلعى ”ەڭ ارداقتى جۇمىسشى - قىزمەتكەرلەردىڭ“ ىزگى ىستەرىن تۇتاس قوعامعا اشىق جاريالادى.
”ءپىل اكە“ مەن ”ءپىل بالالاردىڭ“ اڭگىمەلەرى
ونىڭ اتى شيۇڭ چاۋيۇڭ، شيشۋاڭباننا جابايى ءپىل اڭعارى كورىنىس ءوڭىرى شەكتى سەرىكتەستىگى ازيا ءپىلىن قۇتقارۋ، قورعاۋ جانە ءوسىرۋ ورتالىعىنىڭ مال شيپاگەرى. 17 جىلدان بەرى ول كاسىپتەستەرىمەن بىرگە 150 نەشە جابايى ازيا پىلىنە قاراپ، قۇرىپ - جوعالۋعا تاياعان ءتۇردى قۇتقارىپ، جاراتىلىستىق قورشاعان ورتانى قورعايتىن ”ءپىل اكەگە“ اينالدى.
بۇل كۇردەلى دە ماشاقاتتى جۇمىس. شيشۋاڭباننا ىستىق بەلدەۋلى جاڭبىرلى ورمانىندا قىزمەتكەرلەر قاپىرىق اۋا رايىنا جانە ماسانىڭ دەنەنى زاقىمداۋىنا ءتوزۋى كەرەك، سونداي - اق جابايى پىلدەرگە قاراعاندا، ولاردىڭ وقياتتان شابۋىل جاساۋىنا ءدوپ كەلۋى دە مۇمكىن.
جابايى ءپىل ”رانراننىڭ“ اۋرۋدان اناعۇرلىم ويداعىداي ايىعۋى ءۇشىن، ول جارالانۋ حاۋپىنە قاراماستان، ونىڭ 4 سيراعىنا بايلانعان تەمىر شىنجىردى قورىقپاستان الىپ تاستادى، ەڭ سوڭىندا، ”رانراننىڭ“ سەنىمىنە يە بولدى؛ شالكەس جابايى ءپىل ”كۇنليۋدى“ قۇتقارۋ ءۇشىن، ول اتويلاپ العا شىعىپ، ءپىلدىڭ تابانى استىندا جان ءتاسىلىم بولۋعا شاق قالدى، ەڭ سوڭىندا، كوپشىلىكپەن تىزە قوسا وتىرىپ ونى ءساتتى تۇردە قۇتقاردى...
ازيا ءپىلى قان بيوحيميا ساندى مالىمەت قامباسىن قۇرۋعا، ازيا ءپىلىن قۇتقارۋ ءادىسىن جانە تاجىريبەلەرىن قاراستىرۋعا، قورىتىندىلاۋعا، ازيا ءپىلىن قورعاۋ ىستەرىنىڭ زاپاس دارىندىلارىن باۋلۋعا قاتىستى... 17 جىلدان بەرى شيۇڭ چاۋيۇڭ ءوزىنىڭ ىقىلاسىمەن جانە قايسارلىعىمەن ورگانيزمدەردىڭ كوپ تۇرلىلىگىن قورعاۋدىڭ، ادام مەن تابيعاتتىڭ جاراسىمدى قاتار ءومىر ءسۇرۋىن ىلگەرىلەتۋدىڭ ”وڭ ەنەرگياسىن“ ۇزدىكسىز تاراتتى.
اۋەلگى ماقساتتان جازباي، ەنەرگيا ارقىلى وتاننىڭ ءۇمىتىن اقتايمىز
”اۋەلگى ماقساتتان جازباي، ەنەرگيا ارقىلى وتاننىڭ ءۇمىتىن اقتايمىز“، بۇل جۇڭگو تەڭىز - مۇحيت مۇناي توبى شەكتى سەرىكتەستىگى ۇڭعىمالاردى بۇرعىلاۋ، ۇڭعىما جۇمىسىن اياقتاۋ تەحنيكاسى مامانى ليۋ شۋجيەنىڭ كاسىپتىك ءومىرىنىڭ شىنايى بەينەسى.
1997 - جىلدىڭ سوڭىندا ليۋ شۋجيە جۇڭگو تەڭىز - مۇحيت مۇناي توبى شەكتى سەرىكتەستىگىنە كىرەدى. قايراتىنا سەنگەن ول ۇجىمىن باستاپ شەشۋشى سالالاردا ءبىر قىدىرۋ عىلىم - تەحنيكادا جاڭالىق اشۋعا جانە تەحنيكالىق ىلگەرىلەۋشىلىككە قول جەتكىزىپ، جۇڭگو تەڭىز - مۇحيت مۇناي توبى شەكتى سەرىكتەستىگىنىڭ تەڭىزدەگى مۇناي - گاز الابىن الدىڭعى مەرزىمدىك بۇرعىلاۋ - اشۋدى زەرتتەۋ تەحنيكالىق جۇيەسىن جۇيەلى ورناتتى.
تەڭىزگە اۋەستەنگەننەن بەرى ليۋ شۋجيە قاشاندا نانحاي تەڭىزىن كوكەيىندە ويلاپ ءجۇردى.
نانحاي تەڭىزىنىڭ مۇناي - گاز بايلىعىنىڭ مولشەرى 35 ميلليارد تونناعا جەتەدى، ايتسە دە مۇنىڭ ％70ى تەرەڭ سۋ قويناۋىندا، تەحنيكالىق سەبەپتىڭ شەكتەمەسىنە ۇشىراعاندىقتان، ەلىمىز وسىدان بۇرىن نانحاي تەڭىزىنىڭ تەرەڭ قويناۋىنداعى مۇناي - گاز بايلىعىن دەربەس بارلاپ اشۋدى جۇزەگە اسىرۋعا لاجىسىز بولىپ كەلگەن ەدى.
قيىندىقتان تايسالماعان ليۋ شۋجيە 10 نەشە جىل تەحنيكادان قامال الۋ جانە امالياتتان وتكىزۋ ارقىلى تەرەڭ سۋ تۇبىندە ۇڭعىما بارلاۋ، ۇڭعىما بۇرعىلاۋ جوباسى، تاياز قاباتتا ۇڭعىما بۇرعىلاۋ تەحنولوگياسى جانە جابدىعى قاتارلى جيىنى 5 ۇلكەن جۇيە بويىنشا 80 نەشە ءتۇرلى شەشۋشى تەحنيكا قالىپتاستىردى. ىلە - شالا ول قاتىستى تەحنيكانى الىپ، نانحاي تەڭىزىنە بارىپ، جۇڭگونىڭ تۇڭعىش رەتكى ءوز باسقارۋىنداعى تەرەڭ سۋ ءتۇبى گاز الابى − ”شىنحاي 1 - ءنومىرلى“ اسا تەرەڭدىك ۇلكەن گاز الابىندا ۇڭعىمانى بۇرعىلاۋ، ۇڭعىما جۇمىسىن اياقتاۋ قۇرىلىسىن باستادى.
ۇڭعىمانى بۇرعىلاۋ، ۇڭعىما جۇمىسىن اياقتاۋ ينجەنەرياسىنىڭ باس قولباسشىسى رەتىندە، ليۋ شۋجيە الدىڭعى شەپتە قولباسشىلىق ەتۋگە تاباندى بولىپ، اسا تەرەڭدىكتەگى 11 ۇڭعىمانى بۇرعىلاۋ جۇمىسىنا ءساتتى تىرەك بولدى.
2021 - جىلى 6 - ايدىڭ 25 - كۇنى پارتيا قۇرىلعاندىعىنىڭ 100 جىلدىعى قارساڭىندا، ”شىنحاي 1 - ءنومىرلى“ ۇلكەن گاز الابى ءساتتى ىسكە قوسىلىپ، قوعامداعى ءار سالانىڭ كەڭ كولەمدى نازارىن اۋداردى.
ليۋ شۋجيە قاراپايىم جۇمىس ورنىندا ءۇن - ءتۇنسىز ۇلەس قوسىپ، ەلىمىزدىڭ تەڭىز - مۇحيت مۇناي - گازىن جوعارى ءونىمدى بارلاۋىنا، اشۋىنا كورنەكتى ۇلەس قوسىپ، جاسامپازدىق سيپاتتى اماليات جانە باي اقىل - پاراساتپەن جاڭا داۋىردەگى ەڭبەكشىلەر جىرىن جازدى.
اسپاننان تۇسەتىن باتىر جوق، تەك باسىن ءباي تىگەتىن قاراپايىم ادام عانا بار
الاسا بويلى، شاعىن دەنەلى لۇڭ بيڭ قوسىننان بوساعان قاراپايىم اسكەر ەدى. ايتسە دە ونىڭ قاراپايىم بەينەسىنەن اتويلاپ الدا جۇرەتىن، وتان جولىندا جان قيۋدان تايسالمايتىن سەنىمدى كورۋگە بولادى.
2020 - جىلى جاڭا تيپتى ايدارشا ۆيرۋس وكپە قابىنۋ ىندەتى ۋحاندا تۇتقيىل تۋىلدى، لۇڭ بيڭ قارسى باعىتتا ءجۇرىپ، ۇلكەن جۇك اۆتوكولىگىن 32 كۇن ايداپ، ۋحانعا 11 رەت بارىپ قايتىپ، جەرگىلىكتى ورىنداعى بۇقاراعا كەرەك - جاراقتاردى جەتكىزدى.
ۋحانعا كومەككە اتتانۋ ول جونىنەن ءبىر ءتۇرلى توسىندىق سانالعانىمەن، ايتسە دە ونى تۇسىنەتىن ادامداردىڭ ءبارى بۇل ونىڭ ستيلىنە ۇيلەسەتىن تابيعي ارەكەت دەپ ءبىلدى −
2019 - جىلى كەدەيلىكتەن ارىلتۋدان قامال الۋ شايقاسى دابىرالى ورىستەتىلدى، لۇڭ بيڭ جەرگىلىكتى ورىننىڭ الەۋمەتتىك يگىلىك ۇيىمىنا بەلسەنە قاتىناستى، اقشانى از تاپسا دا، قيىنشىلىعى بار بۇقارا ءۇشىن كوبىرەك ءىس ىستەۋگە پەيىل بولدى؛
2021 - جىلى 7 - ايدا حىناندا ەرەكشە اۋىر تاسقىن اپاتى تۋىلدى، لۇڭ بيڭ اۆتوكولىگىمەن حىناننىڭ شينشياڭىنا بارىپ، اپاتقا ۇشىراعان بۇقاراعا 19 توننا تۇرمىستىق جانە اپاتتان قۇتقارۋ كەرەك - جاراقتارىن جەتكىزدى؛
2021 - جىلى 8 - ايدا كوپ جەردە ىندەت تۋىلعان جاعدايدا، ول ىندەتتەن ساقتانۋ - تىزگىندەۋ شايقاسىنا تاعى دا قاتىناسىپ، باقىلاۋ - تەكسەرۋ تۇيىنىندەگى ەرىكتىلەرگە سۇيىسپەنشىلىك كەرەك - جاراقتارىن جەتكىزدى...
قوسىننان بوساسا دا قاسيەتىن جويمادى، كيىمىن اۋىستىرسا دا جۇرەگى وزگەرمەدى. لۇڭ بيڭ ءىس جۇزىندىك ارەكەتىمەن قوسىننان بوساعان اسكەردىڭ وتەۋگە ءتيىستى جاۋاپكەرشىلىگىن بەينەلەپ، ”پارتيا مەن حالىق قاجەت ەتسە بولعانى، مەن قاشاندا اتويلاپ الدا جۇرەتىن اسكەر بولامىن“ دەۋدەن تانبادى.
قىسقى وليمپيادا سپورت جارىسى الاڭىنىڭ ارتىنداعى ”جول اشقان اتويشى“
بەيجيڭ 2022 - جىلعى قىسقى وليمپيادا سپورت جارىسى كەزىندە مەملەكەتتىك تۇعىردان سەكىرۋ قار شاڭعى جارىسى ورتالىعى (”شۋەرۋ - ي“) قىزىقتى جارىس تۇرلەرىمەن جانە كەرەمەت قۇرىلىستارىمەن جۇرت نازارىن اۋداردى. بۇنى جۇڭگو تەمىر جول قۇرىلىس توبى بەيجيڭ 2022 - جىلعى قىسقى وليمپيادا سپورت جارىسىنىڭ وليمپيادا قىستاعىنىڭ جانە الاڭ - سارايلار شوعىرى ينجەنەريالىق نىسانىنىڭ باسقارۋ ءبولىمىنىڭ ەڭبەگىنەن بولە قاراۋعا بولمايدى.
تاۋلى جەرگە ورنالاسقان، كليماتى قۇبىلمالى، تۇتاس جىلدا ءونىمدى قۇرىلىس جۇرگىزەتىن ۋاقىتى نەبارى 6 اي عانا... قۇرىلىس باستاۋدان ىلگەرى، نىسان ۇجىمى ءتۇرلى - ءتۇستى سايىستارعا ءدوپ كەلدى. ايتسە دە ”90 - جىلداردىڭ تۇلەگىن“ نەگىز ەتكەن نىسان ۇجىمى قيىندىقتان تايسالماي، قايتا - قايتا وزگەرىستى مولشەرلەپ، باعامداپ، ءاربىر جۇمىس ءتارتىبىن ％100 تولىمدى ەتىپ، قۇرىلىس مىندەتىن تابىسپەن ورىندادى.
جەكە ”شۋەرۋ - ي“ عانا ەمەس، مەملەكەتتىك دالالىق شاڭعى جارىسى ورتالىعى، مەملەكەتتىك قىسقى ەكى ءتۇر ورتالىعى، جاڭجياكوۋ وليمپيادا قىستاعى دا وسى نىسان ۇجىمىنىڭ قولىندا چەرتوجدان رەالدىققا اينالىپ، دۇنيە جۇزىنە جۇڭگو ۇستانىمىن، جۇڭگو عىلىم - تەحنيكاسىن، جۇڭگو جىلدامدىعىن ايگىلەدى.
ينجەنەريالىق نىساننىڭ 3 پايىزى قۇرۋعا، 7 پايىزى باسقارۋعا بايلانىستى. قۇرىلىس مىندەتىنەن سىرت، نىسان ۇجىمى الاڭ - سارايلاردىڭ اينالىمىن، قورعالۋىن قامتاماسىز ەتۋ مىندەتىن دە ارقالايدى، كوكتەم مەرەكەسىنە قاراعان كۇنى تۇندە دە باياعىسىنداي قاقاعان ايازدا ءۇن - ءتۇنسىز تاپجىلمادى. تۇتاس قىسقى وليمپيادا سپورت جارىسى كەزىندە نىسان ۇجىمى اقىل - پاراساتىمەن، ەرلىگىمەن جانە تاباندىلىعىمەن ەڭ كەرەمەت قامتاماسىزدىق ازىرلەدى.
تاڭداۋلى بەينەسى سەبەپتى، بۇل ۇجىمنىڭ نىسان مەڭگەرۋشىسى جياڭ شيۋپىڭ 2022 - جىلعى بەيجيڭ قىسقى مۇگەدەكتەر وليمپيادا سپورت جارىسى الاۋگەرىنىڭ ءبىرى بولدى، بۇل ونىڭ كوڭىلىن تولقىتتى: ”ءار قادامىمدا ۇجىمىمىزدىڭ كوز جاسى جانە اشتى تەرى بار، ءار قادامىم ەرەكشە مىعىم، اياق سەرپىنىم ەرەكشە باتىل بولدى“!
(شينحۋا اگەنتتىگىنىڭ 4 - ايدىڭ 30 - كۇنى بەيجيڭنەن بەرگەن حابارى)
