انار بۇلت \ شينجياڭ گازەتىنىڭ ءتىلشىسى شيە حۇيبيان 5 - ايدىڭ 2 - كۇنى ۇرىمجىدەن حابارلايدى. شينجياڭ اۋىل شارۋاشىلىعى عىلىم اكادەمياسىنان ۇعىسۋىمىزشا، رايونىمىزدىڭ عىلمي زەرتتەۋ قىزمەتكەرلەرى زەرتتەپ اشقان جارقىشاق ماقتا تۇقىمىن شىعارىپ تاستاۋ تەحنيكاسى تولىمدى ماقتا تۇقىمىنىڭ كوكتەۋ مولشەرىنىڭ تومەنگى شەگى ％80تەن اسا الماۋ سىندى الەمدىك قيىن تاقىرىپتى شەشكەن. قازىر، اتالعان تەحنيكا شينجياڭنىڭ ماقتا تۇقىمىن ءوندىرۋ، وڭدەۋ كاسىپورىنداردىڭ قاجەتتى تەحنيكاسىنا اينالعان، وسى تەحنيكامەن وڭدەلگەن تۇقىمدار شينجياڭنىڭ باستى ماقتا القاپتارىن تولىق قامتىعان.
زەرتتەۋ - اشۋ ۇجىمىنىڭ مۇشەسى، شينجياڭ اۋىل شارۋاشىلىعى عىلىم اكادەمياسى ەكونوميكالىق داقىلدار زەرتتەۋ ورنىنىڭ زەرتتەۋشىسى تيان لي - ۋىن بىلاي دەدى: بۇرىن جارقىشاق ماقتا تۇقىمدارى ءونىمدى شىعارىپ تاستالمايتىندىقتان، ەل ءىشى - سىرتىنداعى ماقتا ەگەتىن باستى القاپتاردا تولىمدى ماقتا تۇقىمىنىڭ كوكتەۋ مولشەرىنىڭ تومەنگى شەگى تەك ％80 بولىپ بەلگىلەنىپ كەلگەن ەدى. شينجياڭدا، ماقتانى ءدال مولشەرمەن ەگۋ تەحنيكاسىنىڭ جالپىلاسۋىنا مەڭزەس، ％80تىك كوكتەۋ مولشەرى ماقتا اتىزىندا وسكىننىڭ قاتارعا قوسىلۋ مولشەرىنىڭ ءبىرشاما جوعارى بولۋىنا كەپىلدىك بەرە المايدى دا، ماقتانىڭ جوعارى تۇسىمىنە كەسىرىن تيگىزەدى.
بۇل قيىن ماسەلەنى شەشۋ ءۇشىن، 2013 - جىلى تيان لي - ۋىن زەرتتەۋ ۇجىمىن باستاپ، شينجياڭ تيانزو اۋىل شارۋاشىلىعى عىلىم - تەحنيكالارىن دامىتۋ شەكتى جاۋاپكەرشىلىك سەرىكتەستىگىمەن بىرلەسىپ، جارقىشاق ماقتا تۇقىمىن جوعارى ونىمدىلىكپەن شىعارىپ تاستايتىن ماشينا جابدىعىن بىرگە زەرتتەپ، جاساپ شىعادى. اتالعان جابدىق وڭدەلەتىن تۇقىمدى تەمىر ۇنتاعىمەن قوسىپ ارالاستىرىپ، ونان سوڭ نەوديم - تەمىر - بور ماتەريالىنان پايدالانىپ جەتكىزىلۋ ۇستىندەگى جارقىشاق ماقتا تۇقىمدارىن باعىتتامالى تۇردە جابىستىرىپ الادى، جارقىشاق ماقتا تۇقىمدارىن قولمەن شىعارىپ تاستاۋدىڭ ورنىنا ماشينانى قولدانۋ جارقىشاق ماقتا تۇقىمدارىن جوعارى ونىمدىلىكپەن شىعارىپ تاستاي الماۋ سىندى قيىن ماسەلەنى تۇبەگەيلى شەشتى. بۇل تەحنيكا تۇقىم جەتىلدىرۋ - كوبەيتۋ اۋماعىنداعى ساپالىلاندىرۋ جانە وڭدەۋ تەحنولوگياسى تارتىبىندە جاڭالىق اشۋ تەحنيكاسىمەن سايكەستىرىلىپ، تۇقىمنىڭ كوكتەۋ مولشەرىنىڭ ％96.7 − 86.2 ارالىعىندا تۇراقتىلانۋىنا شىنايى كەپىلدىك ەتەدى.
تيان لي - ۋىن بىلاي دەدى: ءدال مولشەرمەن تۇقىم سەبىلەتىن ماقتا اتىزدارىنداعى وسكىننىڭ قاتارعا قوسىلۋ مولشەرىن جوعارىلاتۋ ءۇشىن، ەل ءىشى - سىرتىنداعىلار كوبىنەسە ءدال مولشەرمەن تۇقىم سەبۋ ماشيناسىن جاقسارتىپ جوبالاۋمەن شەكتەلىپ، جوعارى ساپالى تۇقىم ءوندىرۋ مەن سايكەستى اۋىل شارۋاشىلىعى تەحنيكاسىن زەرتتەۋ - اشۋدى بىرلەستىرۋدىڭ قاجەتتىلىگىن ەسكەرۋسىز قالدىرىپ كەلدى. جارقىشاق ماقتا تۇقىمىن شىعارىپ تاستاۋ تەحنيكاسى وسى شەكتەۋدى بۇزىپ، ماقتا تۇقىمى وسكىنىنىڭ قاتارعا قوسىلۋ مولشەرىن 10 پايىزداي جوعارىلاتتى.
جارقىشاق ماقتا تۇقىمىن شىعارىپ تاستاۋ تەحنيكاسى ءدال مولشەرمەن تۇقىم سەبۋ تەحنيكاسىنىڭ جەدەل جالپىلاسۋىنا مۇمكىندىك تۋعىزدى. بيڭتۋان 7 - شى 128 - تۋان 7 - ليانىنىڭ قىزمەتشىسى شاۋ جيدۇڭ بىلاي دەدى: بۇرىن ”ءبىر شۇقاناققا كوپ تۇقىم سەبۋدە“ وسكىننىڭ قاتارعا قوسىلۋ مولشەرى ءبىرشاما جوعارى بولعانىمەن، وسكىندى قولمەن تۇراقتاندىرۋ كەرەك بولاتىندىقتان، قول ۇستاپ، ۋاقىت جەيتىن. قازىر تۇقىم ساپاسىنىڭ جوعارىلاۋىنا مەڭزەس، وزىق ماشينا جابدىقتارىن سايكەستىرىپ، ”ءبىر شۇقاناققا ءبىر تۇقىم سەبەتىن“ ءدال مولشەردەگى تۇقىم سەبۋ تەحنيكاسىن قولداناتىن بولدىق، ءسويتىپ وسكىننىڭ قاتارعا قوسىلۋ مولشەرى اناعۇرلىم جوعارى بولىپ قانا قويماي، تۇقىم ىستەتۋدىڭ وزىندىك قۇنى دا ۇنەمدەلدى.
