انار بۇلت \ شينجياڭ گازەتىنىڭ ءتىلشىسى حان چين - يان
سالاماتتىق كودىن كورسەتتى، دەنە تەمپەراتۋراسىن تەكسەرتتى... 5 - ايدىڭ 2 - كۇنى ساعات 10 مولشەرىندە گۋاڭدۇڭدىق ساياحاتشى ليڭ يۇڭ ەرلى - زايىپتىلار قولمەن تىزىمگە الدىرۋ وتكەلىنەن ءوتىپ، قاشقار بايىرعى قالا كورىنىس وڭىرىنە كىردى.
بايىرعى قالا كورىنىس ءوڭىرى قاقپاسىنىڭ الدىندا ساياحاتشىلار سانالىلىقپەن ارالىق ساقتاي قاتارعا تۇرىپ، كىرگەلى تۇر، قىزمەتكەرلەر اندا - ساندا ساياحاتشىلارعا ”ماسكى تاعىڭىزدار، ۇيمەلەمەڭىزدەر“ دەپ ەسكەرتىپ قويادى.
ساعات 10نان 30 مينۋت وتكەندە ۇزىن سىرناي تارتىلىپ، قاشقار بايىرعى قالا كورىنىس وڭىرىنە كىرۋ سالتى ۋادەلى ۋاعىندا باستالدى. ”الىستاعى دوستار قايدان كەلدىڭىزدەر“؟ اسقاق اماندىق ءۇنى قىزۋ مەرەيدى باستادى، ساياحاتشىلار ارتيستەرمەن بىرگە بيگە باسىپ، شادىمان ۇندەر شالقىدى.
”بايىرعى قالانىڭ قالاعا كىرۋ راسىمىنە قاتىناسا العانىما توتەنشە قۋانىشتىمىن“. شينيڭدىك ساياحاتشى ما شياۋتيڭ شاتتانا: ”ءساتى تۇسكەندە قاشقارعا تاعى دا ساياحاتتاي كەلەمىن“، - دەدى.
قاشقار بايىرعى قالا كورىنىس ءوڭىرى كوشەسىندە جۇرسەڭىز، ءبىر جاعى بيىك عيماراتتار قاز - قاتار تىزىلگەن جاڭا قالا، ءبىر جاعى بايىرعى ءتىلسىم ساراي ۇلگىسىندەگى قۇرىلىس شوعىرى؛ ءداستۇرلى تەمىرشىلىك دۇكەنىنەن دىڭعىرلاعان داۋىستار ەستىلەدى، زاماناۋي لەپ ەسكەن كوفەحانادان كوفەنىڭ حوش ءيىسى اڭقيدى... ساياحاتشىلار بايىرعى جىبەك جولىنىڭ تاريحي بەلگىلەرىن ىزدەۋمەن بىرگە، وسى زامانعى جانە بايىرعى ۋاقىت كەڭىستىگىنىڭ وسى ارادا مۇلتىكسىز توعىسقانىنا سۇيىنۋدە.
”قاشقارعا كەلىپ داڭعازالىقتان تىنىشتالار جەر تابارىمدى ويلاماعان ەكەنمىن، بىرنەشە كۇن كوبىرەك تۇرىپ، جاقسىراق سەزىنەيىك دەيمىز“! ءجۇز جىلدىق شايحانانىڭ الدىندا وتىرعان گۋاڭدۇڭدىق ساياحاتشى لي يۇيليڭ كۇلىپ تۇرىپ وسىلاي دەدى.
ساياحاتشىلارعا ۋايىمسىز، جايلى، الاڭسىز سەرۋەندەۋ ورتاسىن ازىرلەۋ ءۇشىن، قاشقار بايىرعى قالا كورىنىس ءوڭىرىن باسقارۋ كوميتەتى ساياحاتشىلار قالاعا كىرگەندە ەكى ولشەمدى كودتى جايمالاۋ، دەنە تەمپەراتۋراسىن ولشەۋ سياقتى تالاپتاردى قاتاڭ تياناقتاندىردى؛ ساۋداگەرلەر دۇكەنىن ءار كۇنى ۋاق - ۋاق زارارسىزداندىرىپ، ساياحاتشىلاردى دۇكەنگە كىرگەن سوڭ ءبىر مەترلىك الەۋمەتتىك قاتىناس ارالىعىن ساقتاپ، وزىندىك ساقتانۋدى ويداعىداي ىستەۋگە قۋزادى.
سالاماتگۇل بىرنەشە جىلدىڭ الدىندا قاشقار بايىرعى قالا كورىنىس ءوڭىرىنىڭ ءتۇسىندىرۋشىسى بولاتىن، وسى ارانىڭ دامۋ بولاشاعىنا قىزىققان ول ساياحات بۇيىمدارىن ساتۋ، ۇلتتىق سالت - سانانى سەزىنۋ ءبىر تۇلعالاندىرىلعان ساياحاتتىق ارالاۋ دۇكەنىن اشتى.
ول كۇلىپ تۇرىپ تىلشىگە بىلاي دەدى: ”بيىل ءبىز قابىلداعان ساياحاتشىلار ءتىپتى كوپ بولدى، كوبى دوستارىمىز تانىستىرعاندار، مەن قاشقاردى دامىتۋدىڭ قاتىناسۋشىسى بولىپ، اناعۇرلىم كوپ ساياحاتشىنىڭ بۇل جەردىڭ باقىتتى تۇرمىسىن سەزىنۋىنە مۇمكىندىك جاساۋدى ءۇمىت ەتەمىن“.
