انار بۇلت \ شينجياڭ گازەتىنىڭ تىلشىلەرى لۋ فىڭباۋ، چىن چياڭۋي
”1 - مامىر“ دەمالىسى كەزىندە شينجياڭنىڭ بايتاق دالاسىندا قىزۋ ورلەۋ كوتەرىلىپ، ءبىر - بىرلەگەن ءتۇيىندى ينجەنەريا نىساندارىنىڭ قۇرىلىس الاڭدارىندا ماشينالار گۇرىلدەپ، ماتەريال تاسىعان كولىكتەر قايشالىسىپ، جۇمىسشىلار قايراتتانا ىستەپ، نىسانداردىڭ اياق الىسىن جەدەل العا ىلگەرىلەتتى.
ءتۇيىندى ينجەنەريالاردىڭ جۇمىسى توقتامادى
5 - ايدىڭ 1 - كۇنى تۇستەن بۇرىن، ۋاڭ تيانچياڭ مەن جۇمىستاستارى تاڭ اتىسىمەن ءۇرىمجى قالا اينالمالى جوعارى جىلدامدىقتى جولى (باتىس جەلىسى) ينجەنەرياسىنىڭ ۇلانباي تورابى تۇتاستىرۋ قۇرىلىس ورنىنا كەلىپ، ءبىر كۇندىك قاربالاستىقتارىن باستادى.
ءتىلشى 1 - ءنومىرلى بولات شىبىق جاساۋ الاڭى ىشىندە دانەكەر ۇشقىندارى شاشىراپ، جۇمىسشىلاردىڭ كوپىر وتكىنى قۇرىلىسىنا قاجەتتى بولات شىبىق بۇيىمدارىن جەدەلدەتە جاساپ جاتقانىن كوردى. الاڭ ىشىنە مانەرلەنىپ بولعان بولات شىبىق تورلارى تولتىرا قويىلىپ، جۇمىس ورىندارىنا جەتكىزىلۋگە دايىندالعان.
”مەرەكە كەزىندە جۇمىس ورنىمىزدان تاپجىلماي قۇرىلىستى جالعاستىرىپ، بەلگىلەنگەن قۇرىلىس مىندەتىن ورىنداۋعا شىنايى كەپىلدىك ەتتىك“. جۇڭگو ەنەرگيا قۇرىلىسى گىجوۋبا قالا ىستەرى سەرىكتەستىگى ءۇرىمجى قالا اينالمالى جوعارى جىلدامدىقتى جولى (باتىس جەلىسى) ينجەنەرياسىنىڭ باس كوتەرەگە الۋ نىسان ءبولىمىنىڭ ورىنباسار باس ينجەنەرى سۋ حۇڭچياڭ بىلاي دەدى: ”قازىر نىساننىڭ جول تاعانى، كوپىر وتكىنى سياقتى ينجەنەريالىق قۇرىلىستارى ءتارتىپتى ءجۇرىلىپ جاتىر، ءبىز ۇستەمەلەپ ىستەپ، كەلەر ايدا العاشقى ساندىقشا بورەنەنى ورناتۋعا دايىندالامىز“.
وڭتۇستىك شينجياڭ G314 جەلىسى قاشقار اۋماعىنان وتەتىن بولىگىنىڭ تاس جول قۇرىلىسى نىسانىندا جەدەلدەتە قۇرىلىس جۇرگىزىلدى، نىساننىڭ قۇرىلىسشىلارى مەرەكەلىك دەمالىس ۋاقىتتارىنان باز كەشىپ، جۇمىس ورىندارىندا ەرلىكپەن شايقاس جاسادى.
”ءبىزدىڭ بولىكتە جىل سوڭىندا جول تاعانى، كوپىر وتكىنى ينجەنەرياسىن اياقتاۋدى جوسپارلاپ وتىرمىز، 2 - ايدا جۇمىستى قالپىنا كەلتىرگەننەن بەرى، ءبىز كوپتەگەن قيىندىقتاردى جەڭىپ، قۇرىلىس ۇيىمىن ساپالىلاندىرىپ، نىسان قۇرىلىسىن ساپالى، جوعارى ءونىمدى تۇردە ىلگەرىلەتتىك“، - دەدى G314 جەلىسىنىڭ قاشقار اۋماعىنان وتەتىن بولىگى تاس جول قۇرىلىسى نىسانىنىڭ 4 - توقتامدىق بولىگىنىڭ نىسان ديرەكتورى مىڭ حۇڭچياڭ.
ۋاقىتتى ۇتىپ، دەمالىستا دا قالىپتى جۇمىس ىستەي بەردى. تەڭىز دەڭگەيىنەن بيىك بولۋ، كليماتتىق فاكتورلاردىڭ ىقپالىنا ۇشىراۋ سالدارىنان جۇمىستى قالپىنا كەلتىرۋ شارت - جاعدايى بولماعان نىسانداردان تىس، وڭتۇستىك، سولتۇستىك شينجياڭنىڭ قاتىناس قۇرىلىسى نىساندارى مەرەكە كەزىندە توقتامادى، بارلىق جەردەن دابىرالى قۇرىلىس جۇرگىزىپ جاتقان كورىنىستەردى كورۋگە بولادى.
قۇرىلىس ۋاقىتىن مىقتى يگەرىپ، اياق الىستى جەبەدى
”ءبىز مىنا كوپىردى 2 اي ىشىندە سالىپ بولۋدى جوسپارلاپ وتىرمىز“، - دەدى 5 - ايدىڭ 1 - كۇنى جۇڭگو تەمىر جولى 15 - مەكەمەسى توبى شەكتى سەرىكتەستىگى ءۇرىمجى − جياڭجۇنمياۋ قۋاتىن ارتتىرىپ جاڭالاۋ ينجەنەرياسى S1 بولىگى جۇمىس ورنىنداعى قۇرىلىستىڭ جاۋاپتىسى يان ۋانجۇن تىلشىگە.
”1 - مامىر“ دەمالىسى ءدال قۇرىلىس جۇرگىزۋدىڭ التىن مەزگىلى، مىڭنان استام تەمىر جول قۇرىلىسشىلارى دەمالىستارىنان باز كەشىپ، قۇرىلىس ورنىندا قاربالاس جۇمىس ىستەدى.
ءۇرىمجى سولتۇستىك ۆوكزالىنان جياڭجۇنمياۋعا دەيىنگى تەمىر جولدىڭ قۋاتىن ارتتىرىپ جاڭالاۋ ينجەنەرياسىنىڭ K40 بولىگىندەگى ءبىر ساندىقشا كوپىردى بۇزىپ، ورنىنا جاڭادان ءبىر بولات شىبىقتى بەتون ساندىقشا كوپىر سالۋ كەرەك. ”كونە كوپىردى بۇزىپ، جاڭا كوپىر سالۋدىڭ ۋاقىتى 2 اي عانا، قۇرىلىس وتە شۇعىل“. يان ۋانجۇن بىلاي دەدى: ”ءبىز قىزمەتكەردى، جابدىقتى كوبەيتىپ، ارتقى شەپ قامتاماسىزدىعىن كۇشەيتتىك ءارى قۇرىلىس جۇرگىزۋ ءتارتىبىن ساپالىلاندىردىق، نىسان ءبولىمى جۇمىس باسىندا سايكەستىرىپ، ماسەلەلەردى شەشۋگە ارناۋلى ادام جىبەردى، 7 - ايدىڭ سوڭىندا ۇلكەن كوپىردە ءدال ۋاعىندا، ساپاسىنا كەپىلدىك ەتىپ كولىك قاتىناۋىن جۇزەگە اسىرۋعا كۇش سالامىز“.
مەملەكەت ەلەكتر تورى شينيۋان شينجياڭ فۋكاڭ سۋدى بيىككە شىعارىپ ەنەرگيا ساقتايتىن ەلەكتر ستانسياسىنىڭ جەر استى زاۆود ۇيىندە سالماعى 135 توننا كەلەتىن 3 - ءنومىرلى گەنەراتور اگراگاتتارىنىڭ ۇلۋ قابىعى ءپىشىندى ناسوسى كرانمەن ورناتۋدى كۇتىپ تۇر. مەرەكە كەزىندە 2000 نان استام قۇرىلىسشى نىساننىڭ قۇرىلىس ورنىندا ەرلىكپەن شايقاس جاسادى.
”ءبىز ماشينا جابدىقتارى، شيكىزات ماتەريالدار سياقتى قۇرىلىس بايلىقتارىن ورنالاستىرۋدى كۇشەيتىپ، كۇن اشىق كەزدەن پايدالانىپ جەدەلدەتە قۇرىلىس جۇرگىزىپ، 2024 - جىلى 9 - ايدان بۇرىن ءدال ۋاعىندا وندىرىسكە قوسىپ، ەلەكتر تاراتۋعا كۇش سالامىز“، - دەدى مەملەكەت ەلەكتر تورى شينيۋان شينجياڭ فۋكاڭ سۋدى بيىككە شىعارىپ ەنەرگيا ساقتاۋ شەكتى سەرىكتەستىگىنىڭ باس ديرەكتورى فۋ بايليڭ.
تەحنولوگيانى جاڭالاپ، ساپانى جوعارىلاتتى
”قۇرىلىس ساپاسىنا كەپىلدىك ەتۋ ءۇشىن، ءبىز تەحنولوگيانى جاڭالاپ، بۇراندا ءپىشىندى دانەكەرلەۋ GIS (گازبەن يزولياتسيالانعان تولىقتاي جابىق قۇرامالى ەلەكتر جابدىعى) نەگىزگى سىم تۇتىگىن قولداندىق“. مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى قۇرىلىس بولىمشە سەرىكتەستىگى ءبىرىنشى نىسان باسقارۋ ءبولىمىنىڭ نىساندى جۇمىس باسىندا قاداعالاۋ جاۋاپتىسى، ءۇرىمجى − سانجى 750 كيلوۆولتتىق كەرنەۋ وزگەرتۋ پۋنكتى ينجەنەريالىق مەنشىك يەسى نىسانى ديرەكتورى ۋ جيانبو وسىلاي دەدى.
ءۇرىمجى − سانجى 750 كيلوۆولتتىق كەرنەۋ وزگەرتۋ پۋنكتى ءۇرىمجىنىڭ سولتۇستىگى − فىڭحۋاڭ − شيحۋ − بۇراتالا وبلىسى − ىلە ەلەكتر جەتكىزۋ، كەرنەۋ وزگەرتۋ ينجەنەرياسىنىڭ ماڭىزدى قۇرامداس بولىگى، سونداي - اق ءۇرىمجى − سانجى ءوڭىرىنىڭ 750 كيلوۆولتتىق اينالمالى جەلىسىنىڭ ماڭىزدى ءبىر بۋىنى، بۇل نىسان 2019 - جىلى 10 - ايدىڭ 24 - كۇنى جۇمىس باستاعان، جوسپار بويىنشا بيىل 10 - ايدا سالىنىپ بولىپ، وندىرىسكە قوسىلادى.
قازىر بۇل نىسان ءۇي قۇرىلىسى جانە ەلەكترلىك ورناتۋ قۇرىلىسىن اياقتاپ، جابدىقتاردى سىناقتان وتكىزۋ مەزگىلىنە ءوتتى. ينجەنەريانىڭ ساپاسىنا كەپىلدىك ەتۋ ءۇشىن، قۇرىلىسشىلار دانەكەرلەگەن كەزدە بۇراندالى دانەكەر تەحنولوگياسىن قولداندى، مۇنداي تەحنولوگيا ءداستۇرلى تىكە دانەكەرلەۋگە قاراعاندا كۇردەلى بولادى، نەگىزگى سىم تۇتىگىنىڭ كۇشەمەلىلىگىن ارتتىرىپ، ينجەنەريانىڭ ساپاسىن جوعارىلاتادى.
قۇمىل قالاسىندا مەملەكەت ەلەكتر تورى شينيۋان شينجياڭ قۇمىل سۋدى بيىككە شىعارىپ ەنەرگيا ساقتايتىن ەلەكتر ستانسياسى نىسانىنىڭ قۇرىلىسى نىسانداعى ەڭ ۇلكەن گەولوگيالىق وپىرىلمالى بەلدەۋ − كۇلاي وپىرىلمالى بەلدەۋى قۇرىلىس وڭىرىنە وتەدى. قۇرىلىسشىلار حالىقارادا وزىق گەولوگيالىق بارلاۋ تەحنيكاسى − TCT (تاۋ جىنىستارىنا ءۇش ولشەمدى ەتىپ كورنەكى تۇردە جاپىراقتاپ تالداۋ جاسايتىن گەولوگيالىق بولجاۋ تەحنيكاسى) تەحنيكاسىن جاسامپازدىقپەن ەنگىزۋ ارقىلى قۇرىلىس جۇرگىزۋدىڭ حاۋىپسىز دە تىزگىندەمەلى بولۋىنا شىنايى كەپىلدىك ەتىپ، قۇرىلىس اياق الىسىن ورنىقتى ىلگەرىلەتتى.
”TCT تەحنيكاسى ادام دەنەسىنە CT تەكسەرۋىن جاساعان سياقتى تاۋ جىنىستارىنا جاپىراقتاپ تالداۋ جاساپ، ءۇش ولشەمدى ۇلگى ءتاسىلى ارقىلى ۇڭگىردىڭ الدىڭعى جاعىنداعى تاۋ جىنىستارىنداعى ءتيىمسىز گەولوگيالىق قۇبىلىستاردى كورسەتىپ، قۇرىلىس جۇرگىزۋ بارىسىندا بولۋى مۇمكىن گەولوگيالىق ماسەلەلەردى ءبىرشاما ءدال شەشىم ەتىپ، وسى ارقىلى ينجەنەريا قۇرىلىسىن جۇرگىزۋدىڭ حاۋىپسىزدىگى مەن ينجەنەريانىڭ ۇنەمدىلىگىن جوعارىلاتىپ، قۇرىلىس جۇرگىزۋ ساپاسىنا كەپىلدىك ەتەدى“، - دەدى مەملەكەت ەلەكتر تورى شينيۋان شينجياڭ قۇمىل سۋدى بيىككە شىعارىپ ەنەرگيا ساقتاۋ شەكتى سەرىكتەستىگى ينجەنەريا ءبولىمىنىڭ ورىنباسار مەڭگەرۋشىسى جۇڭ فاجىڭ.
