چومولاڭما شىڭىنا عىلمي زەرتتەۋ جۇرگىزۋدە كوپ ءتۇرلى جاڭا رەكوردتار جاراتىلدى
شينحۋا اگەنتتىگىنىڭ 5 - ايدىڭ 4 - كۇنى چومولاڭما شىڭى ايالجايىنان بەرگەن حابارى. 5 - ايدىڭ 4 - كۇنى تۇستە چومولاڭما شىڭىنا عىلمي زەرتتەۋ جۇرگىزۋ اترەتىنىڭ 13 مۇشەسى چومولاڭما شىڭىنا ءساتتى شىقتى. بۇل ەلىمىزدىڭ چومولاڭما شىڭىنا عىلمي زەرتتەۋ جۇرگىزۋدە تەڭىز دەڭگەيىنەن 8000 مەتردەن جوعارى بيىكتىكتەن تۇڭعىش رەت قامال الۋى، چيڭحاي − شيزاڭ ۇستىرتىندە عىلمي تەكسەرۋ - زەرتتەۋ جۇرگىزۋ تاريحىندا ءداۋىر بولگىش مانگە يە.
وسى رەت چومولاڭما شىڭىنا شىققان عىلمي زەرتتەۋ اترەتىنىڭ مۇشەلەرى دۇنيە جۇزىندەگى تەڭىز دەڭگەيىنەن ەڭ بيىك اۆتوماتتى اۋا رايى پۋنكتىن قۇردى. سول كۇنى تاڭعى ساعات 3تە دىچيڭ وۋجۋ گرۋپپا باستىعى بولعان چومولاڭما شىڭىنا عىلمي زەرتتەۋ جۇرگىزۋ شىڭعا شىعۋ قىزمەت گرۋپپاسى عىلمي زەرتتەۋ اسپاپتارىن الىپ شىڭعا بەت الدى، العاشقى مىندەت اۋا رايى پۋنكتىن قۇرۋ ەدى. بۇل ءۇشىن ولار بىرنەشە ايدىڭ الدىندا قايتا - قايتا جاتتىعىپ، جۇمىس تارتىبىنە ابدەن جاتىلدى.
جۇڭگو عىلىم اكادەمياسى چيڭحاي - شيزاڭ ءۇستىرتىن زەرتتەۋ ورنىنىڭ زەرتتەۋشىسى جاۋ حۋابياۋ بىلاي دەدى: ”ەلىمىزدىڭ چومولاڭما شىڭىنىڭ ساتىلى اۋا رايىن باقىلاۋ جۇيەسىن قۇرۋى تەڭىز دەڭگەيىنەن بيىك مۇزدىقتار مەن قاسات قارلاردىڭ وزگەرىسىن باقىلاۋ - ولشەۋدە كەلەلى ماڭىز الادى“.
5 - ايدىڭ 4 - كۇنى عىلمي زەرتتەۋ اترەتىنىڭ مۇشەلەرى تۇڭعىش رەت «جەر شارىنىڭ شوقىسىندا» جوعارى دالدىكتەگى راداردان پايدالانىپ، شىڭداعى قار - مۇزدىڭ قالىڭدىعىن ولشەدى.
چومولاڭما شىڭىنىڭ ەتەگىندەگى تەڭىز دەڭگەيىنەن 5200 مەتر بيىكتىكتەگى باس قولباسشى ءماجىلىس كەڭسەسى شاتىرىندا جۇڭگو عىلىم اكادەمياسىنىڭ اكادەميگى، چيڭحاي - شيزاڭعا 2 - رەت عىلمي زەرتتەۋ جۇرگىزۋ اترەتىنىڭ باستىعى ياۋ تاندۇڭ سول جەردىڭ وزىندە: ”’شىڭ بورىشى‘ چومولاڭما شىڭىنا عىلمي زەرتتەۋ جۇرگىزۋدە شىڭعا شىعىپ باقىلاۋ - ۇلگى الۋى ءساتتى بولدى“! دەپ جاريالادى. سول جەردەگى كوپشىلىك قىزۋ شاپالاق سوعىپ، قول الىسىپ قۇتتىقتادى.
تانىستىرۋعا قاراعاندا، عىلمي زەرتتەۋ اترەتىندەگىلەر جالعاستى كوپ ءتۇرلى عىلمي تەكسەرۋ - زەرتتەۋ جۇرگىزەدى ەكەن.
