انار بۇلت \ شينجياڭ گازەتىنىڭ تىلشىلەرى سۇڭ ۋيگو، لۋ فىڭباۋ
”ءدۇت - ءدۇت“... 5 - ايدىڭ 12 - كۇنى اتۇش قالاسى سۇنتاع قالاشىعى ۋاقۋاق قىستاعىندا اشىق گۋدوك داۋىسى جاڭعىرىپ، پويەز ۇلگىسىندە جاسالعان ءبىر سەيىل - سەرۋەن كولىگى قىستاق تۇرعىندار كوميتەتىنەن جولعا شىقتى.
”بۇل ’شاعىن پويەزدىڭ‘ قىستاعىمىزدا اتاعى جەر جارادى، ’شاعىن پويەزعا‘ وتىرعاندار بۇكىل قىستاعىمىزدىڭ قوناعى ەكەنىن قىستاقتاعىلاردىڭ ءبارى بىلەدى“، - دەدى اتۇش قالاسى سۇنتاع قالاشىعى ۋاقۋاق قىستاعىنىڭ ءبىرىنشى شۋجيى شي كىۋي.
ءوڭى توتىعىپ، قوس قولى مۇيىزگەكتەنگەن شي كىۋيدىڭ قازىرگى بەينەسى ۋاقۋاق قىستاعىنداعى تۇرعىنداردان پالەندەي پارىقتالا قويمايدى. ول جۇڭگو حۋاديان توبى شەكتى سەرىكتەستىگى عىلىم - تەحنيكا ينفورماتسياسى ءبولىمى عىلىم - تەحنيكا، ونەركاسىپ باسقارماسىنىڭ ورىنباسار باستىعى، 3 جىلدىڭ الدىندا ول بەيجيڭنىڭ چاڭان كوشەسىندەگى كەڭسە عيماراتىندا عىلىم - تەحنيكا ينفورماتسيالارىن ءبىر جاقتى ەتۋمەن شۇعىلداناتىن.
2019 - جىلى ەندى عانا قىستاققا كەلگەن كەزدەگى كورىنىس شي كىۋيدىڭ ءالى انىق ەسىندە: قىستاقتا جول شىراقتارى جوق، ءتۇن كوزگە تۇرتسە كورگىسىز قاراڭعى بولاتىن؛ سۋ قۇبىرى جاڭالانىپ جاتقاندىقتان، جولدى شاڭ - توزاڭ قاپتاعان؛ جاراقسىز - كونە كەرپىش زاۆودىنىڭ ماڭى ۇزىننان - ۇزاققا جالعاسقان قۇبا دالا ەدى...
”شاعىن پويەزعا“ وتىرعان ءتىلشى قىستاقتىڭ قازىرگى شىت جاڭا بەينەسىنەن كوز ايدىن بولدى: يەن دالاداعى 300 مۋدان استام شاپتول اعاشى ءوسىپ ورمان قالىپتاستىرعان، جاپ - جاڭا كۇن ەنەرگياسى جول شىراقتارى قىستاق جولىن بويلاي ورناتىلعان، جاراقسىز - كونە قۇمداندار كوفەحانا بولىپ وزگەرتىلۋ ۇستىندە، قىستاقتىڭ بارلىق جەرىنەن قاتار - قاتار سالىنعان رەتتى ۇيلەر كوزگە شالىنادى، قىستاق تۇرعىندارىنىڭ جۇزدەرىنەن باقىت كۇلكىسى ەسەدى.
وسى وزگەرىستەردىڭ بارلىعى تىنباي ارتقان ەكونوميكالىق ناقتى قۋاتتىڭ ارقاسى.
قىزىلسۋ وبلىسى بويا ينفورماتسيا عىلىم - تەحنيكاسى شەكتى سەرىكتەستىگى، اتۇش شانشۇي اۋىل شارۋاشىلىعىن گۇلدەندىرۋ ينجەنەرياسى شەكتى سەرىكتەستىگى، تاۋحۋاداۋ ساياحاتتىق قىزمەت وتەۋ شەكتى سەرىكتەستىگى، سۋىق قىسىم كەرپىش جاساۋ زاۆودى، قوجالىق قىزمەت وتەۋ سەرىكتەستىگى... ”شاعىن پويەزدىڭ“ دامىلسىز العا جۇرۋىمەن، ءتىلشى ءبىرتالاي سەرىكتەستىكتەردى كوزى شالدى. شي كىۋي بۇلاردىڭ بارلىعىنىڭ قىستاقتا قۇرىلعان سەرىكتەستىك نەمەسە قارجى قوسقان سەرىكتەستىكتەر ەكەندىگىن ايتتى.
2019 - جىلدان باستاپ، ۋاقۋاق قىستاعىندا جالپى قارجىمەن تىركەلۋ، قارجى شىعارىپ جارنا مەڭگەرۋ جانە جارناعا قاتىناسۋ تاسىلىمەن 5 سەرىكتەستىك قۇرىلدى، وسى سەرىكتەستىكتەر قىستاق تۇرعىندارىنىڭ جۇمىستانۋىنداعى تاماشا ورىنعا اينالۋمەن بىرگە، بۇكىل قىستاقتىڭ ورتا تازالىعىن جونگە سالۋ، نەگىزدىك قۇرىلعى قۇرىلىسى سياقتى قىستاق دارەجەلى ىستەردى باسقارۋ قىزمەتىن دە كوتەرمەگە الدى. قىستاق كوللەكتيۆىنىڭ تازا كىرىسى 2019 - جىلعى 300 مىڭ يۋاننان ارتىپ 2021 - جىلى ءبىر ميلليون 570 مىڭ يۋانعا جەتتى، ۋاقۋاق قىستاعى ”مەملەكەتتىك اۋىل - قىستاقتى جونگە سالۋدان ۇلگى كورسەتۋ قىستاعىنا“ جانە ”اۆتونوميالى رايوننىڭ اۋىل - قىستاق ساياحاتىنداعى ءتۇيىندى قىستاققا“ اينالىپ، قىستاق تۇرعىندارى ”جاسىل تاۋ، تۇنىق سۋى“ بار دوڭگەلەك داۋلەتتى تۇرمىس كەشىردى.
”وتباسىمداعىلار دۇكەن اشقىسى كەلەدى، تيجارات كۋالىگىن بىتىرۋدە نەندەي ءراسميات قاجەت“؟ ۋاقۋاق قىستاعى 6 - قىستاق تۇرعىندار شاعىن گرۋپپاسى پارتيا قۇرىلىسى شاعىن بەكەتىندە، قىستاق تۇرعىنى ۋالي ابدىرەشىت كاسىپ جونىندە كەڭەس الۋدا.
6 - قىستاق تۇرعىندار شاعىن گرۋپپاسى قىستاق كوميتەتىنەن 4 كيلومەتر قاشىقتىقتا، قىستاق تۇرعىندار كوميتەتىنە بارىپ - كەلۋ ءۇشىن 20 مينۋتقا تاياۋ ۋاقىت كەتەدى. ”قىستاق ءبىزدىڭ قىستاق تۇرعىندارى شاعىن گرۋپپامىزدا پارتيا قۇرىلىسى شاعىن بەكەتىن قۇرىپ، 29 ءتۇرلى قىستاق دارەجەلى ىستەردى جانە ءىشىنارا ساياساتتىق كەڭەس الۋ ماسەلەلەرىن جاقىن ماڭنان بىتىرۋگە بولاتىن بولدى“، - دەدى ۋالي.
شي كىۋي تىلشىگە بىلاي دەدى: ۋاقۋاق قىستاعىندا جالپى 8 قىستاق تۇرعىندارى گرۋپپاسى، 3000 نەشە ادام بار، ءبىرشاما بىتىراڭقى قونىستانعان، قىستاق تۇرعىندارىنىڭ ءىس بىتىرۋىنە قولايلىلىق جاساۋ ءۇشىن، قىستاق تۇرعىندار كوميتەتى، قىزمەت اترەتى ءبىرشاما شالعاي بىرنەشە قىستاق تۇرعىندارى گرۋپپاسىندا پارتيا قۇرىلىسى شاعىن بەكەتىن قۇرىپ، قىستاق تۇرعىندارىنىڭ ءىس ءبىتىرۋ قاجەتىن ءبىر ارادا شەشتى.
پارتيا قۇرىلىسى شاعىن بەكەتىنەن شىققاننان كەيىن، ”شاعىن پويەز“ ءتىلشىنى الىپ ۋاقۋاق قىستاعى ساياحاتشىلار ورتالىعىنا كەلدى، ساياحاتشىلار ورتالىعىنىڭ ماڭدايشالىعىنا جەكە - جەكە ءونىم ورتالىعى، ساياحاتشىلاردى قابىلداۋ ورتالىعى، ەلەكتروندى ساۋدا تىكە تاراتۋ ورتالىعى سىندى 3 تاقتا اسىلىپتى.
ادەمى جاسالعان ءساندى اتكريتكالار، قىستاق تۇرعىندارىنىڭ وزدەرى جاساعان قولونەر بۇيىمدارى ساياحاتشىلاردى قابىلداۋ ورتالىعىنىڭ سورەسىنە تولتىرا تىزىلگەن، ءاربىر مادەنيەت جاسامپازدىعى ونىمدەرىنىڭ بارلىعىندا ۋاقۋاق قىستاعىنىڭ وزىندىك ەرەكشەلىگى ايگىلەنگەن.
شي كىۋي بىلاي دەدى: بۇل ارا قىستاققا كىرەتىن باستى جول تورابى، ىلگەرى بوس تۇرعان جەر بولاتىن. ۋاقۋاق قىستاعى اتۇش قالاسىنان 3 كيلومەتر قاشىقتىقتا عانا، اپتا سوڭىندا كوپتەگەن قالا تۇرعىندارى قىستاققا ساياحاتتاي كەلەدى. قىستاقتا شەبەرلەر تولىپ جاتىر، ءتۇرلى ءدامدى تاعام جاساپ قانا قويماي، تاعى قولدان جاسالعان قوي مايى سابىنى، مۇزداتقىشقا جاپسىرعىش سياقتى قولونەر بۇيىمدارىن دا جاساپ شىعارادى. قىستاق ساياحاتشىلار ورتالىعىن قۇرىپ، قىستاق تۇرعىندارى جاساعان قولونەر بۇيىمدارىن ساتادى. وسى مادەنيەت جاسامپازدىعى ونىمدەرىنىڭ ءوتىمى وسىنشاما تەز بولادى دەپ ويلاماعان ەدىك، ۋاقۋاق قىستاعىنىڭ پوچتا بەكەتى اتكريتكاسى تيانشان الابىنا، پوچتامەن بۇكىل ەلدىڭ جەر - جەرىنە جونەلتىلىپ جاتادى.
”2021 - جىلى قىستاعىمىز 3000عا تاياۋ ساياحاتشى قابىلدادى، تەك اتكريتكانىڭ وزىنەن 1000عا تاياۋى ساتىلدى“، - دەدى ۋاقۋاق قىستاعى ساياحاتشىلاردى قابىلداۋ ورتالىعىنىڭ جاۋاپتىسى راميلا ياقۇپ، - ۋاقۋاق قىستاعىنداعى ەستەمەنىڭ كۋاسى اتكريتكالار ءتىپتى دە كوپ ادامداردىڭ وسى كورىكتى قىستاقتى ەستە ساقتاۋىنا مۇمكىندىك جاسادى.
