انار بۇلت ＼ شينجياڭ گازەتىنىڭ تىلشىلەرى شيە حۇيبيان، ميھىرگۇل عوپۇر 5 - ايدىڭ 16 - كۇنى ۇرىمجىدەن حابارلايدى. 5 - ايدىڭ 16 - كۇنى شينجياڭ قوعامدىق عىلىمداردى جالپىلاستىرۋ اپتالىعى قيمىلى ءۇرىمجى مادەنيەت ورتالىعىندا باستالدى. وسى رەتكى قيمىل ينتەرنەت جەلىسى مەن ينتەرنەت جەلىسىنەن تىسقارىنى ءوزارا ۇشتاستىرۋ ءتاسىلى ارقىلى وتكىزىلدى، قيمىل ءبىر اپتاعا جالعاسادى، نەگىزگى تاقىرىپتىق كورمە، كلاسسيكالىق شىعارمالاردى داۋىستاپ وقۋ سياقتى 10 ءىرى قيمىل وتكىزىلەدى.
قيمىل كەزىندە ”جۇڭحۋا ۇلتى ورتاق تۇلعا تانىمىن بەرىك ورناتۋ: ءبىر تامىر، ءبىر ارمان، جۇڭگو اۋىل ءومىرى − مەملەكەتتىك شارۋالار سۋرەتى بىرلەسكەن كورمەسى“ جانە ”كوركەمدىكتى ورتاقتاسۋ − ’ءبىر بەلدەۋ، ءبىر جول‘ بويىنداعى ەلدەردىڭ ويما سۋرەت ۇسىنىس كورمەسى“ سىندى ەكى ۇلكەن تاقىرىپتىق كورمە قاتار اشىلىپ، كورەرمەندەردى ايرىقشا باۋرادى.
مەملەكەتتىك شارۋالار سۋرەتى بىرلەسكەن كورمەسى شينجياڭنىڭ ماكىت اۋدانى، اۋات اۋدانى، شاپشال سىبە اۆتونوميالى اۋدانى، سونداي - اق شانشي، گۋاڭدۇڭ، نانجيڭ، شاڭحاي، جىجياڭ سياقتى بۇكىل ەلدىڭ جەر - جەرىنەن كەلگەن 120دان استام شارۋالار سۋرەتىنىڭ ۋاكىلدىك تۋىندىلارىن شوعىرلى تۇردە كورسەتتى، بۇل كەدەيلىكتەن ارىلتۋدان قامال الۋ، اۋىل - قىستاقتى گۇلدەندىرۋ، ۇلتتار ىنتىماعى، ەتەنە سۇيىسپەنشىلىك سياقتى جاقتارداعى مازمۇنداردى قامتيدى. ”ءبىر بەلدەۋ، ءبىر جول“ بويىنداعى ەلدەردىڭ ويما سۋرەت ۇسىنىس كورمەسىندە جۇڭگو، لاتوۆيا، ەگيپەت، بەلورۋسسيا سياقتى 26 مەملەكەتتەن كەلگەن 76 كوركەمونەرشىنىڭ 229 ويما سۋرەت تۋىندىسى شوعىرلى كورسەتىلدى، مۇنىڭ ىشىندە ”ويانعان جىلداردى“ قامتىعان 100 ويما سۋرەت تۋىندى بار.
”مەملەكەتتىك شارۋالار سۋرەتى بىرلەسكەن كورمەسى كوركەمونەرلىك فورما ارقىلى شارۋالاردىڭ تۇرمىس كۇيىن ايگىلەپ، ادامدارعا تەرەڭ اسەر قالدىردى. اسىرەسە، شينجياڭنىڭ كەيبىر تۋىندىلارى بىزگە وڭتۇستىك شينجياڭ حالقىنىڭ تۇرمىسىن اناعۇرلىم ويداعىداي ءتۇسىندىردى“، - دەدى ەكسكۋرسيالاۋشى ليۋ ليڭليڭ.
ۇعىسۋعا قاراعاندا، بيىلعى شينجياڭ قوعامدىق عىلىمدارىن جالپىلاستىرۋ اپتالىعى قيمىلى ”ورتاق رۋحاني مەكەن قۇرۋدى“ نەگىزگى تاقىرىپ ەتىپ، نەگىزگى تاقىرىپتىق كورمەدەن سىرت، ”شينجياڭ ۇيعۇر اۆتونوميالى رايونىنىڭ قوعامدىق عىلىمداردى جالپىلاستىرۋ ەرەجەسىن“ ۇيرەنۋ، ۇگىتتەۋ، دايەكتىلەندىرۋ جونىندەگى اڭگىمە، اۋىس - كۇيىس جاساۋ ءماجىلىسى، ”4 - كەزەكتى قوعامدىق عىلىمدار كەشى كلاسسيكالىق شىعارمالاردى داۋىستاپ وقۋ جينالىسى“، ”جۇڭگو جاستار قوزعالىسىنىڭ تاريحى شينجياڭ كورمەسى“ قاتارلى 10 ءتۇرلى قيمىلدى ىركەس - تىركەس ورىستەتەدى ەكەن.
اۆتونوميالى رايوندىق قوعامدىق عىلىمدار بىرلەستىگى عىلىم جالپىلاستىرۋ ءبولىمىنىڭ باستىعى ليۋ جين بىلاي دەدى: ”قوعامدىق عىلىمداردى جالپىلاستىرۋ اپتالىعى قيمىلى بۇقارا ۇناتاتىن فورمالار ارقىلى ماركسيزمنىڭ بۇقارالانىپ تارالۋىن ىلگەرىلەتىپ، جاڭا داۋىردەگى پارتيانىڭ جاسامپاز نازارياسىنىڭ ’قاراپايىم بۇقارانىڭ وتباسىنا جەتۋىنە‘ مۇمكىندىك جاساپ، شينجياڭنىڭ جوعارى ساپالى دامۋىنا قوعامدىق عىلىمنىڭ كۇش - قۋاتىن ارنايدى“.
ءتىلشىنىڭ ۇعىسۋىنشا، شينجياڭدا قوعامدىق عىلىمداردى جالپىلاستىرۋ اپتالىعى قيمىلى 2018 - جىلى باستالعاننان بەرى ءۇرتىس 5 كەزەك وتكىزىلگەن.
