− شينجياڭعا مەديتسينالىق جاقتان كومەكتەسۋدىڭ سۇبەلى ناتيجەسى كورىندى
5 - ايدىڭ 17 - كۇنى، حيلۇڭجياڭنىڭ مەديتسينالىق تەحنيكا جاقتان شينجياڭعا كومەكتەسۋى تاعى ءبىر ناتيجە جاراتتى − التاي ايماعى كوكتوعاي اۋداندىق حالىق شيپاحاناسىنىڭ تۇتىكشە كىرگىزىپ ەمدەۋ ءبولىمى رەسمي ىسكە قوسىلدى.
ۇعىسۋعا قاراعاندا، بۇرىن كوكتوعاي اۋدانىنداعى ايدارشا ارتەرياسى قاتايۋدان بولعان جۇرەك اۋرۋىنا شالدىققان ناۋقاستار التاي قالاسىنداعى نەمەسە ءۇرىمجى قالاسىنداعى شيپاحانالارعا جوتكەلىپ ەمدەلەتىن، ساپاردىڭ الىستىعى ناۋقاستاردىڭ باسقا شيپاحاناعا جوتكەلۋدەگى حاۋىپ - قاتەرىن ارتتىرۋمەن بىرگە، ناۋقاستاردىڭ تاماقتانۋ، جاتىن ورىن، ءجۇرىس - تۇرىس جاقتاعى ءتۇرلى شىعىندارىن كوبەيتەدى ەكەن.
حيلۇڭجياڭ ولكەسىنىڭ 4 - توپتاعى مەديتسينا دارىندىلارى شينجياڭعا كەلگەننەن بەرى، حيلۇڭجياڭ ولكەسىنىڭ شينجياڭعا كومەكتەسۋ العى شەپ قولباسشىلىق شتابى كوكتوعاي اۋدانىنىڭ مەديتسينا ىستەرىن دامىتۋعا بەلسەندى قولداۋ كورسەتىپ، تۇتىكشە كىرگىزىپ ەمدەۋ ءبولىمىن قۇرۋ ءۇشىن، شينجياڭعا ىلگەرىندى - كەيىندى 3 رەت يكەمدى جولمەن كومەكتەسۋ فورماسىمەن، جيامۋسى قالالىق ورتالىق شيپاحاناسى جۇرەك قان تامىر اۋرۋلارى ءبولىمىنىڭ تەتە اعا شيپاگەرى چىڭ ليندى شينجياڭعا كەلىپ ەمدەۋ تەحنيكاسىنا جەتەكشىلىك ەتۋگە جانە جۇرەك قان تامىر اۋرۋلارى ارناۋلى ماماندار ءبولىمىن قۇرۋعا ۇسىنىس ەتىپ، كوكتوعاي اۋداندىق حالىق شيپاحاناسى تۇتىكشە كىرگىزىپ ەمدەۋ ءبولىمىنىڭ قۇرىلىسىنا جان - جاقتى تەحنيكالىق تىرەك ازىرلەدى.
تۇتىكشە كىرگىزىپ ەمدەۋ ءبولىمى قۇرىلعاننان كەيىن، جەرگىلىكتى ورىننىڭ ايدارشا ارتەرياسى قاتايعان جۇرەك ناۋقاستارى كوكتوعاي اۋداندىق حالىق شيپاحاناسىندا دەر كەزىندە ەمدەلىپ، 3A دارەجەلى شيپاحاناسىنان شينجياڭعا كومەككە كەلگەن مامانعا دياگنوز قويدىرىپ، ەمدەلە الاتىن بولدى. 5 - ايدىڭ 10 - كۇنى تۇتىك ءبولىمى سىناق رەتىندە ىسكە قوسىلعاننان بەرى، ءبىر اپتانىڭ ىشىندە - اق 18 وپەراتسيا جاسالدى، مۇنىڭ ىشىندە، 12سى ايدارشا ارتەريانى سۋرەتكە ءتۇسىرۋ، تورتەۋى جۇرەك قان تامىرىنا تىرەۋ قويۋ وپەراتسياسى، بىرەۋى جۇرەك بۇلشىق ەتىنىڭ شۇعىل تۇيىلۋىنە قاراتا ايدارشا ارتەريانى ترومبوليتيكالىق ەمدەۋ جانە جۇرەك قان تامىرىنا تىرەۋ قويۋ وپەراتسياسى، ەندى ءبىرى ايدارشا ارتەرياداعى قان اينالىسىنىڭ ىركىلۋ ساندى مالىمەتىن（FFR） ولشەۋ. وسى تۇتىكشە كىرگىزىپ ەمدەۋ ءبولىمىنىڭ قۇرىلۋىمەن، كوكتوعايدىڭ اۋدان دارەجەلى شيپاحاناسىنىڭ جالپى مەديتسينا دەڭگەيى مەن كەشەندى قابىلەتى زور دارەجەدە جوعارىلادى، بۇل كوكتوعاي اۋداندىق حالىق شيپاحاناسىنىڭ ينتەرۆەنسيالىق ەمدەۋىنىڭ جاڭا داۋىرگە قادام باسقانىنىڭ بەلگىسى.
(ەرىكتى ءتىلشى اقىل)
