تيانشان تورى
تيانشان تورى   ›   جاڭالىقتار   ›   ەل ءىشى حابارى

باس شۋجيدىڭ تاپسىرماسى بىزگە قيىنشىلىقتى جەڭۋ سەنىمىن بەردى

  □ شينحۋا اگەنتتىگىنىڭ تىلشىلەرى شياڭ جىچياڭ، حۋاڭ حاۋميڭ

  2020 - جىلى 5 - ايدا گۋاڭشي حۋانجياڭ ماۋنان اۆتونوميالى اۋدانىنىڭ ماۋنان ۇلتى بۇقارا ۋاكىلى باس شۋجي شي جينپيڭگە حات جازىپ، جەرگىلىكتى ماۋنان ۇلتىنىڭ كەدەيلىكتەن ارىلعان قۋانىشتى كوڭىل كۇيىنەن مالىمەت بەردى. وسىدان كەيىن باس شۋجي شي جينپيڭ ماۋنان ۇلتىنىڭ تۇتاس ۇلت بويىنشا كەدەيلىكتەن ارىلۋدى جۇزەگە اسىرعاندىعى جونىندە ماڭىزدى نۇسقاۋ بەردى. تاياۋدا شينحۋا اگەنتتىگىنىڭ تىلشىلەرى وتكەندە باس شۋجيگە حات جازعان بۇقارا ۋاكىلى تان مەيچۇنمەن قايتالاي سۇحباتتاستى، تومەندەگى مازمۇن ونىڭ ءوز اۋزىمەن بايانداعان جۇرەك ءسوزى −

  2 جىلدىڭ الدىنداعى 5 - اي، ماۋنان ۇلتىنان قۇرام تاپقان بىرنەشە اۋىلداستارمەن بىرگە ومىرىمدەگى ەڭ ۇزاق جازىلعان، ەڭ ۇزاققا جولدانعان حاتتى جازدىق، حات تاپسىرىپ الۋشى باس شۋجي شي جينپيڭ ەدى.

  ءبىز باس شۋجيگە كوڭىلىمىزدەگى قۋانىش پەن العىس سەزىمىمىزدى ايتۋعا اسىقتىق: پارتيا مەن ۇكىمەتتىڭ كومەكتەسىپ - سۇيەمەلدەۋىندە جان سانى ءبىرشاما از سانالاتىن ۇلتىمىز تۇتاس ۇلت بويىنشا كەدەيلىكتەن ارىلدى!

  ”ماۋنان ۇلتىنىڭ تۇتاس ۇلت بويىنشا كەدەيلىكتەن ارىلعاندىعىن، اۋىلداستاردىڭ تۇرمىسىنىڭ كورنەكتى جاقسارعاندىعىن ءبىلىپ قاباعات قۋاندىم“ − حات جولدانىپ، كوپ وتپەي باس شۋجي ماڭىزدى نۇسقاۋ بەردى.

  بۇل حاباردى ەستىپ ەرەكشە قۋاندىم. ءبىز قىستاقتىڭ كىرە بەرىسىندەگى ۇلكەن فيكۋس اعاشىنىڭ استىنا جينالىپ، ماۋنان تىلىندەگى ”پارتيانىڭ مەيىرىنە ون العىس“ دەگەن ءاندى شىرقاپ وتىرمىز: «سازان بالىق سۋدا جۇزسە سۋ تۇنىق، ايعا سەرىك بولسا جۇلدىز، اي كەتەدى قۇلپىرىپ، بالداي ءتاتتى تۇرمىسقا ءبىز بولەندىك، پارتيانىڭ مەيىرىنە العىسىمىز تۇر تۇنىپ...».

  سۋ ىشكەندە قۇدىق قازۋشىنى ۇمىتپاۋ كەرەك. اسىلىندە مەن ءبىر كەدەي وتباسى ەدىم، كەدەيلىكتەن ارىلتۋ ساياساتىنىڭ قولداۋى مەن كەدەيلەردى سۇيەمەلدەۋ كادرلارىنىڭ كومەكتەسىپ - سۇيەمەلدەۋىندە، اپەلسين ەگىمشىلىگىن دامىتۋ ارقىلى 2016 - جىلى كەدەيلىكتەن ارىلدىم. كاسىپ سالاسى ارقىلى اۋقاتتانۋدىڭ پايداسىن كورگەننەن كەيىن، مەن 14 كەدەي وتباسىن قامتىعان 22 بۇقارانى باستاپ، سەلبەستىك كووپەراتيۆىن قۇردىم، وسى ارقىلى قىستاقتاعى بايۋعا باستاۋدىڭ باستاماشىسىنا اينالدىم. 2019 - جىلدىڭ سوڭىندا وسى 14 كەدەي وتباسى تۇگەلدەي كەدەيلىكتەن ارىلدى. تۇرمىسىمدا وسىنشاما زور وزگەرىستىڭ بولارى ءۇش ۇيىقتاسام دا تۇسىمە كىرمەگەن ەدى.

  باس شۋجي نۇسقاۋىندا بىلاي دەپ باسا دارىپتەدى: اۋىلداستاردىڭ كەدەيلىكتەن ارىلۋدى اناعۇرلىم كوركەم دە تىڭ تۇرمىسقا تالپىنۋدىڭ تىڭ باستاماسى ەتىپ، كۇش ۇستىنە كۇش قوسىپ، ۇزدىكسىز كۇرەس جۇرگىزىپ، تۇرمىستارىن بارعان سايىن شالقىتا ءتۇسۋىن ءۇمىت ەتەمىن. وسى 2 جىلدا ءبىز باس شۋجيدىڭ تاپسىرماسىن ەستە بەرىك ساقتاپ، قاجىماي - تالماي قۇلشىنىپ، ءار جاقتا تىڭ ىلگەرىلەۋشىلىكتەرگە قول جەتكىزدىك.

  اپەلسين ەگىمشىلىگىنىڭ كوپشىلىكتىڭ قالتاسىن قامپايتۋى بىزدەگى ەڭ ۇلكەن وزگەرىس ەدى. اپەلسيننىڭ ساپاسىن جوعارىلاتۋ ءۇشىن، اۋدان بىزگە ۇنەمى اۋىل شارۋاشىلىعى تەحنيك - ماماندارىن اتىز باسىنا كەلىپ بىزگە ەگىمشىلىك تەحنيكاسىن ۇيرەتۋگە جىبەردى، مۇنىمەن قويماي، ءبىزدى سىرتقا ۇيرەنۋگە جىبەرىپ، ساۋداگەرلەرمەن ءتۇيىلىستىرىپ، ساتۋ ارناسىن كەڭەيتتى. تەحنيكا يگەرىپ، وي - ءورىسىمىز كەڭەيگەننەن كەيىن ساۋدا - ساتتىق كوزقاراسىمىزدا دا وزگەرىستەر تۋىلدى.

  كاسىپ سالاسىن دامىتۋ بارىسىندا ءبىز دە قيىنشىلىققا تاپ بولدىق. مىسالى، ماۋنانشان اۋىلىنىڭ جەرى ادىرلى، سۋى تاپشى، ەگىستىك جەرى از بولعاندىقتان، اپەلسين ەگىمشىلىگى دامىپ بەلگىلى كولەمگە جەتكەننەن كەيىن، ونى تاعى دا كەڭەيتۋ ءبىرشاما قيىنعا سوقتى؛ تاعى ءبىر مىسال، اپەلسين باعاسىنىڭ تولقۋىنىڭ زور بولۋى بۇقارانى الاڭداتتى.

  باس شۋجيدىڭ تاپسىرماسى بىزگە قيىنشىلىقتى جەڭۋ باتىلدىعىن سيلادى. مەن اپەلسين ساتۋدىڭ قيىن بولۋ سەبەبىنە ەگجەي - تەگجەيلى تالداۋ جاسادىم، اسىلىندە باعانىڭ ورلەمەۋىنىڭ باستى سەبەبى ءار جىلدىڭ سول مەزگىلىندە قىرۋار اپەلسين شوعىرلى تۇردە بازارعا شىعارىلاتىندىقتان، بىزدە باسەكەلىك باسىمدىق جوق ەدى. مەن اپەلسيندى كۇنى بۇرىن بازارعا شىعارىپ، قاۋىرت مەزگىلگە شوعىرلاندىرماي ساتۋدى جۇزەگە اسىرا الۋ - الماۋ جاعىن ويلاستىردىم. مەن تاعى تالاي رەت اۋدانداعى اپەلسين كاسىپ سالاسىنىڭ وزەكتى ۇلگى رايونىنا بارىپ تاجىريبە قابىلداپ، ”قۇپيالىقتى“ يگەرگەننەن كەيىن قايتىپ كەلىپ امالياتتان وتكىزدىم.

  مەن ءوزىمنىڭ 120 مۋدان استام اپەلسين باعىمدا الدىمەن سىناق جاسادىم، بيىل جاڭا جىلدا وسى اپەلسيندەر جارتى اي بۇرىن بازارعا شىعارىلدى، ءار جىڭىنىڭ باعاسى بىلتىرعىدان ءبىر يۋاننان ارتىق قىمبات بولا تۇرسا دا، ساۋداگەرلەر تۇك قالدىرماي تالاسا - تارماسا ساتىپ الىپ كەتتى. قىپ - قىزىل اپەلسين سولتۇستىككە تاسىمالدايتىن جۇك اۆتوموبيلىنە تيەلگەندە، جۇرەگىم جىلىپ سالا بەردى. قازىر بۇل ۇلگى تۇتاس سەلبەستىك كووپەراتيۆىنە جالپىلاستىرىلىپ، كوپشىلىك بىرگە ۇجىمداسىپ دامىدى.

  چاڭجياڭدى قورشاعان كارستتى جەر بەدەرى − دۇنيە جۇزىلىك جاراتىلىستىق مۇرا، كوپتەگەن ادامدار ءبىزدىڭ بۇل جەرىمىزدى تاۋى كوركەم، سۋى تۇنىق، ”اۋليەلەر قونىستانعان جەر“ دەيدى، الايدا بۇل جەر بۇرىن كەدەي ءوڭىر بولاتىن. قازىر اپەلسين، جىبەك قۇرتى، شياڭجۋ، ۇن شاي سياقتى ەرەكشە كاسىپتەر ماۋنانشان اۋىلىنىڭ بار الابىندا شەشەك اتتى.

  مەن باس شۋجيگە تۇرمىسىمىز، ءسوز جوق، قىپ - قىزىل اپەلسين سياقتى بارعان سايىن ءتاتتى بولا تۇسەدى، بارعان سايىن شالقي تۇسەدى دەگىم كەلەدى.

  (شينحۋا اگەنتتىگىنىڭ 5 - ايدىڭ 22 - كۇنى ناننيڭنەن بەرگەن حابارى)

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.