ماشينامەن تەرىلەتىن ماقتا ساپاسىن زور مولشەردە جوعارىلاتۋعا بولادى
انار بۇلت \ شينجياڭ گازەتىنىڭ ءتىلشىسى ۋاڭ يۇڭفي 5 - ايدىڭ 29 - كۇنى ۇرىمجىدەن حابارلايدى. 5 - ايدىڭ 27 - كۇنى شينجياڭ اۋىل شارۋاشىلىعى عىلىم اكادەمياسى ەكونوميكالىق داقىل زەرتتەۋ ورنىنىڭ اعا زەرتتەۋشىسى تيان لي - ۋىننىڭ ۇجىمى 2 مەملەكەتتىك تاپقىرلىق پاتەنت كۋالىگىن تاپسىرىپ الدى. اتالعان 2 پاتەنت تەحنيكاسى شينجياڭنىڭ ماشينامەن تەرىلەتىن ماقتاسىنىڭ تالشىعىنىڭ ۇزىندىعى، سالىستىرمالى قاتتىلىعى، رەتتىلىگى سياقتى شەشۋشى كورسەتكىشتەردە ساپالى ماقتا ولشەمىنە جەتۋگە شىنايى كەپىلدىك ەتىپ قانا قويماي، شينجياڭدا ماقتانى ماشينامەن تەرۋدەگى سۋلياۋ جارعاقتىڭ لاستاۋى سىندى كونە، اۋىر، قيىن ماسەلەنى شەشىپ، شينجياڭنىڭ ماشينامەن تەرىلەتىن ماقتا ساپاسىن زور مولشەردە جوعارىلاتتى.
اتالعان 2 تەحنيكا − ”شينجياڭنىڭ ماشينامەن تەرىلەتىن جوعارى ساپالى ماقتاسىنىڭ ءبىر ءتۇرلى ءوندىرىس ءتاسىلى“ جانە ”ماشينامەن تەرىلەتىن ماقتانى شيكىزات ەتكەن سۋلياۋ جارعاقپەن لاستانباعان ماقتا ءجىپ ءوندىرۋ ءتاسىلى“، قازىرگى تاڭدا جىل سايىن 20 ميلليون مۋدان استام جەردە پايدالانىلىپ وتىر. ەلىمىزدىڭ تانىمالى ماقتا مامانى ماۋ شۋچۇن: وسى 2 پاتەنتتى كاسىپ سالاسى شينجياڭنىڭ ماشينامەن تەرىلەتىن ماقتا وندىرىسىندەگى كەلەلى تەحنيكالىق تاپقىرلىق دەپ مويىنداپ وتىر، - دەدى.
شينجياڭنىڭ ماشينامەن تەرىلەتىن ماقتاسىنىڭ جاپىراعى، ماقتا قابىعى، ساباعى سياقتى كىرمە زات ءبىرشاما كوپ بولۋ جانە ماقتا تازالاۋ بارىسىندا ماشينانىڭ زاقىمدالۋى سالدارىنان ماقتا تالشىعىنىڭ ۇزىندىعى مەن بەرىكتىگى كورنەكتى تومەندەۋ سياقتى ماسەلەگە قاراتا، تيان لي - ۋىن ۇجىمى ماقتا سورتى، ءتۇپ قاتارى، سۋلياۋ جارعاق، تەز جەتىلدىرۋ ءدارىسى، ماقتا تەرۋ ۋاقىتى جانە وڭدەۋ تەحنولوگياسىن تاڭداۋ نەمەسە بەلگىلەۋ سياقتى بۋىنداردى ساپالىلاندىرىپ جوبالاپ، شينجياڭنىڭ ماشينامەن تەرىلەتىن ماقتاسىنىڭ ءوندىرىس ءتاسىلىن زەرتتەپ اشتى.
2018 - جىلى تيان لي - ۋىن ۇجىمى وڭتۇستىك - سولتۇستىك شينجياڭداعى نەگىزگى ماقتا ەگىلەتىن اۋدانداردا تاجىريبە جاساپ، ۇلگى كورسەتتى. ناتيجەدە وسى تاسىلدەن پايدالانىپ وندىرگەن تازا ماقتانىڭ وزگە تاسىلمەن وندىرىلگەن تازا ماقتامەن سالىستىرعاندا، تالشىق ۇزىندىعى، سالىستىرمالى بەرىكتىگى جانە رەتتىلىگى تۇگەلدەي كورنەكتى جوعارىلاپ، وزگە تۇردەگى تالشىق، كىرمە زات كورنەكتى تومەندەگەنىن كورسەتتى.
ىشكى ساپاسىن جوعارىلاتقان سوڭ، سۋلياۋ جارعاقتىڭ لاستاۋى سالدارىنان شينجياڭنىڭ ماشينامەن تەرىلەتىن ماقتاسىنىڭ يىرىلگىشتىگى تومەندەپ كەتۋ ماسەلەسىن شەشۋ كەرەك. ”ماقتا ءجىپ قالدىق سۋلياۋ جارعاقتىڭ ىقپالىنا ۇشىراپ، ءۇزىلىپ قالۋ سالىستىرماسىنىڭ ارتۋىنا، ماقتا تۇيىنشەگى مەن كىرمە زاتتىڭ كوبەيۋىنە اپارىپ سوقتىرىپ، يىرگەن ءجىپتىڭ بەرىكتىگىنە تىكەلەي ىقپال جاسايدى؛ قالدىق سۋلياۋ جارعاق كەزدەمە ماتەريالىنا ارالاسىپ كەتسە، كەزدەمەدە داقتاردىڭ كوبەيۋىنە، بوياۋدىڭ بىركەلگى بولماۋىنا، ءتىپتى، اق تەڭبىلدىڭ پايدا بولۋىنا اپارىپ سوقتىرادى“، - دەدى تيان لي - ۋىن. سوندىقتان، تيان لي - ۋىن ۇجىمى ماقتا ەگۋ، جيناۋ - تەرۋ، ءشيتتى ماقتا وڭدەۋ، ماقتا ءجىپ شيكىزاتىن سۇرىپتاۋ جانە ءجىپ ءيىرۋدىڭ ءارقايسى بۋىندارىن ساپالىلاندىرىپ جوبالاپ، ماشينامەن تەرىلەتىن ماقتانى شيكىزات ەتكەن سۋلياۋ جارعاقتان لاستانباعان ماقتا ءجىپ ءوندىرۋ ءادىسىن تاۋىپ شىقتى. 2016 - جىلدان 2017 - جىلعا دەيىن، تيان لي - ۋىن ۇجىمى شينجياڭ ياگىر اۋىل شارۋاشىلىعى عىلىم - تەحنيكاسى جارنا شەكتى سەرىكتەستىگىندە، سونداي - اق ونىمەن سەلبەسكەن كاسىپورىنداردا، ماقتا ەگىمشىلىگى بازاسىندا تاجىريبە جاساپ، ۇلگى كورسەتتى. ناتيجەدە وسى ادىستەن پايدالانىپ ەككەن، جيناپ - تەرگەن جانە وڭدەگەن ماشينامەن تەرىلەتىن ماقتادا تازا ماقتانىڭ بوگدە تالشىق قۇرامى، سۋلياۋ جارعاق قۇرامى جانە تۇيدەك سانى تۇگەلدەي زور مولشەردە تومەندەگەن؛ ماقتا جىبىنەن كەزدەمە توقىعان سوڭ، رەڭىنىڭ بىركەلكى بولماۋ، رەڭدى داق جانە اق تەڭبىل پايدا بولۋ جاعدايى بايقالماعان.
”وسى تەحنيكادان پايدالانىپ وندىرگەن ماقتا جىپتەن توقىلعان كەزدەمەدە، ءار 20 كيلوگرام كەزدەمەدە بوگدە تالشىقتىڭ قالدىعى 15تەن تومەن بولىپ، جوعارى دەڭگەيلى الارمانداردىڭ ماقتا جىبىنە دەگەن تالابىنان اسىپ ءتۇستى“، - دەدى اقسۋ شينحاۋ توقىماشىلىق شەكتى سەرىكتەستىگىنىڭ ورىنباسار باس ديرەكتورى ۋاڭ جۇن.
