انار بۇلت \ شينجياڭ گازەتىنىڭ ءتىلشىسى يۇي شي 6 - ايدىڭ 2 - كۇنى ۇرىمجىدەن حابارلايدى. تاعى ءبىر جىلدىڭ دۋان - ۋ مەرەكەسى كەلىپ جەتتى، رايونىمىزدىڭ جەر - جەرى ىندەتتەن ساقتانۋ - تىزگىندەۋدىڭ ءتۇرلى شارالارىن زاڭ بويىنشا، عىلمي، دالمە - ءدال تياناقتاندىرۋ العى شارتى استىندا ءوندىرۋ مەن ساتۋدى ۇشتاستىرۋدى كۇشەيتىپ، ءوندىرىستى ورنالاستىرۋ، زات اينالىمى، تاسىمال جانە اقىرعى ساتىلۋ سياقتى ءارقايسى بۋىندار قىزمەتىن ويداعىداي ىستەگەندىكتەن، مەرەكە كۇندەرىندە بازاردا زات مول، باعا تۇراقتى بولىپ، ساتۋ مەن ساتىپ الۋ تەڭ جانداندى.
شينجياڭ دوستىق (توبى) جارنا شەكتى سەرىكتەستىگىنىڭ دوستىق ساۋدا سارايى الۋان ءتۇرلى باعا ءتۇسىرىپ ساتۋ، ساتىپ السا سيلىق بەرۋ، توتەنشە ارزانعا ساتۋ سياقتى ارزانداتۋ شارالارىن قولدانىپ، مەرەكەلىك تۇتىنۋدىڭ قىزۋ ورلەۋىن كوتەردى. دوستىق ساۋدا سارايىنىڭ ەرەن بازارى ەرتە باستان قياق كۇرىش ساتۋ ارناۋلى اۋماعىن قۇرىپ، قانتتالعان شىلان قوسىلعان قياق كۇرىش، باباۋ قياق كۇرىشى سياقتى دورباعا سالىپ دايىندالعان، سالەمدەمە قورابىنا سالىنعان قياق كۇرىشتەردى سورەگە ءتىزىپ تاستادى. ءتىلشى ەرەن بازاردا جاڭا جەمىس - جيدەك، كوكونىس، سيىر - قوي ەتى، سۋ ونىمدەرى تولىپ تۇرعاندىعىن بايقادى.
شينجياڭ جيۋديڭ اۋىل شارۋاشىلىق ونىمدەرىن تولايىم ساتۋ ساۋدا بازارى بۇكىل شينجياڭدى جەمىس - جيدەك، كوكونىسپەن قامداۋ اۋىر مىندەتىن ارقالاپ وتىر. وسى 2 كۇندە تولتىرا زات تيەلگەن اۆتوكولىكتەر قاتاڭ زارارسىزداندىرۋدان وتكەننەن كەيىن، تارتىپپەن بازارعا كىرىپ - شىعىپ جاتتى. دۋان - ۋ مەرەكەسىندەگى زات ساتىپ الۋ ورلەۋىن قارسى الۋ ءۇشىن، ساۋداگەرلەر ەرتە باستان زات دايىندادى، بازاردا جەمىس - جيدەكتەر مەن كوكونىستەردىڭ ءتۇرى مول بولىپ، كۇندىك قامداۋ مولشەرى 10 مىڭ توننادان استى، باعاسى جالپى تۇلعادان العاندا ورنىقتى تومەندەدى.
ءبىر اپتانىڭ الدىندا - اق شيحۋ قالاسىنىڭ ءارقايسى ەرەن بازارلارىندا، اۋىل شارۋاشىلىق ونىمدەر بازارىندا زاتتار جەتكىلىكتى دايىندالعان بولىپ، مەرەكە كەزىندە تاۋارمەن قامداۋ مولشەرى جايشىلىقتاعىدان 3 − 5 ەسە ارتتى. ”ءبىز ساپا وتكەلىن مىقتى يگەرىپ، شيحۋدىڭ ءوز كوكونىستەرىن تومەن باعادا تىكە ساتۋعا شىعاردىق“، - دەيدى شيحۋ قالاسىنداعى لوۋلوۋ ەرەن بازارى شينفۋيۋان دۇكەنىنىڭ دۇكەنباسى ۋاڭ يىڭ.
اقسۋ قالاسى ءتۇيىندى ساۋدا - ساتتىقتى ىركىلىسسىزدەندىرۋ سالاسىنىڭ مەرەكە كەزىندە زاتپەن قامداۋى جونىندەگى ارناۋلى تاقىرىپتىق سايكەستىرۋ جيىنىن تالاي رەت ۇيىمداستىرىپ اشىپ، ساۋداگەرلەردى زات قاينارىن شوعىرلاندىرىپ، زات مولشەرىن كوبەيتۋگە ۇندەدى. شايار اۋدانى بازار اينالىمىنا تالداۋ جۇرگىزىپ جولداۋ ءتۇزىمىن اتقارىپ، بازاردىڭ ساتىپ الۋ، تاسىمالداۋ، زاپاس ساقتاۋ، ساتۋ ارنالارىن ىركىلىسسىزدەندىرىپ، استىق، ماي، جۇمىرتقا، ءسۇت، جەمىس - جيدەك، كوكونىس سياقتى ماڭىزدى تۇرمىستىق قاجەتتى بۇيىمدارمەن بازاردى قامداۋ قىزمەتىن ۇزدىكسىز ويداعىداي ىستەدى. بۇل اۋداننىڭ استىق - مايمەن قامداۋى جەتكىلىكتى، زاپاس ساقتاۋى ويداعىداي، باعاسى ورنىقتى بولۋدا. ءىشىنارا ساۋداگەرلەر تاعى دۋان - ۋ مەرەكەسىنە بايلانىستى مادەني جاسامپازدىق ونىمدەرىن بازارعا شىعارىپ، تۇتىنۋشىلاردىڭ قارسى الۋىنا بولەندى.
حاۋىپسىز، اقاۋسىز مەرەكەلىك تۇتىنۋ ورتاسىن جاراتۋ ءۇشىن، بۇكىل شينجياڭداعى ساۋدا ىستەرى جۇيەسى كوپتەگەن تاراۋلارمەن بىرلەسىپ، مەزگىلدىك ازىق - تۇلىك حاۋىپسىزدىگىن باقىلاپ - باسقارۋدى كۇشەيتتى، قياق كۇرىش، استىقتان مانەرلەنگەن ونىمدەر، سۋسىندار، ەت ونىمدەرى سياقتى مەزگىلدىك ازىق - تۇلىكتەر مەن مەرەكە كەزىندە تۇتىنۋ مولشەرى جوعارىلاعان ازىق - تۇلىكتەردى ءتۇيىندى تەكسەرىپ، ءار ۇلت بۇقاراسىنىڭ ”اس - سۋ حاۋىپسىزدىگىن“ بار كۇشپەن قورعادى.
