انار بۇلت \ شينجياڭ گازەتىنىڭ ءتىلشىسى ۋاڭ يۇڭفي 6 - ايدىڭ 3 - كۇنى ۇرىمجىدەن حابارلايدى. اۆتونوميالى رايوننىڭ 2022 - جىلعى جازعى استىق ساتىپ الۋ قىزمەتى جونىندەگى بەينە ەكران ماجىلىسىنەن ۇعىسۋىمىزشا، بيىل رايونىمىزدىڭ جازعى استىق باعاسىندا، ساتىپ الۋ مولشەرىندە ورنىقتىلىق بارىسىندا ارتۋ جاعدايى جارىققا شىققان. ”استىق جيۋعا ادام بولۋ، استىق جيۋعا اقشا بولۋ، استىق جيۋعا قامبا بولۋ، استىق تاسۋعا كولىك بولۋدى“ ارقاۋ ەتىپ، رايونىمىز قارجى توپتاۋ، قامبا بوساتىپ، قامبانى بىرىكتىرۋ، قامبانى بوس قالدىرىپ زارارسىزداندىرۋ، اسپاپتاردى تەكسەرۋ، ماشينا - جابدىقتاردى تەكسەرۋ - جوندەۋ جانە قىزمەتكەرلەردى باۋلۋ سياقتى دايىندىق قىزمەتتەردى تىڭعىلىقتى ىستەپ، شارۋالاردىڭ ەككەن استىعىن ساتا الۋىنا شىنايى كەپىلدىك ەتتى.
بيىل رايونىمىزدا ءبيداي ەگىلگەن جەر اۋدانى بىلتىرعىدان ءبىراز ارتىپ، جالپى ءونىم مولشەرىنىڭ 2021 - جىلدان جوعارى بولاتىندىعى مەجەلەنىپ وتىر. قازىر جالپىلىق اۋىل شارۋاشىلىعى، اۋىل - قىستاق سياقتى تاراۋلاردان يەلەگەن جاعدايدان العاندا بۇكىل رايونىمىزدا ءبيدايدىڭ ءوسۋ جاعدايى ويداعىداي بولعان، سوڭعى مەزگىلدە ەگەر جاراتىلىستىق اپات تۋىلماسا، ءبيدايدان تاعى دا مول ءونىم الۋدان ءۇمىت بار ەكەندىگى مەجەلەنۋدە.
2022 - جىل رايونىمىزدىڭ ءبيداي ساتىپ الۋ، ساقتاۋ ءتۇزىمى رەفورماسىنىڭ 5 - جىلى، 5 - ايدىڭ باسىنان بەرى، رايونىمىز بازارلاندىرۋ ۇستانىمىن بەرىك ورناتىپ، ءوندىرۋ، ساتىپ الۋ، ساقتاۋ، مانەرلەۋ، ساتۋ بۋىندارىن سايكەستى قامتاماسىز ەتۋدى كوزدە ۇستاپ، جازعى استىق ساتىپ الۋدىڭ ءتۇرلى دايىندىق قىزمەتتەرىن مۇقيات، ويداعىداي ىستەدى. بازار تۇلعالارىنىڭ بازارعا كىرۋ رۇقساتى جاعىندا بيىل وتكەن جىلى باستالعان بازارعا كىرۋ رۇقساتىن ەستەلىككە الۋ ءتۇزىمى جالعاستىرىلدى. قازىر رايونىمىزدا ەستەلىككە الىنعان استىق ساتىپ الۋ كاسىپورىندارى 450گە جەتتى. قازىرگە دەيىن بۇكىل رايوننىڭ جەر - جەرى 3 ميلليون 520 مىڭ توننا سيىمدىلىقتاعى استىق قامباسىن دايىندادى، بۇل بيىلعى جازعى استىق ساتىپ الۋ قامبا سيىمدىلىعىنىڭ جالپى قاجەتىن قاناعاتتاندىرا الادى. قازىر بۇكىل رايوندا ءبيدايدىڭ بازارداعى ورتاشا ساتىلۋ باعاسى ءار كيلوگرامى شامامەن 68. 2 يۋان بولىپ، بىلتىرعى سايكەس مەزگىلدەگىدەن ءار كيلوگرامى مولشەرمەن 15. 0 يۋان ارتتى. مەجەمەن 6 - ايدىڭ 15 - كۇنى اينالاسىندا ساتىپ الا باستايدى. قارجىمەن قامتاماسىز ەتۋ جاعىندا، اۋىل شارۋاشىلىعىن وركەندەتۋ بانكەسىنىڭ شينجياڭ بولىمشە بانكەسى ساتىپ الۋعا 11 ميلليارد 600 ميلليون يۋان امانات - قارىز قارجىسىن دايىندادى، قازىر ساتىپ الۋشى كاسىپورىنداردىڭ دارەجەسىن باعالاۋ، سەنىمدىلىك بەرۋ، سونداي - اق سەنىمدىلىكتەن پايدالانۋدى تەكسەرىپ بەكىتۋ قىزمەتى ورىندالدى.
مۇنان سىرت، رايونىمىز تاعى ءبيداي ساتىپ الۋدىڭ شۇعىل جاعدايعا توتەپ بەرۋ دايىندىق جوباسىن جاساپ، ءبيدايدى شۇعىل جاعدايعا توتەپ بەرۋ بويىنشا ساتىپ الۋدىڭ اتقارۋ ءوڭىرى، اتقارۋ ۋاقىتى، شۇعىل جاعدايعا توتەپ بەرۋ بويىنشا ساتىپ الۋ باعاسى، ساپا ولشەمى سياقتىلاردى ايقىندادى.
قازىرگە دەيىن رايونىمىزداعى ءبيدايدىڭ قامباداعى مولشەرى 6 ميلليون 590 مىڭ تونناعا جەتكەن، بۇل تۇتاس رايونداعى قالا، اۋىل تۇرعىندارىنىڭ 18 ايلىق ىشەر استىق قاجەتىن قاناعاتتاندىرادى.
