− رايونىمىزدىڭ جەر - جەرى باي مازمۇندى، الۋان ءتۇرلى قيمىل ورىستەتىپ، دۋان - ۋ مەرەكەسىن قارسى الدى
□ انار بۇلت \ شينجياڭ گازەتىنىڭ تىلشىلەرى
6 - ايدىڭ 3 - كۇنى شاباندوزدار ايداعارشا قايىق جارىسىنا قاتىناسۋدا. سول كۇنى كورلا قالاسى كونچى وزەنىندە تۇڭعىش كەزەكتى ايداعارشا قايىق جارىسى قيمىلى وتكىزىلىپ، ايداعارشا قايىقتار ءبىرىن - ءبىرى قۋا جارىسىپ، العا دەگەن ۇندەر جاڭعىرىپ تۇردى.
□ سۋرەتتى ۋي يىنحى تۇسىرگەن
جاز ورتاسىنا تاياي قياق كۇرىش مەرەكەسى دە كەلىپ جەتتى، رايونىمىزدىڭ جەر - جەرى باي مازمۇندى، الۋان ءتۇرلى سالت - سانا، مادەنيەت قيمىلىن ورىستەتىپ، مەرەكەنى بىرگە وتكىزدى. ادامدار قياق كۇرىش جەپ، ايداعارشا قايىق ەسىپ، ءداستۇرلى سالت - سانانى ءتۇسىنىپ، مادەنيەتتىڭ باۋراۋ كۇشىن سەزىندى.
”ءبىر - ەكى - ءبىر، ءبىر - ەكى - ءبىر... العا! العا!“، 6 - ايدىڭ 2 - كۇنى جاڭعىرعان بارابان ۇنىنە ىلەسە، جىڭ اۋدانىنىڭ شيڭحى سايران باقشاسىندا شولدە ايداعارشا قايىق ەسۋ جارىسى وتكىزىلىپ جاتتى، ايعايلاعان داۋىستار، بارابان ۇندەرى تولاستامادى.
دۋان - ۋ مەرەكەسىن قارسى الۋ ءۇشىن، جىڭ اۋدانى حۇڭشيڭ ءمالىسى تۋانجيە الەۋمەتتىك اۋماعى، سايحۇڭ الەۋمەتتىك اۋماعى تۇرعىنداردى ۇيىمداستىرىپ، دۋان - ۋ مەرەكەسى بىرلەسكەن دوستىق قيمىلىن ورىستەتتى.
”ايداعارشا قايىق جارىستىرۋ دۋان - ۋ مەرەكەسىندەگى ماڭىزدى سالت - سانا قيمىلدارىنىڭ ءبىرى، ءبىز شولدە ايداعارشا قايىق جارىستىرۋ قيمىلىن ارنايى دايىندادىق، كوپشىلىك دۋان - ۋ مەرەكەسىن بىرگە وتكىزىپ، ءار ۇلت بۇقاراسىنىڭ مادەني تۇرمىسىن بايىتىپ قانا قويماي، كوپشىلىككە قيمىل بارىسىندا ءداستۇرلى مادەنيەتتىڭ قۇدىرەتتى كۇشىن دە سەزىندىرىپ، ءاربىر ادامنىڭ ءداستۇرلى مادەنيەتتى اسقاقتاتۋعا قاتىناسۋشىسىنا، ىلگەرىلەتۋشىسىنە اينالۋىنا مۇمكىندىك جاسادىق“، - دەدى جىڭ اۋدانى حۇڭشيڭ ءمالىسى تۋانجيە الەۋمەتتىك اۋماعى پارتيا ياچەيكاسىنىڭ شۋجيى دان دانلي.
6 - ايدىڭ 3 - كۇنى قارامايلى قالاسى جايرانبۇلاق رايونى (قارامايلى جوعارى، جاڭا تەحنيكالىق اشۋ رايونى) جينلۇڭجىن ءمالىسى جينحۋا الەۋمەتتىك اۋماعىندا قياق كۇرىش ءتۇيۋ، قياق كۇرىش ۇسىنۋ قيمىلى الەۋمەتتىك اۋماقتا مەيىرىممەن ورىستەتىلدى. قيمىلعا كوپتەگەن تۇرعىندار كەلىپ قاتىناستى ءارى الەۋمەتتىك اۋماقتاعى قىزمەتكەرلەرمەن بىرگە ءتۇيىپ بولعان قياق كۇرىشتى الەۋمەتتىك اۋماقتاعى جالعىز تۇراتىن قارتتارعا اپارىپ بەرىپ، مەيىر جەتكىزدى جانە باقىت تىلەدى.
جينحۋا الەۋمەتتىك اۋماعىنىڭ تۇرعىنى ي سۋچين الدىن الا سۋعا شىلاپ قويعان جابىسقاق كۇرىش، قياق جاپىراق سياقتى ماتەريالداردى الىپ ەرتەمەن الەۋمەتتىك اۋماققا كەلدى، تۇرعىن يمام قادىر ي سۋچيننەن قياق كۇرىش ءتۇيۋدى ۇيرەندى، ”قياق جاپىراقتى شۇڭعىل فورمادا بۇكتەپ، ىشىنە جابىسقاق كۇرىشتى تولتىرا سالىپ مىقتاپ نىعىزداعان سوڭ، اۋىزىن بەكىتىپ، جىپپەن ورايمىز“... ي سۋچيننىڭ جەتەكشىلىگىندە ازدان سوڭ يمام ادەمى قياق كۇرىشتەردى تۇيە باستادى.
سونان سوڭ، ءتۇيىپ دايىنداعان قياق كۇرىشتەردى ءبولىپ - ءبولىپ، قاراستى اۋماقتاعى قيىنشىلىعى بار، جاسى ەگدەلەگەن قارتتارعا اپارىپ بەردى. قياق كۇرىشتى العان قارتتار قۋانا: مەرەكە كۇنى الەۋمەتتىك اۋماق قىزمەتكەرلەرى تۇيگەن قياق كۇرىشتەن ءدام تاتا العاندىعىمىزعا توتەنشە قۋاندىق، شىنايى مەيىردى سەزىندىك، - دەدى.
ءداستۇرلى سالت - سانانى ءتۇسىنىپ، مادەنيەتتىڭ قۇدىرەتتى كۇشىن سەزىندى. قياق كۇرىش ءتۇيىپ، ولەڭ وقىدى، دۋان - ۋ مەرەكەسىندە قولمەن كوشىرىلگەن گازەت جاسادى... 6 - ايدىڭ 2 - كۇنى حوتان اۋدانىنىڭ وقۋ - اعارتۋ جۇيەسى بۇكىل اۋدانداعى 20 ورتا - باستاۋىش مەكتەپتە ”مادەنيەتتى جالعاستىرىپ، قياق كۇرىش مەرەكەسىن قارسى الامىز، قياق كۇرىشتىڭ ءيىسىن اڭقىتىپ، پارتيانىڭ قامقورلىعىن جىرلايمىز“ تاقىرىبىندا دۋان - ۋ مەرەكەسى جەلىلەس امالياتتىق قيمىلىن وتكىزدى.
مۇعالىمدار كوپ مەديالى ساباق قۇرالدارى ارقىلى دۋان - ۋ مەرەكەسىنىڭ توركىنىن تانىستىرىپ، وقۋشىلارعا دۋان - ۋ مەرەكەسىندە ايداعارشا قايىق جارىستىرۋ، حوش ءيىس دورباسىن تاعۋ، قياق كۇرىش جەۋ سياقتى سالت - سانا مادەنيەتىن ىشكەرىلەي ءتۇسىندىردى. وقۋشىلار دۋان - ۋ مەرەكەسىنە ارناپ ادەمى قولمەن كوشىرىلگەن گازەت جاساپ، ۇلى وتانشىل اقىن چۇي يۋاندى ەسكە ءتۇسىرىپ، چۇي يۋاننىڭ قاستەرلى وتانشىلدىق سۇيىسپەنشىلىگىن ۇيرەنىپ جانە جالعاستىرىپ، جۇڭگونىڭ ءداستۇرلى مەرەكەسىندە قامتىلىپ جاتقان تەرەڭ ءماندى دەن قويا سەزىندى.
6 - ايدىڭ 3 - كۇنى تۇستە ويناقى مۋزيكا ءۇنى ىشىندە التاي قالاسى سارعۋسىن اۋىلى قاراتەرەك قىستاعىندا ”قياق كۇرىشتىڭ حوش ءيىسىن اڭقىتىپ، قار قالاسىن سۇيىسپەنشىلىككە بولەۋ − ۇلتتار ىنتىماعىنىڭ بەرەكەلى شاڭىراعى بىرلەسكەن دوستىق قيمىلى“ ورىستەتىلىپ جاتتى. تۋىستاسقان كادرلار قىستاق تۇرعىندارىمەن بىرگە ساحناعا شىعىپ ونەر كورسەتىپ، قىزىقتى ويىندارعا قاتىناسىپ، قياق كۇرىش ءتۇيدى، قيمىل وتكىزىلگەن ورىندا شات - شادىمان قۋانىش لەبى ەستى.
”قياق كۇرىشتەن ءدام تاتىپ، دۋان - ۋ مەرەكەسىن تويلاپ، دۋان - ۋ مەرەكەسىن ءتۇسىندىم، وسى رەتكى قيمىل ارقىلى قالىڭ كارلار مەن بۇقارا ءداستۇرلى مادەنيەتتىڭ قۇدىرەتتى كۇشىن تولىق سەزىندى، سونداي - اق ءبىر - بىرىمەن سۇيىسپەنشىلىك ورناتتى“، - دەدى سارعۋسىن اۋىلى ورمان شارۋاشىلىعى قىزمەت پۋنكتىنىڭ كادرى جەڭىسبەك قۇرمەتقان.
5 - ايدىڭ 27 - كۇنى قىزىلسۋ قىرعىز اۆتونوميالى وبلىستىق ءتارتىپ تەكسەرۋ كوميتەتى، باقىلاۋ - تەكسەرۋ كوميتەتىنەن اتۇش قالاسى ازاق قالاشىعى ازاق قىستاعىنا تۇسكەن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتى، قىستاق تۇرعىندار كوميتەتى ”جۇڭحۋا ۇلتىنىڭ بەرەكەلى شاڭىراعىندا ءبىر نيەتتە بولىپ، جۇڭگو ارمانىن بىرگە ورىندايمىز“ اتتى دەكلاماتسيا جارىسىن جانە ۇلتتار ىنتىماعىنىڭ وزاتتارىن ماداقتاۋ - سيلاۋ قيمىلىن وتكىزدى.
وزگەلەرگە جاردەمدەسۋدى قۋانىش ساناۋ، وقۋشىلارعا قارجىلاي كومەكتەسۋ، قارتتاردى سۇيەمەلدەپ، قيىنشىلىعى بارلارعا كومەكتەسۋ... دەكلاماتسيا جارىسىندا، جارىسقا قاتىناسقان 10 ساڭلاق بىرىنەن سوڭ ءبىرى ماڭايىنداعى ادامدى اسەرلەندىرەتىن حيكايالاردى مايىن تامىزا باياندادى.
”بۇدان كەيىن مەن ۇلتتار ىنتىماعىنىڭ حيكاياسىن ۇزدىكسىز، ويداعىداي ايتىپ، وسىناۋ جاندى حيكايالار ارقىلى ءتىپتى دە كوپ قىستاق تۇرعىنىن ۇلتتار ىنتىماعى قوسىنىنا قوسىلۋعا جەتەكتەيمىن“، - دەدى قىستاق تۇرعىنى گۇلزار ءمىجيت.
(ءتىلشى جاڭ تيڭ، قاتىناسقان تىلشىلەر سۇڭ يا - ۋىن، جازيرا نەسىپبەك، سۇڭ ۋيگو، ەرىكتى ءتىلشى حان لي)
