3 عارىشكەر تيانحى وزەكتى بولمەسىنە ءساتتى كىردى
6 - ايدىڭ 5 - كۇنى بەيجيڭ عارىشقا ۇشۋدى مەڭگەرۋ ورتالىعىنان تۇسىرىلگەن تيانحى وزەكتى بولمەسىنە كىرىپ ورنالاسقان عارىشكەرلەر چىن دۇڭ (ورتادا)، ليۋ ياڭ (وڭدا)، ساي شۇيجىلاردىڭ بۇكىل ەل حالقىنا اسكەري سالەم بەرگەن كورىنىسى.
□ سۋرەتتى شينحۋا اگەنتتىگىنىڭ ءتىلشىسى لي شين تۇسىرگەن
شينحۋا اگەنتتىگىنىڭ 6 - ايدىڭ 5 - كۇنى جيۋچۋاننان بەرگەن حابارى (تىلشىلەر لي ليحان، جاڭ رۇيجيە). جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ حابارىنشا، بەيجيڭ ۋاقىتى 2022 - جىلى 6 - ايدىڭ 5 - كۇنى ساعات 10نان 44 مينۋت وتكەندە شىنجوۋ 14 - ءنومىرلى عارىشكەرلى الەم كەمەسى تيەلگەن ۇزاق جورىق 2 - ءنومىرلى F ياۋ 14 - ءنومىرلى تاسىمال راكەتاسى جيۋچۋان جاساندى سەرىك ۇشىرۋ ورتالىعىندا وتالدىرىلىپ ۇشىرىلعان، مولشەرمەن 577 سەكۋندتان كەيىن شىنجوۋ 14 - ءنومىرلى عارىشكەرلى الەم كەمەسى راكەتادان ءساتتى اجىراپ، بەلگىلەنگەن وربيتاعا ەنگەن، ۇشۋ توبىنىڭ جاي - كۇيى جاقسى، ۇشىرۋ تولىق تابىستى بولعان.
بۇل ەلىمىزدىڭ عارىشقا ادام الىپ ۇشۋ ينجەنەرياسى جوسپارعا الىنىپ، اتقارىلعاننان بەرگى 23 - رەتكى ۇشۋ مىندەتى، سونداي - اق كەڭىستىك بەكەتى كەزەڭىنىڭ 3 - رەتكى ادام الىپ ۇشۋ مىندەتى.
الەم كەمەسى وربيتاعا ەنگەن سوڭ، بەلگىلەنگەن ءتارتىپ بويىنشا، كەڭىستىك بەكەتىنىڭ قۇراما تۇلعاسىمەن دەربەس، تەز قارقىنمەن ءتۇيىلىسىپ توعىسادى. ونان سوڭ، عارىشكەرلەر تيانحى وزەكتى بولمەسىنە كىرىپ، 6 اي مەرزىممەن وربيتادا تۇرىپ، كەڭىستىك بەكەتى تۇعىرىن باپتاۋ جانە كۇتىمدەۋ، مەحانيكالىق قولمەن جۇمىس ىستەۋ، بولمەدەن شىعىپ ارەكەت ەتۋ، بولمە بولىكتەرىندە اۋىسۋ سياقتى قىزمەتتەر مەن كەڭىستىك عىلىمى تاجىريبەسى مەن تەحنيكا سىناعىن ورىستەتەدى.
شينحۋا اگەنتتىگىنىڭ 6 - ايدىڭ 5 - كۇنى بەيجيڭنەن بەرگەن حابارى (ءتىلشى گاۋ رۇي). جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ حابارىنشا، شىنجوۋ 14 - ءنومىرلى عارىشكەرلى الەم كەمەسى كەڭىستىك بەكەتىنىڭ قۇراما تۇلعاسىمەن دەربەس، تەز قارقىنمەن ءتۇيىلىسۋدى، توعىسۋدى ءساتتى جۇزەگە اسىرعان سوڭ، عارىشكەرلەر گرۋپپاسى قايتا ورالۋ بولمەسىنەن وربيتا بولمەسىنە كىرگەن. ءتارتىپ بويىنشا ءتۇرلى دايىندىقتاردى ورىنداپ بولعان سوڭ، عارىشكەر چىن دۇڭ تيانحى وزەكتى بولمەسىنىڭ ەسىگىن ءساتتى اشقان، بەيجيڭ ۋاقىتى 2022 - جىلى 6 - ايدىڭ 5 - كۇنى ساعات 20دان 50 مينۋتتا، عارىشكەرلەر چىن دۇڭ، ليۋ ياڭ، ساي شۇيجى رەتىمەن تۇگەلدەي تيانحى وزەكتى بولمەسىنە كىرگەن.
