سورعا، سۋىققا، قۋاڭشىلىققا ءتوزىمدى پىشەن ءشوپتى كەڭىستىككە شىعارۋ تاجىريبەسى باستالدى
شينجياڭنىڭ 4 ءتۇرلى پىشەن ءشوپ تۇقىمى شىنجوۋ 14 - نومىرلىمەن عارىشقا ۇشتى
انار بۇلت \ شينجياڭ گازەتىنىڭ ءتىلشىسى ما بويۇي 6 - ايدىڭ 5 - كۇنى ۇرىمجىدەن حابارلايدى. 6 - ايدىڭ 5 - كۇنى شىنجوۋ 14 - ءنومىرلى عارىشكەرلى الەم كەمەسى عارىشقا ۇشتى، شينجياڭنىڭ 4 ءتۇرلى پىشەن ءشوپ تۇقىمى ونىمەن بىرگە عارىش كەڭىستىگىنە جول الىپ، سورعا، سۋىققا، قۋاڭشىلىققا ءتوزىمدى پىشەن ءشوپتى كەڭىستىككە شىعارۋ تاجىريبەسى باستالدى.
ءتىلشىنىڭ اۆتونوميالى رايوندىق مال شارۋاشىلىعى جانە مال دارىگەرلىگى مەكەمەسىنەن ۇعىسۋىنشا، بۇل شينجياڭنىڭ مال شارۋاشىلىعى عىلىم - تەحنيكا قىزمەتكەرلەرىنىڭ العاش رەت عارىش كەڭىستىگىندە تۇقىم جەتىلدىرۋ ءىسىن ورىستەتۋى سانالادى ەكەن. بۇل رەتتە كەڭىستىككە جانتاق، ىلە جۋسانى، اق الابوتا، شينساۋ 1 - ءنومىرلى سۋدان قۇمايى قاتارلى پىشەن ءشوپ تۇقىمدارى شىعارىلدى. ۇعىسۋىمىزشا، سورعا، سۋىققا، قۋاڭشىلىققا ءتوزىمدى بۇل 4 ءتۇرلى پىشەن ءشوپتىڭ كەڭىستىككە شىعارىلاتىن تاجىريبە ماتەريالى بولۋى جۇڭگونىڭ عارىشقا ادام الىپ ۇشۋ ينجەنەرياسى كەڭسەسىنىڭ ءبىر تۇتاس ۇيىمداستىرۋىندا، عارىش كەڭىستىگىندە تۇقىم جەتىلدىرۋ كاسىپ سالاسىندا جاڭالىق اشۋ بىرلەستىگى جيناپ، شينجياڭ مال شارۋاشىلىعى عىلىم اكادەمياسى مەملەكەتتىك ءبيازى ءجۇندى قوي شارۋاشىلىعى تەحنيكالىق جۇيەسىندەگى عالىمدار ءوتىنىش ەتىپ، عارىشقا ادام الىپ ۇشۋ ينجەنەرياسى كەڭسەسى ۇيىمداستىرعان مامانداردىڭ باعالاۋىنان، تاڭداۋىنان ءوتىپ، بەكىتىلگەننەن كەيىن اتقارىلعان.
شينجياڭ مال شارۋاشىلىعى عىلىم اكادەمياسىنىڭ باستىعى جىڭ ۋىنشيننىڭ تانىستىرۋىنشا، ەلىمىزدىڭ 5 ۇلكەن مال شارۋاشىلىعى رايونىنىڭ ءبىرى بولعان شينجياڭدا جالپى 860 ميلليون مۋ جايلىم بار، مۇنىڭ ىشىندە پايدالانۋعا بولاتىن جايلىم كولەمى 720 ميلليون مۋ ەكەن. سونىمەن بىرگە، شينجياڭنىڭ قۇمدى ءشول اۋماعى مولشەرمەن 430 مىڭ شارشى كيلومەتر، سورتاڭ جەر اۋماعى مولشەرمەن 110 مىڭ شارشى كيلومەتر بولىپ، بۇكىل ەلدەگى سورتاڭ جەر كولەمىنىڭ 3/1ىن ۇستايدى ەكەن.
”سورعا، سۋىققا، قۋاڭشىلىققا ءتوزىمدى وسىمدىكتەر شينجياڭنىڭ جايلىم مال شارۋاشىلىعىن، ەرەكشە مال شارۋاشىلىعىن دامىتۋىنىڭ ماڭىزدى قۇرامداس بولىگى. ءداستۇرلى تۇقىم جەتىلدىرۋدىڭ قارقىنى سالىستىرمالى اقىرىن بولادى، ەگەر عارىش كەڭىستىگى ورتاسىنىڭ وزگەرتۋ اسەرى ارقىلى سورعا، سۋىققا، قۋاڭشىلىققا اناعۇرلىم ءتوزىمدى سورت قاسيەتتەرىن جەتىلدىرىپ شىعىپ، جەلدەن قورعانۋ، قۇمدى تىزگىندەۋ قۋاتىن، جايلىمنىڭ ءوندىرىس قۋاتىن، جايلىمنىڭ مال كوتەرىمدىلىگى مولشەرىن جوعارىلاتۋعا، جايلىمنىڭ شولەيتتەنۋىنەن ساقتانۋعا پايدالانساق، شينجياڭنىڭ، ارىسى بۇكىل ەلدىڭ مال شارۋاشىلىعىن دامىتۋى مەن ەكولوگيالىق ورتانى قورعاۋىندا ماڭىزدى رول اتقارادى“، - دەيدى جىڭ ۋىنشين.
ۇعىسۋىمىزشا، شينجياڭ مال شارۋاشىلىعى عىلىم اكادەمياسى ءشوپ شارۋاشىلىعىن زەرتتەۋ ورنىنىڭ اق الابوتا سياقتى قۇرعاق سۇيگىش شوپتەر بازاسى مەملەكەت بەكىتكەن 1 - توپتاعى 5 مەملەكەتتىك پىشەندىك ءشوپ تۇقىمى بازاسىنىڭ ءبىرى ەكەن. شينجياڭ مال شارۋاشىلىعى عىلىم اكادەمياسى سونىمەن قاتار عىلىم - تەحنيكا مينيسترلىگى تانىعان مەملەكەتتىڭ حالىقارالىق عىلىم - تەحنيكالىق سەلبەستىك بازاسى سانالادى، مال شارۋاشىلىعىنىڭ ساپالىق ولشەمىن زەرتتەۋ ورنى سياقتى وعان قاراستى ورىندار كەزىندە اۆستراليا، قازاقستان، رەسەي سياقتى مەملەكەتتەرمەن سەلبەستىك جاساپ، سيىر، قوي جانە پىشەندىك ءشوپ سياقتى مال شارۋاشىلىعىنا قاتىستى زەرتتەۋلەر ورىستەتكەن.
