انار بۇلت \ شينجياڭ گازەتىنىڭ ءتىلشىسى شيە حۇيبيان 6 - ايدىڭ 7 - كۇنى ۇرىمجىدەن حابارلايدى. 6 - ايدىڭ 7 - كۇنى شينجياڭ اۋىل شارۋاشىلىق عىلىم اكادەمياسى ەكونوميكالىق داقىلداردى زەرتتەۋ ورنىنىڭ زەرتتەرمەنى لي شۋەيۋان تاعى 2 تۇقىم كاسىپورنىنىڭ تەلەفونىن الدى، ولار ونىمەن سەلبەستىك جاساسىپ، كاسىپورىن ءتۇيىندى تۇردە جالپىلاستىرۋدى جوسپارعا العان ماقتا تۇرىنە ”سالاۋات“ جاساپ بەرۋىن ءۇمىت ەتتى.
تاياۋدا لي شۋەيۋان ۇجىمى ساۋساق بەدەرى سۋرەتتەرىن جاساۋ تەحنيكاسىنان پايدالانىپ، ماقتا سورتى − شينلۋزاۋ 84 - ءنومىرىن ساۋساق بەدەرى سۋرەتىنە جانە ەكىلىك كود سالاۋات كۋالىگىنە يە ەتتى. قازىر لي شۋەيۋان ۇجىمدى باستاپ شينجياڭنىڭ 130 نەشە ماقتا سورتىنا ساۋساق بەدەرى سۋرەتىن جانە ەكىلىك كود سالاۋات كۋالىگىن جاساپ، شينجياڭ ماقتاسى سورتىنىڭ اۋىل شارۋاشىلىق تەحنيكاسى ينفورماتسياسىن، مولەكۋلالىق ساۋساق بەدەرى ينفورماتسياسىن، ەرەكشە گەندى پارىقتاۋ ينفورماتسياسىن بايلانىستىرىپ، ماقتا سورتىنىڭ سالاۋاتىن جانە ەرەكشەلىگىن پارىقتاۋدى جۇزەگە اسىردى. بۇل تەحنيكا سونىمەن بىرگە مەملەكەتتىك تاپقىرلىق پاتەنتىن الدى، قازىر شينجياڭداعى 10 كاسىپورىن جالپىلاستىرىپ قولدانۋدا.
”بەينە بالانىڭ كىمنىڭ بالاسى ەكەندىگىن ساراپتاعان سياقتى، ساۋساق بەدەرى سۋرەتىن جاساۋ تەحنيكاسى مولەكۋلالىق دەڭگەيدەن ماقتا سورتىنىڭ گەندىك پارقىن انىقتايدى، ءداستۇرلى تۇقىمنىڭ سيپاتى مەن ءپىشىنىن اتىز باسىندا انىقتاۋ تەحنيكاسىمەن سالىستىرعاندا اناعۇرلىم دالمە - ءدال، جوعارى ءونىمدى بولدى“، - دەدى ءتۇسىندىرىپ لي شۋەيۋان.
”شينجياڭ ماقتا وندىرەتىن ءىرى رايون، ايتسەدە قازىر ماقتا سورتى ءوندىرىسىن جانە تيجاراتىن باسقارۋدا كوپتەگەن ارناعا تۇسپەگەن ماسەلەلەر بار“. لي شۋەيۋان بىلاي دەدى: شينجياڭنىڭ ماقتا سورتىنىڭ كوپ، رەتسىز، الا - قۇلا بولۋ جايتى ەرەكشە جالپىلاسقان، بىرتەكتىلەنۋى قيىن، ەرەكشە سورت از، تۇقىم ءبىلىم مەنشىك ۇقىعىن قورعاۋ جەتەرسىز بولۋ سياقتى ماسەلەلەر جالپى بەتتىك ءومىر ءسۇرىپ وتىر.
وسىنداي جاعدايدا لي شۋەيۋان ۇجىمىن باستاپ 13 جىل بىرلەسىپ قامال الىپ، شينجياڭ ماقتاسىنىڭ نەگىزگى ەگىلەتىن سورتىن، وڭىرلىك سىناق ەتىلەتىن سورتىن، جاڭا سورتىنىڭ قورعالاتىن سورتىن جالپى بەتتىك جيناۋ، رەتتەۋ نەگىزىندە، ماقتا تۇقىمىنىڭ شەشۋشى تەحنيكالىق زەرتتەۋ جەتىستىگىن قالىپتاستىردى. بۇل جەتىستىك شينجياڭ ماقتاسىنىڭ DNA سالاۋاتىن ساراپتاۋ جۇيەسىن قۇرىپ، شينجياڭ قۇرلىق ماقتاسى سورتىنىڭ DNA −SSR ساۋساق بەدەرى ساندى مالىمەت قويماسىن ورناتىپ، ماقتا سورتى ينفورماتسياسى ۇلكەن ساندى مالىمەتىن قالىپتاستىرىپ، سورتتى باسقارۋدى سيفرلاندىرۋدى، قولايلىلاستىرۋدى جانە زەردەلىلەندىرۋدى جۇزەگە اسىرىپ، شينجياڭ ماقتا سورتىنىڭ ساۋساق بەدەرى سۋرەتىن جاساۋداعى بوستىقتى تولتىردى.
جۇڭگو ينجەنەريالىق عىلىمدار اكادەمياسىنىڭ اكادەميگى يۇي شۋشۇن مىنالاردى ءبىلدىردى: شينجياڭ ماقتاسى تۇقىمىنىڭ شەشۋشى تەحنيكالىق زەرتتەۋ جەتىستىگى شينجياڭنىڭ ماقتا ەگۋ شارۋاشىلىعىن دامىتۋدى جەبەپ، اسىل تۇقىمدى كاسىپ سالالاندىرۋدى قالىپتاستىرىپ، تۇقىم شارۋاشىلىعىنىڭ دامۋ دەڭگەيىن جالپى تۇلعالىق جاقتان ءوسىرۋ جونىنەن ماڭىزدى مانگە يە بولدى.
