شينحۋا اگەنتتىگىنىڭ 6 - ايدىڭ 25 - كۇنى ۇرىمجىدەن بەرگەن حابارى (ءتىلشى لي جىحاۋ) بيىل 6 - ايدان 10 - ايعا دەيىن، ورتالىق مەكەمە ورىندارى مەن شينجياڭعا كومەكتەسەتىن ولكە، قالالاردان شينجياڭعا كومەكتەسۋگە كەلگەن 70تەن استام مەديتسينا مامانى توپقا ءبولىنىپ، شينجياڭنىڭ شەكارا وڭىرلەرىنىڭ العى شەپتەرىنە بارىپ، تەگىن ەمدەۋ قىزمەتىن شوعىرلى جۇرگىزدى.
2022 - جىلعى ”شينجياڭعا كومەكتەسۋ سۇيىسپەنشىلىگى · شەكارا وڭىرگە بارۋ“ 10 - توپتاعى شينجياڭعا كومەكتەسۋگە كەلگەن مەديتسينا ماماندارىنىڭ شەكارا وڭىرلەردى ارالاپ تەگىن ەمدەپ، ناقتى ءىس ىستەۋ قيمىلى جۋىردا باستالدى. شينجياڭ ۇيعۇر اۆتونوميالى رايوندىق پارتكوم ۇيىمداستىرۋ ءبولىمى، شينجياڭ ۇيعۇر اۆتونوميالى رايوندىق دەنساۋلىق ساقتاۋ، سالاماتتىق كوميتەتى شينجياڭعا كومەكتەسەتىن 70تەن استام مەديتسينا مامانىن ۇيىمداستىرىپ، اقسۋ ايماعى ءۇشتۇرپان اۋدانى، قىزىلسۋ قىرعىز اۆتونوميالى وبلىسى اقتاۋ اۋدانى، قاشقار ايماعى جاڭاءشار اۋدانى سىندى وڭتۇستىك، سولتۇستىك شينجياڭنىڭ شەكارا جيەگىنە ورنالاسقان 7 اۋدانعا (رايون) توپقا ءبولىپ جىبەرىپ، تەگىن ەمدەۋدى شوعىرلى ورىستەتەدى، سونداي - اق ءجيى كەزدەسەتىن ءدارى - دارمەكتەرمەن قامدايدى. ماماندار نەگىزگى ساتىداعى شيپاحانالارعا ىشكەرىلەي بارىپ، وقىتۋ، ناۋقاستار بولمەسىن ارالاۋ، عىلمي لەكسيا جاساۋ، ارناۋلى تاقىرىپتا ساباق ءوتۋ سىندى قيمىلداردى ورىستەتىپ، جەرگىلىكتى ورىننىڭ ەمدەۋ دەڭگەيىن جوعارىلاتادى؛ شەكارا وڭىرلەردە ءجيى كەزدەسەتىن، كوپ تۋىلاتىن اۋرۋلارعا مەڭزەس، دەنساۋلىق ساقتاۋ، سالاماتتىق بىلىمدەرى لەكسياسىن، دەنساۋلىق بىلىمدەرى ۇگىتىن جۇرگىزەدى.
بەيجيڭ شيەحى شيپاحاناسىنان كەلگەن، اۆتونوميالى رايوندىق حالىق شيپاحاناسى رەۆماتيزم - يممۋنيتەت ءبولىمىنىڭ ورىنباسار مەڭگەرۋشىسى مىندەتىن ارقالاعان لي جيڭ مىنانى ءبىلدىردى:”شينجياڭ شەكارا وتكەلىنىڭ، شەكارا قىستاق، اترەتىنىڭ، شەكارالىق قورعانىس قاراۋىلحاناسىنىڭ ءار ۇلت حالقى مەملەكەتكە ەلەۋلى ۇلەس قوستى، ءبىز قاتارلى شينجياڭعا كومەكتەسۋگە كەلگەن بارلىق شيپاگەرلەر شەكسىز قۇرمەتپەن، بار ىنتامىزبەن وسى رەتكى شەكارا وڭىرلەردى ارالاپ تەگىن ەمدەۋ مىندەتتەرىن ورىندايمىز“.
2021 - جىلى، ورتالىق مەكەمە ورىندارى مەن ولكە، قالالاردان شينجياڭعا كومەكتەسۋگە كەلگەن 108 مەديتسينا مامانى، شينجياڭنىڭ 10 ايماق، وبلىس، قالاسىنا 6 كەزەككە ءبولىنىپ بارىپ، شوعىرلى تەگىن ەمدەۋدى 44 رەت جۇرگىزدى، ارالاپ تەگىن ەمدەۋدى 160 رەتتەن استام جۇرگىزىپ، 4600 دەن استام ادامنىڭ دياگنوزىن تۇراقتاندىرىپ ەمدەدى، جالپى قۇنى 700 نەشە مىڭ يۋان كەلەتىن ءجيى پايدالاناتىن ءدارى - دارمەكتەردى ۇسىندى، وپەراتسيادان ۇلگى كورسەتۋ، 37 مايدان - رەت عىلمي لەكسيا جاساۋ، 1000نان استام مەديتسينا قىزمەتكەرىن كۋرستا باۋلۋ ورىستەتىلىپ، ەلىمىز ىشىندەگى ساپالى ەمدەۋ قىزمەت وتەۋىن شەكارا ءوڭىردىڭ العى شەبىنە جەتكىزدى.
