ءسىز اتپەن كەلىپ ءبىزدى ساپارعا ۇزاتىپ سالعان ەدىڭىز، ءبىز جەڭىسپەن ورالىپ سىزگە قۇرمەت بىلدىرەمىز

قىسقى وليمپيادا سپورت جارىسىنىڭ اعا جۇلدەگەرلەرى مەن شينجياڭ مالشىلارى شىنايى سۇيىسپەنشىلىك ورناتتى

ءسىز اتپەن كەلىپ ءبىزدى ساپارعا ۇزاتىپ سالعان ەدىڭىز، ءبىز جەڭىسپەن ورالىپ سىزگە قۇرمەت بىلدىرەمىز

　　انار بۇلت \ شينجياڭ گازەتىنىڭ تىلشىلەرى تاڭ كاندۇڭ، يىن لۋ 6 - ايدىڭ 25 - كۇنى ۇرىمجىدەن حابارلايدى. 5 ايدىڭ الدىندا شينجياڭداعى مالشىلار قاردا اتقا ءمىنىپ مەملەكەت تۋىن ۇستاپ، قىسقى وليمپيادا سپورت جارىسىنا قاتىناساتىن ساڭلاقتاردى جارىس الاڭىنا اتتاندىرىپ سالعان بولاتىن، بۇل شىنايى سۇيىسپەنشىلىك بۇكىل ەلدەگى توراپتاستاردى اسەرلەندىردى؛ 6 - ايدىڭ 25 - كۇنى بەيجيڭ قىسقى وليمپيادا سپورت جارىسىنىڭ اعا جۇلدەگەرلەرى ۇرىمجىگە كەلىپ، بۇراتالا موڭعۇل اۆتونوميالى وبلىسىنداعى مالشىلار ۋاكىلدەرىنە ”بيڭدۇندۇن“ ۇسىنىپ، العىس ايتىپ، قۇرمەت ءبىلدىردى.

　　سول كۇنى بەيجيڭ قىسقى وليمپيادا سپورت جارىسىنىڭ اعا جۇلدەگەرلەر ساپارىنىڭ العاشقى بەكەتى ”تيانشانعا ساپار“ قيمىلى شينجياڭ مۇز ءۇستى سپورت ورتالىعىنىڭ مۇزدا سىرعاناۋ سارايىندا وتكىزىلدى. وسى كورىنىس الاڭداعى كوپتەگەن جۇرتشىلىقتى تەبىرەنتتى.

　　ساعات 18 مولشەرىندە گاۋ تيڭيۇي، سۋ يميڭ، چي گۋاڭپۋ، سۇي ۋىنجيڭ، حان سۇڭ قاتارلى بەيجيڭ قىسقى وليمپيادا سپورت جارىسىنىڭ اعا جۇلدەگەرلەرى، لي ۋىنلۇڭ، پىڭ چىڭ، جين ياڭ، ۋاڭ شىيۋە، ليۋ شينيۇي، جۋ ي قاتارلى جۇڭگونىڭ قار - مۇز سپورتى ساڭلاقتارى قانىق قىزىل مەملەكەتتىك كوماندا كيىمىن كيىپ، ءۇرىمجى قالالىق 15 - باستاۋىش مەكتەپ، ءۇرىمجى اۋداندىق 1 - ورتا مەكتەپ سياقتى ورىنداردان كەلگەن 100دەگەن وقۋشىلارمەن، كادرلارمەن، بۇقارامەن اۋىس - كۇيىس جاساپ، قىسقى وليمپيادانىڭ قىزىقتى اڭگىمەلەرىمەن ورتاقتاسىپ، بەيجيڭ قىسقى وليمپيادا رۋحىن جەتكىزدى.

　　شينجياڭ دەنە تاربيە باس قوعامىنىڭ مانەرلەپ سىرعاناۋ ارناۋلى كوميتەتى جاس وسپىرىمدەر اترەتىنىڭ ”مۇز ءۇستى شەبەرى“ مۇزدا سىرعاناۋ ويىن ءنومىرى «انار ءبىر - بىرىنە سۇيەنەدىنى» جەڭىل ءبي، سىپايى قيمىلمەن ويناپ، وتانعا داڭق اپەرگەن اعا - اپەكەلەرىن قارسى الدى. مەملەكەتتىك مانەرلەپ سىرعاناۋ كومانداسىنان كەلگەن قار - مۇز ساڭلاقتارى مۇز ءبيى، قوس ادامدىق سىرعاناۋ، جالعىز ادامدىق سىرعاناۋ سياقتى تارتىمدى ويىنداردى الا كەلىپ، كورەرمەندەردى كوزايىم ەتەرلىك تاماشا ويىن كورسەتتى. مەملەكەتتىك دەنە تاربيە باس مەكەمەسىنىڭ قىسقى سپورتتى باسقارۋ ورتالىعى تاعى 2 مەكتەپكە قار - مۇز اسپاپتارىن ۇسىندى.

　　وسىدان كەيىن سول جەردەگى ۇلكەن ەكراندا مىناداي ءبىر كەسكىن قويىلدى: ۇشى - قيىرسىز قارلى دالادا مالشىلار اتپەن شاپقىلاپ بارادى، بەس جۇلدىزدى قىزىل تۋ جەلمەن بىرگە جەلبىرەۋدە... بۇل 1 - ايدىڭ 20 - كۇنى جۇڭگونىڭ دالالىق قار شاڭعى مەملەكەتتىك شوعىرلى تاربيەلەۋ اترەتى بۇراتالا وبلىسىنىڭ اراسان اۋدانىنداعى شوعىرلى جاتتىعۋدى اياقتاتىپ، قىسقى وليمپيادا ساپارىنا اتتانعان كەزدە ءبىر توپ مالشى وليمپيادا ساڭلاقتارىن اتتاندىرىپ سالعان كورىنىس ەدى.

　　وسى كەزدە 2 مالشى ۋاكىلى ساحنا تورىنە شىقتى، بەيجيڭ قىسقى وليمپيادا سپورت جارىسىنىڭ اعا جۇلدەگەرلەرى گاۋ تيڭيۇي مەن چي گۋاڭپۋ ولارعا قىسقى وليمپيادا ەستەلىك بۇيىمى ”بيڭدۇندۇن“ ۇسىنىپ، العىس ايتتى جانە حال سۇرادى، زالدان قىزۋ شاپالاق ءۇنى كوتەرىلدى.

　　مالشى ۋاكىلى بايىنعول: ”ەرەكشە قۋاندىم، ەرەكشە تەبىرەندىم، قىستا ءبىز مەملەكەتتىك كوماندانى بەيجيڭ قىسقى وليمپيادا سپورت جارىسىنا قاتىناسۋعا اتتاندىرعان ەدىك. بۇگىن اعا جۇلدەگەرلەردىڭ ۇسىنعان ’بيڭدۇندۇن‘ تارتۋى ءبىزدى ەرەكشە داڭققا بولەدى. قار - مۇز ساڭلاقتارىنىڭ بۇدان بىلايعى جولدارىنىڭ بارعان سايىن ءساتتى بولىپ، اناعۇرلىم ويداعىداي ناتيجەگە قول جەتكىزۋىن ءۇمىت ەتەمىن“، - دەدى. ول تاعى ورايدى قولدان بەرمەي، شينجياڭنىڭ قار - مۇز سپورتىنا جارشى بولىپ: ”ءبىزدىڭ شينجياڭنىڭ قار - مۇز بايلىعى وتە تاماشا، قار - مۇز سپورتىنا قاتىناساتىندار بارعان سايىن كوبەيۋدە، اراسان اۋدانىندا دا يەنيۋ شاڭعى تەبۋ قۇراماسى قۇرىلىپ، جاتتىعۋ جانە جارىس ارقىلى وسى سپورتتى جالپىلاستىرا باستادىق“، - دەدى.

　　مەملەكەتتىك دەنە تاربيە باس مەكەمەسى قىسقى سپورت ورتالىعىنىڭ ورىنباسار مەڭگەرۋشىسى حۋاڭ جىيۇڭ بىلاي دەدى: شينجياڭنىڭ وزگەشە قار - مۇز بايلىعى ارتىقشىلىعى جانە تەرەڭ قار - مۇز مادەنيەت قورى بار، قار - مۇز سپورتىنىڭ ءداستۇرلى ءوڭىرى. اسىرەسە، جۋىق جىلداردان بەرى، شينجياڭ وليمپيادا سپورت جارىسىنىڭ وڭتايلى ساتىنەن پايدالانىپ قار - مۇز سپورتىنىڭ جالپىلاسۋىن، دامۋىن كۇش سالا ىلگەرىلەتىپ، ونەر باسەكەسىندىك قار - مۇز سپورتى بارعان سايىن كوبەيىپ، قار - مۇز كاسىپ سالاسىنىڭ ومىرشەڭدىك كۇشى شەكسىز ارتىپ، بۇقارالىق قار - مۇز كاسىبى قارىشتاپ دامىدى.

　　ساناققا قاراعاندا ، شينجياڭدا قار - مۇز سپورتىنا قاتىناسقان ادام سانى 9 ميلليون 280 مىڭعا جەتىپ، قاتىناسۋ سالىستىرماسى ％36كە تاياپ، باتىس بولىك وڭىرىندە 1 - ورىندى يەلەگەن.

　　”بەيجيڭ قىسقى وليمپيادا سپورت جارىسى اعا جۇلدەگەرلەرىنىڭ تيانشان ساپارى“ قيمىلى تاعى التاي ايماعى مەن قاشقار ايماعىنا ىشكەرىلەي بارىپ، دەنە تاربيە اۋىس - كۇيىس قيمىلىن ورىستەتەدى.