انار بۇلت \ شينجياڭ گازەتىنىڭ تىلشىلەرى تاڭ كاندۇڭ، يىن لۋ 6 - ايدىڭ 26 - كۇنى التايدان حابارلايدى. بەيجيڭ قىسقى وليمپيادا سپورت جارىسى اشىلۋ سالتىنىڭ الدىندا تاراتىلعان جەتەكشى فيلمدە، ءبىر تال قار گۇلى التايدىڭ ءدوڭدىبۇلاعىنان شىعىپ، بەيجيڭگە قاراي شارىقتاي ۇشىپ، قالىقتاپ بارىپ ”قۇس ۇياسىنا“ قونىپ، جۇڭگونىڭ قىسقى وليمپيادامەن قاۋىشقان تاماشا ساتىنە كۋا بولاتىن ەدى. 6 - ايدىڭ 26 - كۇنى بەيجيڭ قىسقى وليمپيادا سپورت جارىسىنىڭ رۋحى بولعان وسى ”قار گۇلى“ تاعى دا بەيجيڭ قىسقى وليمپيادا سپورت جارىسى اعا جۇلدەگەرلەرى ساپارلارىنىڭ العاشقى بەكەت قيمىلى ”تيانشان ساپارىنداعى“ قار - مۇز ساڭلاقتارىن باستاپ، جۇڭگونىڭ قار قالاسى التايعا كەلىپ، ادامزات قار شاڭعىسىنىڭ باستالعان جەرىندەگى ءار ۇلت بۇقاراسىمەن رومانتيكالى كەزدەستى.
سول كۇنى، بەيجيڭ قىسقى وليمپيادا سپورت جارىسىنىڭ اعا جۇلدەگەرلەرى چي گۋاڭپۋ، سۇي ۋىنجيڭ، حان سۇڭ جانە جۇلدەگەر لي ۋىنلۇڭدار ەجەلدەن داڭقى بار گەنارال تاۋى قار شاڭعى الاڭىنا كەلدى. التاي دۇنيە جۇزىندەگى شاڭعى تەبۋدىڭ التىن ولشەمدى سىزىعىنا ورنالاسقان، قار - مۇز جاراتىلىستىق بايلىعى مول، قارى ساپالى، قالىڭ، قار جاتاتىن مەزگىلى ۇزاق سياقتى ەرەكشەلىكتەرگە يە. شاڭعى الاڭىنىڭ جاۋاپتىسى: ”مولشەرمەن 2025 - جىلى ءبىز مەملەكەتتىك قىسقى سپورت جارىسى، ازيا قىسقى سپورت جارىسى سياقتى ەل ىشىندەگى جانە حالىقارالىق قار - مۇز سپورت جارىستارىن وتكىزۋ شارت - جاعدايىن ازىرلەپ بولامىز“، - دەدى. قار - مۇز ساڭلاقتارى بىرىنەن سوڭ ءبىرى ماداقتادى.
گەنارال تاۋى ءتورت ماۋسىمدىق جاساندى قار شاڭعى تەبۋ الاڭىندا، كىشكەنتاي سپورتشىلار شاڭعى جولىمەن قۇيعىتا اعىپ ءتۇسىپ، بىركەلكى داۋىسپەن: ”اعا - اپەكەلەر، سالەمەتسىزدەر مە!“ - دەپ داۋىستادى. چي گۋاڭپۋ مايدانعا شىعىپ، كىشكەنتاي دوستاردىڭ شاڭعى تەبۋ ارەكەتىنە جەتەكشىلىك ەتتى. التاي ايماقتىق مۇراجايدا، ءدوڭدىبۇلاق 1 - ءنومىرلى تەكشە تاستاعى جارتاس سۋرەتىن جوعارى دارەجەدە قالپىنا كەلتىرۋ ارقىلى سىزىلعان ءدوڭدىبۇلاق ۇڭگىرى رەڭدى جارتاس سۋرەتىن كورگەن قار - مۇز ساڭلاقتارى ادامزات قار شاڭعىسىنىڭ باستالعان جەرى جونىندەگى حيكايانى قىزىعا تىڭدادى. التاي قالالىق دەنە تاربيە باقشاسىندا، جەرگىلىكتى مەيماندوس بۇقارا ءداستۇر بويىنشا ”شاشۋ“ شاشىپ، قۇرمەتتى قوناقتاردى قارسى الدى، قار - مۇز ساڭلاقتارى كوپشىلىكتىڭ قاۋمالاۋىمەن دوڭگەلەنە ”قارا جورعا بيىنە“ باستى.
قيمىل ورنىندا قىسقى وليمپيادا سپورت جارىسىنىڭ اعا جۇلدەگەرلەرىن ىنتالى بالالار قاۋمالاپ الىپتى. ”مەن بيىل 7 جاستامىن، شاڭعى تەبۋدى ەرەكشە جاقسى كورەمىن، مەن دە كەيىن قىسقى وليمپيادا سپورت جارىسىنا قاتىناسا الامىن با“؟ - دەپ سۇرادى التاي قالالىق سەنترلى باستاۋىش مەكتەپ 2 - جىلدىق 1 - كلاسىنداعى تيان مەيجيە، چي گۋاڭپۋ يىلە تۇرىپ وعان: ”وزىڭە سەن، سەن، ءسوزسىز، قاتىناسا الاسىڭ“، - دەدى. ”مەن 5 جاسىمنان باستاپ كونكي تەبۋدى ۇيرەندىم“. حان سۇڭ مۇزدا سىرعاناۋدى جاقسى كورەتىن باستاۋىش مەكتەپ وقۋشىسى جوۋ بونيڭگە: ”سۇي ۋىنجيڭ ەكەۋىمىز قىستا التايعا كەلىپ، كول بەتىندە كونكي تەبۋدى جوسپارلاپ وتىرمىز، سول كەزدە سەندەردى بىرگە كونكي تەبۋگە ۇسىنىس ەتەمىز“، - دەپ ەدى، سول جەردە تۇرعاندار قۋانا الاقايلاپ كەتتى. قار - مۇز ساڭلاقتارى مەن بالاقايلار قولدارىن بىرگە كوتەرىپ تۇرىپ: ”جۇڭگونىڭ قار - مۇز سپورتى العا! التاي العا!“ - دەپ ۇراندادى.
التاي ايماقتىق پارتكومنىڭ مۇشەسى، ۇگىت ءبولىمىنىڭ باستىعى لان شىڭ بىلاي دەدى: جاستار مەن ورەندەردى قار - مۇز سپورتىنا بەلسەنە ات سالىسۋعا شابىتتاندىرۋ ءۇشىن، جەرگىلىكتى ورىن ورتا - باستاۋىش مەكتەپتىڭ دەنە تاربيە ساباعىن شاڭعى الاڭدارىنا، دوڭگەلەكتى كونكي الاڭدارىنا كەڭەيتىپ، بالالاردىڭ قار - مۇز الاڭدارىندا ەمىن - ەركىن بالا بوپ ويناپ، اسىل ارماندارعا تالپىنۋىنا مۇمكىندىك جاراتىپ وتىر. ”جازدا اتقا ءمىنۋ، قىستا شاڭعى تەبۋ، ءبىر جىلدىڭ ءتورت ماۋسىمىندا فۋتبول تەبۋ“ التايداعى جاستار مەن ورەندەردىڭ دەنە تاربيە قيمىلىندا التىنعا ايىرباستامايتىن بەلگىسىنە اينالدى.
مەملەكەتتىك دەنە تاربيە باس مەكەمەسى قىسقى سپورت جارىسى ورتالىعىنىڭ ورىنباسار مەڭگەرۋشىسى يان شياۋجۋان بىلاي دەدى: بەيجيڭ قىسقى وليمپيادا سپورت جارىسىنا دايىندالىپ جاتقان كەزدە، مەملەكەتتىك دالالىق قار شاڭعى قۇراماسى، مەملەكەتتىك سىڭار تاقتايمەن سىرعاناۋدىڭ U فورمالى الاڭدا سىرعاناۋ قۇراماسى سياقتى كوپتەگەن مەملەكەتتىك قۇرامالاردىڭ بارلىعى التايدا جاتتىعۋ جاسادى؛ التاي تالاي - تالاي سپورتشىلاردى، باپكەرلەردى جانە تەحنيكالىق قىزمەتكەرلەردى اتتاندىرىپ، بەيجيڭ قىسقى وليمپيادا سپورت جارىسىنىڭ ءساتتى وتكىزىلۋىنە، جۇڭگو دەنە تاربيە ۋاكىلدەر ۇيىرمەسىنىڭ تاريحتاعى ەڭ تاماشا ناتيجەگە قول جەتكىزۋىنە ماڭىزدى ۇلەس قوستى. بولاشاقتا، مەملەكەت قۇراماسىنىڭ جاتتىعۋ وتكىزۋىن، جاتتىعۋ ورنىن قۇرۋىن جانە حالىقارالىق جارىس وتكىزۋىن قامتاماسىز ەتۋدى تۇتقا ەتىپ، التايدىڭ قار - مۇز بايلىعىن ۇگىتتەپ، التايدىڭ قار - مۇز سپورتى كاسىپ سالاسىنىڭ جانە ساياحات كاسىپ سالاسىنىڭ دامۋىن ىلگەرىلەتىپ، التايدى شاڭعى تەبۋدە مەملەكەت دارەجەلى ايگىلى ورىن جانە الەمدىك دارەجەدەگى قار - مۇز سپورتىنىڭ نىسانالى ورنى ەتىپ سومداۋعا كۇش ۇستەۋىمىز كەرەك.
