شينحۋا اگەنتتىگىنىڭ 6 - ايدىڭ 30 - كۇنى شياڭگاڭنان بەرگەن حابارى (تىلشىلەر چىن جيانشيڭ، جۋ جيچاي، چا ۋىنيە). مەملەكەت ءتوراعاسى شي جينپيڭ 6 - ايدىڭ 30 - كۇنى تۇستەن كەيىن شياڭگاڭدا شياڭگاڭ ەرەكشە اكىمشىلىك رايونىنىڭ اكىمى لينجىڭ يۋە - ىمەن كەزدەستى.
شي جينپيڭ بىلاي دەپ اتاپ كورسەتتى: 5 جىلدان بەرى، ورتالىقتىڭ پارمەندى قولداۋىندا، ءسىز اكىمدىك مىندەتتىڭ نەگىزگى زاڭدىق جاۋاپكەرشىلىگىن ادالدىقپەن وتەپ، ”ءبىر ەل، ەكى ءتۇزىم“ باعىتى مەن ءتۇبىرلى زاڭدى باتىل دايەكتىلەندىرىپ، تياناقتاندىرىپ، ەرەكشە اكىمشىلىك رايون ۇكىمەتىن باستاپ زاڭ بويىنشا بيلىك جۇرگىزىپ، قوعامداعى ءار سالا قايراتكەرلەرىن ىنتىماقتاستىرىپ زورلىقتى كۇشتى تيىپ، بىلىقپالىقتى شاۋجايلاپ، جاڭا تيپتى ايدارشا ۆيرۋس وكپە قابىنۋ ىندەتىنە بار كۇشپەن قارسى اتتانىپ، مەملەكەتتىڭ دامۋ كەلەلى جاعدايىنا بەلسەندى توعىسىپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن جانە شياڭگاڭنىڭ كوركەيىپ - گۇلدەنۋىن، ورنىقتىلىعىن قورعاۋ، ”وتانشىلدار شياڭگاڭدى باسقارۋ“ پرينسيبىن تياناقتاندىرۋ، شياڭگاڭنىڭ بىلىقپالىقتان تىنىشتىققا ءوتۋدىڭ كەلەلى بۇرىلىسىن جۇزەگە اسىرۋدى ىلگەرىلەتۋ ءۇشىن قىرۋار جاپالى قىزمەت ىستەپ، ماڭىزدى ۇلەس قوسىپ، باتىلدىقپەن جاۋاپكەرشىلىك ارقالايتىن رۋحتى ايگىلەدىڭىز. ءسىزدىڭ وسى 5 جىلدان بەرگى قىزمەتىڭىزدى ورتالىق تولىق تۇراقتاندىرادى.
شي جينپيڭ لينجىڭ يۋە - ىنىڭ جاڭادان تاعايىندالعان اكىمنىڭ جانە جاڭا كەزەكتى ەرەكشە اكىمشىلىك رايون ۇكىمەتىنىڭ زاڭ بويىنشا بيلىك جۇرگىزۋىنە بەلسەندى قولداۋ كورسەتىپ، شياڭگاڭنىڭ جانە مەملەكەتتىڭ دامۋىنا جالعاستى ۇلەس قوسۋىن ءۇمىت ەتتى.
لينجىڭ يۋە - ى ءتوراعا شي جينپيڭنىڭ شياڭگاڭدا ىندەت جاعدايى ءالى دە ورنىقپاعان جاعدايدا ءوزى كەلىپ، شياڭگاڭ وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسىنا جانە شياڭگاڭ ەرەكشە اكىمشىلىك رايونى 6 - كەزەكتى ۇكىمەتىنىڭ مىندەتكە وتىرۋ سالتىنا قاتىناسقاندىعىنا ءارى شياڭگاڭدى كوزدەن كەشىرگەندىگىنە شىن جۇرەكتەن العىس ايتتى، بۇل ءتوراعا شي جينپيڭنىڭ شياڭگاڭدىق باۋىرلاستارعا دەگەن ىقىلاستى قامقورلىعىن تولىق ايگىلەدى. ول شياڭگاڭنىڭ وتكەن 5 جىلى وزگەشە 5 جىل بولعاندىعىن، ءوزىنىڭ ”ءبىر ەل، ەكى ءتۇزىم“ ىستەرى ءۇشىن ۇلەس قوسا العاندىعىن ەرەكشە ماقتانىش سەزىنەتىندىگىن ءبىلدىردى. وتاننىڭ باي دا قۋاتتى، گۇلدەنىپ - كوركەيۋىن، ءتوراعا شي جينپيڭنىڭ شياڭگاڭدى كوزدەن كەشىرۋىنىڭ ءساتتى بولۋىن تىلەدى.
سول كۇنى تۇستەن كەيىن شي جينپيڭ جەكە - جەكە شياڭگاڭ ەرەكشە اكىمشىلىك رايونىنىڭ اكىمشىلىك، زاڭ شىعارۋ، ءادىليا ورگاندارىنىڭ جاۋاپتىلارىمەن، شياڭگاڭنىڭ ءار سالا ۋاكىل، قايراتكەرلەرىمەن، شياڭگاڭ ءتارتىپ قوسىندارىنىڭ ۋاكىلدەرىمەن، ورتالىقتىڭ شياڭگاڭدا تۇراتىن قۇرىلىمدارىنىڭ جانە جۇڭگو قارجىلاندىرعان نەگىزگى قۇرىلىمداردىڭ جاۋاپتىلارىمەن كەزدەستى.
ديڭ شۋەشياڭ، شۇي چيلياڭ، شىن يۋەيۋ، ۋاڭ ي، شيا باۋلۇڭ قاتارلىلار قاتىستى كەزدەسۋگە قاتىناستى.
مەملەكەتتىك ساياسي كەڭەستىڭ ورىنباسار ءتوراعاسى لياڭ جىنيىڭ، شياڭگاڭ ەرەكشە اكىمشىلىك رايونىنىڭ اكىمى لينجىڭ يۋە - ى، ەندى مىندەتكە وتىراتىن اكىم لي جياچاۋ دا قاتىستى كەزدەسۋگە قاتىناستى.
