انار بۇلت \ شينجياڭ گازەتىنىڭ ءتىلشىسى جاڭ شياۋمي 7 - ايدىڭ 9 - كۇنى ۇرىمجىدەن حابارلايدى. تۇڭچىڭ ساياحات سەرىكتەستىگىنەن ۇعىسۋىمىزشا، 6 - ايدىڭ ورتاسىنان بەرى شينجياڭ ساياحاتىن ينتەرنەتتە ىزدەۋ قىزعىندىلىعى ۇقساس مەزگىلدەگىمەن سالىستىرعاندا ％78 جوعارىلاعان، شينجياڭ كورىنىس ءوڭىرىنىڭ ەسىك بەلەتىنىڭ ساتىلۋ مولشەرى ۇقساس مەزگىلدەگىمەن سالىستىرعاندا ％300 جوعارىلاعان، ۇشاق بەلەتى، ساياحات لەنياسى سياقتى ونىمدەردىڭ ساتىلۋ مولشەرى ۇزدىكسىز ارتقان.
تۇڭچىڭ ساياحات ساندى مالىمەتىندە كورسەتىلۋىنشە، 6 - ايدىڭ ورتاسىنان بەرى شينجياڭعا ۇشاقتارى قاتىناعان 10 ءىرى جەر جەكە - جەكە: حىنان، شانشي، سىچۋان، گانسۋ، چۇڭچيڭ، گۋاڭدۇڭ، جىجياڭ، جياڭسۋ، شاندۇڭ جانە حۋبەي بولىپ، مۇندا گۋاڭجوۋ، شىنجىن، نانجيڭ، سۋجوۋ سياقتى جۋجياڭ اتىراۋى، چاڭجياڭ اتىراۋى وڭىرىندەگى قالالاردان شينجياڭعا كەلەتىن ۇشاق بەلەتىنە الدىن الا تاپسىرىس بەرۋ مولشەرى كورنەكتى جوعارىلاعان. بۇكىل ءۇي ىشىمەن بالا - شاعاسىن ەرتىپ ساياحاتتاۋ، مەكتەپ ءبىتىرىپ ساياحاتقا شىققان وقۋشىلار سياقتى ساياحاتشى شوعىرى وسى مەزگىلدەگى ساياحات بازارىنىڭ تىرەگىنە اينالدى. 6 - ايدان بەرى ”بالا - شاعاسىن ەرتىپ ساياحاتتاۋعا“ قاتىستى ينتەرنەتتىك ۇعىسۋدىڭ ارتۋ مولشەرى ۇقساس مەزگىلدەگىمەن سالىستىرعاندا ％100 ارتقان، ”مەكتەپ ءبىتىرىپ ساياحاتقا شىعۋ“ ％300كە جۋىق جوعارىلاعان.
كول، جايلاۋ سياقتى تابيعي كورىنىس ءوڭىرى ءالى دە ساياحاتشىلاردىڭ قارسى الۋىنا يە بولۋدا. ساندى مالىمەتتە كورسەتىلۋىنشە، بيىل جازعى دەمالىس كەزىندە شينجياڭنىڭ ەڭ ءوتىمدى كورىنىس ءوڭىرىنىڭ الدىڭعى 5ى: سايرام كولى كورىنىس ءوڭىرى، تيانشان بوعدا كولى كورىنىس ءوڭىرى، قاناس كورىنىس ءوڭىرى، نارات كورىنىس ءوڭىرى جانە يالقۇنتاع كورىنىس ءوڭىرى. مۇنان تىس، مۇراجاي، ويىن - ساۋىق، بەيزاتتىق مادەنيەت مۇرالارىن سەزىنۋ سياقتى مادەنيەت تۇرىندەگى كورىنىس وڭىرلەرى مەن قيمىلدارعا نازار سالۋ دەڭگەيى دە ۇزدىكسىز جوعارىلاعان.
7 - ايدىڭ 6 - كۇنى سايرام كولى كورىنىس ءوڭىرىنىڭ ساياحاتشى سانى 22 مىڭ ادامنان اسىپ، بيىلعى ەڭ جوعارعى دەڭگەيگە جەتتى. وسى كورىنىس ءوڭىرىنىڭ 6 - ايداعى ساياحاتشى سانى كۇنىنە ورتا ەسەپپەن 13 مىڭ ادامنان جوعارى بولدى، 7 - ايدا ساياحاتشى سانى كۇنىنە ورتا ەسەپپەن 16 مىڭ ادامنان اسىپ، مۇنىڭ ىشىندە ％65ى شينجياڭنىڭ سىرتىنان كەلگەن ساياحاتشى ەكەن. ءىرى ساندى مالىمەتتىڭ تالداۋ جاساۋىنشا، مەجەمەن 7 - ايدىڭ 10 - كۇنى كورىنىس وڭىرلەرى ساياحاتشىلاردىڭ قاۋىرت مەزگىلىن قارسى الادى ەكەن. سايرام كولى كورىنىس ءوڭىرىن باسقارۋ كوميتەتىنىڭ ورىنباسار مەڭگەرۋشىسى جياڭ حۋا بىلاي دەدى: ”بىلتىردان بەرى كورىنىس ءوڭىرى 8 اۆتوكولىك توقتاتۋ الاڭىن سالىپ، 4000عا جۋىق اۆتوكولىك توقتاتۋ ورنىن قوستى؛ بيىل اشەكەيلى قايىق، جاياۋ ساياحاتتاۋ، پاراشوتپەن ۇشۋ سياقتى سۋ، قۇرلىق، كەڭىستىك قيمىلدارىن جولعا قويدى، 7 - ايدا تاعى تۇزدە تۇنەۋ، تۇڭعىش كەزەكتى تومەن كەڭىستىكتە ۇشۋ فەستيۆالى، كولدى اينالعان ۆەلوسيپەد جارىسى، كولدى اينالعان مارافون جارىسى سياقتى قيمىلداردى ارت - ارتىنان وتكىزىپ، ساياحات كۇيىن مولايتىپ، ساياحاتشىلاردىڭ سەزىنۋ دەڭگەيىن جوعارىلاتامىز“.
تۇڭچىڭ زەرتتەۋ ورنىنىڭ جوعارى دارەجەلى زەرتتەۋشىسى جاڭ ميڭياڭ بىلاي دەدى: ”بيىل شينجياڭ ساياحات ونىمدەرىنىڭ ءار الۋاندىلىعى، ونىمدەردىڭ ساپاسى تۇگەلدەي جوعارىلادى، كوپتەگەن ساياحاتشىلار اپتا سوڭىنداعى دەمالىستارىن رەتتەپ، شينجياڭعا كەلىپ سالقىنعا تارتىپ دەمالۋدى تاڭدادى“.
