شينحۋا اگەنتتىگىنىڭ 7 - ايدىڭ 12 - كۇنى بەيجيڭنەن بەرگەن حابارى. 7 - ايدىڭ 12 - كۇنى مەملەكەت ءتوراعاسى شي جينپيڭ دۇنيە جۇزىلىك ينتەرنەت جينالىسى حالىقارالىق ۇيىمىنىڭ قۇرىلعاندىعىنا قۇتتىقتاۋ حات جولدادى.
شي جينپيڭ بىلاي دەپ اتاپ كورسەتتى: دۇنيە جۇزىلىك ينتەرنەت جينالىسى حالىقارالىق ۇيىمىنىڭ قۇرىلۋى − ينفورماتسيالانعان ءداۋىر دامۋىنىڭ اعىمىنا ۇيلەسىپ، ينتەرنەت كەڭىستىگى حالىقارالىق اۋىس - كۇيىس سەلبەستىگىن تەرەڭدەتۋدىڭ ماڭىزدى شاراسى. دۇنيە جۇزىلىك ينتەرنەت جينالىسىن جوعارى باستامادا جوبالاۋعا، جوعارى ولشەممەن قۇرۋعا، جوعارى دەڭگەيدە ىلگەرىلەتۋگە تاباندى بولىپ، تىلدەسۋ، اۋىس - كۇيىس جاساۋ ارقىلى بىرگە اقىلداسۋدى جەبەپ، ناقتى ىستەر سەلبەستىگى ارقىلى بىرگە يگىلىكتەنۋدى ىلگەرىلەتىپ، الەمنىڭ ينتەرنەت دامۋىن باسقارۋعا اقىل - پاراساتىن، كۇش - قۋاتىن ارناۋىن ءۇمىت ەتەمىن.
شي جينپيڭ بىلاي دەپ باسا دارىپتەدى: تور كەڭىستىگى ادامزاتتىڭ تاعدىرىنا سايادى، تور كەڭىستىگى بولاشاعىن دۇنيە جۇزىندەگى ءارقايسى ەلدەر بىرگە اشۋى ءتيىس. جۇڭگو حالىقارالىق قوعاممەن بىرگە، وسىنى ماڭىزدى وراي ەتىپ، اناعۇرلىم ءادىل، ۇيلەسىمدى، اشىق، سيىسىمدى، حاۋىپسىز دە ورنىقتى، ومىرشەڭدىك كۇشكە باي ينتەرنەت كەڭىستىگىن قۇرۋدى ىلگەرىلەتىپ، ينتەرنەتتىڭ دۇنيە جۇزىندەگى ءار ەل حالقىنا اناعۇرلىم ويداعىداي باقىت جاراتۋىن قالايدى.
دۇنيە جۇزىلىك ينتەرنەت جينالىسىنىڭ قۇرۋ جينالىسى سول كۇنى بەيجيڭدە وتكىزىلدى، مۇشەلەرى الەمدىك ينتەرنەت سالاسىنداعى قاتىستى حالىقارالىق ۇيىمداردى، كاسىپورىن قۇرىلىمدارىن جانە مامان، وقىمىستىلاردى قامتىدى.
