انار بۇلت \ شينجياڭ گازەتىنىڭ ءتىلشىسى جاڭ شياۋمي 7 - ايدىڭ 25 - كۇنى كۇنميڭنەن حابارلايدى. 7 - ايدىڭ 24 - كۇنى 3 كۇنگە جالعاسقان 2022 - جىلعى جۇڭگو حالىقارالىق ساياحات جارمەڭكەسى يۇنناننىڭ كۇنميڭ قالاسىندا جابىلدى. شينجياڭ كورمە ۇيىرمەسى 8 ميلليارد 849 ميلليون يۋاننىڭ كەلىسىمىنە قول قويدى، كەلىسىم زەردەلى ساياحات، ساپالى مادەنيەت - ساياحاتى نەگىزدىك نىساندارى، مادەنيەت - ساياحات بازاسى قۇرىلىس نىساندارى بويىنشا قارجى قۇراۋ سەلبەستىگى سياقتى كوپتەگەن سالالارعا سايدى.
وسى رەتكى ساياحات جارمەڭكەسىنە شينجياڭداعى 14 ايماق، وبلىس، قالا، 35 مادەنيەت - ساياحات كاسىپورنى 9 ۇلكەن سالاعا سايكەس وزىندىك ەرەكشەلىككە يە 200 تۇرگە جۋىق مادەنيەت - ساياحات تاۋارىن جانە نەشە ون ساياحات سارا جەلىسى بويىنشا ۇيىرمە ۇيىمداستىرىپ كورمەگە قاتىناسىپ، شينجياڭنىڭ مادەنيەت - ساياحاتىنىڭ شىت جاڭا بەت - بەينەسىن ءتۇرلى فورمالارمەن ايگىلەدى. جارمەڭكە كەزىندە ”تىڭ تالپىنىس باستالۋ الدىندا“ اتتى شينجياڭدى ارناۋلى تانىستىرۋ ءماجىلىسى وتكىزىلىپ، ”مەملەكەت تاس جولى 219 شينجياڭ − شيزاڭ جەلىسى“، ”مايتاۋ − كۇشار تاس جولى“ سياقتى ءوز كولىگىمەن ساياحاتتاۋ جەلىسى، سارا جەلى جانە كۇز، قىس ماۋسىمىنداعى ساياحات بايلىعى ونىمدەرى مەن جەلىلەرى ءتۇيىندى تۇردە جاريالانىپ، ءبىرشاما جاقسى تانىستىرۋ ونىمدىلىگىنە قول جەتكىزدى. شينجياڭ ساياحات قوعامى تۇڭچىڭ ساياحاتى سياقتى ەل ىشىندەگى 10 نەشە مادەنيەت - ساياحات قۇرىلىمىمەن جانە كاسىپورنىمەن ستراتەگيالىق سەلبەستىك كەلىسىمىنە قول قويىپ، ”ساياحاتشىلاردى شينجياڭعا كەلۋگە باۋراۋ“ ستراتەگيالىق سەلبەستىك سەرىكتەستىك وداعىن بىرگە قۇردى.
مۇنان سىرت، سارا ساياحات جەلىلەرىن ارناۋلى تانىستىرۋ، ”ينتەرنەتتە تانىمالى مەكەمە باستىقتارى“ ۇيىرمە ۇيىمداستىرىپ ينتەرنەت جەلىسىندە تىكە تاراتۋ، ءان - ءبي كونسەرتى سياقتى كوپ ءتۇرلى تانىستىرۋ فورمالارى ارقىلى شينجياڭ كورمە ۇيىرمەسى شينجياڭنىڭ مول مادەنيەت - ساياحات بايلىعىن ۇگىتتەپ، ەل ىشىندەگى مادەنيەت - ساياحات كاسىپورىندارىمەن سەلبەستىكتى، اۋىس - كۇيىستى كۇشەيتىپ، بازار ءورىسىن اناعۇرلىم كەڭەيتتى.
