سىرتقى ىستەر مينيسترلىگى امەريكانىڭ جۇڭگودا تۇراتىن باس ەلشىسىن شاقىرىپ الىپ كەزدەستى
پەلوسيدىڭ تايۋانعا تىمىسكىلەپ بارعاندىعى جونىندە قاتاڭ سويلەستى جانە كۇشتى قارسىلىق بىلدىرەتىندىگىن ورتاعا قويدى
شينحۋا اگەنتتىگىنىڭ 8 - ايدىڭ 2 - كۇنى بەيجيڭنەن بەرگەن حابارى. 8 - ايدىڭ 2 - كۇنى ءتۇن ورتاسىندا، جۇڭگونىڭ سىرتقى ىستەر مينيسترلىگىنىڭ ورىنباسار مينيسترى شيە فىڭ بۇيرىققا ساي، امەريكانىڭ جۇڭگودا تۇراتىن باس ەلشىسى بونسىندى شۇعىل شاقىرىپ الىپ كەزدەسىپ، امەريكا پارلامەنتى قاۋىم پالاتاسىنىڭ باستىعى پەلوسيدىڭ جۇڭگونىڭ تايۋان وڭىرىنە تىمىسكىلەپ بارعاندىعى جونىندە جۇڭگو ۇكىمەتى اتىنان امەريكا جاقپەن قاتاڭ سويلەستى جانە كۇشتى قارسىلىق بىلدىرەتىندىگىن ورتاعا قويدى.
شيە فىڭ مىنالاردى ءبىلدىردى: پەلوسي دۇنيە ءجۇزى حالقىنىڭ نالەتىنە قالۋمەن ساناسپاي، قاساقانا ارانداتۋشىلىق ىستەپ، وتپەن ويناپ، ءبىر جۇڭگو پرينسيبىنە جانە جۇڭگو مەن امەريكانىڭ 3 بىرلەسكەن مازمۇنداماسىنىڭ بەلگىلەمەسىنە اۋىر دارەجەدە قايشىلىق جاساپ، جۇڭگو − امەريكا قارىم - قاتىناسىنىڭ ساياسي نەگىزىنە اۋىر دارەجەدە سوقتىعىپ، جۇڭگونىڭ يەلىك ۇقىعى مەن تەرريتوريا تۇتاستىعىنا اۋىر دارەجەدە سۇعاناقتىق جاساپ، تايۋان بۇعازىنىڭ بەيبىتشىلىگىن، ورنىقتىلىعىن اۋىر دارەجەدە ءبۇلدىرىپ، ”تايۋاندى دەربەستەندىرۋدى“ كوزدەيتىن بولشەكتەۋشى كۇشتەرگە اۋىر دارەجەدە قاتە سيگنال تاراتتى. سيپاتى ەرەكشە جيىركەنىشتى، زاردابى ەرەكشە اۋىر. جۇڭگو جاق مۇنى استە ىرقىنا جىبەرمەيدى.
امەريكا ۇكىمەتى، ءسوز جوق، جاۋاپكەرشىلىكتى ارقالاۋ كەرەك. ءبىر مەزگىل ۋاقىتتان بەرى امەريكا جاقتىڭ ءسوزى ءبىر باسقا، ارەكەتى ءبىر باسقا بولىپ، ءبىر جۇڭگو پرينسيبىن ۇزدىكسىز بۇرمالاپ، وزگەرتىپ، فورماعا اينالدىرىپ، ۇڭعىلاپ، قىزىل سىزىقتان اتتاۋعا، بۇلدىرۋگە ۇرىنىپ، ”تايۋان كوزىرىن“ ءتاسىل تالعاماي كوتەردى، سونداي - اق بارعان سايىن اسقىنىپ، امەريكا مەملەكەتتىك كەڭەس سايتىنان ”تايۋان جۇڭگونىڭ ءبىر بولىگى“ سياقتى شەشۋشى ايتىلىمداردى ءوشىرىپ، تايۋاندى ايتىلمىس ”يىندى مۇحيت - تىنىق مۇحيت ستراتەگياسىنا“ ەنگىزىپ، امەريكامەن تايۋان قارىم - قاتىناسىنىڭ دارەجەسىن اشىقتان - اشىق كوتەرىپ، تايۋانعا اسكەري قارۋ - جاراق ساتۋدى ورشەلەنە ىلگەرىلەتىپ، تايۋاننىڭ ”سيممەتريالى ەمەس جاۋىنگەرلىك قۋاتتى“ جوعارىلاتۋىنا كومەكتەسۋ جونىندە كوپە - كورنەۋ داۋرىعىپ، ”تايۋاندى دەربەستەندىرۋدى“ كوزدەيتىن بولشەكتەۋشىلىك ارەكەتكە سۇيەنىش بولىپ ەلىرتتى. امەريكا ۇكىمەتى پەلوسيدىڭ ويىنا كەلگەنىن ىستەۋىنە شەكتەۋ قويىپ، پەلوسيدىڭ تەرىس ازۋلىعىن تەجەۋگە ءتيىستى ەدى، الايدا ىرقىنا جىبەرىپ، ءتىل بىرىكتىرىپ، تايۋان بۇعازىنىڭ شيەلەنىستى جاعدايىن ءورشىتىپ، جۇڭگو − امەريكا قارىم - قاتىناسىن اۋىر دارەجەدە زياندادى.
شيە فىڭ بىلاي دەپ اتاپ كورسەتتى: امەريكا جاق، ءسوز جوق، ءوزىنىڭ قاتەلىگى ءۇشىن بوداۋ بەرۋى كەرەك. جۇڭگو جاق الداعى جەردە قاجەتتى شارا قولدانىپ، باتىل قارسى تۇرادى، ءبىز ايتقانىمىزدى ىستەيمىز. ءارقانداي ادام تايۋان ماسەلەسىن جەلەۋ ەتىپ، ساياسي كاپيتال جيناۋعا ۇرىناتىن بولسا، تەك ”ءبارى سەلگە كەتەدى“، ”تايۋان كوزىرىن“ كوتەرىپ، ساياسي ميراس ويدىرىپ شىعارۋ قيالىندا بولسا، تۇبىندە تاريحتىڭ ماسقارالىق دىڭگەگىنە شەگەلەنەدى. امەريكا جاق قاتەلىگىن دەرەۋ تۇزەتىپ، ناقتى شارا قولدانىپ، پەلوسيدىڭ تايۋانعا تىمىسكىلەپ بارۋىنىڭ جيىركەنىشتى ىقپالىن جويۋى كەرەك. قاتەلەسكەن ۇستىنە قاتەلەسىپ، جاعدايدى ۋشىقتىرىپ، تايۋان بۇعازى اۋقىمى مەن جۇڭگو − امەريكا قارىم - قاتىناسىن تۇزەلمەستەي جەرگە باستاۋعا بولمايدى.
جۇڭگو جاق امەريكا جاقتى اتىنىڭ باسىن تارتىپ، تايۋان ماسەلەسىندە قاساقانا سويقان شىعارۋدى دوعارۋعا، ”تايۋاندى دەربەستەندىرۋدى“ كوزدەيتىن بولشەكتەۋشى كۇشتەردى ىرقىنا جىبەرۋدى، قولداۋدى دوعارۋعا، ءارقانداي فورماداعى ”تايۋان كوزىرىن“ كوتەرۋدى، ”تايۋان ارقىلى جۇڭگونى شاۋجايلاۋعا ۇرىنۋدى“ دوعارۋعا، تايۋان ىستەرىنە قول سۇعۋىن، جۇڭگونىڭ ىشكى ىسىنە كيلىگۋىن دوعارۋعا، ءىس جۇزىندىك ارەكەتى ارقىلى ءبىر جۇڭگو پرينسيبىنە جانە جۇڭگو مەن امەريكانىڭ 3 بىرلەسكەن مازمۇنداماسىنىڭ بەلگىلەمەسىنە بويسۇنىپ، امەريكا باسشىلارى بەرگەن ”ءتورتتى قاراستىرماۋ، بىرگە نيەت ەتپەۋ“ ۋادەسىن تياناقتاندىرىپ، قاتە ءارى قاتەرلى جولمەن ءجۇرىپ ونان ارى اداسا بەرمەۋگە تاعى دا قۋزايدى.
شيە فىڭ بىلاي دەپ باسا دارىپتەدى: ۇلكەن اۋقىمدى كەرى قايتارۋعا كەلمەيدى، حالىق قالاۋىنا قايشى كەلۋگە بولمايدى، وتپەن ويناعاندار ءوزى كۇيىپ ولەدى. تايۋان جۇڭگونىڭ تايۋانى، تۇبىندە وتان قۇشاعىنا ورالادى. جۇڭگو حالقى جىن - شايتاننان قورىقپايدى، قىسىمنان جاسقانبايدى، ساندىراققا سەنبەيدى. جۇڭگو حالقىنىڭ كوڭىلىندە مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋدان قاسيەتتى نارسە جوق، مەملەكەتتىڭ تۇتاستىعىن قورعاۋدان جانە ونى جۇزەگە اسىرۋدان ماڭىزدى ءىس جوق. ءارقانداي مەملەكەت، ءارقانداي كۇش، ءارقانداي ادام جۇڭگو ۇكىمەتى مەن حالقىنىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعايتىن، مەملەكەتتىڭ تۇتاستىعى مەن ۇلتتىڭ گۇلدەنۋىن جۇزەگە اسىراتىن مىزعىماس بەكىمىن، بەرىك ەرىك - جىگەرىن جانە قۋاتتى قابىلەتىن تومەن مەجەلەمەسىن.
